Yoel Uram 1
1
Deyok
1:1
1Ara, Er Iya Erebdobnyi biryi Petuel mi si Yoel bisi uram ebdeibmou uram deyok.
Er Iya Erebdobnyi biryi sun Yehuda mutuk nang asi wenenmouci, kwising langkarikoka karebmou uram deyok
1:2–2:11
2Er Imtamnyi uram ermururamunyi si nabi Yoel biryi ato ebmou,
“Sun Yehuda mutuk atei nang bobde menengna nang ara a ebkwaman uram asi diboka kekendarur.
Sun akatei kundarur nang yuk nang ababyi sun amol tang ebdeiboka kekendarur.
Er Imtamnyi biryi, ‘Wenen dinyi karebkwan,’ tenen kwising mitik kum langkarikoka karebsou uca, kwaning ataransir deyok ati ebman.
Ato kun dinyi ara sun min kurandau talak aryi ton eibmandau do?
Ba, minob sun abwe yabwe kuramnyi talak aryi ato dinyi kunuamwe ba, sun dam asi aminda ton nungnamnyi ba, kekerandau do?
Ato tenen kum.
3A kunurur dinyi ara wenesina weik dinyi kurur ati, sunci sun mabwe asi nukarebde binkwandarur.
Ba, sun deirandum mabwe aryi sun deibkwaming mabwe asi nukarebkwanung.
Uca, sunci deibkwaming mabwe aryi o deibkwaming mabwe asi a kunurur dinyi ati nukarebdanin binkwaming ati ebman.
4Ara, kwising yubwa-yubwa ilinto aryi sun wa in dam koubdoba deici amuryandoka yirkiriraming deyok asi nukarebdanin binkwandarur.
Ba, tentok-tentok takdongoamingnyi dinyi ara ton yuk kwising yubwa-yubwa aryi amuryandoka yiramingnyi uca, kum danardeirinung.
Ani, a kwising yubwa-yubwa aryi takdongobingnyi dinyi ara yuk kwising yubwa aryi amuryandoka kum danardeirinung deyok asi nukarebdanin binkwandarur.
5Kwising yubwa-yubwa aryi anggur du nirya yibsekmang ati, ninyi aryi anggur du yung kum yibkwaming.
Ati, we walina talen me yinyi mer e, sunci bukoka engerondarur se!
Anggur me yinyi mer se, anggur du yung me kum danmar ati, sunci isin dakeiboka-dakeiboka engerondarur.
6Kwising mer yubwa ara nukman kumto kuboka amuryanmasir, se.
Kwising yubwa ara mar ordana nang mikib nang ato kunungci, nun mutuk kum daneibmasing.
Ba, a kwising yuk-yuk sun si ara mikib weik kururci, nun koubdoba nirya asi yibsekmang, se.
Kwising si ara yu bisam singa ner bisam aryi yang belerande to dinyi kurur aryi nun koubdoba nirya asi yibkiribmasing.
7Ba, nun co anggur asi mumub-mumub eboka yirkirironmang.
Ani, nun co si co ara ababyi sirika dem taklobmang.
Ba, co nong ara kala kokob eboka yirkirironung ba,
co nong dem deirlonung.
8Ati, sun Yehuda mutuk nang ara, kam ner aryi er dobkwande eaminginyi dibmaci ba,
malyi limdon isin dakeiboka-dakeiboka engerande to kuboka
sunbabyi neiktoto isin dakeiboka-dakeiboka engebdobdarur.
9Ba, kwising yubwa aryi nun koubdoba nirya yibsekmar deyok aryi,
Er Imtam Erebdobnyi biti dama deirin ai dam deirirban gandum ab, co anggur du ababyi sirya kum danmar.
Ati, sun akai dam kuboka Er Imtamnyi iya Erebdobnyi biti wa irmilin nang,
ninyi dama deirin nang ara engen kanya boboka bukmang.
10Gandum du sirya kulubsekmar.
