Kejadian Uram 31

Yakub bira er mam Laban takloboka bindobmou deyok

31:1-21

1Uki tentok aryi Yakub kekenmou uca, Laban mabwe aryi ato enmai, “Nun nai Laban bona nirya Yakub dinyi akwe kibdobdaryi bona ilinto kibdoro bar aryok,” eboka sisingmai asi Yakub kekebmou. 2A talak ara er mam Laban urasin ababyi minob talak lengleng eramwe to kum uca, eda tulum urasin boramwe dinyi ara Yakub sirya asing eirongnamwe. 3Ura, Er Iya Erebdobnyi biryi Yakub bisi ato ebmou, “Kan nai mutuk dam ab kan yala ninyi kunung mutuk dam ab asi bindobdum. Bindobminyi ura, Niryi milibkwankin,” ebmou. 4Ura, Yakub biryi er nerabwe Rahel ab, Lea ab asi ato ebmou, “Bisam kambing toto, domba toto kalikmanyi dam yarurum,” ebmou. 5Ba, er nerabwe yanmarei ura, ato ebmou, “Sun nai bira min kunub talak borur urasin ara lengleng erur. Ucab, uku talak bonmar urasin ara yu urasin bonmar. Bok, ni nai moloramunyi, Er Imtamnyi tanglona kum kunururci, tuba milinurur,” ebmou. 6Ani, ton ato ebmou, “Sun bikmarurum, niryi sun nai wa asi mikib doboka, ilinto ibde banun dinyi ara sun sirya bingdurum. 7Bok, sun nai biryi liki takubaryi inina dokoka ni karebmanto dinyi asi mininga kukoka bobdobwe. Ukubnou bok, Er Imtamnyi tuba milinurur deyok aryi sun nai biryi nisi ona kum kubnou. 8Sangkuna sun nai biryi, ‘Tobtobokna lerdaranci bisam kambing ab, domba ab akwe kan wa irandim dinyi dengna karenkwankin,’ eboka karebkwanir. Ba, anda bisam yabwe mi yaldakci ababyi ara tobtobokna lerdaranci bisam akwe yaldakwandur. Ani, sangkuna ton ato ebkwanurur, ‘Bol tirdaranci bisam akwe kan wa irum dinyi dekwankin,’ eboka karebkwanurur. Ukubnici ura, anda bisam sun mabwe ababyi bol tirdaranci bisam mabwe akwe deibdankwandur. 9Ukuboka Er Imtamnyi biryi sun nai bisam yabwe nirya niti karebmanir. 10Anda bisam yabwe asi mundu bobdai ura, uki tentok tum aryi, ni lengdera mabmase uca, ato kubwe asi asing eibse. Domba bisam babyi, kambing bisam babyi yim akwe kimou. Bok, anda bisam yim nirya ara tir bol ab, tobtobokna bol ab akwe kimou asi asing eibse. 11Ura, Er Imtamnyi uram eryuryangananyi biryi nisi ato ebnou, ‘Yakub a! Yakub a?’ ebmanou. Ba, niryi, ‘Nai uko?’ ebmase. 12Uca, Erci nisi ato ebnou, ‘Urasin lengleng eboka nisi dinurum!’ Niryi dinun uca, Laban urasin ara tulum-tuluma dongorurci, kansi yu bobkou. Ati, niryi teneboka ukubdeiboknyi ba, domba bisam yim babyi, kambing bisam yim babyi ara bol otong tobtobokna bol ab, tir bol ab, kweita bol ab kuanci bisam yabwe akwe yaldobdankwaming. 13Nira, Imtamnyi, Betel dam aryi, keil dukoka tikeiboka, ‘Er Imtamnyi a dikum kurur,’ eboka si ereanumnyi bikwe a yanman. Ati, ukura anarorum! Anabdobminyi ura, a mutuk takloboka, sun mutuk kobdoba kan atei nang kunung mutuk bindobdum,” ebmanou, ebmou. 14Uca, er nerabwe Rahel ab, Lea ab aryi ato ebmarei, “Nun nai biryi er boboka taleranci dinyi nunti karebmanto dinyi ton kum kubmar. 15Nunda kan yuk ateinyi biti kabdeibkou kan wa iramoumwe dinyi dekou ura, nunda yuk atei nerabwe kibsou. Nunsi dekansoumwe bona sirya boboka talebdoburyi, kum dandeibwe ati, nun dinyi ton kum kubmar. 16Ati, nun nai boboka taleramwe bona nirya ara Imtamnyi biryi dobdobwe. A bona nirya ara nun dinyi ab, nun yaldakwanim mabwe dinyi ab kibkwande. Ati, ukura kan Nai Imtamnyi ebmar to ur kunubdum,” ebmarei.

