Kejadian Uram 32

Yakub biryi Esau ab urasin erdana ara er ilil kubmou deyok

32:1-21

1Ura, Yakub bisik noutam banmou uca, Er Imtamnyi uram eryuryangan nang ab ebdanmai. 2Ura, Yakub biryi sunsi asing eibmou ura, ato ebmou, “Ara, Er Imtamnyi yin doun nang aca,” ebmou. Ato ebmou deyok aryi a mutuk si ara, “Mahanaim,” eboka si dobmou.

3Ura, ninyi ton nang minob bokdonokmou ba, er du Esau bisi Edom mutuk asi mutuk si Seir dam kuramwe asi minob uram eryanmai. 4Ara, Yakub biryi a nang asi ato eboka uram ebdeibmou. “Sun minob bimunyi ura, ni du Esau bisi ato ebkwandarur, ‘Kan weit Yakub bira ato ebmar,’ ebkwandarur. ‘Minob ura nira Laban bisi bindoka kuranse. 5Ani, ukura ni bisam yabwe sapi ab, keledai ab, domba ab, ni wa arungnun ba, wa iraning nang ab, ai me ilingni nerabwe ab, ilinto doboka boyanganman. Ati, nai du, “Nisi boukwe kibnurum,” eboka molobmakir. Ba, nunda er ebdeibmar to eryanmab,’ ebkwandarur,” ebmou ba, erbinmai. 6Ura, a bokdonokmou nang ara bindoka sirya ebmai ura, tamuboka Yakub dam binmaici ato ebmai, “Nunda kan du Esau dam sirya bindoka kan ebdeibmomwe to ebmabci, yanmab. Ba, kan du Esau bira ninyi yubwa 400 baryi nang ab bobmarci, kansi bisik diryanganmakir,” ebmai. 7Ba, Yakub bira er kanyi teneina bukam kuboka ilil mitik kum kubmou. Ura, er milibmai nang asi meici kukoka olong bitinyi kibdeibmouci, bisam yabwe kambing toto ab, domba toto ab, unta toto ab ababyi ton tam tabangdeirin-ton tam tabangdeirin kibmou. 8Ara, ato tenebmouci, kiknibmou, “Esau yandoka sangkuna ton olong nang asi yandoka oboka erebdobci ura, ton olong nang ara bindobkwanunga,” tenen ato kiknibmou. 9Ura, Yakub biryi Er Imtamnyi bisi ato eboka molobmou, “Ni Nai Iya Erebdobnyi, ni abwe Abraham si weik eboka moloramunyi, ni nai Ishak moloramunyi. Ni Nai Iya Erebdobnyi Kanci nisi ato eboka arukmanirim, ‘Kan ab kan ai ninyi nirya ab kan mutuk ur tamuboka bindarur! Bimunyi ura, Niryi kansi telebto kubdeibkwankin,’ ebmanirim. 10Nira Kanci, tuba boukwe kibman kumnyi bok, ni kan wa inanyi bisi boukwe kiboka karebmanirim. Nira a me Yordan kouboka yanmase ara utotoa ton borona kum kubmase. Eda, a kama tentok douboka yanmase. Bok, ukura bona karebnoumwe ba, ni nerabwe mabwe toto, bisam yabwe toto, bona toto, bobankung nang ara ninyi olong bitinyi a wibdeibne. 11Ati, Nai se, Kansi molobmakin. Ara, sangkuna ni du Esau biryi nisi yandoka, ni ab ni nerabwe ab, mabwe ab obsicei ati, Kanci er yu wekmaci dinyi kum dandeibdum. 12Kanci nisi minob ato ebdeibnoumwe, ‘Niryi kansi teleb kibdeibkwankin. Teleb kibdeibkinyi ura, kan yaldangna aryi me wininga ato kubci ba, nuksekman kum kubkwande,’ ebnoumwe to kunurdeirina teleb,” eboka molobmou. 13Ura, a tum lukunda ara a dikum yandoka mabmou.

Ura, er bisam a boyangaramwe bisam yabwe kankan dam aryi bisam yubwa ton doboka er du Esau biti karebkwamou dinyi wiboka deibmou.

