Imamat Uram 10
10
Nadab ab, Abihu ab dibmarei deyok
10:1-7
1Ura, uki tentok tum aryi sun Harun mabwe bitinyi si Nadab ab, Abihu ab aryi talyi uk kalum kin dinyi dobmareici, a uk kalum uk abdeibmarei. Ato kuboka sirya abdeibdei ura, a uk deici asi tong teleb co yung deibdongoboka dama deiboka uk dabkwamarei. Bok, Er Iya Erebdobnyi biryi sun a dama deiboka uk dabmarei dinyi asi kanyi deiboka kum dobdobmou. Ara, Er Imtamnyi biryi kum arukmou bok asi, dama deiboka molobmarei deyok aryi kanya deiboka kum dobdobmou. 2Ura, Er Iya Erebdobnyi biryi uk dobkwetebmou ba, sun bitinyi nong nirya uk yibmou. Ba, Er Iya Erebdobnyi urasintam a dibmarei. 3Ura, Musa biryi Harun bisi ato ebmou, “Er Iya Erebdobnyi biryi Er wa in nang ati minob uca ato ebdeiamwe. ‘Ni wa in nang imam nang ara Ni ebdeianyi uram asi diboka talebnuruboka kunubde bankwanung. Ba, sun Israel ninyi nirya ababyi Ni si weik eboka, “Nun molonanyi,” eboka molonkwanunung,’ ebdeiamwe,” ebmou. Bok, Harun bira uram kilikoka tikokmou. 4Ura, Musa biryi Misael ab, Elsafan ab nabmou. A mabwe bitinyi ara Harun er nai du mi Uziel mabwe kurandei. Nabmou ura, sunsi ato ebmou. “Sun kwit yabwe sun tukwi ara Er Iya Erebdobnyi ai dam aryi boboka yuk dikum bobirurum,” ebmou. 5Ura, Musa biryi ebmou to kuboka yanmareici, Nadab ab, Abihu ab tukwi doboka bobmarei. Ura, Er Iya Erebdobnyi ai dam aryi kuboka yuk ai bobinmarei. Ba, sun a dibmarei nang bitinyi ara sun imam nang ongon aling ongoblobmarei tok dibmarei.
6Ura, Musa biryi Harun ab, er mabwe bitinyi si Eleazar ab, Itamar ab asi ato ebmou. “A dibmaringnyi nang bitinyi boukwe ati kuramunci, sun ongon aling kwilikoka sun yuk nang ab tonkwa engebde buna mem. Tonda, sun otong malyito kurdeirdana mem! Sunci ato kubmunyi ura, sunda dibkwandum ba, Er Iya Erebdobnyi yu wekokabdiryi sun Israel ninyi nirya asi diba ati kerebkwamar. Bok, sun yuk Israel ninyi ara sun a dibmaring nang bitinyi ati sunci ur boukwe boboka engebkwamang. 7Sunda Er Iya Erebdobnyi wa ibde bankwamunyi ati sunsi tong teleb me kisok likeibsici sunsi sirya yuk wibdeiboka wa karebsou. A deyok aryi sunci Er Iya Erebdobnyi ai deirirlona mem! Asi sunci deiblobmunyi ura, sunda dibkwandum,” ebmou. Akiryi Harun ab sun Harun mabwe ab ara Musa biryi ebdeibmasou to kuboka kunubmai.
Sun imam nang walina talen me yina kum deyok
10:8-11
8Ura, Er Iya Erebdobnyi biryi imam Harun bisi ato ebmou. 9“Kan ab kan mabwe ab ara Er Imtamnyi ai Kemah Suci wa inkwamamunyi ura, ninyi walina talen me yina mem! A walina talen me yibmunyi ura, dibkwandum. A ebdeibmasin dinyi ara sunbabyi, odei-odei yaldakde binkwandum ninyi nirya ababyi kunubde binkwandum dinyi ati ebdeibmasin. 10Ba, sunci Er Iya Erebdobnyi biti yuk deirin dinyi ab, ur dinyi ab ara wiboka bikwandarur. Ani, Er Iya Erebdobnyi biryi, ‘Duknasito,’ tenerur dinyi ab, ‘Dobdobmanto,’ tenerur dinyi ab ara diboka wiboka bikwandarur. 11Ani, Er Iya Erebdobnyi biryi Musa deici aryi, ‘Ukubde binkwanung,’ eboka iya kibdeibwe dinyi nirya ara sun Israel ninyi nirya asi eterebkwandarur,” ebmou.
