Hakim-hakim Uram 15

Simson biryi Filistin nang mar bobmou deyok

15:1-20

1Uki mitikanun kunmou ani, roti kwaning kikniraming keica kin talak dobmou. Ura, Simson biryi kambing mi tomobmouci, er ner ati bobinmou. Binmou ura, er yamal bisi ato ebmou, “Ni ner bisi binkwan ati, ni ner marande atei eterebnurum,” ebmou. Uca, er ner er nai biryi, “Kan ner ai ara atiba,” eboka kum eterebmou. 2Ura, er ner er nai biryi ato ebmou, “Kanda ni nebnyi kanya kum deibumci, li tenerum tenebmanaryi, kan kwit biti kabdeibman. Ati kanda er weit ner urasin teleb ner asi unuboka dobdobdum,” ebmou. 3Ba, Simson biryi er yamal bisi ato ebmou, “Uku talak aryi Filistin nang asi da kubnyi to nun ara ni deyok kuma eda sun deyok,” ebmou. 4Ura, Simson anaboka bindobmou. Ura, bai kam yubwa 300 baryi tomobmou ura, bitinyi-bitinyi waluboka tabwe koubmouci, a bai kam aimwe deici asi uk ubna biribdongobnin yibinmou. 5Ura, a bai kam asi biribdongobnin yibinmou uk ubna asi uk dinibdongobnin yibinmou. Ura, Filistin nang sun roti kiknin keica wa dam asi lobdongobokmou. Ba, sun roti kiknin keica yabla sekde mining damnyi dinyi ab, tuba tikoka du mouramwe dinyi ab, sun co zaitun ababyi nirya asi uk buk lemberekoka yibsekmou. 6Ba, Filistin nang aryi, “Unanyi biryi uk dinibmar do?” ebmai. Uca, ato ebmai, “Timna atei aryi Simson ner asi, er nai biryi doboka Simson er kwit yuknyi biti kabdeibmar ba, Simson biryi uk dabmara,” ebmai. Ba, Filistin nang anaboka Timna dam binmaici, a ner ab, er nai ab uk dongobmai. 7Ba, Simson biryi Filistin nang asi, “Sunci ato kubmarum ura, sunbabyi kisok daksinyi akwe ara taklobkwan,” ebmou. 8Ura, Simson biryi Filistin nang asi wa tuninto kuboka ninyi nirya obukmouci, mutuk si Etam mutuk kon asi keil siling umbura kuroramwe.

9Ba, Filistin nang anaboka Yehuda nang mutuk bindoka keis ol aruma atei dobdanin yibinmaici, Lehi atei mar bobinmai. 10Ba, Yehuda nang aryi, “Sun unatoa ati nun mar iyanmasurum do?” ebmai. Bok, sunci, ato ebmai, “Nunda, Simson biryi nunbabyi obsou to, erbabyi tabwe debkwamab ati yanganmab,” ebmai. 11Ura, Yehuda yala nang ninyi yubwa 3.000 baryi nang anaboka Simson bisi mutuk si Etam dam keil siling umbura kuramwe asi binmai. Bindoka, “Filistin nang aryi nunsi mar bobmasing ara kum bikmarim do? Kanci nunsi una kubkwamasirim?” ebmai. Uca, Simson biryi, “Sunbabyi ukuanei to sunbabyi kisok dakse,” ebmou. 12Uca, sunci Simson bisi, “Nunda kansi tabwe deboka Filistin nang asi karebkwinkib ati yanamib,” ebmai. Bok, Simson biryi sunsi, “Sunci anyi bira kum obkwayeb,” ebdarur. 13Ba, sunci, “Nunda kan obkwamakib ati kum yanmab. Eda, kansi tabwe dem deboka Filistin nang asi bobinkwamakib ati, yanmab,” ebmai. Ura, Simson talebmaici, ukuryok tabwe bitinyi bobmai akiryi tabwe deboka bobinmai. 14Ani, Lehi dam sirya bobinmai ura, Filistin nang aryi, “Obkub,” tenen luboka iyangai asi, Iya Erebdobnyi Kanya koukwe olokmou aryi mikib dobkarebmou. Ba, er debmai tabwe ara uk yibmaci tabwe kwamingca aryi dururub erande to kubmou. 15Ura, bisam si keledai si kankanya yok ukuryok liblobmaia asi dobdobmou ura, a keledai si kankanya yok aryi ninyi yubwa 1.000 baryi obukmou.

16Sirya obukmou ura, ato ebmou,

“Bisam keledai si kankanya yok aryi keledai aryi kanya kum boranda ato mutuk nang asi litukbukni.

Ani, keledai si kankanya yok aryi ninyi yubwa 1.000 baryi obukne,” ebmou.

17Ato ebmou ura, a keledai si kankanya yok bai donokmou. Ukuboka obmou deyok aryi a mutuk si ara, “Ramat-Lehi,” ebmou. Ara, Bisam keledai si kankanya yok mutuk eboka si dobmou.

18Ura, Simson me weik atanmou ba, Er Iya Erebdobnyi bisi, “Nai Er Iya Erebdobnyi ni kan wa irmilinanyi bisi milibmanoumwe ba, ninyi ilinto obkiribmonwe. Ukura ni me utan deyok aryi kansi dib kum tenekunungci den bam kum sengdanung nang taruk dam aryi ur da dibnun,” eboka molobmou. 19Ba, Er Iya Erebdobnyi biryi Lehi mutuk dam asi keil um botoboka me anabdeibmou ba, a me yibmou ura, Simson er mikib dongobmou. Ani, nong bol u yina kum kubmouci, er kanya lengleng ebkarebmou. Ato kubmou deyok aryi a me si ara, “Uram Doboka Molon Me U,” eboka si dobmou. A me ara Lehi mutuk dam uku talak ababyi tuba yibarur. 20Sun Filistin nang ab ordaramnyi talak aryi, Simson bira Israel nang sienyi kiboka malyi dinyi lilinanyi kiamwe ara kwalina yubwa 20 baryi kwaliamnyi.

Currently Selected:

Hakim-hakim Uram 15: MTG

Highlight

Copy

Compare