Hakim-hakim Uram 16

Simson Gaza dam kuramwe deyok

16:1-3

1Uki tentok tum aryi Simson Gaza dam binmou. Ura, bindoka diramwe uca, yortamni ner tentok asing eibmou. Ura, a yortamni ner ab mabmarei. 2Asi Filistin ninyi bikmai ura, Gaza atei nang ati, “Simson a yanmar,” ebmai. Ba, Gaza nang aryi, “Simson bisi obkwayeb,” tenen er wekmou atei bisik bublan dam asi lukunda nirya ara kalingkiringmai. Uca, a lukunda aryi kum obmai, “Berekci ba, obkwayeb,” tenebmai. 3Bok, Simson bira akatei mabmou tok kum berekmou. Eda, lukunda dukduk en ara bukalabkaboka, akatei lika bisik bublan bitinyi ab, dina-dina abyokomna ab, bisik dangdeina ab nirya dakoka takubdaburyi, Hebron tam kuboka burbinamwe mutuk kon bobde binmou.

Simson ab Delila ab deyok

16:4-22

4Sirya ato kubmou ura, Simson biryi Sorek lu ner si Delila bisi er kanyi kubmou. 5Ura, Filistin sien nang Delila dam yanmai ura ato ebmai, “Kanci Simson bisi nenebdum ba, er ilila mikib kurur dinyi lak ebkwande ati. Ani, nunci, ‘Una kuboka ersi taleboka tabwe debibiryi luknubdeibtibyi,’ tenebmab. Ati, kanci nun ebmab to ukubdeibsiminyi ura, nunci kansi dengna keil aryi kikniraming uang 1.100 baryi niton-niton buluboka karebkwankib,” ebmai. 6Ba, Delila biryi Simson bisi ato ebmou, “Kan ilila mikib dongobkou dinyi ara unatoa aryi tabwe debkitinyi uca, mitang kibdeibkitinyi da? A dinyi asi ni dam lak ebdum,” ebmou. 7Ba, Simson biryi ersi, “Ukuryok yin tabwe, me kum cebmaci tabwe tabaryi aryi debniting ura, mitang kiboka yuk nang mikib ato kubnute,” ebmou. 8Ura, Filistin atei weik atei-weik atei nang sien nang nirya aryi, ukuryok yin tabwe me kum cebmou tabwe boyandoka Delila bisi karebmai. Ba, Delila biryi Simson mablukmou talak ara anda boyanmai tabwe nirya aryi tabwe debmou. 9Ara, sun man ai aryi tabwe debmou. Ba, Simson talebkwabmai nang ara ai dam kalikmai. Ura, Delila biryi ato ebmou, “Simson e, Filistin nang oryangaking e!” ebmou. Ba, Simson mikib doboka burongdamwe uca, a debmou tabwe nirya ara uk yibmaci tabwe kwamingca danmaci aryi dururub ebde sangdorande to kubdobmou. Ba, Simson er mikib ara, “A dinyi aryi mikib kurur,” kum tenebmai. 10Ura, Delila biryi Simson bisi, “Tola ati ebmanumci malyi kibmanirim ati, iya dib ean. Ukura unatoa aryi tabwe debkiting uca, mitang kubkute da? Ni dam lak ebdum,” ebmou. 11Ura, Simson biryi, “Ukuryok tabwe utotoa ton kum koubmating tabwe aryi nuruboka debniting ura, mitang dululung eboka yuk nang mikib ato kubnute,” ebmou. 12Ura, Delila biryi Simson bisi ukuryok tabwe aryi debmou. Ura, erci ato ebmou, “Simson e, Filistin nang oryangaking e,” ebmou. Ba, Simson mikib asa burongnamwe uca, tabwe debmou tabwe ara aling win tabwe kuna er taruk dam aryi dururub ebdobmou. A talak ara wiliboka ton man ai ara er, “Obkwayeb,” tenen kalikmai. 13Ba, Delila biryi Simson bisi, “Kanda nisi malyi kimniminci, tola akwe ebde barum ati, ukura lak ebdum. Unatoa aryi tabwe debkiting do?” ebmou. Uca, Simson biryi, “Kanci ni otong kitina tabaryi ongon aling win tabwe ab laboka wibniminci, liboka co asi nuruboka biribniminyi ura, mitang dululung eboka yuk nang mikib ato kubkwaman,” ebmou. 14Ba, Simson maboka dirongmou ura Delila biryi er otong ab, laboka ongon aling win tabwe ab liboka nurukmouci, tabwe kitibmou. Ura, ato ebmou, “Simson e, Filistin nang iyangking e!” ebmou. Ba, mikib asa burongnamwe uca, lobdobmou.

