Hakim-hakim Uram 6
6
Er Gideon bisi malyi dinyi lilinanyi tikeibmai deyok
6:1-40
1Sun Israel nang aryi Iya Erebdobnyi Er urasintam manmaliramnyi deyok aryi, kwalina tabaryi ara Midian nang ati yan lobdeibmou. 2Ani, a talak ara Midian nang aryi Israel nang asi mar boamnyi. Ba, Israel nang ara sunsi ona ilil aryi mutuk konkon dam asi keil siling um ab, bara ai ab dobde kuroramnyi. 3Ani, Israel nang, “Wa ibde-koubde kimdonkub,” tenen wa dam tingbangnyi ura, Midian nang ab, Amalek nang ab, yaletam nang ab aryi mar iyangaramnyi. 4Ani, uki tentok tum ara sun wa in dam bindoka tiya atei doboka wa nirya talala dobde binmai ani, Gaza mutuk dam bindoka sirya talala dobmai. Ani, Israel nang mutuk dam yin keica nirya ab, domba babyi, keledai babyi, lembu babyi nirya oboka dalubkiribmai ba, Israel ninyi ara yina bulung kuramnyi. 5Ura, sun Midian nang ara sun bisam yabwe ab, sun keis ol atei ab, ninyi yubwa ab ara kwising ato kuboka yanmai. Ukuboka ninyi yubwa ab, unta bisam yubwa ab yanmaici, sun Israel nang kouroramnya nirya yandoka talala doboka yiryanmai. 6Ba, sun Israel nang ara utotoa bulung kubmaici, Er Imtamnyi Iya Erebdobnyi bisi, “Lebdeibsurum,” eboka molobmai.
7Ukuboka sun Midian nang aryi Israel nang asi ato kuramnyi deyok aryi Iya Erebdobnyi bisi molobmai. 8Molobmai ba, Er Imtamnyi uram ermurunanyi nabi tentok bokdonokmouci, ato ebdeibmou, “Israel nang sun Nai, Iya Erebdobnyi biryi ato ebmasir. ‘Niryi sunsi Mesir mutuk il dimnansei mutuk aryi iniboka boyanansise. 9Niryi sunsi Mesir nang il dimnansei nang aryi talebnuruansei asi, taruk leboka boyasise. Ani, sun kuramnyi mutuk dam a kuramnyi ninyi asi kum dandeiboka, a ninyi kuramnyi mutuk asi sun mutuk kibdeibsise. 10Eterebsise ura, ato ebmase, “Nira sun Nai Iya Erebdobnyi kunun ati, sun kundarur mutuk Amori nang molonung kwemdeina molona ara mem. Eda, Ni uram akwe kekeboka kununkwandarur,” eansise uca kum kunundarur,’ ebmasir ebdum,” ebmou.
11Ura, uki tentok tum aryi Gideon bira anggur du yung ururamnya dam bindoka inibdobmou. Ara, “Midian nang eibningnyei,” tenen inibdobmouci, gandum yabla kulubde kuronmou. Uca, Er Iya Erebdobnyi uram eryuryangan nang sienyi si Malaikat Tuhan imtam aryi mutuk Ofra dam yuryanmou. Ura, Abiezer yalanyi si Yoas er co si Tarbatin tikamwa deyok dam asi yandoka bukmou. 12Er Iya Erebdobnyi uram eryuryangan nang sienyi er dam lak tingyanmou. Tingyanmou ura, ato ebmou, “Se, yin dounanyi akata ilintonyi, Er Iya Erebdobnyi biryi kansi milibkwamakir,” ebmou. 13Ebmou bok, Gideon biryi ato ebmou, “Nai a, Er Iya Erebdobnyi miliransute ura, orkirisunung to kum kuransiting se! Nun abwe yabwe aryi ato eboka nungnung. ‘Er Iya Erebdobnyi biryi Mesir dam aryi ukuboka boyanansou,’ eboka nungnung bok nunda, ‘Midian nang aryi obnung,’ tenen yan lobsou do?” ebmou. 