Hakim-hakim Uram 7
7
Gideon biryi sun Midian mutuk ninyi asi mar bobmouci, yakdonokmou deyok
7:1–8:3
1Gideon si akwe Yerubaal, er ab, er atei nang nirya ab, belekuna anaboka Harod me u dam bindoka keis ol ai dobmai. Midian nang atei ara More kon akiryi eitam mutuk lu dam kubwe bok asi, bindoka keis ol ai dobmai.
2Ura, Er Iya Erebdobnyi biryi Gideon bisi ato ebmou, “Ninyi ilinto ibanmarum ara ni kum ebse to ibanmarum. Ninyi ilinto ibanmamunyi ura, Israel nang aryi ato ebingnyei, ‘Ni taruk aryi Midian ninyi obnaryi lebdandobne,’ eboka erebdangnyei. 3Ati, ukura sunsi ato ebdum, ‘Unanyi biryi ilil kuboka sirim talebmarinyi bira mutuk kon Gilead dam aryi tamuboka atei birur,’ ebkwandum,” ebmou. Ato ebmou ba, yubwa 22.000 baryi nang tamubmai. Ura, yubwa 10.000 baryi nang demang a takdongobmai.
4Takdongobmai bok, Er Iya Erebdobnyi biryi Gideon bisi ato ebmou, “Ninyi ilinto tuba ati, kanci sunsi, ‘Me yirbindarur,’ ebdum. Ato ebminyi ba, Niryi, ‘Anyi bisi mar ibinkwande, anyi bira kum ibinkwande,’ eboka kansi uram dobnyi bok asi, mar ibinkwandarur,” ebmou. 5Ato ebmou ba, Gideon biryi ninyi ilinto asi, “Me yiryurbindarur,” ebmou. Ba, me yiryurbinmai talak aryi, Er Iya Erebdobnyi biryi Gideon bisi ato ebmou, “Taruk aryi me kweboka yibmangnyi nang yuk, kutam sunsunuboka si lubmangnyi nang yuk wibkwandum,” ebmou. 6Ba, taruk aryi kweboka yibmai nang ara yubwa 300 baryi wibmou. Ba, yuk nang da yubwa ara kutam sunsunuboka si lubdobmai.
7Ato, kubmai ura, Er Iya Erebdobnyi biryi Gideon bisi ato ebmou, “Yubwa 300 baryi nang dam aryi, Midian nang asi sun Israel nang taruk dam karebkwamasin. Ba, me si luboka yibmang nang ara, ‘Sun atei yuk-yuk bindarur,’ ebdum,” ebmou. 8Ba, da yubwa ilinto ara, “Tamubdarur,” ebmou. Ba, sun yina bobdobmaia ab, buu ena bobmaia ab ara yubwa 300 baryi nang mar ibinkwabmai nang aryi dobdobmai. Ba, sunda nong demang tamuboka sun atei yuk-yuk yandobmai. Sun Israel nang ai dobmai ai amwetam mutuk lu ara Midian nang ai yandoka dobmai. 9A mabmai lukunda ara Er Iya Erebdobnyi biryi Gideon bisi ato ebmou, “Bukokminyi ura, yurbindoka Midian nang asi mar ibirum. Ba, Niryi sun taruk dam karebkwamasin. 10Kan yurbana ilil kubkici ura, kan wa irmilinanyi si Pura milibkici ba, tonkwa ibirurum. 11Bindoka kekeraminyi uca, sun uram sisingmangnyi dinyi kekebminci, kan tulum wekici ura, sun ai dobmangnya dam mar ibinkwamarim,” ebmou. Ura, er milinanyi kabirnyi si Pura ab iyurbindoka, Midian yin doun nang ai yandoka dobmaia bublan dam ninyi kalingna dam binmarei. 12Ba, Midian nang ab, Amalek nang ab, sun yaletam nang yubwa nirya ara kwising yubwa buluranda ato kubmou. Ba, sun boyiban bisam si unta yubwa nirya ara me wininga kilingnande ato kuboka a mutuk lu mabdanin binmai. 13Ato kuboka mabdanin binmai asi Gideon a mutuk lu dam yurbinmou. Yurbindoka kekeramwe uca, sal binton er lengdera mabmou to asi ato ebde nungdabwe. “Roti tokol tentok asi bongobkaboka Midian nang keis ol ai dam wengyar. Uca, nun Midian nang ai asi dakde bunmararyi kum dananmar asi lengdera mabne,” ebmou. 14Ato ebmou bok, er kwit tonyi biryi, “Ara, yuk dinyi ati lengdera kum mabdim. Eda, Israelnyi Yoas mi Gideon biryi sun Nai Iya Erebdobnyi biryi nun Midian nang keis ol ai a dobmab tok nirya asi sun taruk dam karebci ba, obkwinsing. Akiryi ato kuboka lengdera mabdim,” ebmou asi kekebmou.
