rumiya 7

asa 7

ḏəŋinio ḏan gwəmɩnyo na gwa gwuŋun

1nya late lilɩŋiḏi lɩmagəri no, na nyi gwuməḏɩjo liji lun lilɩŋiḏi ŋuɽuna ŋun ŋigelijɩlo elo musaŋ, galakwe ŋuɽun ŋeno ŋəṯi ŋelɩnya kwiji gwune gwore gwumiḏo? 2gi gwune gwa gwun gwəṯi gwəmɩnyəŋe gwukanano kwəmɩnyo ŋuɽun ŋe gi gwune gwore gwumiḏo; namɩni ḏa gwəmɩnyo mai na ŋu gwumakədəḏɩni ga ŋuɽun ŋun ŋɩkaiilo geḏi gwəmɩnyo. 3na ḏa ŋɩmaro dino, gwune gwəmɩnyo gwuŋun gwore gwumiḏo na ḏa ŋu lɩmamaṯiḏe ganu gwəmɩnyo gwe gwiro kaja gwurinu; namɩni ḏa gwəmɩnyo mai na ŋu məkəḏɩni ga ŋuɽun ŋun ŋigelijɩlo elo musaŋ, na gwate gwurino ḏa malmaṯiḏe gwəmɩnyo gwe gwiro kaja no. 4na dino lɩmagəri, nyaŋa dino nyalmai gwan ŋuɽun ŋun ŋigelijɩlo elo musaŋ aŋɩnu ye yeḏi kɩrisṯo, kani nyaro leḏi gwiro kaja gwun gwumədiɽini gi ḏaiya, kani iləpijo eloŋu nyaɽe. 5na ḏa ilmawewele ŋan ŋuɽun ŋeḏi jiŋɩno kuwei, ŋuɽun ŋage ŋun ŋɩki ŋeḏi jiŋɩno ŋun ŋidiɽu ŋuɽun ŋe ŋun ŋigelijɩlo elo musaŋ, ŋaṯape ŋɩru gi jiŋɩno ganu jage kani alɽe nyaɽe gi ḏaiya. 6namɩni gwunnɩno ilməkədəḏɩni ga ŋuɽun ŋun ŋigelijɩlo elo musaŋ, gi gwune ilmai gwan ŋeno ŋun ŋiməṯeḏiḏɩne, na dino iləpijo ŋɩru ḏɩmiḏa ḏe ḏun ḏiya ḏeḏi gwuɽɩwə gwun gwɩpiḏo pɽul, ŋədu ŋun ŋulinu ŋun ŋuɽun no.

ŋuɽun ŋun ŋigelijɩlo elo musaŋ na ŋuɽun ŋun ŋɩki

7na dino ilarau? ilarno ŋuɽun ŋun ŋigelijɩlo elo musaŋ ŋiro ŋuɽun ŋun ŋɩki a? awe, ŋate ŋiro dino ḏuṯ no. namɩni nyi gwate malɩŋe ŋuɽuna ŋun ŋɩki no, na ḏa ŋuɽun ŋate ŋɩmaje ŋun ŋigelijɩlo elo musaŋ no. na nyi gwate malɩŋe ḏibunya ḏun ḏɩki na da ŋate ŋɩmarɩŋe ŋuɽun ŋun ŋigelijɩlo elo musaŋ no, aṯaŋaldeleḏa ganu no. 8namɩni ŋuɽun ŋun ŋɩki ŋɩmabuje ṯaṯ ŋuɽun ŋe ŋun ŋigelijɩlo elo musaŋ ŋulduji lugwi ŋuɽun wei ŋe ḏibunya ḏun ḏɩki, gi gwune ḏa ŋuɽun ŋɩmete ŋun ŋigelijɩlo elo musaŋ no, ŋuɽun ŋun ŋɩki ŋaiyo. 9namɩni nyi gwumiḏo gwerre ganu ŋuɽun ŋate ŋun ŋigelijɩlo elo musaŋ no, namɩni gwune na ŋuɽun wila ŋun ŋigelijɩlo elo musaŋ na ŋuɽun ŋɩmədiɽəno ŋun ŋɩki namɩni nyi mai. 10na ŋuɽun ŋeno ŋun ŋigelɩlo elo kani aləpijo liji ḏɩmiḏa, namɩni nyi ŋɩmibuje ŋɩminyəpijo ḏaiya. 11gi gwune ŋuɽun ŋun ŋɩki ŋɩmape ṯaṯ ŋuɽun ŋe ŋun ŋigelɩlo elo ŋɩminyirdeijo ganu na ŋɩmiɽinye. 12na dino ŋuɽun ŋun ŋigelijɩlo elo musaŋ ŋɩpiḏo pɽul, na ŋɩḏuḏɩnu ga na ŋiŋir. 13na dino ŋeno ŋun ŋiŋir ŋɩminyəpijo ḏaiya a? awe, ŋate ŋiro dino ḏuṯ no. namɩni ŋuɽun ŋun ŋɩki kani alaŋini ŋɩki, ŋɩnyəpijo ḏaiya ŋuɽun ŋe ŋun ŋiŋir, kani a ŋuɽun ŋun ŋɩki ke gworki ŋuɽun ŋe ŋun ŋigelɩlo elo.