14Ebmou bok, Er Iya Erebdobnyi bok er uram erbananyi kibdanmounyi biryi uram danguboka ato ebmou, “Kan mikib asa aryi anaboka Midian nang aryi Israel nang asi mar bobya asi lemdeirirbirum. Niryi kansi bokdonokin,” ebmou. 15Ebmou bok, Gideon biryi ato ebmou, “Ah, Nai Imtam Sienyi, unatoa aryi Israel nang lebkwaman do? Kekerandum! Manasye yala kankan dam aryi, ni ai ninyi yala ara mitik yala kunub ati ebman. Ani, nun ai ninyi kankan aryi nira kabirnyi kunun ati ebman,” ebmou. 16Ebmou uca, Er Iya Erebdobnyi biryi ato ebmou, “Ni milibkinyi ura, Midian nang nirya obkiriboka, kum dandeibkwamarim,” ebmou. 17Ebmou bok, Gideon biryi ato ebmou, “Teleb nai, dib nisi boukwe kiboka a ebmarim to dib kunubkwaniminyi ura, kunumna ton kunubdeibnurum. Ba, niryi, ‘Diba, Er Iya Erebdobnyi biryi ebmar,’ tenebkwan. 18A ebmarim to dib kunubkwaminyi ura, a bukmaminyi ba, ni dama borbinmakinyi ani, yandoka kan dam karebkinyi ba, binkwandum. Sangkuna bindobmaminyi ba, ni dama Kansi talyi boyandoka saklobnyei,” ebmou. Ba, Er Iya Erebdobnyi biryi ato ebmou, “A kunmanyi ba, kan yaminyi ura, binkwaman,” ebmou. 19Ura, Gideon atei bindoka kambing mi ukuryok nenmoua asi oboka yubmou. Yubmou ura, tepung ongomna kilo takubaryi, roti kwaning bungbung ena dongona kum roti kikniboka bobmou. A kambing yubmoua ara tower aling aryi kibmou. Ba, a yubmou me ara tukwe aryi kikniraming meyok aryi dikdongoboka bobmou. Ukuboka Er Iya Erebdobnyi uram eryuryangan nang sienyi bisi, co tarbantin deyok dam bukmoua dam bobinmou. 20Ura, anyi Malaikat Tuhan biryi ato ebmou, “A kambing tub ab, a bungbung ena dongona kum roti ab, doboka a keil deici deibdongobminyi ura, yun me bobmanirim me aryi dikdongobdum!” ebmou ba, kunubmou. 21Ura, Malaikat Tuhan biryi er doubmou kama dobtaleboka, a deibmou kambing tub ab, bungbung ena kum roti ab asi bolibmou ba, uk buk lengkerekoka yibdobmou. Ukubmou ura, Er Iya Erebdobnyi uram eryuryangan nang sienyi asing kublabumto aryok kum dandobmou. 22Ba, Gideon kanya aryi, “Iya Erebdobnyi yanmoa,” tenebmou. Ura, ato ebmou, “Nai e, Er Iya Erebdobnyi ab ebdanmanumwa aryok ni ilil talya dibkwan,” ebmou. 23Uca, Er Iya Erebdobnyi biryi ato ebmou, “Kan kanya ilil kukina mem! Kan kum dibkwamarim, karyi asa aryi mangkau kuronkwandum,” ebmou. 24Ebmou ba, Gideon biryi dama deirin keil lamna laboka kiknibmou ura, si dobmou. Er eboka si dobmou to ara, “Er Iya Erebdobnyi bira mangkau asa kuna deyoknyi kurur,” eboka si dobmou. A keil dungna ara Abiezer yala nang atei si Ofra mutuk dam ukubabyi tuba kubwe.
