Hakim-hakim Uram 8
8
1Ato kuboka Midian ninyi asi sirya obmai. Ura, sun Efraim nang aryi Gideon bisi ato ebmai, “Kanda unati Midian nang asi mar bobkwamaminyi ura, nunsi, ‘Ninyi mar bobkwaman ati yandarur,’ ena kum kusurum do?” ebmai. Ara, Gideon biryi sunsi, “Ninyi mar bobkwayeb,” ena kum kuramwe ati, sun kanya malyi kubmou ba, ato ebmai. 2Ba, Gideon biryi ato ebmou, “Sunda weikanun ondarur ba, nira mitikanun obman ati enmarum do? Abiezer yala ninyi aryi anggur du minob dakmang dinyi ara mitikanun bok, Efraim yala ninyi aryi aminda dakmang dinyi asi ilinto dakmang. 3A ebman dinyi ara Er Iya Erebdobnyi biryi Midian sien nang bitinyi si Oreb ab, Zeeb ab sun taruk dam karebsou ba, sunci obmarum ara, ‘Mitika nun,’ tenebmunyei. Eda, sunci ilinto obmarum. Niryi obse ninyi ara mitikanun obse,” ebmou. Ba, Gideon bisi, yu bobmai ara mundu tebmou.
Midian nang nirya obkiriboka sien nang ababyi obmai deyok
8:4-21
4Er Gideon ab, er milibmai nang yubwa 300 baryi nang ab me Yordan kouboka dinatam yaletam yanmai. A yanganmai ara sun mitang kubmou bok asi tuba dobde yanganmai. 5Ura, erci Sukot nang asi ato ebmou, “Nira Midian sien nang bitinyi Zebah ab, Salmuna ab dombanman. Uca, ni milibmaning nang kwaning utanmar ati, roti kwaning ton karebdarur,” ebmou. 6Uca, Sukot ninyi aryi ato ebmai, “Zebah ab, Salmuna ab sirya talebmana kuma, nun kwaning talyitam kan yin doun nang kum karebnub,” ebmai. 7Ba, er Gideon biryi ato ebmou, “Ato ebmarum ura, Er Iya Erebdobnyi biryi Zebah ab, Salmuna ab ni taruk dam karebnici ba, taleboka boyanyi ura, yini mutuk co tiling ab, yini mutuk keil tikil ab aryi sun nong bol asi litukoka kirikwamasin,” ebmou. 8Ura, er anaboka Pnuel binmouci, Pnuel nang ababyi bindoka neikto akwe roti kwaning molobmou. Bok, Pnuel nang ababyi Sukot nang ebmai to akwe, “Zebah ab, Salmuna ab sirya talebmana kuma, nun kwaning talyitam, kan yin doun nang kum kerebkwamab,” ebmai. 9Ura, Pnuel nang asi ato ebmou, “Ni mar ibinmanyi ani, ninyi obniryi ni atei yibaronyi ura, a dukoka dobdanin yibandarur ai ara yandoka dakabokwamasin,” ebmou.
10A talak aryi Zebah ab, Salmuna ab sun yin doun nang ab tonkwa weik atei Karkor dam bindoka kunmai. A kunmai yin doun nang yubwa ara 15.000 baryi dikum wekmai. Ara, yaletam kuramnyi yin doun nang nirya ara yubwa 15.000 baryi bok, yubwa 120.000 baryi nang asi obmai. 11Gideon bira anaboka Nobah ab, Yogbeha ab yaletam ai dobde kuramnyi nang bisik ibinmou. Binmou ura, Zeba ab Salmuna ab tam nang a mutuk yin doun nang ara, “Mangkau kuronub,” teneramnyi asi bindoka obkiribmou. 12Ba, Zebah ab, Salmuna ab Midian sien nang bitinyi ara baronmarei asi dombinmou ani, bindoka talebmouci, sun yin doun nang bokwalwalabkabmou.
13Sirya obmou ura, Yoas mi Gideon bira ordanmai dam aryi mutuk Heres diniboka yandobmou. 14Yanmou ura, Sukot nang ninyi kamnyi tentok taleboka asibmou. Ba, anyi biryi Sukot sien nang wis yoka nang nirya yubwa 77 baryi si sekoka Gideon bisi karebmou. 15Karebmou ura, Gideon anaboka Sukot nang asi bindoka ato ebmou, “ ‘Zebah ab, Salmuna ab sirya talebmana kuma, nun kwaning talyitam kan yin doun nang kum karebnub,’ ebmanindau. Ara, ukura a taleboka boyasin,” ebmou. 16Ebmou ura, Sukot sien nang bulubdeiboka co tiling aryi doboka litukoka tikil kirikmou. 17Ani, Pnuel atei dukdanin weleramnyi ai dakabmouci, akatei ninyi sal nirya obkiribokmou.
