rumiya 8

asa 8

1na dino ḏakɩmino ḏate gwunnɩno gi liji lun lo ḏi yecu kɩrisṯo lun late laṯɩgwujane ŋuɽuna ŋeḏi jiŋɩno no, nalmɩni gwujane ŋeḏi gwuɽɩwə gwun gwɩpiḏo pɽul. 2gi gwune ŋuɽun ŋeḏi gwuɽɩwə gwun gwɩpiḏo pɽul ŋe ḏɩmiḏa ḏi yecu kɩrisṯo ŋimikədə ga ŋuɽuna ŋeḏi ŋuɽun ŋun ŋɩki na ŋe ḏaiya. 3gi gwune ŋɩru ŋeno, ŋun ŋuɽun ŋun ŋigelijɩlo elo musaŋ ŋate ŋəṯi ŋɩma ŋulduji no gi gwune ŋɩmumɩḏo aŋɩnu ye, namɩni elo mawəjo ŋaɽe ŋuŋun kaŋɩnu, yun yiro gi jiŋɩno jage jun jaṯape ŋuɽuna ŋɩki, na gi ḏiḏuga ḏan ŋuɽun ŋun ŋɩki, na dino ŋumakɩmi ŋuɽuna ŋun ŋɩki kaŋɩnu, 4kani a ŋuɽun ŋun ŋiŋir ŋun ŋɩbunyɩlo ŋuɽun ŋun ŋigelijɩlo elo musaŋ alṯɩmini lage lun late laṯɩgwujane ŋuɽuna ŋeḏi jiŋɩno no, nilmɩni gwujane ŋuɽuna ŋeḏi gwuɽɩwə gwun gwɩpiḏo pɽul. 5gi gwune luŋa lun lɩməṯɩnu ŋele ŋe ŋeḏi jiŋɩno laṯɩgele ŋwuɽa ŋwagin ŋuɽun ŋeḏi jiŋɩno, namɩni luŋa lun lɩməṯɩnu ŋele ŋe ŋeḏi gwuɽɩwə gwun gwɩpiḏo pɽul laṯɩgele ŋwuɽa ŋwagin ŋuɽun ŋeḏi gwuɽɩwə. 6gi gwune ḏigela ŋwuɽa ŋuɽun ŋeḏi aŋɩnu ḏiro ḏaiya, namɩni ḏigela ŋwuɽa ŋuɽun ŋeḏi gwuɽɩwə ŋiro ḏɩmiḏa na ḏouwɩɽiḏa. 7gi gwune ŋwuɽa ŋwun ŋwɩgelɩnu ŋɩdi ŋeḏi jiŋɩno ŋiro ŋɩkiḏiḏɩl eloŋale gi gwune ŋwate ŋwɩtienɩjo ŋuɽuna ŋun ŋigelijɩlo elo musaŋ no, na dino ŋate ŋəṯi ŋɩma ŋwɩtienɩjo no. 8na dino luŋa lun lɩməṯɩnu ŋele ŋe ŋeḏi jiŋɩno late ləṯi ŋɩma liŋiri eloŋu ḏugwore no. 9namɩni nyaŋa late lɩməṯɩnu ŋele ŋeḏi jiŋɩno no, nyamɩni je gwuɽɩwə gwe, ḏa gwuɽɩwə gweḏi elo gwerkwe majaḏaṯa lagalo. namɩni ḏa gwete gwate məṯi gwuɽɩwə gweḏi kɩrisṯo no gwədu gwuŋun no. 10na ḏa kɩrisṯo maje lagalo, jiŋɩno jalo jɩmai gwan ŋuɽun ŋun ŋɩki, namɩni gwuɽɩwə gwumiḏo gi gwune nyalmaro liŋir gi jei ganu jeḏi elo. 11namɩni ḏa gwuɽɩwə gweḏi ŋu gwun gwidiɽi yecuŋ gi liji lun laiyo majaḏaṯa lagalo, na ŋu gwun gwidiɽi yecu kɩristoŋ gi liji lun laiyo gwəmɩḏi jiŋɩno jalo jun jaṯai dino gwuɽɩwə gwe gwuŋun gwun gwijəḏəṯi lagalo.

