Bilangan Uram 22
22
1Ura, sun Israel ninyi anabdobmaici, Moab mutuk lu asi bindoka keis ol ai dobmai. Ara, Yordan me kouna kum kubmaici, eda Yerikho atei dam kubmou bok kitingyangantam kuboka asi atei dobmai.
Moab atei sienyi si Balak biryi Bileam bisi nabmou uram deyok
22:2-20
2Ninyi si Zipor mi Balak bira Moab mutuk sienyi kiboka kuramwe. Sienyi Balak biryi kekenmou uca, sun Israel ninyi aryi Amori mutuk nang asi ukutoto nirya kunmai dinyi asi kekebmou. 3Ba, Moab mutuk ninyi ilil aryi sirim talebmou. Ara, Israel mutuk nang weik akiryi, Moab mutuk ninyi sirim talebmouci, kanyi nirya dukduk enmou. 4Ura, Moab mutuk ninyi aryi, sun Midian mutuk sien nang asi ato ebmai, “Uki kum talak aryok sun Israel ninyi aryi nun mutuk dam kuroci keica nirya ya sekoka kum dandeibkwamang. Ara, bisam lembu aryi sungsunga nirya asi silalum cang aryi dobde yirande to kunmang,” ebmai. Ba, a talak ara Zipor mi Balak bira Moab atei sienyi kiamuryi, taleamwe. 5#2Ptr. 2:15-16; Yud. 11Moab atei sienyi Balak biryi Moab mutuk ninyi talen nang ab, Midian mutuk ninyi talen nang ab asi arukoka ato ebmou. “Beor mi Bileam bisi nambindarur” eboka sunsi bokdonokmou. Ba, Bileam bira weik atei Petor dam kuramwe. Ara, me Efrat yibinamwe dam bok, Aram mutuk tam kuboka asi kuramwe. Sunci mirei bingnanyi si Bileam bisi nabmunyi ura, ato ebkwandarur, “ ‘Kan bikdum. Ninyi ilinto Mesir mutuk aryi anaboka yanganmang. Diba ati a mutuk dam nirya lingdironmarci, keis ol ai ni mutuk tam yandoka dobmang. 6Sunda mikib ilinto ninyi ati, Bileam kan yaminci, a mutuk nang asi niti subdum. Ba, nunci sunsi a mutuk dam aryi yakibiryi, nun erebdobkwayeb. Niryi kanci kurun mirei ara sirya bingkunun. Ara, kanci ninyi kisal dakmaminyi ura, sunda kisal dangni dinyi dororaming. Ba, kanci ninyi submaminyi ura, sunci kan submaminyi to kuboka dororaming,’ ebkwandarur,” ebmou.
7Ura, sun Moab mutuk ninyi talen nang ab, Midian mutuk ninyi talen nang ab aryi Bileam bisi bona-bona bobmaici, binmai. A bobinmai ara Bileam biryi, “Sun Israel ninyi asi subte ba, dekwayeb,” tenen bobinmai. Ura, sunci Moab mutuk sienyi Balak uram Bileam bisi ebdeibmou to kuboka ebmai. 8Ura, Bileam biryi sunsi ato ebmou, “Arub lukunda ara a mabmamunyi ba, ambutum aryi niryi sun uram dekeibkwamasin. Ara, Er Iya Erebdobnyi biryi nisi uram ebkarebniriba, ebkwamasin,” ebmou. Ura, sun uram bobinmai ninyi talen nang nirya a lukunda ara Bileam atei mabmai. 9Ura, Er Imtamnyi biryi Bileam dam yandokaburyi, uram ato eboka asibdenmou, “Kan ab tonkwa kunmarum nang ara dantam atei ninyi do?” eboka asibdenmou. 10A asibmou dinyi Bileam biryi Er Imtamnyi bisi uram ato eboka dekeibmou, “Zipor mi Balak Moab mutuk sienyi biryi uram ato ebdeibmar to boyanmang. 11‘Kan bikdum. Ninyi ilinto Mesir mutuk aryi anaboka yanganung ninyi ara a mutuk nirya lingdironmar ati, kan yaminci sunsi niti subdeibnurum. Ba, niryi sunsi ibindokabniryi oboka erebdobkwan,’ ebdeibmar ba, uram boyanmang nang,” ebmou 12Ura, Er Imtamnyi biryi Bileam bisi uram ato ebmou, “Kanda anda nang ab tonkwa bana mem. Kanci sun Israel ninyi asi sumna mem. Sun Israel mutuk ninyi ara Niryi sunsi sirya kisal dakse ati sunsi sumna mem,” ebmou.