Er Imtamnyi biti deibmangnyi dama aryok sun imam nang ababyi don deyok
10:12-20
12-13Ura, Musa biryi Harun ab, er kam tuba mabwe Eleazar ab, Itamar ab asi ato ebmou. “Er Imtamnyi biti yina-yina Korban Sajian dama deiboka uk dabde bankwaming yina dinatam ara sunci ur doronkwandum. Dobdobmunyi ura, roti bungbung erande keica si ragi aryi dongoboka kiknina kum roti kwaning kibdeibmunci, yinkwandum. A yina ara Er Imtamnyi biti yuk deirinkwaming yina asi yinkwandum ati, Er Imtamnyi biryi wiboka yuk dikum yibkwandarur. Ura, Er Imtamnyi biti dam deirin keil dungna dinatam akwe bobindoka yirbankwandarur. Ato kuboka Er Imtamnyi biryi ni deici ebdeibsou ati ebman. 14Ba, bisam taram asi douboka Er Imtamnyi biti Er urasintam amuraming dama ara sun ab, sun mabwe nermabwe ab ur yinkwandum. Ani, bisam yan asi Er Imtamnyi biti yuk wiboka deirinkwaming dama ababyi sun ab, sun mabwe nermabwe ab ur yinkwandum. A yinkwandum dikum ara lek kianci dikum asi sunci bobindoka yinkwandum. Ani, a yinkwandum dama ara sun Israel ninyi malyi kuamingnyi aryi lemdarona ati deirinkwaming dama asi yinkwandum. 15Ara, Er Imtamnyi biti yuk wiboka dibkwamangnyi bisam yan ab, Er urasintam amuboka deibkwamangnyi bisam taram ab ara bisam mita dama deirin keil lamna dam boboka Er Imtamnyi urasintam amubkwandum. Ba, sun Israel ninyi aryi Er Iya Erebdobnyi biti ato kuboka sirya dama deibingnyi ura, sun dinyi kimnikwansurur eboka iya kibdeibsou,” ebmou.
16Ura, Musa biryi sun ninyi malyi kun dinyi kilina ati deiriraming bisam kambing yim ati bita lilibdenmou. Uca, Harun mabwe Eleazar ab, Itamar ab a bisam nirya dama deiboka uk dabmai ba, sunsi ato eboka kerebmou. 17“Unato ati Israel ninyi malyi kun dinyi kilina ati dama deibmongwe dinyi ara Er Imtamnyi ai dam aryi kum yibmarum do? A dama ara Er Iya Erebdobnyi biti yuk wiboka deiriraming dama asi, Er Imtamnyi biryi, ‘Sun imam nang yinkwaming,’ eboka karebsou. Ba, sun Israel ninyi malyi kun dinyi ara Er Imtamnyi biryi kilibde bankwande. 18A bisam kambing ining ara Er Imtamnyi ai beterdongona mem dam boboka wengbana mem! Eda, Niryi asa dikum asi deiboka yibkwandarur ebdeibsise dikum asi deiboka yibkwandarur.” 19Ebmou uca, Harun biryi Musa bisi ato ebmou, “Nai diba, ‘Er Imtamnyi biryi nun malyi kun dinyi kilibsute,’ tenen bisam domba oboka uk dan dama ara Er Iya Erebdobnyi urasin dam sirya dama deiboka uk daryanmang. Bok, niryi kan ebdeibmasumwe to kuboka kum kunubman. Ara, ‘Ni mabwe dibmaring bok asi a dama yinmanyi ura, Er Iya Erebdobnyi kanya teleb kum kubcei,’ tenen ati kubman,” ebmou. 20Ato ebmou ba, Musa biryi ersi ato ebmou, “A kubmarim to ara telebto kubmarim,” ebmou.
Currently Selected:
Imamat Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
