2 Korinto 10

O Pipa'ading ni Pawlo to Tayal Ningra

1Pa'icel kako ci Pawlo i tamowanan. O harateng namo i, yo i tiniho i tamowanan a malakapot kako i, o tadadamsayay. Nikawrira, yo miliyas to i, o tadaca^desay. Anini sato i, pakaynien ako i nika damsay ato olah ni Kristo ko nipipa'icel i tamowanan. 2Ano tayra kako i tamowanan i, o mama^deng kako a ca^des ko sowal toya o no hkalan ko dmak na Pawlo, sanay a milikafay tamiyanan a tamdaw. Nikawrira, nanay caay ka do^do ako ko hatiraay a faloco' ako a somowal i cangraan saan kako. 3Talacowa i tini i hkal ko 'orip niyam, nikawrira, caay pitoor kami to no hkalan a harateng a mico'ay. 4O sapilood niyam a lalosidan i, caay ko no hkalan, o nai Kawasay a ci'icelay a pakaplengay to pisitalaan no 'ada. Onini a lalosidan ko sapipleng niyam to pacfaay a harateng no tamdaw. 5Palasawaden niyam ko milalangay to sakafana' no tamdaw to Kawas a misatakaraway a harateng. Paliten niyam ko masamaamaanay a harateng a papitoor i ci Kristoan. 6Ano masongila'to ko pitoor namo to sowal niyam i, itiya kami a mitfoc to caay pitoor to sowal niyam a tamdaw.

7O papotal a ccay ko ninengnengan namo. O i ci Kristoananay kako, ano saan ko cima namo a tanektek ko pipaso'lin i, o nipiliyaw noya tamdaw a miharateng to tireng ko nga'ay. Nawhani matiya o nika laccay ningra aci Kristo ko nika laccay niyam aci Kristo. 8O sapa'icelaw i tamowanan a palatamdaw ko nipaflian no Tapang i tamiyanan a 'icel. Caay ko sapitfadaw i tamowanan. Saka, ano pakinalinali to miming ko pipasneng ako to pakayniay tonini i, caay ka ngodo kako. 9O patalaway ko nipipatilid ni Pawlo i titaanan, ano saan ko harateng namo i, caay ka nga'ay. 10Ira ko somowalay, <<Ca^des, ci'icel ko sowal ni Pawlo i tilid. Nikawrira, nengneng han cingra i, o tadancaay cingra. Caay ko masamaanay ko sowal ningra,>> saan. 11O nika fana' no matiraay a tamdaw ko nga'ay to nika ano masamaan ko sowal i tilid niyam i tamowanan i, mahaenay ko dmak niyam a mikapot tamowanan.

12Ira ko mipasnengay a pakafana' to pakayniay i tireng nangra a tamdaw. Caay ko papasasotiri' kami to tireng niyam ato cangra. O nika apa nangra saka, pasasotiri' cangra to tireng ato kapot a patatodong i nisanga'an nangra a lkakawa. 13O kami i, caay pakinali kami a mipasneng toya niparocekan no Kawas i tamiyanan a tayal. Oya niparocekan no Kawas a tatayalen niyam ko pi'arawan niyam a pasneng. Halo amo a masa'osi tonini. 14Ano caay ka sa'osi no Kawas kamo to tatayalen niyam i, paci^ci caay ka saan kami a tayra i tamowanan. Kami ko sa'ayaway a tayra i tamowanan a mipatnak to Nga'ayay Ratoh to pakayniay ci Kristoan. 15O nisa'osian no Kawas a tatayalen ko pi'arawan niyam a pasneng. Caay ko nitayalan no tao ko papasnengen niyam. O longoc no faloco' niyam i, o sakalomahad no piti'er namo i ci Kristoan, ta adihay a adihay ko tatayalen niyam i kasalaloma' no sa'osi no Kawas a pakatayal tamiyanan i tamowanan saan kami. 16Caay ko nikahrekan no tao a matayal ko papasnengen niyam. Mangalay kami a pakayra i tamowanan a tayra i roma a pala a mipatnak to Nga'ayay Ratoh.

17Mato sowal a matilid i Fangcalay Cudad, <<Ano cima ko malata'angay i, ka o dmak no Tapang ko kalita'angen,>> saan. 18Nawhani o so'linay a kahmekan a tamdaw i, o kahmekan no Tapang. Caay ko misamangahay a pacakat to tireng a tamdaw ko kahmekan.

Currently Selected:

2 Korinto 10: AMIS2019

Highlight

Copy