Ani, co anggur du murungdura ababyi sirya tumakmar.
Ani, co si zaitun du me ababyi kum danin banmar deyok aryi
ukutotoa koun tukwe ara koula ato danmar.
Ati, nun co yala nirya ara du ton kum mourdeirinkwansir.
11Gandum du ab, jelai du ab, wa in dam kurur dinyi ara
tumakoka koula dansekmar.
A deyok aryi sun wa irandum nang aryi engebdarur.
Ba, sun anggur wa irandum nang ababyi engebdarur.
12Anggur co sirya koula dansekwe.
Ani, co si co ara ababyi sirya yukmar.
Co si delima ababyi,
co si kurma ababyi,
co si apel ababyi wa in dam kurur co yala nirya koula dansekwe.
Ba, diba ati uku talak nun ninyi kanya ara kanya teleb kum kusurur.
Eda, nun kanya ara surungsurur.
13Gandum du ab, anggur du ab ara kum dandobmar ati, ninyi aryi Er Imtamnyi bisi dama kum deirinung.
Ara, gandum du boboka anggur du boboka Er Imtamnyi bisi dama kum deirinung.
A deyok aryi sun ninyi dama deirin nang ara engebdobdarur.
Lukunda ara sunci engen kanya boboka aling kolo doboka arikdandobdarur.
Sunda Ni Imtamnyi biti uk darandum nang a,
sunci isin dakeiboka-dakeiboka engebdobdarur.
14Ati, sunci sun Yehuda mutuk atei sien nang ab,
a mutuk dam kunung atei nang nirya ab nabmunci,
Er Imtam Erebdobnyi sun molondarurnyi ai dam bulubdeibdarur.
Bulubdeibmunci, sunci, ‘Er Imtamnyi biryi lebdeiboka yina yin dinyi tamuboka karebsute,’ tenen,
‘Yina si teboka bukibiryi, Er Imtamnyi bisi molobkwayeb,’ ebdarur.
15We nai e, a mabwa, a uki tum atiba! Diba ati,
Er Iya Erebdobnyi biryi wenebkwansir uki tum sirya dam kubmar.
Er Iya Mikibnyi biryi obminikwansir uki tum sirya yankwamar ati dam kubmar.
16Nun urasin dam aryi Er Imtamnyi ai dam dama deibkwamatibyi yina ababyi
sirya kum danmar asi eibmab.
Ani, Er Imtamnyi ai dam aryi kilkil kuboka mot semnub dinyi ababyi
ton kum semnamib ara bikdanmab.
17Koubdoba kouamoubwe dinyi ab du kwekamoubwe dinyi ababyi
tukwe ilim biribwe aryi sirya tumakoka koula dansekmar.
Ba, yina kiboka dongordeirin ai ara
yina yin dinyi tuba kum deirinub ati, daksekmar.
Ba, gandum du kibdeiboka dongordeirin ai nirya ara
lo dem asi dakminikmai.
18Bai sungsunga ababyi kum dansekmar ba,
ninyi winin bisam yala nirya ngwek-ngwek ebdanin banmang.
Ani, bisam kambing domba ababyi ngolongmang.
19Yo, Nai Iya Erebdobnyi, niryi Kansi uram doboka molobmakin.
Uk ato dinyi aryi nun winin bisam mol kwamdonung ai sungsunga nirya yaleboka yibkabokmar.
Ani, uk ato dinyi aryi bai tingdur co nirya yaleboka yibkabokmar aryi buta dem taklobmar.
A deyok aryi niryi Kansi uram doboka molobmakin.
20Ani, baitam kurande bisam ab yuk lulungnande dinyi ababyi sun yin me nirya cebwe.
Ani, sun yin sungsunga nirya uk yaleboka yininto kubwe.
Ba, iya mitika ton kuna kum kubwe aryi, sungsunga ab me ab atan aryi Kansi molorokunung,” eboka nabi Yoel biryi ebmou.
Currently Selected:
Yoel Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