17Ura, Yakub er nerabwe ab, er mabwe ab bisam unta deici bukeiboka anabmou. 18Ura, mutuk si Padam-Aram dam kuramuryi, boboka taleramwe dinyi nirya ab, er bisam yabwe ab, nirya boboka anabmouci, er nai Ishak bisi Kanaan mutuk binmou.

19Ura, Laban bira er bisam domba yabwe otong kungbinmou. A tum aryi er nai Laban er kwemdeina atoanun kikniboka moloramwe keica si terafim asi Rahel biryi ukula dobdobmou. 20Ura, Yakub biryi er mam Laban Aram ateinyi bisi molona kum uca, “Kunusa deici aryi bindobkwaman,” tenebmou. 21Ato kuboka er bona taleramwe dinyi nirya caboka bobmouci, me si Efrat kouboka, Gilead kon bisik binmou.

Laban biryi Yakub bisi dombinmou deyok

31:22-42

22Yakub anaboka er atei baronmou ara uki winiryi tum berekmou bok, Laban bikmou. 23Ura, Laban er atei ninyi bulubdeibmou ura, tonkwa anaboka Yakub bisi dombinmai. Yakub bisi a dobde baramnyi uki ara mutuk era deyok aryi uki tabaryi dobde baramnyi ani, mutuk Gilead konkon bindoka dam seknebmai. 24Lukunda ara lengdera deici aryi Er Iya Erebdobnyi biryi Laban Aram mutuknyi bisi yanmouci, ato ebmou, “Yakub bisi biminyi ura, uram talyi mitik tentok ababyi uram dimna mem. Eda, kan si bambul diboka kalikdankwandum!” eboka ebdukeibmou. 25Ura, Laban ab, er milibmai nang ab dombanmai ani, Yakub Gilead kon bindoka keis ol ai donmai. Ura, sunci Yakub ab er mabsilib ab ara otam keis ol ai dobmai. 26Ura, Laban biryi Yakub bisi ato ebmou, “Kan unati nisi inina dokoka, ni nermabwe bobmarimci, mar ordan nang asi yu ninyi talen ai dongoraming to kuryanganmarim da? 27Una deyok ati, ni molonina kumkum likibna bukam kiboka yangaronmarim da? Ni keken dam asi, ‘Nai, ni atei bindobkwan,’ eboka molobmanutum ura, karyi asa aryi mot seboka, lilim ena si rebana toto, kecapi toto douboa kwebnin yanganmatibiryi iniboka boyanankitinya se! 28Ani, ni nermabwe ab, ni nermabwe aryi mabwe ab asi, ‘Sirya kirona ati, u kunkunuboka kibminyi ba, binkwayeb,’ eboka uki karenina kum kubnoumwe ara unati kubnoumwe do? Ato kubnoumwe ara iya walwalto kubnoumwa de! 29Nira, ‘Kan obdobkwankin,’ tenen iyanganmakin. Bok, kan nai Moloramunyi, Er Imtamnyi biryi arub lukunda aryi lengdera deici aryi ato ebmanir, ‘Yakub bisi uram tentok ababyi bindoka dimna mem. Diboka kalikdankwandum,’ ebmanir. A deyok aryi kansi ona kum kubkwamakin. 30Eda, kanci, ‘Ni mutuk dam ni nai bisi bindobtinyi,’ tenebmoumci, yangaronmarim. Bok, unati ni kwemdeina ukula doboka boyanmarim do?” ebmou. 31Uca, Yakub biryi Laban bisi ato ebmou, “Molonmakinyi asi, ‘Kan nermabwe ara kanbabyi kibdobminyei,’ tenen ati, molona kumkum yandobse. 32Bok, kan kwemdeina ukula doboka yanandinyi bira kam kuna kum kubkwande eda, obkwandum. Ati, ni ai ninyi sun aling nirya yokoka ebde yibanmaminyi ani, eibdobminyi ura, kan keica yokdobdum,” ebmou. Ba, Yakub bira er ner Rahel biryi er nai kwemdeina atoa ukula doboka yanamwe ara kum bikmou deyok aryi ato ebmou. 33Ura, Laban biryi Yakub keis ol atei dobdanmou dikum bindoka, Yakub ai wekoka dibde, Lea ai wekoka ingkirikde, sun wa irmilin nerabwe bitinyi ai ton ner ai dibde, ton ner ai dibde, kibdenmou. Ani, Lea ai sirya dibdenmou ura, Rahel ai wengbindoka ingkirikmou. 34Uca, Rahel bira er nai Laban, er kwemdeina atoa kikniboka moloramwe keica ara doboka bisam unta deici tam aling kibdongoboka alib bukokmou. Ba, er nai Laban bira Rahel ai nirya kalaboka ingkiringmou uca, er kwemdeina keica kum eibmou. 35Ura. Rahel biryi er nai bisi ato ebmou, “Nai nira, ‘Unati kum tikokmar do?’ tenebniminyei. Nira bunga ining yibanmanir ati, kan urasin dam kum tikokwaman,” ebmou. Ura, Laban anda niryi kuluboka ingkiringdenmou ba, er keica kum eibmou.

