Bilangan Uram 20
20
Miryam dibmou uram deyok
20:1
1Sun Israel ninyi aryi Mesir mutuk aryi anaboka yangaramnyi ani, kwalina 40 baryi wengbinmaici, yuma wala dobmou ura, yini mutuk si Zin dam binmai. Ani, Kadesh atei bindoka kuramnyi talak aryi Miryam dibmou ba, a mutuk dam tukwe dongobmai.
Musa ab, Harun ab aryi Er Imtamnyi urasin dam malyi kubmarei uram deyok
20:2-13
(Kel. 17:1-7)
2Uki tentok tum aryi sun Israel yala ninyi bindoka kuramnyi yini mutuk si Zin asi me kum danmou. Ba, sunci Musa ab, Harun ab dam buluryanmai. 3A buluryanmaici, Musa bisi yandoka erekoka ato enmai, “Nun kwit yabwe Er Iya Erebdobnyi urasin dam aryi minob diblalabmai talak akiryi, nunbabyi nirya diantibyi ura, teleb. 4Unatoa ati, kanci nunsi yini mutuk dam boyasoumwe do? Nun ab, nun bisam yabwe ab nirya a mutuk dam dibkwayeb do? 5Unatoa ati, kanci Mesir mutuk dam aryi boboka ninyi on mutuk boyasoumwe da? A mutuk ara ukutotoa abman kum. Ara, co kwarang ab, co anggur ab, co delima ab, anda co ara ton kum kurur. Ani, me ababyi ton kum kurur,” eboka sunsi erekdobmai. 6Ura, Musa ab, Harun ab sun Israel ninyi kankan aryi anabokabdeici, Er Imtamnyi ai Kemah Suci ai bisik bublan dam tingyanmarei. Ura, sunci Er Imtamnyi bisi luknubdongoboka molobmarei. Ura, Er Iya Erebdobnyi milil ibarya Musa ab, Harun ab asi sun dam lak kimdaryanmou.
7Ura, Er Iya Erebdobnyi biryi Musa bisi uram ato ebmou. 8“Kanci, Er Iya Erebdobnyi biryi, ‘Ukubdarur-ukuna mem,’ en uram deirin co sangkol urasintam deiboumwe kama dobdobdum. Ara, Harun douramwe kama asi luk anabmouci, keta teleb obmou kama dobdobdum. Ura, kan ab, kan du Harun ab aryi sun Israel ninyi asi, ‘Neik dikum bulubdarur,’ eboka arukdurumnyi ba, bulubkwanung. Ura, kanci sun urasin dam aryi keil mutuk kon dam asi kanci uram iboka, ‘Me anamyarum,’ ebmimba, me anamyankwamar. Sirya me anabci ura, sun Israel nang ab, sun bisam yabwe ab asi yibkarebdum,” ebmou. 9Ura, Er Iya Erebdobnyi co sangkol u dikum tam kuboka aryi, Musa biryi a kama Er Iya Erebdobnyi ebdeibmou to kuboka dobdobmou. 10Ura, Musa ab, Harun ab aryi sun Israel yala ninyi ara keil mutuk kon deyok dam asi bulubdeibmareici, Musa biryi sunsi ato ebmou, “Sun Er Imtamnyi bisi dib tenena kum ninyi nisi kekenindarur! Nunci a keil mutuk kon dam aryi sunsi me anabdeibkwamasinim do?” ebmou. 11Ura, Musa biryi taruk erebokaburyi, kama aryi a keil mutuk kon deici asi liki bitinyi kulabmou. Ba, me anamyanmou ura, sun Israel ninyi ab, sun bisam yabwe ab yibmai.
12Er Iya Erebdobnyi biryi Musa ab, Harun ab asi ato ebmou, “Sunci Nisi dib tenena kum kubnururumwe deyok aryi Israel nang asi Niryi, ‘Karebkwansin,’ ebdeibse mutuk Kanaan boboka kum wengbinkwandurum. Ara, sun Israel nang urasintam aryi sunci Ni mikib aryi me anabdeibmanto bok asi, dib kum tenebdurumwe. Eda malyi kibnururumwe, a deyok aryi sunci ni mabwe nermabwe asi Kanaan mutuk boboka kum wengbinkwandurum,” ebmou.
13Ura, a me si ara Meriba eboka dobmai. Ara, a mutuk dam aryi Er Iya Erebdobnyi bisi talak doboka uram talenmai bok, Erci sunsi Er mikib ibarya lak kibdanmou. A deyok aryi a me si Meriba dobmai.
