MATIU 26

Pogombo da mampepate i Yesu

26:1-5

(Mrk. 14:1-2, Luk. 22:1-2, Yoh. 11:45-53)

1Roo ndatotoraka i Yesu pura-pura setu, mompau Sira ri waʼa anagurua ndatoʼo, 2#Pa. 12:1-27 “Da ndipaincani, jamo radua eo, da jelamo ri eo mposusa Pasa. I Ana Manusia da napepombaika ntau da ndapaku ri kaju ndapanggo!”

3Ri tempo setu mompasambakamo waʼa ntadulako ntadu mpanyomba pai waʼa ntadulako nto Yahudi ri banua i ngKayapa Tadu mPanyomba bangke. 4Mogombo tau seʼe da mancoko ngkaroo i Yesu, nepa da napepate Sira. 5Paikanya, natoʼo ntau seʼe, “Da ndapawianaka neʼe ri eo mposusa, boi da guaga waʼa ntau sondo.”

I Yesu ndabubuka lana wongi ri Betania

26:6-13

(Mrk. 14:3-9, Yoh. 12:1-8)

6Sindara i Yesu ri lipu Betania ri banua i Ncimo anu ketangga owi, 7#Luk. 7:37-38 elamo sambaʼa weʼa madadu Sira. Weʼa setu mangkeni butolo watu anu buke-buke lana wongi anu masuli kojo olinya. Ntongo mpangkoni i Yesu, njoʼumo weʼa setu nabubu lana wongi setu ri tanoana i Yesu. 8Majaʼa raya waʼa anagurua mangkita anu mewali setu. Natoʼo ntau seʼe, “Nunjaa yowenya lana wongi setu ndabolontanaka? 9Moruana lana wongi setu ndapobalu, masuli kojo olinya doinya ndatila-tilaka waʼa ntau kaasi-asi!”

10Ndaincani i Yesu nawa-nawa ntau seʼe, pai ndapantoʼo, “Ara wenu painaka ndisalempori weʼa seʼi? Siʼa mampowia anu madago pai ndaunde galaku. 11#Paw. 15:11 Tau kaasi-asi bareʼe tepalai ri oyomi paikanya Yaku bareʼe da maroo-roo sangkani-ngkani pai komi rantani masae-sae. 12Ri pangariukanya Yaku lana wongi seʼi, kamonconya siʼa mampatokamo da ndapangadayo Yaku. 13Ndipoaya moncomo! Ri mbeʼi-mbeʼi ntano ndapampobambarika Nuntu ngKatuwu ri sambawo lino seʼi, powia mbeʼa seʼi da kono ndapau woʼu da mewali tanda pangaendo siʼa.”

I Yudasi mampobalu i Yesu

26:14-16

(Mrk. 14:10-11, Luk. 22:3-6)

14Sambaʼa ri oyo anaguru i Yesu anu sampuyu pai radua setu, anu mampotoʼo i Yudasi to Karioti, njoʼu mampomberataka waʼa ntadulako ntadu mpanyomba. 15#Sak. 11:12 Natoʼoka tau seʼe, “Nunjaa anu da ndiwaika yaku ane kupepombaika ri komi i Yesu?” Ganggara napaimba ntau seʼe doi salaka tatogo mpuyu, natonjuka i Yudasi. 16Montepuʼu ungka njairia napepalimo i Yudasi tempo anu madago da napampepombaika i Yesu.

I Yesu mangkoni pangkoni Pasa pai waʼa anaguru-A

26:17-25

(Mrk. 14:12-21, Luk. 22:7-14,21-23, Yoh. 13:21-30)

17Ri eo mpontepuʼu mposusa ri eo pangkoni roti anu bareʼe ndaragi, mompeoasimo waʼa anaguru-A ri Yesu, “Ri mbeʼi pampokonomi da kapampatokaka Komi pangkoni Pasa?”

18Mesono i Yesu ndatoʼo, “Ndikanjoʼumo mampomberataka tau sambaʼa ri kota pai nditoʼoka siʼa, ‘Pantoʼo i Guru, jelamo temponya Yaku da mawianaka pangkoni Pasa pai waʼa anaguru-Ku ri banuamu.’ ” 19Nawianaka waʼa anaguru-A ewa anu ndapepokauka i Yesu ri tau seʼe. Njoʼumo tau seʼe mampatoka pangkoni Pasa setu.

