Loma 16

Salicay ni Pawlo to Mitooray

1Pakafana' kako i tamowanan tonini a fafahiyan a salikaka ita ci Foypi, o i Kinkriyaay a kiwkay a hicoci cingra. 2Tona o mitooray kamo to Tapang saka, nanay o no mitooray to Kawas a faloco' ko faloco' namo a mihamham i cingraan. Ano o maan ko kacango'otan ningra i, padangen cingra. Nawhani namipadangay cingra to 'alomanay a tamdaw. Halo ako a mapadang ningra.

3Nga'ayho han a paratoh ci Priskila aci Akuila a mararamod o kapot ako a matayal i ci Kristo Yisan. 4Caay ka limla cangra to 'orip no tireng a midipot takowanan. Caay ka o kako a ccay ko miahowiday i cangraan. Halopolong no kasakiwkay a roma a finacadan a miahowid i cangraan. 5Nga'ayho han a paratoh koya i loma'ay nangra a kiwkay.

Nga'ayho han a paratoh ko kaolahan ako a tamdaw ci Ipanitus. O sa'ayaway no i Aciyaay a tamdaw a mipaso'linay i ci Kristoan cingra. 6Nga'ayho han ci Mariya a paratoh, o namarorayay a matayal to saki tamowanan. 7Nga'ayho han ca Antronikus aci Yuniya a paratoh. O nano kapot ako a marofo a finacadan ako cangra, o cinganganay a tamdaw i kapot no tarokos. I 'ayaway ako cangra a mitoor ci Kristoan.

8Nga'ayho han a paratoh ci Ampliyatus oya i Tapangay a kaolahan ako a tamdaw. 9Nga'ayho han a paratoh ko i ci Kristoananay a kapot niyam a matayal ci Urpanus atoya kaolahan ako a tamdaw ci Stakis. 10Nga'ayho han a paratoh ci Apilis. O mapalifetay a mitooray ci Kristoan cingra. Nga'ayho han a paratoh ko paro no loma' ni Aristopulus. 11Nga'ayho han a paratoh ko finacadan ako ci Hirotion ato mitooray to Tapang a salikaka i loma'ay ni Narkisus.

12Nga'ayho han a paratoh ca Trifaina aci Trifosa o fafahiyan a kapot to matayalay to no Tapang ato kaolahan ako a fafahiyan a widang ci Persis, oya malalokay a matayal to no Tapang. 13Nga'ayho han a paratoh ci Rufus, o tadamaanay a matayalay no Tapang cingra. Nga'ayho han ko ina ningra. O ainaen ako cingra. 14Nga'ayho han a paratoh ca Asinkritus aci Flikon aci Hirmis aci Patropas aci Hirma atoya mikapotay i cangraan a salikaka a ma^min. 15Nga'ayho han a paratoh ca Filolokus aci Yuliya aci Nirius atoya fafahiyan a salikaka ningra aci Olimpas atoya polong no mikapotay i cangraan a mitooray.

16Ka o fangcalay a kacacocop ko sakalalitmoh namo a malalicalicay. Nga'ayho saan i tamowanan ko polong no kiwkay no misaKristoay.

Saikoray a Sapa'icel

17Salikakaaw, palimo'ot kako i tamowanan. Pina'on kamo a minengneng to parawraway ato patahfikoday a tamdaw. O miliyangay cangra to ninanaman namo a sifana'. Piliyas kamo cangraan. 18Nawhani caay ko matayalay to Tapang ita ci Kristoan ko matiniay a tamdaw. Deng o 'anof no tireng ko nido^doan nangra. O ko^sanay ato cisa'fitay a sowal ko sapisafana' nangra to ko^ngelayho ko faloco' a tamdaw. 19Kafana'anto no tamdamdaw a ma^min ko lalok namo a mitoor ci Kristoan. Saka, salipahak sa kako a miharateng tamowanan. O longoc ako i, nanay mafana' kamo to nga'ayay a dmak. Nanay mafokil kamo to tatiihay a dmak. 20O raranikay ko parihadayay a Kawas a miripa' ci Satanan. O papakaynien Ningra i wa'ay namo ko nipiporaric ci Satanan.

Nanay, mapaini no Tapang a Yis ita kamo to mikomi!

21Nga'ayho saan ci Timoti i tamowanan. O kapot ako cingra a matayal. Mahaen ko sowal no finacadan ako a salikaka ci Lukius aci Yason aci Sosipatir.

22O mipatadoay takowanan a mitilid tonini a cudad ci Tirtius. Tona o mitooray cingra to Tapang saka, nga'ayho saan cingra i tamowanan.

23Nga'ayho saan i tamowanan ci Kayus o pilafinan ako a loma'. O kasa'opoan no kiwkay ko loma' ningra. Nga'ayho saan i tamowanan ci Irastus o citodongay a mikowan to payso no niyaro'. Nga'ayho saan i tamowanan ko salikaka ita ci Kuartus.#16.23 O nitongalan no katlangay a cudad i 24 a tosir, Nanay, mapaini no Tapang ita ci Yis Kristo kamo to mikomi a ma^min. Amin.

O Pahrekan a Tolon ato Sapahmek

25Nanay mapa'dil ko Kawas! O nipatnakan ako a Nga'ayay Ratoh to pakayniay ci Yis Kristoan i, o patalahkalay i matini to nano masimeday no Kawas nai ti:yaho i kasarkarkad no mihcaan a pakakmoday a sowal. 26Pakayni i nitilidan no pali'ayaway to sowal no Kawas a cudad ato pipalimo'ot no mida'ocay a Kawas a mapatalahkal konini to sakafana'aw no tamdamdaw no kasakitakit a miti'er a mitoor ci Kristoan. 27Nanay pakayni i ci Yis Kristoan a mida'oc a mapahmek Cingra o tadacitanengay a dengan a Kawas. Amin.#16.27 Onini 16.25-27 a tosir, ira i katlangay a cudad, ira haca i ikor no 14.23 a masadak, ano roma i, deng i ikor no 14.23 a masadak, romasato deng i ikor no 15.33 a masadak.

Currently Selected:

Loma 16: AMIS2019

Highlight

Copy