Kejadian Uram 33

Yakub ab Esau ab ebdanmarei deyok

33:1-20

1Ura, Yakub asing donongdamwe uca, er du Esau bira ninyi yubwa 400 baryi nang milibmai ba, o yanganmai asi eibmou. Ura, Yakub er mabwe ara bokoka, er ner Lea ton, er ner Rahel ton, dortabangni nerabwe bitinyi ton asi karebmou. 2Ura, er nerabwe tabakoka doamwe nerabwe bitinyi ab sun mabwe ab ara menekeibokmou. Ba, er ner Lea ab er mabwe ab ara noutumang kibdeibokmou. Ba, er ner Rahel ab, er mi Yusuf ab ara aminda kibdeibokmou. 3Ba, Yakub er nong kobdob ara menekoka banmou. Ani, Yakub bira menekmouci, kisok tukwe ikdongoboka er du bisi kibde banmou. Ani, liki tabaryi ukubmou ura, er du dam kobdob yanganmoua dam binmou. 4Bok, er du Esau cukaboka er weit iribdobmouci, engeboka u mulakdandobmarei. 5Ura, er du Esau biryi asing dirdonongdamwe uca, er weit nerabwe toto, er weit mabwe nermabwe toto, banmai asi asing eibmou. Ura, ato eboka asibmou, “Kan ab yanganmarum ninyi ara una ninyi da?” eboka asibmou. Uca, er weit Yakub biryi ato ebmou, “A yanganmanga ara ni mabwe yanganmang. Anda mabwe ara Er Imtamnyi biryi nisi karebnou mabwe a yanganmang atiba,” ebmou. 6Ura, Yakub er tabakoka don nerabwe minob mining dam binmai ura, sunci kisok luknubdongoboka kibdobmai. 7Ani, er ner Lea ab er mabwe ab banmai ninyi ababyi dam binmai. Ura, tubto kisok luknubdongoboka kibdobmai. Ani, Yusuf ab Rahel ab banmai ninyi ababyi dam binmai ura, kisok luknubdongoboka kibdobmai. 8Ura, Esau biryi ato ebmou, “Bisam yubwa minob ni dam o bobinmang ba, ebdanmab nang ara una tenebmarimci, bokdonokmoumwe do?” eboka asibmou. Uca, er weit Yakub biryi ato ebmou, “Nai du, a bobanmongwe dinyi ara kanti boyanganmakungwe,” ebmou. 9Uca, Esau biryi ato ebmou, “Ni kwit, nibabyi bona toto, bisam yubwa toto ilinto taleboka bonun. Ati, kan bona ni karebniminyei,” ebmou. 10Uca, Yakub biryi ato ebmou, “Nai du, ato ena mem. Niryi kansi a bona talebminci, kan kanya karyi kubkwankir ati, karebmakin. Ani, tonda kan urasin ebdanmanim uca, yu tuba kukina kum uca, urasin lengleng asa bobmarimci, kanyi deiboka nisi bisik diroryanmanirim. Niryi kan urasin eibmakin ara Er Imtamnyi urasin eirininto kubmakin. 11Ati, ‘Anda bona ni li,’ ena mem. Eda, ur dobdobdum. A boyanmakin bona ara Er Imtamnyi biryi dengna kum uca, ur karenurur ba, ukutotoa yala nirya ilinto talenun bona asi, ‘Ni kwit teleb,’ ebdandoka kirdaron dinyi ati, boyanmakin. Anda bona ara ni bobde talenun bona asi nai du kanti yandoka ur karebmakin ati, ‘Ni li,’ ena mem. Ur dobdobdum,” eboka nenebmou ba, anda bona dobdobmou. 12Ura, Esau biryi er weit Yakub bisi ato ebmou, “Yo teleb, ura tonkwa baronkwayeb,” ebmou. 13Uca, Yakub biryi Esau bisi ato ebmou, “Nai du, ni mabwe ara yan mitang kubmar aryi mikib doboka binman kum kubmar. Ani, ni milibmaning nang ababyi bisam bobmang dinyi ara moum tuba yirdarur aryi mikib doboka binman kum kubmar. Ati, tentok tum aryok banmabyi ura, bisam yubwa dibsekingnyob. 14Ati, nai du kansi menekoka minob binmarum. Nunda, bisam yabwe ab, ni mabwe ab, sun yan mikib kubci to kuboka, aminda nimalyi mabde yangaramibyi ani, kan mutuk Seir dam asi yankwayeb,” ebmou. 15Uca, Esau biryi ato ebmou, “Ato ebmarim ura, ni milibnei ba, yabwe nang ton kanti a takdongobniryi binkwan. Ba, a nang ara kan ab yandarur,” ebmou. Uca, Yakub biryi ato ebmou, “Kum, kan milibkei nang a takloboka bana mem. Kanci, kanya teleb kuboka bisik diryanmanirima bikdoba,” ebmou. 16Ura, a tum aryok Esau banmou ani, mutuk si Seir dam binmou. 17Ura, Yakub aminda baramwe ani, minob Esau keken dam eamwe to kum kunubmou. Eda, Yakub baramwe ani, mutuk si Sukot dam binmouci, er ai sirik ab, er bisam yabwe ai ab dobmou. Ato kubmou deyok aryi a mutuk si ara, “Sukot,” enung.#33:17 Sukot ebyi ara koka lilibdeiboka bun ai ati ebyi.

18Ura, Yakub bira mutuk si Padan-Aram aryi kuboka baramwe ani, Kanaan mutuk atei si Sikhem dam teleb akwe sirya yandobmou. Ura, weik atei Sikhem doramya dam aryi kuboka yaletam asi bindoka keis ol ai atei dobmou. 19Yakub atei bindoka dobmou dikum ara Sikhem er nai si Hemor yala nang aryi keil perak uang yubwa 100 baryi kuboka dekamnyi dikum asi bindoka ai dobmou. 20Ura, Yakub biryi a mutuk asi Er Imtamnyi biti dama deiboka uk dan keil lamna dukoka labmouci, a keil lamna si ara, “Nun Israel nang molonubnyi bira Er Iya Erebdobnyi kurur,” eboka si dobmou.

Currently Selected:

Kejadian Uram 33: MTG

Highlight

Copy

Compare