Yoel Uram 2

1Sion atei ara buu ena si trompet um bis buu eboka uram weik dobdarur.

Ara, Ni Imtamnyi biryi wibdeibse mutuk kon dub ai aryi kuboka sunci, “Kalikdarur,” tenen uram weik nun dobdarur.

Er Iya Erebdobnyi uki berekwande talak dam kubmar.

A berekwande tum uki ara sirya dam kubmar.

Ati, a mutuk atei nang nirya ur sirim talesina teleb.

2A tentok berekwande uki tum ara kunuk dakmurubkwande tum berekwande.

Ani, a uki tum ara duwa aryi ibdongoboka mo tululu eboka mutuk nirya lubkwande tum berekwande.

Kwising mer yubwa-yubwa yanganung ara duwa aryi ibdongoboka mo tululu erande to yanganung.

Kwising yubwa sun mikib ilinto ara yin doun nang aryi yubwa-yubwa ilinto ninyi mar bobaraming to kuboka yanganung.

A kurur to dinyi ara minob talak ababyi ato ton kum kuramwe to asi ukurur.

Ani, aminda talak ababyi mabwe odei-odei binkwaming talak ababyi a ukurur to ara iya ton kum kubkwande.

3Kwising mer yubwa-yubwa yanganungci, koubdoba dinyi nirya yirsengnung.

Sun kunung ai urasintam uk aryi yaleboka yirande ba, sun kunung ai dongtam ababyi ara uk buk lengkerengdur.

Sun kunung urasintam mutuk ara teleb mutuk yuma kobdob kikniamwe mutuk Eden ato mutuk bukwe.

Bukwe bok asi, utotoa nirya asi yibsekmang ani, sun dongtam ara keil yok dem taklobwe mutuk ato kibwe.

Ba, koubdoba dinyi tentok ababyi ton tangdongona kum kurur.

4Kwising nong ara bisam kuda ato kibwe.

Ba, sun cungyibanung ola ara cukoka menengbisirdaraming bisam kuda cungna ola ato cungyibanung.

5Ba, kwising yubwa ara mutuk kon dub ai asi kabliboka sangkurungmang.

Ba, sun lilim ara mar ordana nang aryi bobaraming kongkong ena ai lilim ato enmar.

Ara, kuda bisam aryi libtaleboka boban ai deici bukoka yibanmangnyi uca, kongkong eryibarande to kunmang.

Ani, ukutotoa yirkiringnung ara uk buk aryi ina ulungka yalibde yirande to kurkarongnung.

Ani, sun mikib ara mikib ilinto atei nang aryi yuk atei nang asi mar bobkwamingiryi, yin dobaraming to kunung.

6Ba, ninyi nirya a kwising yubwa ilil aryi sun sirim talerur.

Ninyi urasin nirya borbosa asok deiboka kol telerminingdur.

7A kwising yubwa ara ninyi mar bon nang ato cungyibanung.

Mar ordan nang ato kuboka keil lika weleboka sangkurungnung

ba, a kwising yubwa sun yuk-yuk u deiboka banmangnyi bisik ara

ton kirikoka yan dina-dina deirdena kum kunung.

8Sun banmangnyi bisik ara dongdongordana kum kunung.

Eda, sun yuk-yuk urasin deibmangiryi banmangnyi tok kuboka u dikum bis banung.

Ani, leleboka banmangnyi tok ani,

co balang aryi atei akdonokoka wengbaraming.

9A kwising yubwa aryi atei wengyandoka dalunung,

atei lika deici asi weleboka banung.

Atei lika deici weleboka ai dub banung

ani, ai yuk-yuk botorkwetena bisik kuboka wengbanung ara ukula don nang aryi kebum eboka wengbaraming to kunung.

10Ba, a kwising urasintam asi tukwe eimlam-eimlam erur

ba, im ababyi lulungdur.