14Ara, kambing ner yubwa 200, yim yubwa 20 baryi wibdeibmou. Ani, domba ner yubwa 200 baryi, yim yubwa 20 baryi akaboka wibdeibmou. 15Ani, bisam unta yubwa 30 baryi ner akwe mi moum tuba yirdanmaia asi mi kibmaning ab, bisam lembu ner akwe yubwa 40 baryi ab, yim yubwa 10 baryi ab, bisam keledai ner yubwa 20 baryi ab, yim yubwa 10 baryi ab doboka wibdeibmou. 16Ura, er wa arukni ba, in nang olong yuk-yuk nirya asi a bisam yubwa bokeibmou. Ara, menekoka bobankwamnyi ati, doboka karebmouci, ato ebdeibmou. “Sunsi bisik boboka menekdarur. Bisik banmamunyi ara ton nang aryi ton olong nang aimdana mem. Eda, olong yuk-yuk liliboka binkwandarur. Ton olong nang kan-ton nang olong kan ara bisik lobdeibkwandarur,” ebmou. 17Ba, yuma kobdob menengbinkwamai nang asi ato ebmou, “Bisik menekoka banmamunyi ba, sangkuna ni du Esau ab ebdamunci, erci ato eboka asibkwansurur. ‘Sun nai kibdaunyi bira unanyi do? Sun dan banmarum do? Bisam yabwe a dam deiboka boyanganmarum bisam ara unanyi bisam yabwe do?’ eboka asibsici ura, 18ato ebkwandarur, ‘Kan wa irmilinanyi Yakub biryi, “Ni nai Esau biti menekoka bobindarur,” eboka arukmasir ba, boyanganmab. Ba, Yakub er nong ara nun aminda o yanganmar,’ ebkwandarur,” ebmou. 19Ato eboka bisam yabwe toto ninyi toto olong yuk-yuk wibmou ninyi aminda tikmai nang babyi, menekmai nang babyi, noutumang banmai nang babyi, nirya asi ato ebdeibmou. Ara, Yakub er kanya aryi ato tenebmouci, ebmou, “Niryi sunsi minob eabne uram asi Esau ab ebdamunyi ura, er dam lak ebkwandarur. 20Ani, tonda ato ebkwandarur, ‘Kan weit Yakub bira aminda o yanganmar,’ ebkwandarur,” ebmou. Ara, Yakub biryi ato tenebmouci, ebmou, “Niryi ni dama Esau biti deibman ba, bobanmang bona asi minob bobindoka karebingnyi bok asi er urasin dakdankwanim,” tenebmouci, ato ebmou. “Ara, ato kubnyi uca, er kanya yu bonina kum uca, er teleb kubkwande,” tenen aryi ato ebmou. 21Ato kuboka er du Esau biti er dama deibmou bona minob bobinmai. Ba, Yakub bira a lukunda ara keis ol ai dobmou atei a yandoka mabmou.

Yakub biryi Er Iya Erebdobnyi bisi molobmou deyok

32:22-32

22Ura, Yakub bira a keis ol atei dam yandoka mabmou ani, berekmou ura, er nerabwe bitinyi ab, er il me ilingna nerabwe bitinyi ab, er mabwe koklombaryi nang ab, boboka me si Yabok kouramnyi dikum koubmouci, otam bindoka kabdeibmou. 23Ura, tamuboka er bona ab, er bisam yabwe ab boryanmou. Ura, tubto boboka me koubdeibmou. 24Ura, Yakub er nong ara atam er yuk Er Imtamnyi bisi molonmou. Uca, sal tentok er dam yanmou. Anyi bira Er Imtamnyi Uram Erbananyi yanmouci, ersi taruk aryi bokmou ba, ordanmarei asi kiting tingyanmou. 25Ura, anyi biryi diramwe uca, Yakub mikib weik aryi sasibokmou. Ura, anyi biryi Yakub keil yok asi kwinikdongobmou. 26Ura, anyi biryi Yakub bisi ato ebmou, “Ura, kiting tingyangar ati, takdongobnurum bindobkwan,” ebmou. Uca, Yakub biryi anyi bisi ato ebmou, “Ni kum takdongobkwamakin. Eda, kisal dangna dinyi ton karebniminyi akwe, ura takdongobkwamakin,” ebmou. 27Uca, anyi biryi Yakub bisi asibmou, “Kan si ara unanyi da?” eboka asibmou. Ba, Yakub biryi, “Ni si ara Yakub,” ebmou. 28Ba, anyi biryi ato ebmou, “Ukura kan si Yakub erankungwe to kum. Eda, Israel enkwanking. Ara, kan ninyi sirik aryi Ni Imtamnyi ab ordanmanim uca, kanci Nisi obdongoboka kan erebdobdim ati, a si dobmakin,” ebmou. 29Ura, Yakub biryi anyi bisi ato eboka asibmou, “Kan si ara unanyi da? Kan si ababyi lak ebdarum!” eboka asibmou. Uca, anyi biryi ato ebmou, “Ni si ebdanyi ba, kan bikwamarim ara kikiman kum. Unati, ‘Si biktinyi,’ tenen asibmanirim do?” ebmou. Ura, a dikum aryi Er Imtamnyi biryi Yakub bisi kisal dangna dinyi karebmou. 30Ura, Yakub biryi a ordanmarei dikum si dobmou ara ato eboka si dobmou. “A dikum aryi Er Iya Erebdobnyi, Er urasin kobdob ni asing aryi eibman. Bok, ni dina kum kubman,” eboka, “Pniel,” ebmou. 31Ura, kiting sirya tingyanmou ura, Yakub a mutuk dam takloboka er keil kwinikdongobmou aryi nimalyi yan camdikdoro bindobmou. 32Er Iya Erebdobnyi biryi Yakub bisi mirikna yok kumubdongobmou. A deyok aryi Israel nang ara kamyoa yala nirya oboka yinmangnyi ababyi, mata yok ab keil yok ab dimdongorande kungkalya yok dakde kum yiramnyi. Ani, ukubabyi tuba kungkalya yok dakde yina kum kunung.

Currently Selected:

Kejadian Uram 32: MTG

Highlight

Copy

Compare