Hakim-hakim Uram 17
17
Mikha biryi ninyi aryi kiknin dinyi asi, er kwemdeina kiboka moloramwe deyok
17:1-13
1Efraim mutuk kon dam asi ninyi tentok kuramwe, anyi si ara Mikha kuramwe. 2Ura, Mikha biryi er kwin bisi ato ebmou, “Nong kan keil uang 1.100 baryi ara ukula dobmang eboka, ukula dobunyi bisi submoumwe ara nibabyi kekebmase. Bok, a uang ara niryi dobse,” ebmou. Ba, er kwin biryi ato ebmou, “Ni mi, kanda Er Iya Erebdobnyi biryi kisal dakwankir,” ebmou. 3Ato ebmou ura, a uang 1.100 ara er mi aryi, er kwin bisi tamubkarebmou. Uca, er kwin biryi ato ebmou. “A uang 1.100 ara wiboka Er Iya Erebdobnyi bisi karebkwan. Ba, a keil uang aryi, kiknibdeiboka si weik eboka molonkwamibyi dinyi kiknibkwande. Ara, co aryi ya talekoka kiknibkwande dinyi ton, dengna weik keil si perak aryi uk nunuboka kiknibkwande dinyi ton kiknibkwande,” ebmou. Ura, a keil uang ara er kwin bisi, “Tamubkarebkwinkin” ebmou. 4Ura, er mi aryi er kwin bisi tamubkarebmou ba, er kwin biryi a keil uang 200 baryi doboka perak keil kikninanyi biti karebmou. Ba, ninyi atoanun a keil uang aryi kiknibmai. Sirya kiknibmai ura, Mikha ai umbura deibmai. 5Mikha bira kwemdeina kikniboka molon ai sirya doamuryi, molonkwamwe keica sirya kikniboka deiamwe. Ani, akai kwemdeina molon ai wa in nang taram karangna si efod ababyi sirya deiamwe. Ba, er Mikha er mi asi akai wa inanyi imam kibdeiamwe. 6Sun Israel ninyi a kuramnyi talak ara sienyi kimna ton kum kimdamnyi, eda sun teleb tenebdobni tok akwe kunuramnyi.
7Ani, kamnyi tentok Lewi yalanyi bok, atei Betlehem kuramwe. A mutuk ara Yehuda yala nang mutuk asi tingyangananyi kuramwe. 8Ura, anyi bira Betlehem atei aryi anaboka talyi da kubde yibaramwe ani, Efraim mutuk dam Mikha atei yandoka kuramwe. 9Asi Mikha biryi ersi asibmou, “A mi, kanda dan mutuknyi do?” ebmou. Uca, erci, “Nira Lewi yalanyi bok, Yehuda yala nang atei Betlehem kunun. Ba, nira talyi anda mutuk yibanyi ba, ‘A kubkun,’ tenebnyi tok kubde yibanun,” ebmou. 10Ba, Mikha biryi anyi bisi, “Ni ab kuronkwanim. Kuroranimiryi ni nai kibkiniryi ni kwemdeina molon ai wa inanyi imam kibdeibkwankin. Ura, kwalina tentok ara keil uang si perak takubaryi karenkwankin. Ani, ongon aling tentok kuboka yina ab karenkwankin,” ebmou. 11Ba, Lewi yalanyi biryi, “Teleb,” ebmou ura, anyi bisi Mikha biryi er mi kobdoba ato kibdobmou. 12Ura, Mikha biryi Lewi yalanyi bisi, er kwemdeina molon ai wa inanyi imam kibdeibmou. Ba, anyi bira er Mikha ai kuroramwe. 13Ani, Mikha biryi ato ebmou, “Ukura ni bikman, Lewi yala aryi ni molon ai wa inanyi kibde ati, Er Iya Erebdobnyi biryi nisi teleb kimkwanirca,” ebmou.
Currently Selected:
Hakim-hakim Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