Kiting ab, wala ab kunuk dangdur

ba, kurya tilirande dinyi ababyi kum danarur.#Why. 8:12

11Ba, Er Imtamnyi Iya Erebdobnyi biryi liman demnande lilim ato eboka

Er yin doun nang kwising mer yubwa urasintam asi uram erkarerur.

Ba, Er ab tonkwa mar bobanung kwising yubwa ara nukman kumto aryi bobanung.

Er uram ebmaci to kunurongnung kwising ara mikib mitik kum bonung.

Er Iya Erebdobnyi biryi weik wenen uki berekwande tum ara iya ilil tenen dinyi kunubkwande tum berekwande.

A uki tum ara unanyi biryi darabdongoboka tikwande do? A tum ara ninyi tentok ababyi ton darabdongoboka tingna kum kubkwaming.#Why. 6:17

“Malyi kuraming dinyi taklobtingiryi, danguboka Ni urasintam aryi teleb kubting,” tenen Er Iya Erebdobnyi biryi uram dobmou uram deyok

2:12-17

12Er Iya Erebdobnyi biryi uram ato ebdeibmou, “Weik wenen uki tum dam kubkwande.

Bok, ukuryok a talak akiryi kuboka sun kanyatam nirya diboka danguboka Ni tam asi urasin deibdarur.

Ura, ‘Er Imtamnyi biti kanya teleb kubdeibkwayeb,’ tenen yina si teboka bukmunci, yan kisiboka engeboka molobdarur,” ebmou.

13“Sunci, ‘Nai e, nun talya aryi malyito kunub ati taklobkwayeb,’ tenen ukubkwamamunyi ura, sun ongon aling ara kwilingdana mem.

Eda, sun kanyatam asi kwilikdandobkwandarur.

Er Iya Erebdobnyi bira boukwe kimsinanyi kurur, tonda bico tenesinanyi kurur.

Erda, minola yu wengkumnyi kurur. Eda, langdiboka boukwe weik kimsinanyi kurur.

Ati, Erci sunsi weneboka, ‘Orminingkwan,’ tenebmou dinyi ara, ‘Taklobkwan,’ tenebmasir.

Ati, sunci danguboka sun malyi kun dinyi taklobmunci, Er Imtamnyi tam asi urasin deibdarur.

14Er Imtamnyi biryi, ‘Wenen dinyi karebkwan,’ teneandiryok tubto taklobci ura,

Erci tamuboka sunsi kisal dangna dinyi aryi unubdongoboka sunsi yina karebkwansurura.

Ba, sunci a karebkwansir gandum du ab, anggur du ab boboka sun dama

Er Imtam Erebdobnyi biti karebkwandum.

15Sion mutuk dub ai aryi kuboka buu ena si trompet buu eboka uram weik dobdarur.

‘Sun Yehuda mutuk nang nirya buluryandarur,’ eboka nabmunyi ura,

‘Er Imtamnyi biti kanya teleb kubdeibkwayeb,’ tenen yina si teboka bukdarur.”

16Ura, Er Imtamnyi biryi ton ato ebmou, “Sun Yahudi nang bobde menengna nang aryi sun akatei nang nirya asi ato eboka naboka bulubdeibdarur.

‘Er Imtamnyi Iya Telebnyi urasintam asi buluryandarur,’ eboka naboka bulubdeibdarur.

Sunci Ni uram diboka keken nang yuk wiboka nabmunyi ura, bulubdeibdarur.

Wisi nang asi naboka bulubdeibmunci,

sun mabwe nermabwe ababyi tonkwa bulubdeibdarur.

Tonda, moum ukuryok dininmangnyi mabwe nermabwe ababyi bulubdeibdarur.

Ani, sal ner ukuryok dobdanmangiryi ai umbura bukmangnyi nang ababyi naboka bulurdeiryankwandarur.

17Ba, sun ninyi dama deirin nang ara Er Iya Erebdobnyi ai umbura dam wa in nang ati arukmasin.

