Imamat Uram 11

Ur yin kamyoa ab yina mem kamyoa ab deyok

11:1-47

1Ura, Er Iya Erebdobnyi biryi Musa ab Harun ab asi ato ebmou. 2“Sun Israel ninyi nirya asi ato ebdurum, ‘Tukwe dangna mutuk dam aryi tukwe ai bunkiliraming kamyoa yan dumbaryi kamyoa nirya ara sunci ur yibde binkwandum. 3A ur yibde binkwandum kamyoa ara sun yan kila isiboka bitinyi kimdarandaryi, yina yibmangiryok tubto mundu umbura aryi tamuboka si dam yaci ura, langnaming kamyoa asi ur yibde binkwandum.

4-6Bok, sun yan kila isiboka bitinyi kimdarandaryi, yina yibmangiryok tubto mundu umbura aryi tamuboka si dam yaci ura, langnaming kamyoa kankan asi sunci yina kum kubkwandum kamyoa ara bisam unta ab, mitik bisam rusa si pelanduk ab, weinya kelinci ab ara kum yibkwandum. Anda kamyoa ara yina mundu umbura aryi tubto weleyandoka si dam yaci ura, lakde yinung, bok sun yan kila isiboka bitinyi kum kimdur. 7Ani, bai kurande bisam ara yina mem! Anda bisam ara yan kila kimdur bok, yina yibmangiryok tubto mundu umbura aryi tamuboka si dam yaci ura, kum langnaming deyok aryi yina mem bisam kubkwaming. 8Ani, bai kurande bisam tub ab, kelinci tub ab, bisam si unta tub ab ara sunci yina mem! Tonda, sunci anda bisam yok ara bolirdena mem! Anda bisam ara yina mem bisam kubkwaming.

9Ba, me kin ai kurande kamyoa ara mekinaia er ol dina-dina kubkub belerande dinyi ab, er bol kila alib kila kurande kamyoa ab asi sunci ur yibde bankwandum. 10Bok, me kin ai kuranda aryi kubkub belena kum kurande kamyoa ab, alib kila kum kuanci kamyoa ab ara sunci yina mem! Eda, sunci anda kamyoa asi duknasito dinyi kibdeibkwandarur. 11Ani, anda kamyoa sun tub yiboka sun yok bolirdena mem! Ara, sunci duknasito kamyoa kibdeibkwandarur. 12Anda kubkub belena kum kurande kamyoa ab, alib kila kum kuanci kamyoa ab nirya ara sunci duknasito kamyoa kibdeibkwandarur.

13-14Ba, maka yala asi sunci duknasito dinyi tenebmunci, kum yibde binkwandum maka yala ara maka bib yala ab, maka kawok yala ab, me kwan deici kurande bib ab, bi bol kurande bib ab, mirin bol bib ab, bib yala nirya yina mem! 15-16Ani, maka si gagak er yala nirya ab, maka solman ab, maka si blekok ab, maka camar ab ani maka mekinaia yirande maka okbayol yala nirya ab, maka si kasa ab keis yala ab ara yina mem! 17Ani, maka si kasa pungguk ab, maka si dendang me deici kurande maka ab, weik solman ab ara sunci yina mem! 18-19Ani, maka solman er otong kait dinyi ab, maka undan ab, maka ering ab, maka ranggung ab, maka okbayol er yala nirya ab, maka meragai ab, keis yala ab ara sunci yina mem! Anda maka nirya ara sunci duknasito maka yala kibdeibkwandarur.

20Ani, mundu tang deib yibarande dinyi ab ol aryi langlang eryibarande dinyi ab, yan dumbaryi kiboka yibaraming kamyoa ab ara sunci yina mem! Eda, sunci anda kamyoa nirya asi duknasito dinyi kibdeibkwandarur. 21Bok, sunci ur yinkwamunyi kamyoa ara er yan aryi im kurung eboka sangdona keil borande kamyoa ara ur yinkwandarur. 22Ba, kwising yala asi sunci ur yibde binkwandum kwising ara belalang gambar ab, belalang kunyit ab, belalang padi yala nirya ab asi yibde binkwandum. 23Bok, yuk tukwe ai yibarande kamyoa yala nirya ara sunci yina mem! Ara, olyoa babyi, yan ilinto borande kamyoa babyi tukwe ai mablitikoka yibarande kamyoa babyi nirya ara sunci duknasito dinyi kibdeibkwandarur.

24Ba, sunci anda dinyi nirya asi kubmunyi ura, duknasito ninyi kibdeibkwansir. Ara, sunci talyi yina kum kamyoa asi bolibmunyi ura, duknasito ninyi kibdeibmasici ba, kunmamunyi tok asi sintam kibkwandur. 25Ani, sunci talyi yina kum kamyoa dibmaca asi boyanmamunyi ura, sun ongon aling ara me ilikdobkwandarur! Ato kuboka me ilikmamunyi ababyi tuba duknasito ninyi kibdeibmasici tok asi sintam kibkwandur. 26Anda kamyoa sun yan kila isiboka bitinyi kum kurande kamyoa ab, yina yibmangiryok tubto mundu umbura aryi tamuboka si dam yaci ura, kum langnaming kamyoa ab ara talyi yina kum kamyoa kunung. Ba, sunci a duknasito kamyoa asi bolibmunyi ura, duknasito ninyi kibdeibkwandarur. 27Ani, sun yan dumbaryi aryi yibaraming kamyoa kuraming noutam aryi sun yan tatang deib yibaraming kamyoa nirya ara duknasito kamyoa kuraming. Ati, sunci a kamyoa dibdoba asi bolibmunyi ninyi ara duknasito ninyi kibdeibmasici tok asi sintam kibkwandur. 28Ani, sunci a kamyoa dibdoba asi boyanmamunyi ninyi ara sun ongon aling ilikdobkwandarur! Ato kuboka ilikmamunyi ababyi tuba duknasito ninyi kibmasici tok asi sintam kibkwandur. Anda kamyoa nirya ara duknasito kamyoa kunung.

