1 युहान्ना 3
3
1बिचार पासु कि आबा परमेस्वर केलाइहेङ इसिका प्रेम पाका हि, कि केलाइ बुङ परमेस्वरको सान्तान दोअ्न्हाका हिनाहि, कालाउ जातिङकोङ केलाइ वाको सान्तान दोङ! ओदोङ भाअ्सिङ या सुमिङको द्याङगेलाइ केलाइहेङ मानाल्खे कि केलाइ परमेस्वरको सान्तान दोङ, हाइपालिपानु इदोइ सुमिङको द्याङगेलाइ परमेस्वरहेङ मानाल्खे। 2ओइ आनाउ, एला केलाइ परमेस्वरको सान्तान दोङ, कालाउ केलाइ भबिस्यता हिसिका जेनाङ इङको एला थेकापा देखाल जेङका मान्थु। इदोइ झोको गिनाखे कि, जेलाउ वा ल्वावा, केलाइ वा भाइकाङ जेनाङ। हाइपालिपानु वा जिस्काङ हि केलाइ वासेहेङ इन्सिकाङ तिनाङ। 3कालाउ जेसाङ ख्रिस्टता हिदोइ बुङ पाप मान्थु, हासु बुङ ख्रिस्ट भाइपाङ जेङलि भोखे वा पाप मापाको।
4जेसापा हासु बुङ लागातार पाप पाखे पानु, उङको द्याङ परमेस्वरको व्यवस्था माकिनाङ दुसिका जेङखे। हाइपालिपानु व्यवस्था माकेम्लि पाप हि। 5पापको आनान्त दन्ड मोअ्पालि ख्रिस्ट इदोइ सुमिङता लोहि दोअ्का काथा नेलाइ गिसुखेना। कालाउ वा हेलाउ बुङ पाप मापाहि। 6ख्रिस्टता हिका हासु बुङ लागातार पाप पातेङ माहिखे। पाप पातेङ हिकालाइ मागिखे कि ख्रिस्ट हासु हि, वा ना ते वासेहेङ तिङका हि ना ते नाल्का दोङ हि।
7नेलाइ जाइ काङको आनाउ जामाललाइ भाइकाङ हिसुना, हिदोइ बुङ द्याङ नेलाइहेङ धाताइलि मानिनाको। जाइ परमेस्वरको आगाता ठिक काम पाखे उङको द्याङ रेम्का हि, जेसाङ ख्रिस्ट हिका हि। 8जाइ लागातार पाप पाखे वा साइतान पाहासो हि। हाइपालिपानु साइतानते लाम्फासोङ पाप पाकाताङ लोका हि। साइतानको कामगेलाइ नासा पालिको भाअ्सिङ परमेस्वरको चान लोहि। 9जाइ परमेस्वरको सान्तान हि इम्बालाइ लागातार पाप मापाखे, हाइपालिपानु वाकोता परमेस्वरको स्वभाव हिखे, कालाउ वा लागातार पाप पालि मादोखे, हाइपालिपानु उङको परमेस्वरको सान्तान हि। 10परमेस्वरको सान्तान हासु कालाउ साइतानको सान्तान हासु एसापा नाल्खे, जाइ परमेस्वरको आगाता आसल काम पाखे कालाउ जाइ आरु खान्धुराइगेलाइहेङ प्रेम पाखे उङको दोङ परमेस्वरको सान्तान दोङ हि।
एमिसो-भेनेङहेङ प्रेम पासु