Edom atei sienyi biryi Israel nang molon dinyi kum kekebmou deyok
20:14-21
14Ura, Kadesh mutuk aryi Musa biryi Israel nang mikbaryi asi, “Edom mutuk sienyi bisi bindoka uram ato ebkwandarur,” eboka bokdonokmou. Ura, erci ato ebmou, “Nunda Israel mutuk ninyi, kanbabyi nun yalanyi, nun mambul donub dinyi ara kan bikmasirim.#20:14 Edom mutuk kuramnyi nang ab, Israel yala nang ab ara Abraham ab Ishak ab yaldangni nang kuramnyi. Ara, Edom nang ara Esau yaldangni nang kuramnyi. Ba, Israel nang ara Esau er weit Yakub yaldangni nang kuramnyi. Akiryi Musa biryi, “Edom sienyi bira nun yalanyi,” ebmou. 15Ara, nun abwe yabwe Mesir mutuk binamnyi uca, nunda Mesir mutuk iya a kunub. Ucab, nun abwe yabwe ab, nun ab asi Mesir mutuk ninyi aryi yu borosunung. 16Ba, nunci Er Iya Erebdobnyi bisi uram doboka molonub uca, Erci nun molonub dinyi kekebsou. Ura, Erci, Imtamnyi uram eryuryangananyi bokwetebwe ba, Erci Mesir mutuk dam aryi boyangasurur. Ani, ukura Kadesh atei yandoka kunmabci, kan mutuk wiliba dam yanmab. 17Ati, kanci nunsi mundu lobsiminyi ba, nun kan mutuk bisik yibindobkwayeb. Nunci kan wa in dam ab, kan co anggur wa in dam bisik kum yibinkwayeb. Ani, kan me ababyi nun kum yibde yibinkwayeb. Eda, ilila bisik akwe yibinkwayeb. Nunci siriktam dibde, kwanimtam dibde kum yibinkwayeb. Eda, u dikum dem baramibyi tok, kan mutuk wiliba bisiboka otam bindobkwayeb,” ebmai. 18Bok, a bokdonokmou nang aryi Edom sienyi bindoka Musa ebmou to ebmai ura, Edom mutuk ninyi aryi, sun Israel nang asi ato ebmai, “Sunci nun mutuk dam bisik yibana mem! A mutuk bisik yibanmamunyi ura, nunci mar bobkwamasib,” ebmai. 19Ura, sun Israel nang aryi sunsi tubto ato ebmai, “Nunda ilila bisik akwe yibindobkwamab. Ani, ninyi ab, nun bisam yabwe ab aryi sun me yibibyi ura, co bok dekwansib. Ati, nunsi sunci mundu lobsumunyi ba, tukwe bisik a yinbindobkwayeb, ati yandoka molobmasib,” ebmai. 20Uca, Edom mutuk ninyi sunci ato ebmai, “Sun a mutuk bisik yibana mem!” ebmai. Ura, Edom mutuk ninyi sakwetebokabiryi ninyi ilinto ab, yin doun nang ab kuboka nirya yanmai. 21Ura, Edom mutuk ninyi aryi, “Nun mutuk bisik yibasina nun li,” ebmai. Ba, sun Israel nang ara a bisik takloboka yuk bisik kuboka binmai.
Harun dibmou deyok
20:22-29
22Sun Israel ninyi Kadesh mutuk aryi anabdobmaici, mutuk kon si Hor dam binmai. 23Binmai ura, Er Iya Erebdobnyi biryi Musa ab, Harun ab asi, Hor mutuk kon Edom mutuk wiliba dam aryi ato ebmou. 24“Harun bira Niryi minob, ‘Kanaan mutuk wengbinkwandum,’ ebdeibse mutuk ara kum wengbinkwande. Ara, sun bitinyi aryi Meriba me u dam aryi Nisi malyi kibnururumwe ati ebman. 25Ati Musa kanci, Harun ab, er mi Eleazar ab asi nabminyi ura, Hor mutuk kon dub iniboka bowelebirum. 26Ara, Harun a mutuk kon dam dibkwamar ati, kanci Harun ongobmar Ni Iya Erebdobnyi biti dama deirin nang sun sienyi si imam besar ongon aling asi kwiriboka er mi Eleazar bisi ongobdeibdum,” ebmou. 27Ura, Musa biryi Er Iya Erebdobnyi ebdeibmou to kuboka kunubmouci, sun winiryi a mutuk kon dam welebinmai. Ura, sun Israel ninyi ara ou tikoka dibwelebmai. 28Musa biryi Harun ongobmou ongon aling kwiribtaleboka er mi Eleazar bisi ongobdeibmou. Ura, Harun bira a mutuk kon dub dam dibmou. Ba, Musa ab, Eleazar ab a mutuk kon Hor dub aryi yuryanmarei. 29Ba, sun Israel ninyi aryi kekeramnyi uca, “Harun dibmar,” ebmarei. Ura, sun Israel ninyi nirya aryi Harun dibmou ati, uki 30 baryi engeramnyi.
Currently Selected:
Bilangan Uram 20: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