13Belekuna kibwe ura, Bileam bukokaburyi, Balak uram boyanmai nang asi ato ebmou, “Nira Er Iya Erebdobnyi biryi, ‘Sun ab tonkwa bana mem!’ ebmanir ati sunda sun atei tamuboka bindobdarur,” ebmou. 14Ura, a Bileam inirbinmai nang anabdobmaici Moab mutuk sienyi Balak dam yanmai. Ura, sunci Balak bisi uram ato ebmai, “Bileam bira, ‘Nira sun ab tonkwa kum binkwayeb,’ ebmar ba, nun ab tonkwa kum yanmab,” ebmai. 15Ura, Balak biryi ninyi ilinto erebdob wa doamyi nang asi, “Bileam bisi tubto nambindarur,” eboka bokdonokmou. Ba, yuma nambinmai nang wa doamnyi ara outamtoto bok, a nang ara erebdob wa doamnyi nang asi arukmou. 16Ura, sun sirya tamuboka Bileam dam binmaici, “Balak ebdeibmou uram asi ato ebmar,” ebmai. “ ‘Niryi kansi luknubdongoboka molobmakin. Kanci deirlona mem. Nisi yandoka lebdobnurum. 17Ba, niryi kansi dengna ilinto karebkwamakin. Ani, kanci molobminyi dinyi ababyi niryi kekebokabniryi, karebkwamakin ati yarum. Ba, kanci sunsi niti subdeibnurum,’ u ebmar,” ebmai. 18Bok, Bileam biryi Balak erebdob wa doamnyi nang asi uram ato eboka dekeibmou, “Niryi weik malyi kun dinyi babyi, mitik malyi kun dinyi babyi nirya ara ni molonunyi Er Iya Erebdobnyi bisi malyi kum kubdongobtinyi. Ati, ‘Nisi Balak biryi er sien ai umbura kubmaci dengna weik dinyi emas keil ab, perak keil ab nirya niti karebmanute,’ tenen ati ni sun Israel ninyi subman kum. 19A deyok ati sun kwit yabwe mabmai to sunda arub lukunda ara a mabkwamarum. Ba, nisi Er Iya Erebdobnyi biryi uram ton ebdeibniriba, sun dam ebkwamasin,” ebmou. 20Ura, a lukunda aryi Er Imtamnyi biryi Bileam dam yuryanmouci, uram ato ebmou, “Anda nang ara kansi namyanmaking ati bukoka anabdobminci sun ab tonkwa bindarur. Bok, Niryi kansi ebdeibmanyi uram akwe kunubkwandum,” eboka Er Imtamnyi biryi Balak bisi ebdeibmou.
Bileam boboka yibaramwe bisam keledai ab, Er Iya Erebdobnyi uram eryuryangananyi si malaikat ab ebdanmarei deyok
22:21-35
21Bileam belekuna aryi bukokwe ura, er boyibaramwe bisam ner keledai deici asi ninyi buna deibdongobwe ura burbinmou. Ura, er ab, sun Moab mutuk ninyi talen nang ab tonkwa anabmai.
22Ura, Bileam anaboka tonkwa banmai talak aryi, Er Imtamnyi yu wekmou. Ura, Er Iya Erebdobnyi uram eryuryangananyi si Malaikat Tuhan yandoka bisik sekmouci, er ordananyi kibmou. Ba, Bileam bira ner bisam keledai dub bukmouci, banmai. Ba, er wa irmilin nang kam nang bitinyi ab banmai, Sun si ara Yanes ab, Yambres ab tonkwa banmai. 23Ura, a bisam keledai aryi diramwe uca, malaikat bisik dam yandoka tikmouci, ninyi on ya doubmou asi eibmou. Ura, a bisam keledai ilil aryi nong bisik bana kum uca, urasin dangubmouci, wa iramnyi dam tam boboka wengbinmou. Ura, Bileam yu wekoka a bisam keledai asi, “Nong bisik tam bobinurum,” eboka kulanmou. 24Ura, malaikat bisik dukuba dam yandoka tikmou. Ara, co anggur wa in dam bisik lika otam atam kiboka doamiryi dukuba kibdeiamnyi ai asi yandoka tikmou. 25Ba, a bisam keledai aryi malaikat asing eibmou. Ura, a bisam keledai ara malaikat ilil aryi lika maknarorbaramwe uca, Bileam er yan deknebmou. Ba, a bisam keledai asi liki bitinyi dinyi kulab-kulab ebmou. 26Ura, a malaikat tubto kisibdakaburyi, bisik dukuba nong tingbinmou. Ara, bisik otam atam ababyi bindobman kum ai nong asi tikmou. 