Hosea Uram 14
14
1Sun Samaria mutuk nang aryi Er Imtamnyi sun Molonanyi bisi lebesengnung deyok aryi wenen dinyi dobdobkwanung.
Ara, sun akatei nang ara ya si deici aryi dibkwaming.
Ba, sun mabwe nermabwe alok ara tulubkabokwaming.
Ba, sun nerabwe mundu boamingnyi nerabwe ara ya mundu taraklobkwaming.
Tamuboka Er Imtamnyi tam deibmai ba, lemna dinyi kunubdeibmou uram deyok
14:2-9
2Er Imtamnyi biryi ato ebmou,
“We Israel nang a, sunda sun mining malyi kundarur dinyi aryi ilabkaboka sangdarur.
Ati, sun malyi kundarur dinyi ara deibloboka Er Iya Erebdobnyi, sun Nai Imtamnyi tam asi urasin deibdarur.
3Sunci Er Iya Erebdobnyi tam asi urasin deibmunyi ura,
Ersi uram sisikoka molon dinyi aryi Erti sun dama deirininto kubdandarur.
Ara, ato eboka molobkwandarur:
‘Nai Imtamnyi, Kanci nun malyi kunub dinyi kilibsurum.
Kanci nun molona kekebsurum.
Ba, nunci Kan dam asi uram ebdeiboubwe to kuboka Kansi si weik eboka kibdobkwankib.
4Asyur mutuk nang aryi nunsi kum lemdeisunung.
Ani, bisam kuda deici bukoka mar ibaraming bisam aryi nunsi kum lemdeisurur ati, nunda Kan kikwe dibde bunkwankib.
Kan Iya Erebdobnyi biryi nun kwaknamni mabwe nermabwe ato kunub asi boukwe kimnasirim.
A deyok aryi nun taruk aryi kiknin kwemdeina asi tubto, “Kanda nun molonanyi kurum,” kum ebkwayeb,’ eboka molobdarur.
5Niryi sunsi yu kuranir dinyi ara sirya mundu tebmanir.
Ati, Niryi sun lebesengnung dinyi ara dangubdeibkwan.
Ura, Niryi sunsi Ni kanya teleb aryi boukwe kibkwan.
6Nira sun Israel nang ati, mutuk buta dem bukanci mutuk asi
belukuna mo doum-douma aryi turdeirirande atonyi kubkwan.
Ba, sunda sikil keta asi keta telebto orande to kubkwaming.
Ani, sunda boubla co aryi balangnande to kubkwaming.
7Sun kubkwaming ara yating aryok luk deiboka weik arande co ato kubkwaming.
Ani, co zaitun bol teleb arande ato kubkwaming.
Ani, Libanon mutuk tingdarur co asi siltong teleb erande ato nang kubkwaming.
8Sunda tamuboka yandobingiryi, Ni boukwe dam kubdobingnyi ba,
gandum wa in dam aryi telebto kuboka luluk arande to kubkwaming.
Ani, co anggur du betekoka abokabdiryi weik kimnande to kubkwaming.
Ani, sunda Libanon mutuk kurur co anggur ati, si weik ererdeiraming to sun si asi weik erebdeibkwaming.
9We Efraim nang a.
Nira sun kwemdeina kikniboka molorandum dinyi ab Ni ab murumdanya ara dan dikum asi do?
Kwemdeina ab Ni ab ara murumdanya ton kum.
Ati, sunci molobmamunyi dinyi ara Niryi kekeboka dirnilisunun.
Nira bok ilinto lukluk eboka bursasirande co atonyi kunun.
Ba, Ni boukwe dam aryi co du buluroraming to kisal dangna dinyi dorondarur,” ebmou.
Sirya kobdob uram deyok
14:10
10Unanyi biryi etekdob kanya bororanci ura,
a kerek sekdob dinyi nirya ara, “Ato ati kerek sekeibwe,” tenen bingdona teleb.
Ba, unanyi biryi, “Ato ati, ebwe,” tenen bikdobdinyi bira
a ebdeianci tok dirnilina teleb.
Ara, ato ati ebmasin.
Er Iya Erebdobnyi bisik ara u dikum akwe lilirur.
Asi a bisik ara diboka teleb kuramingnyi nang akwe binkwaming.
Bok, sun Er Imtamnyi bisi lebesengnamingnyi nang ara a bisik ai aryi ilabkaboka sakwaming ati, ebmasin.
Currently Selected:
Hosea Uram 14: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
