1 युहान्ना 4
4
सत्ये कालाउ धाताइका आत्मा
1आनाउ खान्धुराइ ओनेगेलाइ, ताइमि दोफा पबित्तरो आत्मा हि दोअ्का झाराङहेङ खाङधुरि मापासु। कालाउ आत्मागेलाइ परमेस्वरसो लोका हि, कि माको दोअ्तेङ वाको जाच पासु, हाइपालिपानु हेन्जा धाताइका आगमबक्तागेलाइ इदोङ सुमिङता हि। 2इदोइ पाहा नेलाइ परमेस्वरको आत्माहेङ नाल्स्वाना कि गोताङ आत्मा जाइ येसु ख्रिस्ट द्याङ जेङतेङ लोका हि दोअ्तेङ सुइकार पाखे, उङको परमेस्वरसो हि। 3कालाउ येसुहेङ द्याङ जेङतेङ लोका हि दोअ्तेङ सुइकार मापाका गोताङ आत्मागेलाइ परमेस्वरसो माको, कालाउ इङको ख्रिस्ट बिरोधिको आत्मा हि, जाइको बिसोइता इङको लोखे दोअ्का नेलाइ हिङका हिसुना। एला इङको इदोइ सुमिङता लोलि दोका हि।
4नाअ् जाइ काङको आनाउ जामाललाइ भाइकाङ हिसुना, नेलाइ चाहि परमेस्वरको द्याङगेलाइ हिसुना, कालाउ नेलाइ धाताइका आगमबक्तागेलाइ ह्रुता बिजोइ जेङका हिसुना। हाइपालिपानु जेदोङ पबित्तरो आत्मा नेलाइ दोफा हि, वा सुमिङता हिका साइतान जाइ इदोइ सुमिङको द्याङगेलाइ जाइ परमेस्वरहेङ मानाल्खे, इम्बालाइ ह्रुता खाबारा पाखे, वा इङको खान्तेङ माहान हि। 5उङको धाताइका धातुवा आगमबक्तागेलाइ सुमिङको हि, ओदोङ भाअ्सिङ इम्बालाइ सुमिङको सिक्स्यागेलाइ धिरपाखे, कालाउ सुमिङको द्याङगेलाइ इम्बालाइको सिक्स्या हिङखे। 6केलाइते परमेस्वरको द्याङगेलाइ हिनाहि। जाइ परमेस्वरहेङ नाल्खे वा केलाइको धिरपाका सिक्स्या हिङखे, कालाउ जाइ परमेस्वरको माको वा केलाइको धिरपाका सिक्स्या बुङ माहिङ पिखे। इदोइ पाहासो केलाइ सत्ये धुइका आत्मा कालाउ धाताइका आत्माहेङ नाल्लि दोनाखे।
एमिसो भेनेङ दोफा प्रेम पासु
7आनाउ, केलाइ एमिसो-भेनेङहेङ प्रेम पाइने, हाइपालिपानु प्रेम परमेस्वरसो लोखे जाइ आरुहेङ प्रेम पाखे उङको परमेस्वरको सान्तान दोङ, कालाउ वा परमेस्वरहेङ नाल्खे। 8जाइ आरुहेङ प्रेम मापाखे वा परमेस्वरहेङ मानाल्खे, हाइपालिपानु परमेस्वर प्रेम हिका हि। 9परमेस्वर केलाइहेङ एसापा प्रेम तिङपाहि, कि वा दोङ ताइको एमि खिनिङ चानहेङ सुमिङता दिङगिल्हि, कालाउकि केलाइ वाकोसो आनान्त जिबन निङलि द्वाको। 10सत्ये प्रेम या दोङ हि: केलाइ परमेस्वरहेङ प्रेम पाकानाङ माको, कालाउ वा दोङ केलाइहेङ प्रेम पाहि, कालाउ ताइको चानहेङ दिङगिल्पिहि। कालाउकि वाको बलिदानसो केलाइको पापको दन्ड स्यामा जेनाको। 11आनाउ, जेसापा परमेस्वर केलाइहेङ एसापा प्रेम पानु, केलाइ बुङ एमिसो-भेनेङहेङ प्रेम पालि गोइखे। 12परमेस्वरहेङ हासु बुङ हेलाउ बुङ तिङका मान्थु। जेसापा केलाइ एमिसो-भेनेङहेङ प्रेम पानाहे पानु परमेस्वर केलाइ दोफा ह्यावा, कालाउ वाको प्रेम केलाइता सिद्द जेङका हिखे।
13वा केलाइहेङ ताइको पबित्तरो आत्मा पिकानाङ, केलाइ या गिनाखे कि केलाइ वा दोफा ए जेङतेङ हिनाहि कालाउ वा बुङ केलाइ दोफा ए जेङतेङ हिखे। 14केलाइ चानहेङ तिङका हिनाहि, कालाउ साक्सि पिनाखे, कि आबा परमेस्वर ताइको चानहेङ सुमिङको द्याङगेलाइको भाअ्सिङ मुक्ति दाता जेङलि दिङगिल्हि। 15जाइ येसुहेङ परमेस्वरको चान हि दोअ्तेङ सुइकार पाखे, वा दोफा परमेस्वर हिखे, कालाउ उङको चाहि परमेस्वर दोफा हिखे। 16एसापा केलाइ रेम्फा गिनाखे कालाउ केलाइ खाङधुरि पानाखे कि परमेस्वर केलाइहेङ प्रेम पाखे। परमेस्वर प्रेम हि, कालाउ जाइ प्रेमता हिखे उङको परमेस्वर दोफा हिखे, कालाउ परमेस्वर वाको दोफा हिखे। 17एसापा जेलाउ केलाइ परमेस्वरता ए जेङतेङ हिनाखे, केलाइको प्रेम सिद्द जेङतेङ हानिनाखे, कालाउ केलाइ न्यायको दिनाको भाअ्सिङ थिलि मागोयाङ, कालाउ केलाइ निर्धक्क जेङतेङ वाको आगाता जाअ्लि द्वाङ, हाइपालिपानु ख्रिस्ट भाइपाङ केलाइ बुङ इदोइ सुमिङता जिबन जियाइनाखे। 18इसिका खाल्को प्रेमता थिका मान्थुखे, कालाउ इसिका प्रेमहोइ थिका लाअ्पाखे। हाइपालिपानु जेसापा केलाइ थिनाखे पानु केलाइ न्यायको दिनाको दन्डको भाअ्सिङ थिका हिनाखे, कालाउ इदोइहोइ तिङपाखे कि केलाइ वाको सिद्द प्रेमहेङ आनुभब पाका मान्थुन्हाहि।
19केलाइ परमेस्वरहेङ प्रेम पानाखे कालाउ एमिसो-भेनेङहेङ प्रेम पानाखे, हाइपालिपानु लाम्फा परमेस्वर केलाइहेङ प्रेम पाहि। 20जेसापा हासु बुङ का परमेस्वरहेङ प्रेम पाखा दोअ्खे, कालाउ ताइको खान्धुराइ ओनेहेङ मन्दा माताखे पानु उङको धातुवा हि, हाइपालिपानु ताइमिङ तिङका खान्धुराइ ओनेहेङते प्रेम मापाखे पानु मातिङका परमेस्वरहेङ प्रेम पालि माद्वावा। 21केलाइ वाकोसो इदोइ आग्या निङका हिनाहि, कि जाइ परमेस्वरहेङ प्रेम पाखे वा ताइको खान्धुराइ ओनेहेङ बुङ प्रेम पालि गोइखे।
Currently Selected:
1 युहान्ना 4: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
