1 युहान्‍ना 5

परमेस्वरको चान ह्रुता खाङधुरि

1येसु दोङ ख्रिस्ट#5:1 ख्रिस्ट जाइ इदोइ सुमिङता राजाको रुपता आबिसेक पातेङ दिङगिल्का हि। हि दोअ्तेङ खाङधुरि पाका झाराङ परमेस्वरको सान्तान दोङ। जाइ आबाहेङ प्रेम पाखे वाको सान्तानगेलाइहेङ बुङ प्रेम पाखे। 2जेलाउ केलाइ परमेस्वरहेङ प्रेम पानाखे कालाउ वाको आग्यागेलाइ केम्न्हाखे, इदोइ पाहासो थाहा निङनाखे, कि केलाइ परमेस्वरको जामालहेङ प्रेम पानाखे। 3परमेस्वरहेङ प्रेम पालि दोअ्का चाहि वाको आग्यागेलाइ केम्लि दोङ। कालाउ वाको आग्यागेलाइ केम्लि मुस्किल मान्थु। 4हाइपालिपानु परमेस्वरको गोताङ सान्तान इदोइ सुमिङको मारेम्का काथागेलाइहेङ इन्कार पाका हि। कालाउ केलाइको खाङधुरिसो दोङ केलाइ इदोइ सुमिङको मारेम्का काथागेलाइहेङ जितिका हिनाहि। 5हासु इदोइ सुमिङको बिरोधता धुम पातेङ बिजोइ निङलि दोखे? उङको दोङ हि, जाइ येसु ख्रिस्ट दोङ परमेस्वरको चान हिका हि दोअ्तेङ खाङधुरि पाखे।

ख्रिस्टको बारेता साक्सि

6या येसु ख्रिस्ट हि, जाइहेङ परमेस्वर इदोइ सुमिङता दिङगिल्हि, कालाउ चिता बप्तिस्ता ह्रुहि, कालाउ न्हुसो जेलाउ वा सिहि वाको हिति होहि, माकुनु येसु ख्रिस्ट जाइ चिसो खिनिङ बप्तिस्ता ह्रुका माको, भरु ताइको हिति होपातेङ क्रुस्टता बुङ सिहि। कालाउ पबित्तरो आत्मा साक्सि पिखे कि येसु ख्रिस्ट परमेस्वरसो लोका हि कालाउ पबित्तरो आत्मा जेलाउ बुङ सत्ये काथा दोअ्खे। 7इदोइ सुमनोङ साक्सिगेलाइ हि: 8केलाइ येसु ख्रिस्टको बारेता सत्ये काथा गिनाखे, हाइपालिपानु पबित्तरो आत्मा दोङ केलाइहेङ दोअ्खे, कालाउ येसु युहान्‍ना पाहासो बप्तिस्ता ह्रुहि कालाउ वा सिहि कालाउ ताइको हिति क्रुस्टता होपाहि। कालाउ इदोइ सुमनोङ काथागेलाइ एनोङ काथाको साक्सि पिखे। 9केलाइ द्‍याङको साक्सि किनाखे पानुते परमेस्वरको साक्सि झन बार्का हि। हाइपालिपानु इदोइ दोङ परमेस्वरको साक्सि हि, जेदोङ साक्सि वा ताइको चानको बिसोइता पिका हि। 10जाइ परमेस्वरको चान येसु ह्रुता खाङधुरि पाखे, वाको हृदयता इङको काथाको साक्सि हिखे। परमेस्वरता खाङधुरि मापाका परमेस्वरहेङ धातुवा बानाइका हिखे, हाइपालिपानु परमेस्वर ताइको चानको बिसोइता पिका साक्सिता वा खाङधुरि पाका मान्थुखे। 11साक्सि चाहि इदोइ दोङ हि, कि परमेस्वर केलाइहेङ आनान्त जिबन पिका हि कालाउ इदोइ आनान्त जिबन वा केलाइहेङ वाको चान येसु पाहासो पिहि। 12जाइ परमेस्वरको चानदोफा ए जेङतेङ हि, वाको दोफा आनान्त जिबन बुङ हि, जाइ परमेस्वरको चानदोफा ए जेङतेङ मान्थु वा दोफा आनान्त जिबन बुङ मान्थुखे।

आनान्त जिबन

13का इदोइ पात्तारा नेलाइहेङ लेखेदोङखा, जाइ परमेस्वरको चानको मिङता खाङधुरि पाखे कालाउकि नेलाइ या गिसु कि नेलाइ आनान्त जिबन निङका हिसुना। 14परमेस्वरता केलाइको पुरा भरोसा हि, कि परमेस्वरको इच्छा बमोजिम केलाइ जेदोङ ह्रेलाउ बुङ वा केलाइको प्रार्थाना हिङपिखे। 15केलाइ प्रार्थाना पालाउ जेदोङ ह्रेलाउ बुङ परमेस्वर हिङपिखे दोअ्का केलाइ गिनाखे पानु, इङको बुङ गिनाखे कि वाको दोफा केलाइ जेदोङ ह्रेका हिनाहि इङको केलाइहेङ पिखे। 16जेसापा हासु बुङ ताइको खान्धुराइ ओने पाप पाका तिङखे, कालाउ इङको पाप चाहि आत्मिक सिकाता#5:16 आत्मिक सिकाता जेलाउलाउको भाअ्सिङ परमेस्वरसो दुरे जेङलि। माचुम्पुखे पानु, वा उङको ओनेको भाअ्सिङ परमेस्वर दोफा प्रार्थाना पापिलि गोइखे, कालाउ जाइको पाप सिकाता चुम्पुका खाल्को मान्थु, वासेहेङ परमेस्वर जिबन पिखे। कालाउ इसिका पाप बुङ हिखे, जेदोङ आत्मिक सिकाता चुम्पुखे, जाइको भाअ्सिङ हासु बुङ बिन्ति पालि गोयाङ दोअ्तेङ का माअ्दोताङका। 17गोताङ खाराब काम चाहि पाप हि, कालाउ इसिका पाप बुङ हिखे जेदोङ आत्मिक सिकाता माचुम्पुखे।

18परमेस्वरको सान्तान हासु बुङ पाप पातेङ माहिखे, हाइपालिपानु परमेस्वरको चान येसु वासेहेङ सामाराइतेङ ताअ्खे, कालाउ साइतान बुङ वासेहेङ मासाइखे। 19केलाइ गिनाखे, केलाइ परमेस्वरको हिनाहि, कालाउ सारा सुमिङको द्‍याङगेलाइ साइतानको खाबाराता परिका हि। 20केलाइ गिनाखे, कि परमेस्वरको चान येसु ख्रिस्ट इदोइ सुमिङता लोका हि, जाइ सत्ये हि वासेहेङ नाल्लि द्वाको दोअ्तेङ परमेस्वर केलाइहेङ समझ पिका हि। जाइ सत्ये हि, केलाइ वा दोफा ए जेङतेङ हिनाहि, माकुनु वाको चान येसु ख्रिस्ट दोफा, वा दोङ सत्ये परमेस्वर कालाउ आनान्त जिबन हि।

21नेलाइ जाइ काङको आनाउ जामाललाइ भाइका हिसुना, जेदोङ काथाहोइ नासेहेङ परमेस्वरसो दुरे बानाइखे इङको काथासो आलाग हिसु।

Currently Selected:

1 युहान्‍ना 5: DHINT

Highlight

Copy

Compare