18Ura, Zebah ab, Salmuna ab asi ato eboka asibmou, “Tabor dam obmandau nang ara danto nang obmandau do?” ebmou. Uca, sunci ato ebmarei, “A mi, sienyi kantoa akwe obmoubwe,” ebmarei. 19Ba, Gideon biryi ato ebmou, “A obmandau ara ni du yabwe, ni weit yabwe ab, ni kwin ab asi obmandau. Er Iya Erebdobnyi kam kururnyi si deici aryi, a ninyi ona kum kuandate ura, sunbabyi kum obsitinyi,” ebmou. 20Ebmou ura, er mi dunyi Yeter biti ato ebmou, “Ukuca sunsi ya sekoka obdum!” ebmou. Uca, a kamnyi biryi, “Ni kamnyi bica, ni ilil,” tenen aryi a nang asi ya sekoka kum obmou. 21Kum obmou ura, Zebah ab, Salmuna ab aryi ato ebmarei, “Kanci osina ara mem ati kunmarim do? Ya kungang dakeiboksurum!” ebmarei. Ba, Gideon biryi a nang asi kunuboka ya kungang dakoka obmouci, a sien nang bitinyi sun unta ngang dam karakna dobdobmou.
Sun Israel nang aryi, “Gideon, kan ab kan mabwe ab aryi nun sienyi kiboka talebkwansurum,” ebmai deyok
8:22-35
22Sun Israel nang aryi Gideon bisi ato ebmai, “Nunda Midian nang aryi obkiribmasinto bok, kanci lebsirim ati, kanci nun talebkwansirim. Ani, kan mi babyi, kan mabwe aryi deibingnyi nang babyi aryi nun sienyi kiboka talebkwansin,” ebmai. 23Ebmai bok, Gideon biryi ato ebmou, “Ni ab, ni mabwe ab aryi kum talebkwansib eda, Er Iya Erebdobnyi biryi sunsi talebkwansir,” ebmou. 24Ani, Gideon biryi ton ato ebmou, “Niryi sunsi tentok molobkwinsin dinyi ara ato, sunci amol birin kweirya si emas ninyi onmandauci, daluboka doandau dinyi asi sun yuk-yuk nirya nisi karebnindarur. Sun mar ordan nang Ismael yala nang Midian mutuk kunung nang ara emas aryi amol birin kweirya kimnung ati ebman,” ebmou. 25Ba, sunci ato ebmai, “Yo, nun kanya teleb asa aryi karebkwamakib,” ebmai. Ura, amsuna tokeiboka, ordanmaici dalubdamnyi amol birin kweirya nirya a tokdeibmaia deici yamubdeibmai. 26A emas keil bulubmai dinyi ikin ara emas ikin 20 kilogram baryi kubmou. Ba, Midian sien nang amol birin dinyi ab, sun ongoramnyi aling kuruta bol ab, unta ngang ongona ab, wala oubni to dongoramnyi dinyi ab ara nungna kum kubmai. 27Ba, Gideon biryi a amol birin kweirya nirya buluboka ninyi atoanun si efod kiknibmou ura, er atei Ofra dam bobindoka deibmou. Ba, Israel nang ara a kiknibmou dinyi asi si weik eboka molobmaici, Er Imtamnyi bisi molona ara taklobmai.#8:27 Sun Israel nang aryi teneramnyi ara efod ara, “Nun molobibyi dinyi lak enkwansir,” teneramnyi akiryi efod kikniboka molobmaici, Er Iya Erebdobnyi bira taklobmai. Ato kubmai dinyi ara, “Ukubdarur-ukubdarur en uram,” yuma yakna ebmou to dakbisibmai. Ato kubmai dinyi aryi Gideon ab, er ai ninyi ab ara neneboka ena tabwe yourdanininto kubdanmai.
28Sun Israel ninyi aryi Midian ninyi asi ilinto oboka erebdobmai. Ato kubmai ura, Israel nang aryi Midian nang asi muna obdongoboka erebdobmai. Ukuboka ninyi ilinto oboka erebdobmaici, Gideon kuramwe talak kwalina yubwa 40 baryi ordana kum uca mangkau asa akwe ur kuramnyi.
29Ba, Yoas mi si Gideon bisi uruma si ara Yerubaal ebok kimnamnyi. Anyi Gideon bira anaboka er atei minob kuramwe atei bindobmou. 30Anyi Gideon bira nerabwe ilinto doramwe deyok aryi er mabwe sal akwe yubwa 70 baryi deiamwe. 31Ani, aminda dortabangni ner ton doamwe ner ara Sikhem dam kuramwe ner aryi mi tentok deibkareamwe. A deiamwe mi si ara Abimelekh eboka si doamwe.
32Yoas mi Gideon bira kul otong dem abmou ura, dibmou. Ba, er abwe yabwe Abiezer yala nang atei si Ofra dam er nai Yoas tukwe dongoamyi bisik akwe erbabyi neik bisik tukwe dongobmai.
33Gideon sirya dibmou ura, Israel nang ara Er Imtamnyi moloramnya ara taklobmaici, yuk-yuk kwemdeina moloramnyi. A moloramnyi kwemdeina si ara Baal-Berit asi sun kwemdeina kikniboka moloramnyi. 34Ba, sun Israel nang ara sun Nai, Er Iya Erebdobnyi biryi sun mar ordan ninyi aryi obmantoa bok, lemdeiriramunyi bisi luba kibmai. 35Akiryi, sun Israel ninyi aryi, “Yerubaal-Gideon mabwe asi, sunci nunsi lebdeibsindau uca, nunsi mar ordana ninyi aryi kum obsei,” eboka teleb-teleb kiboka, kirona kum kuramnyi.
Currently Selected:
Hakim-hakim Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