15Ura, Gideon biryi ninyi bitinyi a lengdera lilibde bunmarei asi kekebmou. Ura, luknubdongoboka Er Imtamnyi bisi si weik eboka molobmou. Sirya molobmou ura, tamuboka sun Israel nang keis ol ai doboka mabmaia dam binmou. Ura, bindoka ato ebmou, “Midian nang nong ab, sun atei ab asi Iya Erebdobnyi biryi nun taruk dam doboka karebkwinsir ati, mabmaruma burongdarur!” ebmou. 16Ato ebmou ba, yubwa 300 baryi nang aryi yubwa olong winiryi kiknibmai. Ura, buu ena ab, uk ubna un keica si buyung umbura asi uk arande keica dongobdongoboka bobmai. 17Ura, Gideon biryi ato ebmou, “Ni banmanyi to asi biti diblilibkwamanindarur. Ani, keis ol ai dobya kubkub tingbinyi ura, ni kubokmanyi to kuboka aminda yankwandarur. 18Ba, nun tonkwa binmabyi nang aryi buu ena, buu ebingnyi ura, sunbabyi buu eboka Midian nang keis ol ai dobmangnya nirya aknaryibinkwandarur. Ukubmunyi ura, Midian ninyi keis ol ai dam asi, Er Iya Erebdobnyi mikib ab, ni Gideon si deici ab si eboka buu ebkwandarur,” ebmou.
19Ato ebmou ura, Gideon ab, er milibmai ninyi ab ara sun Midian ninyi mabmai ai dam sirya tingbinmai. Sirya tingbinmai talak ara sun a mabmai ninyi ara bublan dam ton nang kalikmai ani, ton nang kalingnamnyi talak kibmou. Ba, minob kalikmai nang ai marbai ura, ton yuk nang unubdongoabyi bok, asi bindoka buu eboka weik moyok doubmaia aryi tolobmai. 20A talak aryi ninyi olong winiryi kibmai to nirya buu ebmai. Ani, weik moyok bobmaia ab tolobmai. Ani, uk ubna ara kwanimtam taruk doubmai ura, siriktam taruk ara buu ena#7:20 Uk ubna ab, buu ena si trompet ab, buyung ab lilim ebmai ara sun mar ordan nang aryi, “Ninyi ilinto aryi iyanganmasingci, obkwamasing,” tenebkwanunga tenen ato kubmai. Sun mar ibanmai ninyi ara yubwa 300 baryok bok ato kubmai. douboka, ato ebmai, “Er Iya Erebdobnyi si ab, Gideon si ab aryi mar iyanmab,” ebmai. Ura, Midian ninyi ai doboka mabmai atei asi aknabdongobmai. 21Ura, a keis ol atei dina-dina aknabloboka a tiklobokmaici, dirongmai. Bok, Midian yin doun nang ara sun mamun talyi a kwemdaronmaici, bai buki baronmai. 22Ba, Israel nang yubwa 300 baryi nang ara a tikloboka buu enmai. Ba, Er Iya Erebdobnyi biryi, “Ninyi on ya aryi sun mamun obdanunga,” tenen ukubdeibokmou. Ba, sun mamun ya sekdanin yibanmai. Ukubmai ura, Midian yin doun nang ton cukoka Bet-Sita atei Zerera dam tam bisik bai burorbinmai. Ani, Abel-Mehola atei Tabat dam kuboka bai burorbinmai.
23Ba, sun Israel nang, Naftali yala nang ab, Asyer yala nang ab, Manasye yala nang ab, me Yordan kouboka yaletam kuramnyi nang babyi, kitingbantam kuramnyi nang babyi, anaboka Midian yin doun nang, a bai burbinmai nang asi dombinmai. 24Ani, Gideon biryi Efraim konkon mutuk kuramnyi ninyi asi ato ebdeibmou. “Sun nirya yurbindoka, Midian nang asi bisik sekoka obdarur. Ukubmunyi ura, me a yibarur me duman nirya Bet-Bara dam aryi kuboka Yordan kin bisik sekdarur,” ebmou. Ba, Efraim yala ninyi nirya anaboka a mutuk me duman, Bet-Bara kin aryi kuboka Yordan kin nirya yandoka bisik sekmai. 25Ukuboka, Midian weik sien nang bitinyi si Oreb ab, Zeeb ab taleboka obmai. Ura, a keil kon si ara Oreb er mining si makmak keil kon dam aryi obmai. Ba, Zeeb bira er mining anggur du me yung ururamnyi dikum aryi obmai. Sirya Midian weik sien nang bitinyi Zeeb kisok babyi Oreb kisok babyi ara ya ngang dakoka bobmaici, me Yordan kouboka otam Gideon bisi bobinmai.
Currently Selected:
Hakim-hakim Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
