2 Korinto 11

Ci Pawlo ato Pacfaay a Tarokos

1Hato maapaay ko nika somowal ako i, ma^deng a samaanen, hadidi hanho. 2Nawhani, o mi'inapay ko olah ako a maolah i tamowanan, matiya o olah no Kawas to saki tamowanan. Matiya o nipatapanganto ako a makoracay a limecedan kamo to malofafahi no ccay a fa'inayan ci Kristo. 3Nikawrira, o katalawan ako i, o nika poni' no faloco' namo a matiya o nipisa'fit no 'oner ci Ifaan. Ta ma'oning ko faloco' namo. Misawad kamo to so'linay a makoracay a faloco' to saki ci Kristoan. 4Nawhani, yo ira a tayra i tamowanan ko patnakay a tamdaw to caay ko nipatnakan niyam a roma a Yis hananay i, lipahak kamo a milayap. O romasato, yo ira ko roma a 'adingo ato caay ko nipatnakan niyam a ratoh i, hai sa kamo a milayap tonini.

5Awaay ko kaisafaan ako to maan aca toya <<tadamaanay a tarokos>> hananay namo saan ko harateng ako. 6Ano caacaay ko makimaday kako i, awaay ko kaisafaan no fana' ako. Mapahapinangto niyam i tamowanan i masamaamaanay a dmak niyam konini.

7Yo mipatnak kako to Nga'ayay Ratoh no Kawas i tamowanan i, mangalay kako a mipalatamdamdaw i tamowanan saka, sapo^neren ako ko tireng a caay pilayap to lifon. Onini a dmak ako i, o raraw ako hakiya? 8Yo matayal kako i tamowanan i, mipadang ko romaroma a kiwkay a pafli to saka'orip ako. Mato mi'afasay kako i cangraan to malosapadama i tamowanan. 9Yo cango'ot kako to saka'orip itira i tamowanan i, caay pakaroray kako i cimacimaan namo. Nawhani ma^dengto ko pipadang no nai Makitoniyaay a salikaka to saka'orip ako. Caay pakaroray kako to maan aca i tamowanan itiya. I ikor nonini caay ko papakaroray kako i tamowanan. 10Mipahapinang kako to i faloco'ay ako a so'lin ni Kristo a pasowal, o mamatnak i polong no Akaya kona kasnengan ako. 11O sakasaan ako i, caay ka olah kako i tamowanan, caay ko nika saan ako. Mafana'to ko Kawas to nika olah ako tamowanan.

12O paparariden ako ko tayal ako to ha:tiniay. Ta mapalasawad ko nipipasneng noya sapalcadananay i tamiyanan to tayal a pasnengay a <<tarokos>> hananay. 13O matiniay a tamdaw i, o pacfaay a tarokos, o misa'fitay to tamdaw a matayalay, o misamatiyatiyaay o tarokos ni Kristo cangra. 14Caay ko kafahka'an konini! Halo ci Satan a misamatiyatiya o ma'dilay a coyoh! 15Orasaka, ano misamatiyatiya o matayalay no Kawas ko kararem ni Satan a misamo^celay i, caay ko kafahka'an. O pahrekan nangra i, mapatatodong toya nidmakan nangra.

O Nika Pades ni Pawlo

16Miliyaw kako a somowal, o maapaay aka ka saan ko harateng namo i takowanan. Nikawrira, ano mahaen ko harateng namo i, nga'ayto a pakomaapaay kamo i takowanan ta ira ko papasnengen ako to miming. 17O sasowalen ako i matini i, caay ko nano Tapang a sowal, o no maapaay a nika somowal. Saka, paci^ci sa kako a pasneng. 18Tona pasneng ko 'alomanay a tamdaw to no tirengan saka, halo ako a pasneng. 19O citanengay a tamdaw kamo. Orasaka, salipahak sa kamo a mihadidi to maapaay a tamdaw. 20Mapalakoli no tao kamo, malihiw no tao kamo a masafana', ^pecen no tao kamo, sti'en no tao ko pising namo i, hadidi sa kamo tonini. 21Mangodo kako a somowal to nika paska niyam a mihaen to dmak.

Matiya o no maapaay ko sowal ako. Ano masamaan ko nika ^ca paska no tao a pasneng i, haenen ako ko no mako. 22Ano o Hipray a tamdaw cangra i, o hatiraay kako. Ano o Israil a tamdaw cangra i, o hatiraay kako. Ano o tloc ni Apraham cangra i, o hatiraay kako. 23Ano o matayalay ni Kristo cangra i, sano mafolaay sa kako a somowal. Ikaka nangra ko nika tayal ako. Ikaka nangra ko roray ako a matayal. Ikaka nangra ko nika adihay no nika rofo ako. Kinapi:na kako a masti'. Kinapi:na a sakapatayan kako. 24Kinalima kako a masti' no Yutaya a tamdaw, tolo a polo' ira ko siwa ko kinaccay a pisti'#11.24 tolo a polo' ira ko siwa ko kinaccay a pisti' -- tiri'en i Limo'ot 25.3.. 25Kinatolo kako a paloen no Loma to kilang. Kinaccay kako a paloen to fokloh. Kinatolo a matotoh ko nidakawan ako a tamina. Masalafii, masaromi'ad a manawnaw kako i riyar. 26Kinapi:na kako a palafang a romakat i, sakanaopan no cdas, makari'ang no kokong, makari'ang no finacadan no tireng, makari'ang no roma a finacadan, mapades i niyaro', mapades i kohkohan, mapades i riyar, makari'ang no pacfaay a salikaka. 27O romasato, maroray kako a matayal. Kinapi:na a caay ka ala ko fafoti'en ako to dadaya. Macahiw, maso'aw, kinapi:na kako a awaay ko kakaenen, mapades to si^naw, caay ka deng to riko'. 28O romasato, ira ko kartengay a 'inorong no faloco' ako to nano rawraw a miharateng to romi'ami'ad to kalokiwkay. 29Ano rarima ko cima i, rarima kako. Ano matfad i raraw ko cima i, adada ko faloco' ako a miharateng.

30Ano o papasneng kako i, o nika tadanca ako ko papasnengen ako. 31O Wama a Kawas no Tapang ci Yis oya hahmeken a mida'oc a Kawas ko mafana'ay to nika caay ko mangah ko sowal ako. 32Yo itira kako i Tamaskus i, papisimawen no kararem ni Aritas a hongti a mikomoday ko mikifiay a tayring to fawahan no niyaro' to sapirpetaw i takowanan. 33Itiya i, pakafakar han no tamdaw kako a mi^pod nai sasingaran no padal a 'adipel no niyaro' a papilaliw toya mikowanay.

Currently Selected:

2 Korinto 11: AMIS2019

Highlight

Copy