2 Korinto 9

O Sapipadahof i Mitooray

1O pakayniay i pipadahof to mitooray itira i Yutaya i, awaay ko sasowalen ako a patilid i tamowanan. 2Mafana' kako to lalok no faloco' namo. <<Nai romaho a mihca a mipatala ko i Akayaay a mitooray>> han ako a somowal a pasneng ko i Makitoniyaay a tamdaw to dmak namo. Onini a lalok namo ko sakangiyangi no faloco' no 'alomanay itira. 3O sapiocor ako tonini a papinapina a salikaka i, o sakaci^pocaw no nipipasneng ako i cangraan to pakayniay i tamowanan. O romasato, o sapido^doaw namo to sowal ako a mipatala to sapadahof. 4Ano caay haenen namo i, ano malahaklongto kami ato Makitoniya a tamdaw a tayra i tamowanan, ano mahapinang nangra ko nika caho pipatala namo, tona hatini ko pipaso'lin niyam i tamowanan i, malakangodoanto ita konini. 5Orasaka, tona maktonto namo ko sowal i 'ayaw saka, kalah han ako ko salikaka a paki'ayaw ako a patayra i tamowanan a papipatala toya sapadahof namo. Ta caay pisa'idi'idi kamo a pasadak, ta o nano lipahak namo ko pipatala saan ko harateng ako.

6Haratengen, o caay ka hakowa ko nipalomaan i, caay ka hakowa ko nilitodan. O adihayay ko nipalomaan i, adihay ko nilitodan. 7Orasaka, ka o nihapinangan no faloco' no kahaccaccay ko sapasadak. Aka ka o nisa'idi'idian, aka ka o nipaci^cian a faloco' ko sapasadak. Nawhani o lipahakay a pafli i, o kaolahan no Kawas. 8Ma^deng ko Kawas a pafli to adihayay a sakalmed namo. Ta ma^deng kamo. Caay konini a ccay. Cirafas kamo to sapadama i masamaamaanay a nga'ayay a dmak. 9Mato sowal a matilid i Fangcalay Cudad,

<<O halipalada'ay ato halipadamaay cingra to pakoyocay a tamdaw.

Mida'oc ko mo^celay a dmak ningra,>> saan.

10Pafli ko Kawas i mifolsakay a tamdaw to sapaloma ato malokakaenen nangra a ^pang. Onini a Kawas ko papafli i tamowanan to adihayay a sapaloma a palahad a patongal to hci no nga'ayay a dmak namo. 11O mamararid haca ko Kawas a mipakadofah i tamowanan to masamaamaanay. Ta mararid kamo a halipadahof. Ta pakayni tonini a padahofay a dmak namo ko sakafana' no 'alomanay a tamdaw a miahowid to Kawas. 12Caay ko sapipadang to cango'ot no mitooray a ccay konini a padahofay a tayal namo. O sapalowadaw to faloco' no 'alomanay a tamdaw a papiahowid to Kawas. 13Onini a nga'ayay a dmak o ccay no wacay, to sakafana' no 'alomanay a tamdaw to pihaklong namo ci Kristoan, ato nika so'lin no faloco' namo a mido^do to nipatnakan a Nga'ayay Ratoh, halipalada' haca to pakoyocay a tamdaw, ta mipa'dil cangra to Kawas. 14O romasato, tona tadamaan ko mikomi no Kawas a mapaini i tamowanan saka, o mamaolah cangra i tamowanan, o mamitolon cangra to saki tamowanan. 15O aahowiden ita ko Kawas! Caay ko mama^min a sowalen ko mikomi Ningra!

Currently Selected:

2 Korinto 9: AMIS2019

Highlight

Copy