ŋuɽun ŋe ḏugwor ḏeḏi gwiji ŋun ŋiro ganu ŋɩttən

14gi gwune nilɩŋiḏi ilarno, ŋuɽun ŋun ŋigelijɩlo elo musaŋ ŋeḏi gwuɽɩwə ŋiro; namɩni nyi gweḏi aŋɩnu gwiro, na nyi gwiḏɩlɩnu nyimaro wainy gweḏi ŋuɽun ŋun ŋɩki. 15gi gwune ŋate ŋilɩŋiḏɩlo ŋɩrṯa ŋiro ŋaṯɩlduji no, gi gwune ŋate ŋaṯɩduji ŋun ŋɩbunyɩlo no, namɩni ŋun ŋɩdonyilo ŋaṯɩlduji. 16na ḏa ŋimaṯɩlduji ŋun ŋate ŋɩbunyɩlo no, namɩni niləmɩnyejiḏi ŋuɽun ŋun ŋigelijɩlo elo musaŋ niarno ŋuɽun ŋun ŋigelijɩlo elo musaŋ ŋiŋir. 17na ḏa ŋɩmaro dino nyi gwədu ŋilduji no, namɩni ŋuɽun ŋiro ŋun ŋɩki ŋun ŋaṯajaḏaṯa lugwi. 18namɩni nyi gwilɩŋiḏi ŋɩdi ŋate ŋetɩdo ŋun ŋiŋir ŋajaḏaṯa lugwi no, i kaŋɩnu yinyi no, nyi gwar gwaṯɩduji ŋɩru ŋiŋir namɩni nyi gwate gwəṯi ŋɩma ŋilape no. 19gi gwune ŋɩbunyɩlo ŋun ŋiŋir namɩni ŋate ŋaṯɩduji no, nilmɩni duji ŋun ŋɩki ŋun ŋate ŋɩbunyɩlo no. 20namɩni ḏa ŋɩmaṯɩlduji ŋun ŋate ŋɩbunyɩlo no, nyi gwədu ŋilape no, namɩni ŋuɽun ŋiro ŋun ŋɩki ŋun ŋijəḏəṯi lugwi. 21na dino nyi mabuje ŋuɽuna ŋeno, na ḏa ŋimaro ŋilduji ŋun ŋiŋir, namɩni ŋun ŋɩki ŋaṯɩje lugwi. 22na nyi gwadile ganu ŋuɽun ŋun ŋigelijɩlo elo musaŋ gi ḏugwor ganu ḏinyi, 23namɩni nyi gwaṯaŋu ŋuɽuna ŋiro kaja kaŋɩnu yinyi, ŋaṯɩlrre gworo gwe gweḏi ŋadɩgɩɽe ŋinyi, na ŋinyiduji wainy gweḏi ŋuɽun ŋun ŋɩki ŋun ŋaṯɩje kaŋɩnu yinyi. 24əgeye, nyi gwun gwiro gwiji gwiḏɩmiḏɩnu, əḏi gwiro gwinyikədə ga kaŋɩnu yeno ye ḏaiya? 25nyi gweico eloŋu sukran yecu kɩrisṯo gwe gwun gwiro gwele gwage. na dino kwulo gwinyi na ŋadɩgɩɽe ŋinyi nyi gwaṯəpijo ŋuɽuna ŋun ŋigelijɩlo elo musaŋ ŋɩru, namɩni aŋɩnu ye yinyi nyi gwaṯəpijo ŋuɽuna ŋun ŋɩki ŋɩru.

Currently Selected:

rumiya 7: OTR1966

Highlight

Copy