20Butu mawengimo, motundamo i Yesu pai anaguru-A sampuyu pai radua mangkoni. 21Ntongo mpangkoni tau seʼe ndatoʼo i Yesu, “Ndipedongeka: reʼe sambaʼa tau ri oyomi anu da mampobalu Yaku.”

22Madonge anu ndatoʼo i Yesu maʼai kojo kapari ndaya ntau seʼe. Natepuʼumo ntau seʼe nteasambaʼa mompeoasi ri Yesu natoʼo, “Manoto banya Yaku anu nditinakondaya?”

23 # Pol. 41:10 Mesono i Yesu, “Tau anu maome roti sangkani-ngkani pai Yaku ri tabo mpanginu seʼi siʼamo anu da mampobalu Yaku. 24Lawinya i Ana Manusia da mate ewa anu teʼuki ri raya Ncura Magali. Paikanya marugimo tau anu mampobalu i Ana Manusia! Moruana tau setu bareʼe liu-liu ndapoana!”

25Roo setu natoʼo i Yudasi anu toponggoli-nggoli setu, “Manoto banya yaku anu nditinako ndaya?”

Mesono i Yesu ndatoʼo, “Ewa nceʼemo pantoʼomu!”

Pangkoni Magali

26:26-30

(Mrk. 14:22-26, Luk. 22:15-20, 1 Kor. 11:23-25)

26Ri pangkoni ntau seʼe, ndatima i Yesu roti, nepa ndapekakaika. Roo setu ndaripu-ripusi roti setu nepa ndawaika waʼa anaguru-A, ndatoʼo, “Nditima, pai ndikonimo, inceʼimo koro-Ku.”

27Roo setu ndatima woʼu tabo mpanginu anggoro, ndapekakaika ri Pue Ala. Nepa ndatonjuka waʼa anaguru-A, ndatoʼo, “Ndipanginumo komi pura-pura. 28#Pa. 24:8, Yer. 31:31-34 Maka inceʼimo daa-Ku anu mampakaiti pojanji mPue Ala, daa anu tebubu tila ntau maria, tila ngkabareʼenyamo ndakitanaka salaanya. 29Ndipoaya moncomo, bareʼemo da Kuinu woʼu anggoro seʼi rantani rata ri tempo mpainu-Ku anggoro dawoʼu sangkani-ngkani pai komi ri Lino Dawoʼu mPapa-Ku.”

30Ungka lairia napongayuka ntau seʼe ngayu mpeunde. Roo setu malaimo tau seʼe njoʼu ri Buyu ngKaju Lana.

Pampakanoto i Peturu da mampesapuka i Yesu

26:31-35

(Mrk. 14:27-31, Luk. 22:31-34, Yoh. 13:36-38)

31 # Sak. 13:7 Ungka lairia ndatoʼo i Yesu ri waʼa anaguru-A, “Ri wengi seʼi seʼe komi pura-pura da molonco mampalaika Yaku, maka lau ndaʼuki ri Sura Magali, ‘I Pue Ala da mampepate topongkambi, pai bimbanya da tewuraga.’ 32#Mat. 28:16 Paikanya ane ndapapembangu muni Yaku, Yaku da mampesindiuka komi njoʼu ri Galilea.”

33Natoʼo i mPeturu ri Yesu, “Mau waʼa ntau seʼe pura-pura mampalaika komi, jayaku manoto bareʼe!”

34Ndatoʼo i Yesu ri siʼa, “Neʼe nukalingani, sambengi seʼi seʼe ri kabareʼepanya mototoroʼo manu, tatogo ngkanimo nupesapuka Yaku.”

35Mesono i Peturu, “Mau yaku da mate sangkani-ngkani pai Komi, pai bareʼe kojo da kupesapuka Komi!”

Ewanceʼe seʼe pompau anaguru anu ntaninya.

I Yesu mekakai ri bonde Jatisemane

26:36-46

(Mrk. 14:32-42, Luk. 22:39-46)

36Ungka lairia njoʼumo i Yesu pai waʼa anaguru-A ri bonde Jatisemane. Jela njairia ndatoʼoka tau seʼe, “Ndikaroo-roomo ireʼi sindara Yaku njoʼu mekakai.” 37Nepa ndasale i Peturu pai radua ana i Ncebedeu mampoyunuki Sira. Montepuʼumo ndaepe kapari pai bareʼemo rodo raya-A. 38Ndatoʼoka waʼa anaguru-A, “Maʼai kojo kapari ndaya-Ku, ewa da pura inosa-Ku. Ndikaroo-roomo ireʼi pai ndipongkenaasimo sangkani-ngkani pai Yaku.”