27A bisam keledai aryi Bileam boblobmou tok diramwe uca, malaikat tuba tikmou ura, a bisam aryi yan ab, taruk ab mungkurukoka tukwe ai mabmou. Ura, Bileam yu weik wekokaburyi, a bisam asi kama aryi liki winiryi dinyi kulabmou. 28Ura, a bisam asi Er Iya Erebdobnyi biryi ninyi uram dongobdongobwe ura, a bisam keledai aryi Bileam bisi uram ato ebmou, “Una kubmakin ati nai, kanci nisi liki winiryi kulabmanirim do?” ebmou. 29Ura, Bileam biryi a bisam asi ato ebmou, “A kulabmakin ara kanci nisi mitik mi kibsinibmanirimci, nisi asing kerketnyi kum ato kibdeibmanirim ati kulabmakin. Ninyi on ya ni taruk dam ton a bobmatinyi ura, a talak aryi obmakitinyi,” ebmou. 30Uca, a bisam keledai aryi Bileam bisi ato eboka asibdenmou, “Nai, Nira kan bisam keledai kum do? Niryi kansi iya kum bobde kukunun do? Arub a kunum bobmakin do? Niryi kansi ato kuboka ton kukunun do?” ebmou bok, Bileam biryi a bisam keledai asi uram ato ebmou, “Ton kum,” ebmou. 31Ura, Er Iya Erebdobnyi biryi Bileam asing elekeibmou ura, malaikat tikmouci, ninyi on ya taruk dam doubmou asi eibmou. Ura, Bileam tukwe ai sakweteboka kisok luknubdongoboka er si weik ebmou. 32Ura, a malaikat aryi asibdenmou, “Unatoa ati kan bisam keledai liki winiryi obmarim do? A dibderum. Ni yuryanman ara kanti bisik sengyanmakin. Ni teneibman dinyi ara, ‘Kan kubkwamarim to ara malyito kubkwamarim,’ tenebmanci bisik sekmakin. 33Ba, kan bisam aryi ni tikmonwe eibnou ura, erci liki winiryi ni urasin dam aryi yuk bisik kirikmo. Erci ni tikmonwe dam aryi kum kisibdobmote ura, Niryi kansi obkwamakunwe. Ba, kan bisam ara kum obkwamonwe,” ebmou. 34Ura, Bileam biryi Er Iya Erebdobnyi uram eryuryangananyi malaikat bisi ato ebmou, “Niryi sirya malyi kubman. Ara, Kan yandoka nisi bisik sekmanoumwe dinyi bingna kum kubmakunwe. A deyok aryi Er Imtamnyi urasin yu bobmanir ati, ni tamuboka bindobkwaman,” ebmou. 35Bok, a malaikat aryi Bileam bisi ato ebmou, “Ur, anda nang ab tonkwa bindarur. Bok, niryi aminda ebkwan uram asi kanbabyi a uram akwe ebkwandum,” ebmou. Ura, Bileam ab, Balak ninyi talen nang ab tonkwa Balak bisi binmai.
Balak biryi Bileam bisi, “Israel nang subdum,” ebmou deyok
22:36–23:3
36Balak kekeramwe uca, “Bileam yanganmar,” ena kekebmou. Ura, atei aryi sakweteboka damdeirorbinmou. Ba, Bileam bira Moab atei kuboka me Arnon yibinamwe ai wiliba dam yanganmou asi Balak biryi damdeirorbinmou. 37Ura, Balak biryi Bileam bisi ato ebmou, “Niryi ninyi kum arukanse ba, namyangakina kum kubmakei do? Unatoa ati kan yangana kum kubumwe do? ‘Niryi kansi dengna dekman kum,’ tenebmanoumwe do?” ebmou. 38Ura, Bileam biryi Balak bisi ato ebmou, “Ara, nitiba, ukura ni kan dam sirya yanman. Bok, ni yuk kanyi teneiboka uram ton kum ebkwaman. Eda Er Imtamnyi biryi, ‘A uram asi ebdum,’ ebci akwe ebkwaman,” ebmou. 39Ura, Bileam ab, Balak ab tonkwa anabdobmareici, weik atei Kiryat-Huzot atei binmarei 40Sirya binmarei ura, Balak biryi bisam lembu ab, kambing ab, domba ab obmouci, Bileam ab, er ab tonkwa yanmai weik nang ab ati karebmou. 41A maberekoka ara Balak biryi Bileam inibwe ura, boboka Baal mutuk kon welebmarei. A mutuk kon aryi dinmou uca, sun Israel nang yubwa-yubwa yandoka kuramnyi mutuk kubkub nong asi asing eibmou.
Currently Selected:
Bilangan Uram 22: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
