Imamat Uram 9

Sun imam nang wa dobmai deyok

9:1-24

1Ura, sun ninyi malyi kun dinyi ati kilina weik li doboka lukunda kitingtam Er Imtamnyi ai si Kemah Suci ai dam kuramnyi. A kuramnyi uki ara uki tabaryi sirya kubmaici, uki inbaryi tum wengbinmai. A uki inbaryi tum ara Musa biryi Harun ab, er mabwe ab sun Israel atei weik wa dobdob nang ab asi naboka bulubdeibmou. 2Ura, Harun bisi ato ebmou, “Kan malyi kun dinyi kilina ati bisam lembu yim ukuryok nerlonmar bisam boyaminyi ura, Korban Penghapus Dosa ati dama deiboka molobdum. Ani, bisam domba nong nirya oboka uk dana ati bisam domba yim boyaminci, Korban Bakaran ati dama deiboka molobdum. A bitinyi boyankwamarim bisam nirya ara sun nong bol tungdena kum kubmaci bisam asi boyarum. Sirya boyaminyi ura, Er Iya Erebdobnyi urasin dam asi Erti dama deiboka molobdum.

3Ba, sun Israel ninyi ara ato ebdum, ‘Bisam kambing yim ara sun malyi kun dinyi kilisina ati boyandarur! Ba, bisam lembu mi yim ab, bisam domba mi yim ab, bisam lembu ab, domba ab oboka nong nirya uk dana ati boyandarur! A bisam mi bitinyi nirya ara sun nong bol tungdena kum kubmariryi, kwalina tentok kimbinmaci bisam asi boyandarur. 4Ani, bisam sapi yim ab bisam domba yim ab ara Er Imtamnyi ab lemdarona ati Er Iya Erebdobnyi urasin dam boyandoka Korban Keselamatan ati dama deiboka molondarur. Ba, a uki tum ara Er Iya Erebdobnyi bira sun Israel nang kankan dam yandoka lak kibdankwamar asi eibkwamarum. Ati, yina-yina dama deiboka uk dabmamunyi dinyi Korban Sajian ara minyak aryi dongoboka dabdarur,’ ebdum,” ebmou.

5Ura, sun Israel ninyi nirya aryi Musa biryi ebdeibmou to kuboka Kemah Suci dam boyandoka bulubmai. Boyandoka bulubmaici, dama deiboka Er Iya Erebdobnyi urasin dam tikmai. 6Ura, Musa biryi sun Israel ninyi nirya asi ato ebmou. “Er Iya Erebdobnyi biryi ebdeibmasou to kuboka kunubmarum. Ba, sunci Er ibarya lak kimdana eibkwamarum,” ebmou. 7Ura, Musa biryi Harun bisi ato ebmou. “Er Imtamnyi biti sun malyi kun dinyi kilibsute tenen bisam domba oboka uk dana dinyi ab, bisam domba oboka nong nirya uk dan dinyi ab dama deiboka uk dabkwamarim ati dama deirina keil dungna dam yandoka bisam sekoka tourminingyarum. Ara, kan malyi kun dinyi ab, sun Israel ninyi nirya malyi kun dinyi kilibmunyi ura, Er Imtamnyi ab antanirdeirina ati, Er Iya Erebdobnyi biryi ebdeibwe to kuboka kiknirmining yarum,” ebmou.

8Ebmou ba, Harun dama deirin keil lamna dam bindoka er malyi kun dinyi kilina ati bisam sapi mi Korban Penghapus dosa ati sekoka toubminikmou. 9Ba, Harun er mabwe aryi a bisam ining karebmai. Ba, er taruk du aryi a bisam ining likmouci, dama deirin keil lamna kisok yang dumbaryi belebdeibnin yibinamnyi er urub-urub asi lubdeibnin yibinmou. Ba, a bisam ining dinatam nirya ara a dama deirin keil lamna amwetam dikoka aknabdongobmou. 10Ba, a bisam er mita ab, er kilirukna bitinyi ab, er boukwe ab ara Er Iya Erebdobnyi biryi ebdeibmou to kuboka Er Imtamnyi biti dama deirin keil lamna dub dama deiboka uk dabmou. 11Bok, a bisam er tub ab, kala ab ara Er Imtamnyi ai dam sakweteboka, a yuk uk darban dikum kiknibdeiamnyi ai darbinmai.