15Ba, Delila biryi Simson bisi, “Ni kanyi deibkise enurum cok, ni kanyi kum deibnoumwe darib? Ura, liki winiryi dinyi tola ati eboka malyi kibnirimci, nisi lak kum enurum. Kanda unatoa mikib dongobkou da?” ebmou. 16Ura, a ner aryi tuba-tuba titik-titik erongnamwe ba, er nong mitang kubmouci, kanya darabdobman kum kubmou ura dibman kanya dongobmou. 17Ato kubmou ura, Simson kanyatam boramwe dinyi ato eboka er dei lak ebmou, “Ni otong ara otong kun but aryi otong kunina kumnyi. Ara, ni kwin mundu umbura aryi minob wiboka memnyi kibdeianou. Ni otong kubniting ura, ni mikib ara kum danuturyi, yuk nang mikib ato kubnute,” ebmou. 18Ba, Delila bira Simson er kanyatam boamwe dinyi nirya er dei lak ebmou ba, sirya bikmou. Ura, Delila biryi Filistin sien nang asi nambindarur eboka uram ebdeibmou, “A tum ara er kanyatam inirur dinyi nirya, er dei lak ebmar ati yandarur,” ebmou. Ba, Filistin nang sien nang nirya Delila bisi uang boyandoka dekmai. 19Ura, Delila biryi Simson bisi, “Ni irimbong maryarum,” eboka nabmou. Ba, er ner irimbong marbinmou ura, ninyi tentok nabmou. Ba, Simson otong bomna tabaryi bomdamwe otong asi otong kun but aryi kurubmou. A ner aryi ukuboka Simson bisi mitang dululung ebdeibmou uca, er mikib nirya kum danmou. 20Ba, a ner aryi, “Simson e, Filistin nang iyangaking e!” ebwe ba, “Minob burongnanto aca,” tenen aryi burongkwe asi lebdobman kum kubmou. Ara, Iya Erebdobnyi biryi ersi miliramwa asi taklobmou ara kum bikmou. 21Ura, Filistin nang aryi taleboka er asing dina-dina nirya kwebkabokmaici, Gaza dam bobinmai. Bobinmai ura, kat keil aryi kikniraming tabwe dungdongordarande tabwe bitinyi aryi tabwe debmai. Ura, ninyi dongon ai dongobmai. Ba, ninyi dongon ai ara roti kiknin keica si gandum du taingnanyi kibdeiamnyi ba, gandum du taikde kuramwe.

22Er otong kuamnya ara sirya tubto abmou.

Simson dibmou deyok

16:23-31

23Ato kubmai ura Filistin sien nang-sien nang nirya bulubmaci, sun kwemdeina si Dagon biti, Simson talebmai deyok ati, dama deiboka teleb eboka kibdobmai. Ani, mot seboka ato ebmai,

“Nun kwemdeina si Dagon biryi talebdeibmasir ba,

Simson nun mar ordananyi sirya talebmab,”

ebmai.

24Ani, a ninyi aryi Simson ato kubmou asi asing eibmai ura, sun kwemdeina asi ato eboka si weik ebmai,

“Nun mar ordananyi,

nun mutuk malyi kimdansunyi,

nun atei nang oransounyi bisi

nun kwemdeina aryi nun taruk dam karebmasir,”

ebmai.

25Sun kanya teleb kubmou ura, ato ebmai, “Simson bisi durukoka akwi ngarangkwayeb ati, iniboka boyandarur,” ebmai. Ba, ninyi dongon ai aryi iniboka bobinmai ura, abyokomna dam wiliboka tikeibmai ba, tikmou ura, durukoka akwi ngarangmai. 26Ura, Simson biryi er taruk taleboka tikmou mi asi, “Ni talebmanirima takdongobniminci, weik abyokomna dam kabdeibniminyi ba, abyokomna asi liknibdongoboka tikwan,” ebmou. 27Akai ara ner sal yubwa ab, Filistin sien nang nirya ababyi akai akwe wekmai. Ani, dukoka imtam yangaamnyi ai ara ner sal yubwa 3.000 baryi wekmaici, Simson bisi durukoka akwi tunmai. 28Ba, Simson biryi Er Iya Erebdobnyi bisi ato eboka molobmou, “Nai, Iya Erebdobnyi, Kanci ni luba kibniminyei. Sun Filistin nang aryi ni asing bitinyi nirya kwebkaboknei ati, sunbabyi kisok dakun ati a talak atikwe mikib ton kareabnurum,” eboka molobmou. 29Ura, Simson biryi noutam abyokomna bitinyi asi kwanimtam taruk ab, siriktam taruk ab aryi dinatam-dinatam ikib talebmou. 30Ura, Simson biryi ato ebmou, “Filistin nang ab, ni ab tonkwa dibibya ara teleb,” eboka mikib doboka abyokomna wikirtaleramwe uca, akai dakoka bukmou. Ba, Filistin mutuk sien nang nirya ab ur ninyi nirya akai wekmai tok nirya siklibmou. Er kam kuramwe talak aryi oramwe yubwa-yubwa ara mitikto bok, dibkouci obmou yubwa ara ilinto obmou. Ani, er Simson bibabyi tonkwa siklibmou.

31Ukubmou ura, er weit yabwe er du yabwe, er ai ninyi nirya yanmai. Ura, Simson ai siklibmoua tukwi boboka Zora mutuk kan, Esytaol mutuk kan noutam er nai Manoah tukwe dongoamnyi umbura akwe erbabyi neik umbura dongobmai. Simson kam kuramwe talak ara kwalina 20 baryi Israel nang malyi deyok liliboka kalingnanyi kiamuryi, taleamwe.

Currently Selected:

Hakim-hakim Uram 16: MTG

Highlight

Copy

Compare