Bilangan Uram 21
21
Israel nang aryi Kanaan mutuk kuramnyi ninyi asi obsekmai deyok
21:1-3
1Arad mutuk sienyi, Kanaan ninyi bok, me youkwetam kuboka yini mutuk si Negeb mutuk dam kuramwe. Ba, erci kekeramwe uca, “Sun Israel ninyi ara Atarim bisik kuboka yanganmang,” ebmai asi bikmou ura, ibinmouci, sun Israel ninyi ukubaryi talebmou. 2Ura, Israel yala ninyi aryi Er Iya Erebdobnyi bisi uram talak ato ebmai, “Nai, kanci nunsi a mutuk ninyi asi muna kirdongon dinyi karebsurum ba, nunci sun atei nirya kum dandeibkwayeb,” eboka Er Iya Erebdobnyi bisi molobmai. 3Ba, Er Iya Erebdobnyi biryi Israel nang molobmai dinyi kekebmou ura, sun Kanaan mutuk dobkarebmai. Ba, sunci akatei ninyi ab, sun dobmai atei nirya ab kum dandeibmai Ati, sun Israel ninyi aryi a mutuk si ara Horma eboka dobmai.#21:3 Horma eboka si dobmai ara Kanaan ninyi nirya kum dandeibmai ati Ibrani uram aryi Horma eboka si dobmai.
Er Imtamnyi biryi yu kwatima tok karebmou deyok
21:4-9
4Hor mutuk kon aryi anabdobmaici, ilila me kwan si Teberau dingibwe kubkub tam kuboka asi binmai. Ara, Edom mutuk kaneimbanmai deyok aryi uki weik ati, sun Israel ninyi bisik noutumang kanya li asa akwe bobmai. 5Ura, sunci Er Imtamnyi ab, Musa ab asi ato eboka kerenmai, “Musa, kan unatoa ati Mesir mutuk aryi a boyangasurum do? Ba, nun a yini mutuk dam aryi dibkwayeb do? Ara, me ab, roti kwaning ab ababyi ton kum kuramwe. Ani, Er Imtamnyi biryi karesurur kwaning Manna ara dukmanto tenenub,” ebmai. 6Asi, Er Iya Erebdobnyi kekebwe ura, kwatima tok ilinto sun Israel ninyi kankan dam arukdongobmou. Ba, anda ninyi si tobmou ba, ninyi ilinto dibdanin binmai. 7Ura, sun Israel ninyi Musa dam bindoka uram ato ebmai, “Nunci sirya malyi kubmab. Ara, kan urasin dam ab, Er Iya Erebdobnyi urasin dam ab asi malyito uram eboka arungninto enmab. Ati, Nai kanci nunsi Er Iya Erebdobnyi bisi molobliknibsurum ba, anda kwatima nun dam aryi dobdonokwande,” ebmai. Ura, Musa biryi Er Iya Erebdobnyi bisi sun Israel ninyi ati molobliknibmou. 8Ba, Er Iya Erebdobnyi biryi Musa molona kekebokaburyi, ato ebmou, “Musa, kanci kat keil si tembaga aryi kwatima tok kiknibokabminci, co balang aryi lumubdeibdum. Ba, sun kwatima tok aryi si tobmaci ninyi ara a kwatima asi dibwelebingnyi ura, sun tobmaci dinyi kum dandoka kam kubdobkwaming,” ebmou. 9#Yoh. 3:14Ura, Musa biryi kat keil si tembaga aryi kwatima tok kiknibokaburyi, kwa co touboka kwa dikeibmou. Ba, a kwatima tok aryi si tobman ninyi ara a kwatima asi kutam sunsunukoka dibwelebne ninyi ara dina kum uca kam kubdobkwamnyi.
Hor mutuk kon dam aryi kuboka Moab mutuk binmai uram deyok
21:10-20
10Ura, Israel nang anabdobmaici weik atei si Obot bindoka ai dobmai. 11Ura, weik atei Obot aryi anabdobmaici, Abarim mutuk keil yamuramnyi dam atei bindoka dobmai. Ara, yini mutuk Moab atei bok me youkwetam kuboka asi ai dobmai. 12Akiryi anabdobyi ura, Zered mutuk lu bindoka ai dobmai. 13A mutuk aryi anabdobyi ura, yini mutuk dam me Arnon yibinamwe dam bindoka ai dobmai. A mutuk ara Amori nang mutuk wiliba dam binmai. Ba, me Arnon ara Moab nang mutuk wiliba kan Amori nang mutuk wiliba kan yibinamwe. 14A deyok aryi Er Iya Erebdobnyi biryi Israel nang asi mar boamwe mutuk ati kerek sengna umbura dam sekdongobyi. A mutuk ara, “Sufa mutuk bok Wahep atei ab, me Arnon duman mutuk dam ab aryi mar boamwe. 15Ani, mitik mutuk yim Ar atei aryi kuboka Moab nang mutuk wiliba dam baramnyi nirya Er Iya Erebdobnyi biryi mar boamwe,” Ati kerek sekdongobyi. 16Ura, Moab nang mutuk wiliba dam aryi anabdobmaici, Beer mutuk binmai. Beer Mutuk si ara Er Iya Erebdobnyi biryi Musa dam asi ato eamwe, “Beer mutuk bimunyi ura Israel nang nirya neik dam bulubdeibkwandum. Ba, Ni Imtamnyi biryi sunsi me karebkwan,” ebdeiamwe mutuk binmai. 17Ura, Israel nang aryi mot ato kuboka sebmai,
“Tukwe ungdon bisik me anamweleyarum,
Nunci kansi mot deici aryi namdoryakib.