Ara, ato, Er Imtamnyi ai dam wengbindoka atei lika bublan dam kan ninyi dama uk dan keil dungna kan noutam tikokabmunci, engebwilwilibdankwandarur.

Ura, sunci Er Imtamnyi urasintam aryi ato eboka molobkwandarur.

‘Se, Nai Iya Erebdobnyi se, Kanci nun Kan milikin nang ner sal asi boukwe kibdobsurum se.

Nun Kan milikin nang ner sal asi taklobsiminyi ba, yuk atei nang aryi malyi kiboka ato ebsingnyei,

“Sun Molonungnyi, Imtamnyi bira dantam kurur do?” eboka nunsi malyi kibsingnyei.

Ati, Kanci nunsi boukwe kibdobsurum,’ ato eboka engeboka molobdarur,” ebmou.

Er Iya Erebdobnyi biryi, “Wenen dinyi karebkwan tenebse bok, taklobkwan,” eboka kisal dangna dinyi tamuboka karebmou uram deyok

2:18-27

18Ura, sun Yehuda nang aryi Er Imtamnyi bisi molobmai.

Ba, Er Iya Erebdobnyi biryi Er tukwe Kanaan mutuk deyok aryi busul weik kubmouci,

Erci, “A mutuk dam koubdoba nirya kum daneibkwan,” tenen dinyi taklobmou.

Ura, Erci wibmou nang asi bico tenebmou.

19Er Iya Erebdobnyi biryi sun Yehuda nang ara Erci wiamwe nang asi ato eboka uram dekeibmou:

“Diba ati, Niryi sunsi tubto kum deiblobkwansin.

Niryi sunti gandum du ab, anggur du yung me ab, zaitun du yung me ab tamuboka langdiboka karebkwansin.

Sirya karebsinyi ba, yiramunyi uca, tamuboka boubkwansir.

Niryi sunsi kum deiblobkwansin.

Ba, sun yuk atei-yuk atei nang aryi sunsi tubto tamuboka ina kum ngilikwansing.

20Ba, kwising yubwa me utam kuboka aryi yanmai yubwa ara Niryi yuk mutuk asi yakdonokwan.

Ara, keil yok dem nyeleblobwe mutuk asi yakdonokwan.

Ba, kwising yubwa menekoka yanmai yubwa ara Niryi yaletam kuboka deibwe me kwan umbura asi yakdonokwan.

Ba, dongtam yanmai yubwa ara kitingbantam kuboka deibwa me kwan umbura asi yakdonokwan.

Ba, a kwising yubwa nirya ara isin dakoka dibsekwaming ura, sun lun tong ara iya malyi tong ebkwande.

Ara, a kwising yubwa aryi sunsi weneransei asi Niryi obkaboknyi ba, ato kubkwande.

21Yehuda mutuk wa in dam tukwe ati ato ebman.

Er Imtamnyi biryi ilil tenen dinyi wa isurur aryi

sunda ilil kanya bona mem.

Eda, kilkil kanya boboka mot seboka dangdonkwandum.

22Winin bisam babyi bai bisam babyi ilil kanya bona mem.

Sun sungsunga yirandum mutuk lu ara sungsunga sirya tubto burubmasir ati ilil kanya bona mem.

Ani, co sirya du moubkalibmar.

Co si co ara ab, co anggur ababyi du mouboka lubde yibanmar ati ilil kusina mem.

23Ba, sun Sion atei kurandum nang e.

Er Iya Erebdobnyi sun Molondarurnyi biryi lebdeibmasir deyok aryi

sun kilkil kanya boboka mot sakoka semyibandarur.

Erci sunti mourya li aryi mo karebmasir.

Minob kuramwe to kuboka mourya li dobkwamaci ura, mo cemnanci ani,

co keta li dobkalibmaci ura, mo tubto cemdeinkwansir.

24Gandum du ara langdeiboka mounkwansir ba, sun gandum du kala longna ai ara langkarikdeinkwansir.

