Loma 15

Aka Pisatked a Lipahak

1Kita o ki^melay ko faloco' a tamdaw i, o mamidama to tadancaay ko faloco' a matoleday a tamdaw. Aka pisatked a palipahak to tireng. 2Kita o kahaccaccay i, o papalipahak to salikaka to sakaci^poc ato sakatanektek no faloco' nangra. 3Nawhani caay pisatked ci Kristo a palipahak to tireng Ningra. Mato sowal a matilid i Fangcalay Cudad, <<Tayni i takowanan ko pilikaf no tao tisowanan,>> saan. 4O matiliday i Fangcalay Cudad a ma^min i, o sapasifana' i titaanan to sakakodait ita ta mapa'icel no Fangcalay Cudad kita to sapasayraaw ita i kacifaloco'an. 5Nanay o pafliay to kodaitay a faloco', o pa'icelay a Kawas ko mipalcaday to harateng namo a papitodong to faloco' ni Yis Kristo, 6ta malaccay ko faloco' namo a pangiha' a pahmek to Wama a Kawas no Tapang ita ci Yis Kristo.

O Sapatnak to i Romaay a Finacadan a Nga'ayay Ratoh

7Orasaka, kasasilitmoh kamo a mihamham a matiya o pihamham ni Kristo i tamowanan to sakahmek no Kawas. 8Pasowal kako i tamowanan, o sapahapinangaw ni Kristo to nika o so'linay a tati'eren ko Kawas ato sakalahciaw no nisowalan no Kawas i tato'asan ita saka, malakoli no Yutaya a tamdaw Cingra. 9Ta halo roma a finacadan a mafana' a pahmek to Kawas to nika sini'ada Ningra. Mato sowal a matilid i Fangcalay Cudad,

<<Orasaka, o a itira kako i roma a finacadan a pahmek i Tisowanan.

O hahmeken ako ko ngangan Iso a romadiw,>> saan.

10O romasato a sowal i Fangcalay Cudad i,

<<Kamo o roma a finacadan,

pikihatiya to finawlan no Kawas a lipahak!>> saan.

11O romasato a sowal i,

<<Kamo o polong no roma a finacadan, pahmeken ko Tapang!

Kamo o kasafinawlan, hmeken Cingra!>> saan.

12O roma a sowal ni Isaya i,

<<O tatalahkal ko tloc ni Yisi.

O tatomireng Cingra a mikowan to roma a finacadan.

Cingra ko pafaloco'an no roma a finacadan,>> saan.

13Nanay o pafaloco'ay a Kawas ko palipahakay, parihadayay i tamowanan to nano piti'er namo ci Kristoan. Ta pakayni i 'icel no Fangcalay 'Adingo a tanektek ko faloco' namo a pasayra i kacifaloco'an.

Caay Paska ci Pawlo a Pasowal

14Salikakaaw ako, ci'icel ko paso'lin ako i tamowanan to nika sahto o nga'ayay ko dmak namo. Tada o mafana'ay kamo to masamaamaanay a dmak. O romasato, mafana' kamo a masasipa'icel. 15Nikawrira, i tini tonini a pipatilid ako i, o mipalalay kako to faloco' namo. Saka, caay paska kako a pasowal i tamowanan. Nawhani tadamaan ko nipipalmed no Kawas i takowanan. 16Saka, malamatayalay ni Kristo Yis kako a patnak to Nga'ayay Ratoh i roma a finacadan. Matiya o citodongay to ta'ong kako a patnak to Nga'ayay Ratoh no Kawas. Ta nga'ay malanikoracan no Fangcalay 'Adingo a sapacakat i Kawas ko roma a finacadan. Ta maolah ko Kawas a milayap cangraan. 17Tona malaccay kako aci Yis Kristo saka, manga'ay kako a malata'ang to pakayniay i tayal ako i Kawas. 18Caayto ka somowal kako to roma a sasowalen, deng o nilahcian ni Kristo pakayni i takowanan a papitoor to roma a finacadan i Kawas ko sasowalen ako. O sakapilahci ni Kristo tonini i, 19o sowal ato dmak, o nano 'icel no kafahka'an a dmak ato nano 'icel no 'Adingo no Kawas. Tona mahaen saka, malahci ako ko nipipatnak to Nga'ayay Ratoh to pakayniay ci Kristoan nai Yirusalim a mitaliyok tahira i Ilirikum. 20O harateng ako to ha:tiniay i, caay ko sapipatirengaw i mapatapangay no tao. Deng o sapipatnakaw to Nga'ayay Ratoh itira i caayho ka fana' ci Kristoan. 21Mato sowal a matilid i Fangcalay Cudad,

<<O papaka'araw ko caayho ka fana' to pakayniay i Cingraan.

O mamafana' ko caayho pakatngil to dmak Ningra a tamdaw,>> saan.

O Nisahalakaan ni Pawlo to Sapiliso'aw to Loma

22Orasaka, macara kako to kinapi:na saka, caho ka tayra kako i tamowanan. 23Nikawrira, malahcito ako ko tatayalen ako i tini tonini a pala. O romasato, halafinto ko harateng ako to sakatayraaw i tamowanan a miliso' saka, 24ano tayra kako i Sipaniya i, o mamicafer kako i tamowanan a miliso'. Ano ma^dengto ko faloco' ako a mikapot i tamowanan i, mangalay kako to pipadama namo i takowanan to sakatayra ako i Sipaniya. 25Nikawrira, o sapipadangaw to mitooray, saka tayra kako i matini i Yirusalim a mipadang. 26Nawhani misafaloco' ko i Makitoniyaay ato i Akayaay a kiwkay to sapasorot to sapipadang to i Yirusalimay a pakoyocay a mitooray. 27O nafaloco'an nangra konini a dmak. O romasato, citodong cangra a milahci tonini a tayal. Tona o Yutaya a tamdaw ko palada'ay i roma a finacadan to sakalmed no 'adingo saka, o matatodongay ko nipihaen no roma a finacadan a mipadama to Yutaya a tamdaw. 28Orasaka, ano mahrekto kako a mipatorod i cangraan to nisa'opoan a payso i, o papakayra kako i tamowanan a tayra i Sipaniya. 29Mafana' kako, ano tayra kako a miliso' i tamowanan i, o mamahawikid ako ko makadofahay a mikomi ni Kristo i tamowanan.

30Salikakaaw, pakaynien ako i Tapang ita ci Yis Kristoan ato nano olah no Fangcalay 'Adingo ko nipilongoc ako i tamowanan. Nanay palaccayen ita ko faloco' a misa'icel a mitolon i Kawas to saki takowanan. 31Ta manga'ay kako a miliyas to sari'ang no caay paso'lin ci Kristoan a i Yutayaay a tamdaw. Nanay rahker ko i Yirusalimay a mitooray a milayap to nihawikidan ako a sapafli. 32Ta ano o nafaloco'an no Kawas i, o lalipahak kako a tayra i tamowanan ta malaccay kita a mapahanhan ko faloco'. 33Nanay, ira a mikapot i tamowanan a mapolong ko parihadayay a Kawas. Amin.

Currently Selected:

Loma 15: AMIS2019

Highlight

Copy