18Tukwe ukyi nang ara minob menengyanamnyi nang. Ani, weik sien nang aryi ukamnyi.
Sun douramnyi kama aryi tukwe kurukoka ukamnyi. A kama ara sun mikib kimna kama aryi ukamnyi,”
eboka mot sebmai. Ura, yini mutuk dam aryi anabdakoka Matana mutuk dam binmai. 19Ura, Matana mutuk aryi anabdobmaici, Nahaliel atei kuboka Bamot atei binmai. 20Bamot bindoka mabmai ani anabdakoka, Moab nang mutuk kon si Pisga kon dam binmai. A mutuk kon ara yina mutuk tam kuboka bukamwe.
Sihon atei sienyi ab, Hesbon atei sienyi ab mar bobdanmai uram deyok
21:21-30
21Ura, Israel nang aryi minob uram boban nang bokdonokmai. Ara, Sihon ateinyi Amori nang weik sienyi bisi uram ato kuboka ebdeibmai ba, erbinmai. 22Ara, ato ebmai, “Nai, kan mutuk bisik ur yibindarur eboka yan lobsurum. Ba, nun ab nun bisam yabwe ab aryi, urasin ton kum dangubdenkwayeb. Ai nai kan wa in dam ab, anggur wa in dam ab, me ab ukaminyi me ab ton kum dibdenkwayeb. Nunci u dikum deiamibyi tok ani kan mutuk dam wiliba bisibkwayeb,” ebmai 23Bok, Sihon atei weik sienyi biryi Israel nang asi ur yibindarur eboka louna kum kubmou. Eda yin doun nang buluboka yina mutuk si Yahas mutuk tam kuboka Israel nang asi ibinmai. Ura, Yahas mutuk dam bindoka Israel nang asi mar bobmai. 24Bok, Israel nang aryi Amori yin don nang nirya obmai. Ura, Amori nang mutuk nirya arabdobmai. A mutuk ara Arnon duman aryi kuboka Yabok duman nirya arabdobmai. Ani, Amon mutuk wiliba ababyi nirya arabdobmai, bok Amon mutuk wiliba dam ara mikib ilinto nang akwe kuramnyi. 25Ato kuboka Israel nang aryi Amori nang weik atei ab Hesbon atei ab mitik-mitik atei ab nirya arabdobmaici anda atei bindoka kuramnyi. 26Hesbon atei ara Amori weik sienyi si Sihon kuramwe atei. A weik sienyi bira Moab atei weik sienyi mar boboka arabdamwe. Ara, a mutuk nirya arabdamunyi Arnon duman ababyi arabdamwe. 27Ato kuamwe deyok aryi Israel nang aryi ato kuboka tanyi ebmai,
“Hesybon bisi yanmab, Sihon atei weik sienyi.
Nun eiboka tubto dobibiryi mikib ting ebkwayeb.
28Uk ara Hesybon biryi ouboka anabmou.
Sihon yin don nang ara uk ato kubmou.
Weik atei Ar-Moab mutuk malyi kibyi.
Ani, Arnon mutuk konkon nirya arabdobyi.
29We Moab yala nang sun mitang kibsou.
Kamos kwemdeina mol yala nang kum dansekdau.
Kamos kwemdeina molon nang sal mabwe bok cungdorbinsekyi.
Nerabwe ara Amori sienyi biryi Amori mutuk bobiu.
Ara, Sihon ateinyi Amori nang weik sienyi.
30Sun yala nirya oboka kum dandeibubwe. Ara, Hesybon bisik aryi kuboka Dibon banung bisik dam ababyi kum dandeiboubwe.
Ani, nunci Nofah mutuk aryi kuboka Medeba atei nirya uk yirande to kuboka kum dandeibubwe,” ebmai.
Basan atei weik sienyi Og ab Israel nang ab mar bobdanmai uram deyok
21:31–22:1
31Ura, Israel nang anabdobmaici Amori nang mutuk dam binmai. 32Binmai ura, Musa biryi Israel nang asi Yaezer atei ban bisik teleb ingkiringbisindarur ebmou. Ura, Israel nang aryi Yaezer atei mitik-mitik atei kuramnyi nang nirya obmai. Ara, Amori nang kuramnyi asi kum dandeibmaici nirya arabdobmai. 33Ura, Israel nang kaniboka Basan mutuk dam bindobmai. Ura, Basan atei sienyi Og ab er yin doun nang ab aryi Edrei mutuk Israel nang ibinmai. 34Ura, Er Iya Erebdobnyi biryi Musa bisi ato ebmou, “Anyi biti ilil kuna mem! Niryi kansi er yin doun nang ab, er ab, mutuk ab kan taruk dam dobkarebkwamakin. Ba, Musa kanci Hesybon ateinyi Amori nang sienyi Sihon obkabumwe to kuboka kunubkwandum,” ebmou. 35Ura, Israel nang aryi weik sienyi Og obmaici, er yin doun nang ab a mutuk kuramnyi ninyi ab nirya kum dandeibmai. Ba, a mutuk nirya ara arabdobmaici, sun Israel nang mutuk kibdobmai.
Currently Selected:
Bilangan Uram 21: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