12Ura, Harun biryi er malyi kun dinyi ati, bisam domba bitinyi dinyi korban bakaran ati ngang sekmou. Ura, er mabwe aryi a bisam ining ersi doboka karebmai ba, Er Imtamnyi biti dama deirin keil lamna kubkub dumbaryi nirya asi dikoka aknabdongobmou. 13Ani, a bisam kisok ab, yuk toubdoba ab nirya sun nai Harun bisi karebmai ba, a dama deirin keil lamna dub dama deiboka uk dabmou. 14Ba, a bisam deisu ab, siriktam yan ab ababyi me ilikoka, Er Imtamnyi biti dama deirin keil lamna dub korban bakaran ati dama deiboka uk dabmou. Harun er malyi kun dinyi kilina ati, Er Imtamnyi bisi ato kuboka dama deiboka uk dabmou. 15Ura, Er Imtamnyi biryi sun Israel ninyi nirya malyi kun dinyi kilina ati, Harun biryi bisam kambing yim doboka ngang sekmouci, Korban Penghapus dosa yuma dinyi to dama deibmou. 16Ani, a bisam kambing yim dama deirin keil lamna dam bobindoka Er Imtamnyi biti bisam domba oboka nong nirya dama deiriramnyi to kuboka dama deibmouci, molobmou. 17Korban bakaran sirya dama deiboka molobmou ura, yina-yina korban sajian dama deiboka molobkwamouci, tepung taruk ongomna tentok doboka dama deirin keil lamna dub korban bakaran ab tonkwa dama deiboka uk dabmou.

18Ani, sun Israel ninyi nirya asi Er Imtamnyi biryi, “Lebkwande,” tenen Korban Keselamatan ati, bisam sapi yim ab, bisam domba yim ab ngang sekoka dama deiboka molobmou. Ura, Harun mabwe aryi a bisam bitinyi ining doboka karebmai ba, Harun biryi dama deirin keil lamna dumbaryi kubkub nirya asi dikoka aknabdongobmou. 19-20Bok, a bisam bitinyi sun amwe ai borande mita ab, mundu ai borande mita ab, deyok mirikna ai borande mita ab dama deiboka uk dabkwamou ati dobmou. Ani, er kilirukna bitinyi ab, boukwe ab ara doboka a bisam yabwe sun taram deici deibmou. Ura, dama deirin keil lamna dub dama deiboka uk dabmou. 21Ba, a bisam yabwe sun taram ab, siriktam yan ab ara Harun biryi Er Iya Erebdobnyi urasintam asi, Musa biryi ebdeibmou to kuboka ereboka taruk sunukoka molobmou. 22Harun biryi ato kuboka Er Imtamnyi biti anda dama Korban Penghapus dosa ab, korban bakaran ab, Korban Keselamatan nirya deiboka sirya molobmou. Ura, sun Israel ninyi nirya asi er taruk bitinyi imtam lak welebmouci, sunsi kisal dakmou. Ura, Er Imtamnyi biti dama deirin keil lamna dub aryi sakwetebmou.

23Ura, Musa ab, Harun ab ara Kemah Suci ai wekmarei. Wekmarei ani, anabmareici, sun Israel ninyi nirya asi kisal dakmarei. Ura, sun Israel ninyi Er Iya Erebdobnyi ibarya milil eibmai. 24Ba, Er Iya Erebdobnyi biryi Er uk dobkwetebmou ba, Erti dama deirin keil lamna dub deibmai dama bisam mita nirya ara a uk aryi yibkabokmou asi eibmai. Ato kubmou asi sun Israel ninyi nirya eibmaici, sun nong nirya tukwe ai maboka Er Iya Erebdobnyi bisi, “Nun Nai,” eboka molobmai.

Currently Selected:

Imamat Uram 9: MTG

Highlight

Copy

Compare