12na dino lɩmagəri, iləṯi gəmɩju nanu gədu geḏi aŋɩnu ki gilgimiḏe gwan aŋɩnu no, 13gi gwune ḏa nyalməmɩḏe gwan aŋɩnu namɩni nyalar lai, namɩni ḏa nyalmaɽinye ŋɩru ŋeḏi aŋɩnu gwuɽɩwə gwe gwun gwɩpiḏo pɽul namɩni nyaləmɩḏe.

nyaɽe nyeḏi elo

14gi gwune liji wei lun laṯɩgwuluḏɩni gwuɽɩwə gwe gweḏi elo liro nyaɽe nyeḏi elo. 15gi gwune nya late lɩmape gwuɽɩwə gweḏi ŋɩwainy kani nyaɽuwe nyaḏonye mɩna no, namɩni nyalmape gwuɽɩwə gwun gwaṯajiduji nyaɽe nyeḏi elo, na ŋu gwe iləri gwula ilarno, abba jun jarno baba. 16na gwuɽɩwəŋu gwun gwɩpiḏo pɽul dino gwaṯɩteiḏɩjo gwuɽɩwəŋe gwage galo, nuarno, liŋə ilro nyaɽe nyeḏi elo, 17na ḏa ilmaro nyaɽe, na liŋə ilro lun liɽenyeḏo dino, na ilɩɽenyeḏo ḏi elo, na ilɩɽenyeḏo kɩrisṯoŋale; na ḏa ilmɩḏe ŋuŋale kani nilibuḏi dino ŋuŋale.

ḏoɽeḏa ḏun ḏar ḏila

18gi gwune nyi gwaṯɩḏuɽə niarno ḏɩḏia ḏeḏi gaja keno ḏate ḏɩdeleḏo ḏɩḏeijo ga ḏoɽeḏa ḏe ḏeḏi elo ḏun ḏaje ḏaŋino lage no. 19gi gwune ŋɩdi wei ŋun ŋigelɩnu ŋaṯɩḏuḏɩnɩjo ḏigegila gei ḏəŋinio ḏeḏi nyaɽe nyeḏi elo. 20gi gwune ŋɩdi wei ŋun ŋigelɩnu ŋɩtienɩjo ŋuɽuna ŋun ŋiro jai, ŋədu ŋe ŋuɽun ŋun ŋɩbunyɩlo lulo lagin no, namɩni ŋeḏi ŋu gwun gwɩtienijɩlo, ḏiḏuḏɩnɩjo ḏe 21ŋɩdi wei ŋun ŋigelɩnu ŋəkədɩno ga ŋɩwainy ŋe ḏaiya kani nalbuje ḏɩkədəḏɩnə ga ḏe ḏoɽeḏa ḏeḏi nyaɽe nyeḏi elo. 22gi gwune ililɩŋiḏi ilarno, kəbe na gwunne ŋɩdi wei ŋun ŋigelɩnu ŋaje ŋeḏinya na ŋal ŋwuɽede enyeḏe nanu kal gete, 23na ŋate ŋiro dino kuwei no, namɩni liŋə dino lun ləṯi ḏɽa ḏeḏi gwerre ḏeḏi gwuɽɩwə gwun gwɩpiḏo pɽul, i liŋə gi lulo lage ileḏɩnya gi lulo lage ilḏuḏɩnɩjo ŋuɽuna ŋun ŋijiduji nyaɽe nyeḏi elo ŋun ŋiro ḏɩkədəḏɩnə ga jili je ḏeḏi jiŋɩno jage. 24gi gwune ilmakədəḏɩni ga gi ḏiḏuḏɩnɩjo ṯeno, namɩni ḏiḏuḏɩnɩjo ḏun ḏaŋinu ḏate ḏiro ḏiḏuḏɩnɩjo no, gi gwune ŋun ŋaŋəḏulo gwiji na galakwe ŋunḏuḏɩnɩjo mɩna? 25namɩni ḏa ŋɩmaṯɩliḏuḏɩnɩjo ŋun ŋate ŋaŋəḏɩlo no, na ŋiliḏuḏɩnɩjo ḏɩməṯo ḏe ḏeḏi ḏugwor.