36Ura, Yakub yu wekoknin bau ura, er yamal Laban ab obdanin yibarei. Ani, Yakub biryi er yamal Laban bisi ato ebmou, “Niryi una dinyi dakbisibman do? Niryi malyi kun dinyi ara una kubman ati, domyandoka atoa weikto kunmanirim do? 37Nai mam, ni ai a nirya ingkiringmarim ara kan keica eibdobmarim do? Kan keica dobdobmaminyi ura, lak a deibdongobdum. Ba, ni milin nang ab, kan milin nang ab asing ni malyito kubman kum, kan malyito kubmarim kum, lilibdandenkwayeb. 38Kwalina yubwa 20 kan ab ni ab tonkwa kununum. Nira kan bisam domba ner toto, kambing ner toto winirankunwe talak ara bisam mundu bobmaci bok, yongsinina ton kum kuranwe. Ani, domba bisam babyi, kambing bisam babyi yim ara ton obde yina ton kum kuranwe. 39Bai kam aryi domba bisam babyi, kambing bisam babyi asi yandoka obmaci ababyi kan dam ton boyangana kum kuranwe. Eda, niryi a obmaci dinyi olong unurdongoranwe. Ani, bisam yabwe ukula lukunda yandoka dobmangnyi dinyi babyi, kitingtam aryi ukula yandoka dobmangnyi dinyi babyi ara mam kanci, ‘Ola unubkwanduma,’ ebniminyi tok unuranwe. 40Ni kan bisam kalingdanwe ara kitingtam ara kiting deici a dalabokmanyi ba, kiting aryi ulib-ulib eroranou. Ba, lukunda ara a labdabokmanyi ba, mabmanto uki dangbisiroramwe. 41Kwalina yubwa 20 baryi nirya ara kan ai akwe kuranwe. Ani, kan nermabwe doboka, dekwankunwe ati, wa iranwe kwalina ara 14 baryi kwalianwe. Ani, kwalina nabaryi ara kan bisam yabwe karebkwanoumwe ati wa irankunwe. 42Ni abwe Abraham ab, ni nai Ishak ab, moloboka si weik erandei Er Imtamnyi biryi nisi milina kum kuranute ura, ‘Utotoa ton kum karebkwamakin ati, te baning da bindobdum,’ eanutum. Bok, ni ying asa il doboka, wa iranse dinyi ara ni Nai Imtamnyi diblilianou. A deyok aryi arub lukunda aryi, ‘Unanyi bisi malyito kubmar do?’ eboka deyok lilinmoubwe ai aryi, Er Imtamnyi biryi lak kibmarci, kansi, ‘Laban bisi malyito kubmar,’ ebmakir ara sirya kunubmar,” ebmou.