Ba, co anggur du yung uruboka deirin ai ab, co zaitun du yung uruboka deirin ai ab ababyi langdeinkwansir.

25Nira Imtamnyi biryi sunsi tamuboka langdiboka kisal dangna dinyi karebkwansin.

Ara, tubto demdongnande kwising ab,

biriring eryibarande kwising ab,

ong ibloboka yirande kwising ab aryi

sun kouryina yibkiriamingnyi dinyi ara Niryi unuboka karebkwansin.

A kwising yala yubwa aryi yiramingnyi ba, kuamunyi to kwalina nirya karebkwansin.

Ara, Niryi Ni yin doun nang ato kuboka kwising yubwa yuk-yuk kareansinyi ba, yibkiriamingnyi deyok aryi Niryi unuboka karebkwansin.

26Ba, sunci a yina yiramunci boubsir ba,

sun kanya kilkil kuboka Ni Iya Erebdobnyi, sun Molonindarurnyi bisi si weik ebkwanurum.

Nira sun urasintam asi ilil tenen dinyi kiknibdeiansininyi bisi si weik ebkwanurum.

Ba, Niryi wibdeiansise atei nang ara alyi iya ton kum kubdeibkwansin.

27Ba, sunci Nisi bikwanurum. Ara, Nira sun Israel nang kankan dam kununyi kunun ati bikwanurum.

Ani, Nira Iya Erebdobnyi bira sun molonindarurnyi kunun ati bikwanurum.

Yuknyi da ton kum kurur ati bikwandum.

Ba, sunda Niryi wiansise atei nang ara alyi iya ton kum kubkwansir.

Eda, teleb akwe kubkwandum,” ato eboka Er Iya Erebdobnyi biryi ebmou.

Er Iya Erebdobnyi biryi malyi deyok liliboka wenebkwande uki berekwande tum uram deyok

2:28-32

28“A talak ara sirya bisibmaci ura,

ninyi nirya dam asi Ni Kanya Roh Kudus asi dobkwetebkwan.

Ba, sun mabwe ab, sun nermabwe ab aryi aminda kunubkwanci dinyi ati minob bikoka lak eterebkwaming.

Ba, sun atei nang ninyi wisi nang ara lengdera deib aryi eibkwaming.

Kam ner sal ara kunumna eibkwaming.

29A talak ara sun ai wa irmilin nang babyi, wa irmilin nerabwe babyi, sun dam asi

Ni Kanya Roh Kudus dongobdeibkwan.

30Ni Imtamnyi biryi ilil tenen dinyi yuk-yuk kiknibkwan. Ara, im deici ab, tukwetam ab asi ‘Se, Nai e,’ tenen dinyi yuk-yuk kiknibkwan. Ara, ining ab, uk buk ab, sukubdob tulum ab kiknibkwan. 31Kiting berengnande dinyi ara kunuk dakwande. Ba, wala ara ining bol deibkwande. A dinyi nirya ara sirya kunubmaci ura, Er Iya Erebdobnyi uki tum berekwande. A uki tum ara iya weik uki tum kubdiryi, ilil weik tenen uki tum berekwande.#Mat. 24:29; Mrk. 13:24-25; Luk. 21:25; Why. 6:12-13 32Ba, Er Iya Erebdobnyi si asi nabdobingnyi sal kum ner kum ara lemna dinyi dobdobkwande. Ara, Sion mutuk dub ai ab, Yerusalem atei dam ab ara lemna dinyi kubkwande. Ara, Er Iya Erebdobnyi biryi uram ebdeiamwe to aryi lemna dinyi dobdobkwaming. Er Imtam Erebdobnyi biryi namnande ba, Er dam yangaroramingnyi nang ara sunbabyi lemna dinyi dobdobkwaming,” ebmou.#Rom. 10:13

Currently Selected:

Yoel Uram 2: MTG

Highlight

Copy

Compare