26na ŋiro dino gwuɽɩwə gwun gwɩpiḏo pɽul dino gwaṯɩgelejo ḏɩmumɩḏa ḏage uwə; gi gwune ilate ililɩŋiḏi ŋuɽuna ŋun ŋaṯɩlinuməḏɩjo eloŋu gi gwune ŋideleḏo lage no, namɩni gwuɽɩwə gwun gwɩpiḏo pɽul kwulo gwuŋun gwaṯɩɽoṯəḏɩjo eloŋu gwan liŋə ḏərio ḏe gwula ḏun ḏate ḏaṯɩlḏumə no. 27na gwun gwaṯɩbunyi gi dugwor ganu ŋilɩŋiḏulo ŋun ŋɩbunyɩlo gwuɽɩwə gwun gwɩpiḏo pɽul, gi gwune gwaṯɩɽoṯəḏɩjo eloŋu gwan liji lun lɩpiḏo pɽul ŋuɽun ŋe ŋun ŋɩbunyɩlo elo. 28na ililɩŋiḏi ilarno ŋɩdi wei ŋaṯɩlduji kal gete gi ḏiŋiriḏa gi liji lun ləmɩnyu eloŋu lun lorniḏɩnu ŋuɽun ŋe ŋun ŋar ŋal elo gele. 29gi gwune lun lilɩŋiḏulo uro gwerre lɩmulməṯo uro gwerre dino kani alkəɽuḏɩni aldaḏe ŋaɽeŋale ŋuŋun kani ŋwuro lɽa gi lɩmegin lun lutu. 30na lun lɩmulməṯo uro gwerre na leno lorniḏulo dino, na lun lorniḏulo na leno lɩmulduji liŋir gi jei ganu jeḏi elo dino, na lun lɩmulduji liŋir gi jei ganu jeḏi elo na leno limulḏəḏə ḏoɽeḏa dino.

ḏəmɩnyo ḏeḏi elo

31na ilarau ŋɩdi ŋeno? ḏa elo maje lage na əḏi gwar gwiro gwar gwɩjikɩdɩḏi? 32ŋu gwun gwate gwinəḏi ŋaɽe ŋuŋun no numɩni ḏəḏinijo gwan liŋə wei, na galakwe gwate nuŋwijiḏəḏo dino ŋuŋale ŋɩdio wei ga dino no? 33əḏi gwiro gwicɩgilo lun lɩməṯɩlo elo? elo gwiro gwun gwaṯɩlduji liŋir gi jei ganu lugwun. 34əḏi gwiro gwun gwakɩmiḏe? kɩrisṯo gwiro gwun gwɩmai, yɩti na gwiro gwun madiɽi gi ḏaiya, na dino gwaṯɩje gi ḏi ḏeḏi elo ḏun ḏiro ḏiŋir, na dino gwun gwaṯɩɽoṯəḏɩjo eloŋu lage. 35əḏi gwiro gwijikenyə ganu gi ḏəmɩnyo ḏeḏi kɩrisṯo? ŋuɽun ŋun ŋɩbɩɽe i ḏɩḏia ḏiro a? i ḏiḏagɩɽina a? i jaŋu a, i ḏijaga ŋumuɽino a, i ḏiṯurɩḏa ḏino a? i cɩwiḏ jiro a? 36gi gwune ŋulinu,

anaŋa anaṯiɽinyini ganyin gwan ŋa bubruṯ

na anamaḏuɽəḏini gi joŋol je ḏiḏuga.

37awe, ŋɩdi ŋeno wei liŋə ŋiliḏami ŋuṯəno ŋu gwe gwun gwəmɩnyije. 38gi gwune nyi gwilɩŋiḏi muma ḏaiya ḏədu no, i ḏɩmiḏa ḏədu no, i ŋɩma ŋeḏi liji leḏi kanyin i ŋeḏi liji ŋədu no, i ŋɩdi ŋun ŋijo gwunnɩno, i ŋun ŋaje ŋila ŋədu no, i ŋele ŋədu no, 39i ŋun ŋijo kalo gun golelo, i ŋun ŋijo kalo gwola ganu ŋədu no, i ŋɩdi ŋede ŋun ŋigelɩnu ŋədu ŋəṯi ŋɩma ŋijikenyə ganu gi ḏəmɩnyo ḏeḏi elo ḏun ḏaṯɩje ḏi yecu kɩrisṯo gwun gwiro gwele gwage no.

Currently Selected:

rumiya 8: OTR1966

Highlight

Copy