Laban ab Yakub ab uram talak ebdeibdandoka uram bebna dinikeibdanmarei deyok

31:43-55

43Ura, er mam Laban biryi ato ebmou, “Anda doyanganmarim nerabwe nirya ni nermabwe akwe doyanganmarim. Anda boyanganmarim bisam yubwa nirya ara ni bisam yubwa akwe boyanganmarim. Ani, kan a boyanganmarim keica yala nirya ni dinyi akwe boyanganmarim. Ati, niryi ni nermabwe ab, sunci yaldakwaming mabwe ab ati una ebdeibtinyi do? 44Yo teleb ukura ni ab kan ab, uram talak likeibdandoka bebna dinikeibdankwanim. Ba, ukuboka uram talak likeibdananimnyi aryi, ‘Ukubdanoumwe,’ tenen teneirdenkwanim,” ebmou. 45Ura, Yakub bira keil tentok kurukoka bukeibmouci, “Ukubdananoumwe,” tenenkwamwe dinyi tikeibmou.

46Ura, Yakub biryi er nerabwe toto, er milibmai nang toto asi, “Keil borkiringdarur,” eboka arukmou. Ba, keil bobkirikoka dukdanin welebmai. Ani, sun yina a keil dungmaia dam yibmai. 47Ura, Laban biryi a keil dukmaia si ara, “Yehar-Sahaduta,” eboka si dobmou. Bok, Yakub biryi si dobmou si ara, “Galed,” eboka si dobmou. 48Ura, Laban biryi ato ebmou, “A keil dukoka tikeibne dinyi aryi ni ab, kan ab, ‘Ukubdananoumwe,’ tenen asing dina ati kiknibmanci, a keil dungna si ara Galed eboka si dobman.” 49Ura, Laban biryi ato ebmou, “A keil si akwe ton si ara Mizpa eboka si dobne. Ara, ni ab kan ab a ebdananimiryok yuk-yuk kubnimyi ababyi Iya Erebdobnyi kalikwansir deyok aryi a si dobman. 50Kanci ni nermabwe a doamin cok, takloboka yuk nerabwe dobminyi ura, ninyi asing kum eibmasingnyi ababyi Er Imtamnyi biryi asing eiboka bikwansir,” ebmou.

51Ani, Laban biryi er mi Yakub bisi ton ato ebmou, “A keil buluboka tikeibne dinyi ara ni kan, kan kan wilimna tikeibne. 52A keil tikeibna aryi sisa ikninto kubdeibne. Ati, nira a keil dungna bisibkaboka kan dam yangana kum kunkwan. Ani, kanbabyi a keil dungna bisibkaboka ni dam yangana kum kubkwandim. Yu wekmasici ababyi a keil dungna wilimna bisirongna kum kubkwanim. 53Ati, nun abwe yabwe Abraham ab, Nahor ab, si weik eboka molorandinyi biryi nibabyi, kanbabyi, wenebkwansir,” ebmou. Ura, Yakub biryi er nai Ishak Moloramunyi si deici aryi, uram talak eboka bebna dinikeibmou. 54Ura, Yakub biryi domba bisam ngang sekeiboka ining kwebmouci, Er Imtamnyi biti dama deiboka molobmou. Ura, er nerabwe mabwe ab, er ai ninyi ab nabmou ura, buluboka tonkwa a mutuk kon yibde mabmai. 55Mabmai ani, berekmou ura, belekuna ara Laban er nermabwe ab, er nermabwe aryi mabwe ab, u kunkunuboka mulakdobmou ura, sunsi kisal dangna dinyi karebmou. Ura, Laban tamuboka er atei yandobmou.

Currently Selected:

Kejadian Uram 31: MTG

Highlight

Copy

Compare