MATIU 28

Pembangu i Yesu pai pepatongawaa ri waʼa mbeʼa

28:1-10

(Mrk. 16:1-8, Luk. 24:1-12, Yoh. 20:1-10)

1Butu liumo eo Umapo, mowuro-wuro mpodago ri eo minggu i Maria Madalena pai i Maria anu ntaninya njoʼu mampeole dayo setu. 2Tingkarasaka molindugi maʼai. Sambaʼa malaʼeka mPue Ala menaʼu ungka ri suruga, naduli watu anu ndadampoka dayo setu nepa motunda ri wawonya. 3Lio malaʼeka setu ewa kila, pai puju ngkoronya maʼai kabuyanya. 4Waʼa ncurodado anu mojaga njairia merata eka ndayanya, kandende-ndende memisa lionya ewa lio ntau mate.

5Mompau malaʼeka setu ri waʼa mbeʼa setu, natoʼo, “Neʼe maeka! Kuincani komi mampepali i Yesu anu roomo ndapaku setu. 6Sira bemoreʼe ireʼi. Sira membangumo ewa anu roo ndatoʼoka komi owi. Maʼi ndipeole waka mpauli Sira. 7Seʼi-seʼi ndipalaimo maliga-liga, ndipetumbuka waʼa anaguru-A, ‘Sira membangumo, pai Sira njoʼumo mesindiu ri Galilea. Njairia da ndipangkita Sira!’ Endomo anu roo kutoʼoka komi.”

8Maliga-liga palai waʼa mbeʼa setu mampalaika dayo, ri raya ntau seʼe eka nagalo wongkondaya, molonco-lonco tau seʼe da mampetumbuka waʼa anaguru i Yesu kono anu mewali setu.

9Tingkarasaka i Yesu mampomberataka waʼa mbeʼa setu ndatoʼo, “Madago-dago!” Metimosuki tau seʼe ri Sira, nasokowaka witi-A pai manyomba ri Sira. 10Ndatoʼo i Yesu, “Neʼe maeka. Ndiakomo ndipetumbuka waʼa anaguruku da naka njoʼu ntau seʼe ri Galilea; njairia da napangkita ntau seʼe Yaku.”

Pompetumbu ncurodado anu mojaga

28:11-15

11Sindara mpalai waʼa mbeʼa setu, bara tesangkuja surodado anu mojaga ri dayo setu mewalili ri kota, pai napetumbuka waʼa ntadulako ntadu mpanyomba pura-pura anu mewalimo. 12Mogombo waʼa ntadulako ntadu mpanyomba pai waʼa nto pombawanaka nto Yahudi, kabotu gombo ewaseʼi, waʼa ncurodado anu mojaga setu da ndawaika doi dampo nguju, 13nepa ndatoʼoka, “Ewanceʼi da ndipampauka tau, watangkoro i Yesu setu napelima waʼa anagurunya mposambengi ri sindara kami tekayore. 14Pai ane nadonge i petoro anu mewali setu, nepa kami da mangkanarasi Sira, naka neʼe napokarau komi.”

15Natima waʼa ncurodado setu doi, pai mawianaka ewa anu roo ndatotorakaka tau seʼe. Inceʼemo puʼunya painaka laolita setu tebambari ri waʼa nto Yahudi nakarataka eo-eo seʼi.

I Yesu mepatongawa ri waʼa anagurua

28:16-20

16 # Mat. 26:32, Mrk. 14:28 Malaimo anaguru i Yesu anu sampuyu pai sambaʼa, njoʼu ri buyu ri tana Galilea silulu pai anu roo ndatoʼo i Yesu ri tau seʼe. 17Butu nakita ntau seʼe i Yesu njairia liu-liu metutu tau seʼe manyomba ri Sira. Paikanya reʼe ri oyo ntau seʼe anu bata-bata rayanya. 18Ndatimosuki i Yesu tau seʼe nepa ndatoʼoka, “Pura-pura kuasa anu ri suruga pai anu ri lino roomo ndawaika Yaku. 19#Pwn. 1:8 Inceʼe painaka ndipalaimo ri pura-pura lemba ri sambawo lino, tau seʼe da ndipapewalimo waʼa anaguru-Ku. Tau seʼe da ndiriu ri toʼo mPapa, pai i Ana pai Inosa Magali. 20Ndipatadaka tau seʼe da napaincani malulu pura-pura anu roo Kusongkaka komi. Pai da ndipaincani Yaku da sangkani-ngkani pai komi rantani rata ri kapusa lino.”

Currently Selected:

MATIU 28: LAIPMF

Highlight

Copy