2 Kuurinthuus 5
5
1Ŋinena liŋidhana darnu ada dunu gwa khema gega ga gidhila ibiga gwimerna, anaŋa luthi duna gi Samawaat di Kalo, gwina gwati gwigitinu doi dai no, gwina gwathije gwortal. 2Gi dunu gwa gidhila ibiga anaŋa lathare gi dugor ganu duri, athanabupe dana gena duna gwuri gwina gwo gi Sama. 3Ada anaŋa limagena anaŋa lati labujini lijo galo ŋwumirinya no. 4Abi anaŋa lina lo gi khema ibiga lathare gi dugor ganu duri, athana uthi dhuŋuna dhina dhinaŋ gi dugor ganu duri; a minoŋ anaŋa lati libupo diji galo ŋwumirinya no, abi dilgena ciraŋa di midhe dhiŋa aiuŋw. 5Abi gwina gwimijigeta gwan ŋidi ibiŋa ŋeda gwan Kalo, gina gidhedhiji ko ŋida ŋina ŋiro kwerkwereny ŋa Dhigirim. 6A minoŋ anaŋa luthi uminyuŋw ŋwamun peth, analiŋa darnu anaŋa luthi duna gi aŋinu, abi anaŋa liro lirin di Kweleny. 7(Ŋinena athana elila imaan gwai, a anaŋa lati lathelila je jai no.) 8Anabuthi uminyuŋw, aniŋir dugore gwoinyadhanu danaro lirin kaŋinu, anabije di Kweleny. 9A gi dhuŋun ibidha aldimini galo ko ada alŋa limaro liji la dunu i ada alŋa limaro lirin, dilro liji lina luminyinu dugun. 10Aram alŋa peth laji laŋini gi je ganu ja kursi ga ẖukm ga al Masiiẖ; di gweta gweta dega ganu apai dhuŋuna dhina dhapuŋw gi aŋinu yuŋun, gi dhuŋun dha ŋiro ŋina ŋapuŋwulo, ada ŋimaro ŋiŋir i ŋike.
Uminyi gwa al Masiiẖ gwiro dhuŋun dhina dhuthana a ŋoma ŋuri
11A minoŋ alŋa liliŋidhi ŋidhenyo ŋa Kweleny, aluminyi dabiŋaijo lijo dildiŋini dhuŋuna dha Kalo; abi di Kalo alŋa liliŋinu dugun momaŋ; a nyi gwuthi dhunijuŋw darnu anaŋa liliŋinu momaŋ gi dugor dalo ko. 12Ŋinena athana dhedhi lidom luri shahaada gwina gwiŋir dagalo manaŋ no, abi lajidhedha lamun ladhanyalai are ŋamilai daguri gwai, danya uthi ŋoma dabiŋaijo ŋediŋaije lina lathare ŋamilai gi je ganu dogo, athathilbaro ŋamilai gi dugor ganu no. 13Abi ada anaŋa limaro jirila, a dhuŋun ibidha dhan Kalo; abi ada anaŋa limabebra, a dhuŋun ibidha dhan nyaŋa. 14Ŋinena ro uminyi gwa al Masiiẖ gwathiji abrico dilje momaŋ; ŋinena uminyana dhuŋuna ibidha, darnu ada gweta gwimai gwan liji peth, a minoŋ peth laio. 15A ŋeda gwaio gwan liji peth, di ŋediŋa midhe athil midho midhuŋw gwan lidom legen manaŋ no, abi gwan ŋeda gwina gwaio gwan ŋediŋa, a gwimadire manaŋ.
Midhe gwina gwiyaŋ gwo gi al Masiiẖ
16A minoŋ ŋinena anaŋa lati liliŋidhi kwijo gweda gi dhuŋun dha aŋinu no; ada anaŋa limaliŋa al Masiiẖuŋw gi dhuŋun dha aŋinu, abi ŋinena gwati gwiliŋidhana manaŋ no. 17Minoŋ ada gweta gwimaje gi al Masiiẖ, a ŋeda gwimaro kwiji gwina gwiyaŋ; ŋidi ŋina ŋurun ŋimerna, aŋadhul, ŋidi peth ŋimaro ŋiyaŋ. 18Abi ŋidi peth ŋa Kalo ŋiro, gina gimiji iŋiriye gwan gwidom gwuŋun Yasuuⓐ al Masiiẖ gwai, a gwimijidhedha ŋiro ŋadhi iŋiriye; 19nyi gwarnu, Kalo gina gijo gi al Masiiẖ giro iŋiriye gwa gidhila kwidom gwuŋun, athuŋwul dhurejo ŋida ŋegen ŋina ŋike no; a ŋwugeta dega ganu dhuŋuna dhan iŋirajiye.
Dhuŋun dhadhi iŋiriye Kalo ŋalai
20A minoŋ alro ŋinena wukala gwa al Masiiẖ, gwiro ŋinena jina Kalo bupe, aluthe galo gwan al Masiiẖ, iŋiriyul Kalo ŋalai. 21Ŋinena muŋw abrico gwina gwati gwiliŋidhi ŋida ŋina ŋike no ŋwuro gwike gwan anaŋa; danaro dhuŋun dhina dhiŋir dha Kalo ŋeda gwai.
Currently Selected:
2 Kuurinthuus 5: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