29-30Sunci talyi yina kum kubkwandum kamyoa ara: tukwe ai taram deib yibarande kamyoa nirya ab, bunkiliraming kamyoa ab nirya ara sunci yina mem! 31Sunci anda kamyoa nirya asi duknasito dinyi kibdeibkwandarur! Unanyi biryi anda kamyoa dibdoba asi bolibmamunyi ura, duknasito ato ninyi kibmasici asi sintam kibkwandur. 32Anda kamyoa dibdoba sakmariryi, ninyi bun sokon deici kum, man sokon deici kum, kalun aling deici kum, ongon aling deici kum, kamyoa bol bok asi ninyi ongon aling kimdaming ongon aling deici kum asi bolibmaci dinyi nirya ara duknasito dinyi kibkwandur. Ati anda bolibmaci dinyi nirya ara me umbura dongoblobkwamandarur! Sirya ato kubmunyi ura, anda dinyi nirya ara tubto lek dinyi kibkwandur. Bok, anda bolibmaci dinyi nirya ara duknasito dinyi kibmaci tok asi kiting wekwandur. Ani, ambutum berekci ura, me ilikwandarur ba, sunsi tubto me ilikdob nang kibkwansurur. 33Ani, dibdob kamyoa aryi sakoka tukwe aryi kikniraming kwaning yun belanga bolibmaci ura, sunci anda yubmamunyi yina nirya ara duknasito dinyi kibkwandur. Ati, sunci a kwaning yun belanga asi tolobkabkwandarur! 34Ani, dibdob kamyoa bolianci kwaning yuna ara sirya duknasito dinyi kiandur. Ani, a kwaning yuna umbura kubmaci me ababyi sirya duknasito dinyi kiandur deyok aryi sunci yina mem! 35Ani, kamyoa dibdoba aryi ukutotoa dub sakmaci ura, a ukutotoa ara duknasito dinyi kibkwandur. Ani, a dibdoba bolibmaci kwaning yuna keica oven ab kompor ab ara tolobkabkwandarur! 36Yuk dinyi nirya ara duknasito dinyi kibkwamarur. Bok, sun yiramunyi me lokamnya ara lek dinyi kibkwandur. 37Ani, anda kamyoa dibdoba aryi koubkwamunyi yala du asi sangkuna bolianci dinyi ara duknasito dinyi kum kibkwandur. 38Eda, anda kamyoa dibdoba aryi a koubkwamunyi yala du me toubmamunyi asi bolibmaci ura, a yala du ara duknasito dinyi kibkwandur.

39Tonda, er yuk dibmaci kamyoa asi sangkuna sunci bolibmunyi ura, duknasito ninyi kibmasici tok asi sintam kibkwandur. 40Ani, a er yuk dibmaci kamyoa asi yibmamunyi ninyi ara sun ongon aling me ilikdobkwandarur. Ato kuboka sirya me ilikdobmamunyi ababyi tuba duknasito ninyi kibmasici tok asi sintam kibkwandur. Ani, a er yuk dibmaci kamyoa asi boyanmamunyi ninyi ara sun ongon aling me ilikdobkwandarur. Ato kuboka sirya me ilikdobmamunyi ababyi tuba duknasito ninyi kibmasici tok asi sintam kibkwandur.

41Tukwe dangna mutuk dam aryi tukwe ai bunkiliraming kamyoa nirya ara duknasito dinyi kurur ati sunci yina mem! 42Ani, taram deib yibaraming kamyoa ab, yan dumbaryi aryi yibaraming kamyoa ab, yan ilinto aryi yibaraming kamyoa ab nirya ara duknasito dinyi kurur ati sunci yina mem! 43Anda kamyoa yina aryi duknasito ninyi kibdamunyei! 44#1Ptr. 1:16 Ni Iya Erebdobnyi sun molonindarurnyi bira Iya Leknyi kunun. Ati, sunbabyi lek ninyi kibdandobdarur! Ani, tukwe dangni kurur kamyoa nirya yina aryi duknasito ninyi kibdeibsicei. Ara, tukwe ai bunkiliboka yibaraming kamyoa ab, taram deib yibaraming kamyoa ab ara sunci yina mem! 45Nira Iya Erebdobnyi biryi sunsi mutuk Mesir dam aryi bobde yasisiryi, sun molonanyi kibsise. Ni Imtamnyi bira iya leknyi kunun ati, sunbabyi lek ninyi kibdandobdarur!’ ebdurum,” ebmou.

46Tonda, Er Imtamnyi biryi ato kuboka ebdeibsou. “A kamyoa ara duknasito kamyoa ab, duknasito kum kamyoa ab kuraming. Ati duknasito kamyoa ara nunci talya yina mem! Eda, duknasito kum kamyoa ara sun Israel ninyi aryi ur talya yibde binwandarur. 47A yan memen dinyi ara Er Imtamnyi biryi li tenerur dinyi ab, ur tenerur dinyi ab liliboka dinyi kurur. Ani, ur yin kamyoa ab, talyi yina kum kamyoa ab liliboka bingni dinyi kurur,” ebdeibsou. Ato kuboka, Musa ab, Harun ab aryi sun Israel ninyi asi Er Iya Erebdobnyi biryi ebdeibmou to kuboka sun dam ebmarei.

Currently Selected:

Imamat Uram 11: MTG

Highlight

Copy

Compare