39Roo setu melinja i Yesu lawa sakodi, nepa mombukotu metutu tudu ri tana pai mekakai. Ndatoʼo, “Papa, ane maya, ndipakalawa ungka ri Yaku kapari anu da Kupomberataka seʼi. Paikanya neʼe pepokono-Ku, pepokono-Mi Papa anu da mewali.”

40Roo setu mewalili i Yesu mampeole anaguru-A anu tatogo, ndarata ntongo ngkayore. Ndatoʼoka i Peturu, “Bareʼe ndikoto komi tatogo mongkenaasi pai Yaku mau podo sajaa? 41Ndipenaa-naamo, pai ndipekakaimo da naka neʼe panangi komi ri pompebutuka. Lawinya da rayami da mawianaka anu monco paikanya bareʼe ndikoto, maka koromi malente.”

42Sangkani woʼu i Yesu njoʼu mekakai, ndatoʼo, “Papa, ane kapari seʼi sangaya-ngaya da Kukoyo, pai bareʼemo maya da Kuperenggoka, mbolimo Papa pepokono-Mi anu da mewali.” 43Roo setu mewalili woʼu i Yesu, ndarata anaguru-A ntongo ngkayore, maka maʼai kojo kayuru mata ntau seʼe.

44Sangkani woʼu ndapalaika i Yesu tau seʼe pai katatogo ngkaninyamo mekakai ndatoʼo pau anu siwia-wia pai pau-A ngena. 45Roo setu mewalili woʼu Sira ri waʼa anaguru-A ndatoʼoka tau seʼe, “Bara ntongo da yorepa komi pai ntongo da meosa? Peole, jelamo temponya i Ana Manusia da ndapepombaika ri pale ntau majaʼa. 46Ndipembangumo, maʼi tapalai. Peole! Tau anu mampobalu Yaku jelamo!”

I Yesu ndasoko

26:47-56

(Mrk. 14:43-50, Luk. 22:47-53, Yoh. 18:3-12)

47Ntongo mompaupa i Yesu, setumo i Yudasi, siʼa sambaʼa ri anaguru-A anu sampuyu pai radua. Sondo tau anu napoyunu mangkeni penai pai tarasulu. Tau seʼe napokau waʼa ntadulako ntadu mpanyomba pai waʼa ntopombawanaka nto Yahudi. 48I Toponggoli-nggoli setu roo mantotoraka tau seʼe ewaseʼi natoʼo, “Tau anu kueki, siʼamo taunya. Ndisokomo siʼa!”

49Karata ntau seʼe njairia, liu-liu njoʼu i Yudasi madadu i Yesu, natoʼo, “Tabea Guru!” Nepa naeki i Yesu. 50Mesono i Yesu ndatoʼo, “Nunjaa anu nukamaʼika ireʼi bale?”

Ungka lairia metimosukimo tau sondo nasokomo i Yesu. 51Sambaʼa ri anaguru i Yesu anu njau njairia nawutu penainya nasayuka anamayunu i ntadu mpanyomba bangke, nasewo rantani mapupu talinganya. 52Ndatoʼo i Yesu ri anaguru-A setu, “Wunca muni penaimu ri gumanya, maka pura-pura tau anu mampesayuka penainya da mate ri mata mpenai. 53Ara nusarumaka bareʼe da Kukoto mamperapi ri Papa-Ku, ri tempo anu sampompida mataja da ndapokau yabi sampuyu pai radua ntibura malaʼeka? 54Paikanya ane ewanceʼe, ewambeʼimo da pewalinya anu roo ndapakanoto ri raya Ncura Magali, ewa anu mewali seʼi?”

55 # Luk. 19:47, 21:37 Nepa ndatoʼo i Yesu ri waʼa ntau sondo setu, “Ara yaku seʼi tau majaʼa painaka komi rata mangkeni penai pai tarasulu da mancoko Yaku? Saeo-saeo Yaku mompaguru ri Banua i mPue Ala pai bareʼe ndisoko Yaku! 56Paikanya lawinya da ewanceʼemo da naka kobanganimo anu naʼuki waʼa nabi ri Sura Magali.”

Ungka lairia pura-pura anaguru-A moloncomo mampalaika i Yesu.