25A lukunda aryi Er Iya Erebdobnyi biryi Gideon bisi ato ebmou, “Kan nai er bisam lembu yim bitinyi dinyi#6:25 Bisam lembu yim bitinyi dinyi ara, Er Iya Erebdobnyi biryi, “Ato kubdarur-ato kubdarur,” ebmou uram aryi ato eboka kerek sekamwe. “Utotoa nirya yina babyi, bisam babyi yuma dinyi ara Imtamnyi dama deibkwandarur,” eboka kerek sekamwe deyok aryi yuma dinyi Imtamnyi bisi dama deibmou. Ba, Gideon biryi kablobmou dinyi bitinyi dinyi ara telebto bisam lembu tubto doryanmou. kwalina tabaryi dinyi kwalibmangnyi dinyi asi tomobdobdum. Tomobdobminyi ura, kan nai kwemdeina Baal moloriryi, kiknibwe keil dungna bindoka dalubkabkwandum. Ani, co ikoka kwemdeina si Asyera eboka molorur co ab ara kwebkabokdum. 26Sirya kwebminyi ura, neik olong akwe kan Er Iya Erebdobnyi biti siltong ena ati, uk dana keil dungna labdum. A labkwamarim keil dungna ara diboka liliboka labkwandum.#6:26 Diboka liliboka labkwandum ebmou ara, “Kat keica besi aryi telena kum kuamingnyi keil aryi dobkwanur,” tenen ato ebmou. Ukubminyi ura, a kwebmaminyi co abyokomna aryi touboka bisam lembu oboka yalibkwandum,” ebmou. 27Ebmou ura, Gideon biryi er wa irmilin nang takubaryi inibmou ura tonkwa Er Iya Erebdobnyi ebmou to kunubmai. Kunubmai bok, kitingtam aryi ukuna ara er atei weik atei ninyi ab, er ai dam kuramnyi ninyi ab asi ilil kubmou ura, lukunda aryi a keil dungna dinyi kiknibmou. 28Akatei nang belekuna bukoka dinmai uca, kwemdeina si Baal ati siltong ena bisam oboka uk daramnyi keil dungna dakmou. Dakoka kwemdeina molon co ikamnya kweboka Er Iya Erebdobnyi biti siltong ena yalina keil labmou. Laboka kiknibmouci, bisam lembu a lamna deici deibmou asi eibmai. 29Ura, ato ebmai, “Unanyi biryi kubmar da?” A weik atei nirya ebdanin yibanmai. Uca, yuk nang aryi, “Yoas mi Gideon biryi ato kubmar,” ebmai. 30Uca, akatei nang aryi Yoas bisi ato ebmai, “Kan mi aryi nun kwemdeina Baal biti siltong en dinyi obde uk yalin keil dungna dakmar. Ani, co mining dam ikoubwa ababyi kwebmar ati, kan mi obkwayeb ati dobkwetebdum,” ebmai. 31Uca, Yoas biryi er aknabmai nang asi ato ebmou, “Kwemdeina Baal asi sun kanya sungmasir aryi, ‘Gideon bisi obkwayeb,’ tenebmarum do? ‘Gideon bisi kum obkwayeb,’ tenebmarum do? Unanyi biryi kwemdeina Baal kanyi sungmaci ura, Gideon bira kum berekabci uca obkwamab. Ba, Baal bira sunsi dib kwebdeiansici ura, Baal erbiramnyi lebdandoka, a lamna dalubkabmaranyi bisi obkwamar,” ebmou. 32Ura, a tum aryi Gideon si ara, “Yerubaal,” eboka si dobmai. “Ara, kwemdeina Baal molon ai asi dakabmo ati, a kwemdeina aryi Gideon bisi obdeiboka kisok dakwande,” tenen aryi Gideon si ara, “Yerubaal,” eboka si dobmai.
33Ba, Midian nang ab, Amalek nang ab, yaletam nang nirya bulubmai ura, diniboka Israel mutuk tam si Yizreel bakan binmaici, ai dobmai. 34A talak aryi er Gideon bira Er Iya Erebdobnyi Kanya koukwe olokmou. Ura, “Ni milibnunung,” tenen sangkakala aryi buu eboka Abiezer nang asi nabmou. 35Ani, Manasye yala nang nirya ababyi, “Ni milibningnyi ba, ninyi mar bobkwayeb,” eboka uram dobmou. Ani, Asyer yala nang ab, Zebulon yala nang ab, Naftali yala nang ababyi, “Ni milibnindarur,” eboka nabmou.
36Ura, Gideon biryi Er Iya Erebdobnyi bisi ato ebmou, “Ni deici aryi kan ebdeibumwe to Israel nang lebkwaminyi ura, a kiklina deici aryi asibkwaman dinyi asi kunubdum. 37Niryi domba otong koboka, gandum du kuluraming dikum deibmanyi asi mo doun domba otong akwe alibmariryi, tukwe ara ilim tuba kubmaci ura, kan ebumwe to ni deici aryi Israel nang lebkwaniryi,” ebmou. 38Ura, domba otong sekdoba aryi ukuboka deibmou. Mabmou ani, berekwe ura, bindoka talerderamwe uca, mo doum-douma ilinto alibmou asi me yin moyok tentok kwebmou. 39Kwebmou ura, Gideon biryi Er Iya Erebdobnyi bisi ato ebmou, “Liki bitinyi dinyi tubto ukubdenkwaman ati, yu bobniminyei. Tumura domba otong sekdoba ara ilim kubmaci ura, tukwe dina-dina ara turubkwamarur,” ebmou. 40Tubto ukuboka deibmou ba, berekwe ura, dinmou uca, domba otong sekdoba ara ilim kubmou. Ucab, tukwe nirya ara mo doun aryi me tubmou.
Currently Selected:
Hakim-hakim Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