11नेलाइ लाम्फासोङ हिङका सन्देस इदोइ दोङ, कि केलाइ एमिसो-भेनेङहेङ प्रेम पालि गोइखे। 12आदमको चान कयिन भाइपा माजेङ, जाइ साइतानसो हिघाहि। वा ताइको ओनेहेङ सेअ्हि। वा ताइको ओनेहेङ हाइ पालि सेअ्हि? हाइपालिपानु वाको ताइको कामगेलाइ दुस्ट हिघाहि, कालाउ वाको ओनेको कामगेलाइ चाहि परमेस्वरको आगाता आसल हिघाहि। 13खान्धुराइ ओनेगेलाइ, इदोइ सुमिङको द्याङगेलाइ नेलाइहेङ मन्दा मातानु आचाम्मा मामानेसु। 14केलाइ गिनाखे, कि केलाइ सिकाको सरबुङसो स्वतन्तरो जेङका हिनाहि कालाउ एला केलाइ दोफा आनान्तको जिबन हि। हाइपालिपानु केलाइ आरु खान्धुराइगेलाइहेङ प्रेम पानाखे, जाइ प्रेम मापाखे वा सिकाको सरबुङको आधिनता हिखे। 15आरु खान्धुराइगेलाइहेङ मन्दा माताका झाराङ मारा पाकालाइ भाइकाङ दोङ हि, कालाउ हिदोइ बुङ मारागेलाइ दोफा आनान्त जिबन माहिखे दोअ्का नेलाइहेङ थाहा हि।
16एसा पासोङ प्रेम हाइ वाला केलाइ थाहा गिनाखे, कि येसु ख्रिस्ट दोङ केलाइको भाअ्सिङ सिपिहि। ओदोङ भाअ्सिङ केलाइ बुङ आरु खान्धुराइगेलाइको भाअ्सिङ सिलि गोइलाउ बुङ तियार हिलि गोइखे। 17हासु बुङ दोफा सुमिङको धन सम्पति हि, कालाउ बुङ आरु खान्धुराइगेलाइहेङ खाचोता हिका तिङलाउ बुङ ओबालाइहेङ मासाघाइस्वाना पानु, परमेस्वरको प्रेम हेसा वाकोता ह्यावा रो? 18नेलाइ जाइ काङको आनाउ जामाललाइ भाइकाङ हिसुन्हा, केलाइ एमिसो-भेनेङहेङ काथाता खिनिङ प्रेम पानाखे मादोअ्ताइने, भरु केलाइको प्रेम काम पाहासो खाचोता परिकालाइहेङ साघाइका पाहासो तिनाको। 19-20जेलाउ केलाइ आरुगेलाइहेङ प्रेम पानाखे एसा दोङ केलाइ गिलि दोअ्नाखे, कि केलाइ सत्येता हिनाहि। जेलाउ केलाइको मनहोइ केलाइहेङ दुसिखे, कालाउ केलाइ ताइको मनहेङ वाको आगाता सान्ति पिलि द्वाङ। हाइपालिपानु परमेस्वर केलाइको ह्रदय खान्तेङ माहान हि, कालाउ वा गोताङ काथा गिखे।
21आनाउ सानाइतिगेलाइ, केलाइको मनहोइ केलाइहेङ मादुसिखे पानु परमेस्वरको आगाता केलाइहेङ प्रार्थाना पालि साहास जेङखे। 22कालाउ केलाइ जेदोङ परमेस्वर दोफा ह्रेनाखे, इङको वाकोसो निङनाखे, हाइपालिपानु केलाइ वाको आग्या केम्न्हाखे। कालाउ वासेहेङ मन परिका कामगेलाइ पानाखे। 23कालाउ परमेस्वरको आग्या इदोइ दोङ हि, कि केलाइ वाको चान येसु ख्रिस्टता खाङधुरि पालि गोइखे, कालाउ वा केलाइहेङ आग्या पिका बमोजिम केलाइ एमिसो-भेनेङहेङ प्रेम पालि गोइखे। 24परमेस्वरको आग्या केम्कालाइ झाराङ वाको दोफा ए जेङतेङ हिखे, कालाउ वा इम्बालाइ दोफा ए जेङतेङ हिखे, वा केलाइहेङ पिका पबित्तरो आत्मासो केलाइ गिनाखे, कि वा केलाइ दोफा ए जेङतेङ हिखे।
Currently Selected:
1 युहान्ना 3: DHINT
Highlight
Copy
Compare
Share
Want to have your highlights saved across all your devices? Sign up or sign in
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