I Yesu ri suara Majalisi Agama

26:57-68

(Mrk. 14:53-65, Luk. 22:54-55,63-71, Yoh. 18:13-14,19-24)

57Butu roo nasoko ntau seʼe i Yesu, nakenimo njoʼu ri banua i ngKayapa Tadu mPanyomba Bangke. Njaumo njairia waʼa guru agama pai waʼa ntadulako nto Yahudi. 58I Peturu melulu mantondaraka i Yesu lawa-lawa, rantani mesua siʼa ri soma banua i ntadu mpanyomba bangke, motundu siʼa njairia sangkani-ngkani pai waʼa ntopojaga. Da rayanya maincani ewambeʼi da kapusanya pura-pura setu. 59Waʼa ntadulako ntadu mpanyomba pai waʼa Majalisi Agama, mampari-mpari mampepali sabi kambamba-mbamba da napaleʼo ntau seʼe mabotusi huku i Yesu da ndapepate. 60Paikanya bareʼe narata ntau seʼe kasala i Yesu mau sakodi, mau mariamo sabi kambamba-mbamba anu mombesawa-sawani. Kapusanya reʼe radua tau anu mewali sabi mekakore ri suara. 61#Yoh. 2:19 Natoʼo ntau seʼe, “Pantoʼo ntau seʼi, ‘Banua i mPue Ala da kugero nepa da kuwali wangu muni ri raya anu tatogo ndeme.’ ”

62Nepa mekakore i tadu mpanyomba bangke, natoʼoka i Yesu, “Ara bareʼe da Nusono waʼa mpetuluri anu ndatudoka ri Siko setu?” 63Paikanya janjii i Yesu. Sangkani woʼu napeoasi i nTadu mPanyomba Bangke ri Sira, natoʼo. “Ri raya ntoʼo i mPue Ala anu tuwu toʼokamo kami bara monco kojo siko Mokole Tadungkadago Ana i mPue Ala?”

64 # Dan. 7:13 Mesono i Yesu ndatoʼo, “Ewamo pantoʼomu. Paikanya da ndiayamo: montepuʼu ungka ri tempo seʼi da ndikita i Ana Manusia motunda ri tondo mokana i mPue Ala Anu Makuasa, pai da rata meyapi-yapi limu ri yangi!”

65 # Tad. 24:16 Setu painaka masiati i ntadu mpanyomba bangke jubanya, natoʼo, “Siʼa mampetikodi i Pue Ala! Bareʼemo reʼe yowenya sabi. Ndidongemo ngkaliomi waʼa mpau-A anu mampetikodi i Pue Ala.

66Seʼi-seʼi ewambeʼi parata ndayami?”

Mesono tau seʼe, “Sira masala, sangaya-ngaya da ndapepate.”

67 # Yes. 50:6 Nepa natupesi ntau seʼe lio i Yesu, nawombo Sira. Pai reʼe woʼu anu mantoposaka Sira, 68seʼi natoʼo, “Koisa toʼoka kami isema anu mantoposaka Komi ee Mokole Tadungkadago?”

I Peturu mampesapuka i Yesu

26:69-75

(Mrk. 14:66-72, Luk. 22:56-62, Yoh. 18:15-18,25-27)

69Sindara njaupa i Peturu motunda-tunda ri soma, setu sambaʼa anamayunu weʼa mampago i Peturu, natoʼo, “Ara banya siko woʼu sangkani-ngkani pai Yesu to Galilea sindate?”

70Paikanya mesapu i Peturu ri suara ntau seʼe pura-pura, natoʼo, “Bareʼe kuincani anu nutangara ndaya,” roo setu malai siʼa njoʼu maroo-roo ri boboka. 71Setu anamayunu weʼa anu ntaninya mangkita i Peturu, natoʼoka waʼa ntau anu njau njairia, “Tau seʼi ingena moyunu-yunu seʼe pai i Yesu ungkari Nasare setu.”

72Mesapu woʼu i Peturu pai montandokoro natoo, “Monco-monco kojo bareʼe kuincani tau sindate!”

73Bareʼe masae ungka lairia, waʼa ntau anu njau mekakore njairia mampago i Peturu natoʼo, “Manoto siko sambaʼa yunu ntau sindate, inceʼe tongawa ri wongku mpompaumu.”

74Mesapu-sapu mpaliu i Peturu, natoʼo, “Melempo mayonco, bareʼe kuincani tau sindate!”

Sindara setu seʼe mototoroʼomo manu. 75Pai tekaendomo i Peturu ri pau i Yesu anu mantoʼoka siʼa, “Kabareʼepanya mototoroʼo manu, tatogo ngkanimo nupampesapuka yaku.” Malaimo i Peturu motumangi maʼai kapari ndayanya.

Currently Selected:

MATIU 26: LAIPMF

Highlight

Copy