Keluaran Uram 7
7
1Er Iya Erebdobnyi biryi Musa bisi ato ebmou, “A bikandum, Niryi kansi, Ni Imtamnyi bitonyi kiboka, Mesir sienyi Firaun biryi kansi molonkwankiranyi kibdeibkwankin. Ba, kan du Harun bira kan uram boboka etererbananyi kibdeibkwan. 2Kanci ni ebman tok nirya Mesir sienyi Firaun bisi ebkwamarum. Tonda, kan du Harun bibabyi Firaun keken ai bindoka ebkwamarur. Ba, sun Israel nang asi a mutuk dam aryi, ‘Ur bindarur,’ eboka mundu lobkwansir. 3Uca, Niryi Firaun kanya kat kibdeianiryi ikin weik dinyi ab ilil tenen dinyi ilinto kibdeiboka Mesir mutuk dam asi karebkwan. 4Firaun biryi sun uram kum kekebsici ura, Ni taruk aryi Mesir mutuk dam aryi Israel nang asi Niryi wiboka yin doun nang kibdeibse nang anabdeibnyi ba, Mesir nang asi ikin weik dinyi kareboka wenebkwaman. 5Ba, Niryi Mesir mutuk asi ikin dinyi kareboka wenebnyi ura, sun kankan dam aryi Israel nang boboka anabdeibkwan. Ba, Mesir nang aryi Nisi, ‘Erda Iya Erebdobnyi dib kurur,’ tenebkwaning,” ebmou. 6Ura, Musa ab, Harun ab asi Iya Erebdobnyi biryi, “Ato ukubdurum,” ebmou ura, sunci er ebmou to kunubmarei. 7Ba, Musa kuramwe talak kwalina 80 baryi kwaliamnyi. Ba, Harun bibabyi kwalina 83 baryi kwaliamnyi. A talak aryi sunci Mesir sienyi dam uram sisingyanmarei.
Musa kama ara kwatima danmou deyok
7:8-13
8Ba, Iya Erebdobnyi biryi Musa ab, Harun ab asi ato ebmou, 9“Mesir sienyi Firaun biryi, ‘Ilil tenen dinyi ni urasintam ukubderurum,’ ebsici ura, Harun bisi ato ebkwandum. ‘Kan kama doboka Mesir sienyi dam asi donokdum,’ ebkwandum. Donokci ba, a kama ara kwatima dankwande,” ebmou.
10Ura, Musa ab, Harun ab kunuboka Firaun dam binmarei ura, Iya Erebdobnyi biryi ebmou to kunubmarei. Ura, kama Firaun dam ab, er wa in nang dam ab donokmou ba, kwatima danmou. 11Ba, Firaun bibabyi Mesir mutuk nang asing kerket nang ab, mirei bingna nang ab asi arukmou ba, sunbabyi sun mirei bingna dinyi ukubmai ba, kwatima danmou. 12Ukuboka sun kama yuk-yuk donokmai ba, kwatima dansekmai. Ba, Harun kama aryi kwatima danmou dinyi aryi sun kama aryi kwatima dansekmai kwatima asi tomoboka alubsekmou. 13Uca, Er Iya Erebdobnyi biryi minob eamwe to kuboka Mesir sienyi Firaun kanya kat biribdeibokmou aryi sun ebmarei uram kum kekebmou.
Ikin dinyi yuma wenebmou dinyi ara me asi ining kibmou deyok
7:14-25
14Iya Erebdobnyi biryi Musa bisi ato ebmou, “Mesir sienyi Firaun kanya kat biribokmar aryi Ni uram keken nang asi, ‘Ur bindarur,’ kum ebmar. 15Ati, belekuna er Mesir sienyi me kin barande talak asi birurum. Kama kwatima danmou kama doubdobmarurumci, me Nil kin bindoka dibde kunmarurum. 16Ani, ato ebkwandum, ‘Er Iya Erebdobnyi, Ibrani nang molonungnyi biryi, “A uram erbirum,” ebmanir ati eryanman. Ara, ato ebmar, “Ni wibdeibse nang lobdeibdum. Lobdeibminyi ba, yini mutuk dam Nisi molorbinkwaning. Ukubdenin banun uca, kum kekerum.” 17Ati, Iya Erebdobnyi biryi ato ebmar, “Iya Erebdobnyi dib kurur,” tenebkwindimca. Ura, a dirum a doubman kama aryi me Nil asi obnyi ura, me nirya ining akwe dankur. 18Ba, me Nil umbura kurur mekinaia nirya dibsekwamar. Ba, lun tong aryi Mesir nang Nil yibman kum dukna asa dongobkwamar,’ ebmar,” ebmou.
19Er Iya Erebdobnyi biryi Musa bisi ato ebmou, “Harun bisi ato ebdum, ‘Kan kama dobtalebokabminci Mesir nang me nirya taruk iboka ukdongobnin yibirum. Ara, yiban me babyi, sangkol me babyi, kwan me babyi, me kweramingnyi dikum nirya ukubdum. Ara, keil sangkol me babyi, co sangkol me babyi nirya ukubkwandum. Ba, a nirya ara ining akwe dankwande,’ ebdum,” ebmou.
20Ura, Musa ab, Harun ab aryi Iya Erebdobnyi biryi ebmou to kunuboka kama doboka, Mesir sienyi ab, er wa irmilin nang ab urasin dam aryi, me Nil deici asi kama aryi kulabmou. Ba, me Nil nirya ining akwe danmou. 21Ba, me Nil umbura kuramwe mekinaia nirya dibsekmai ba, lun tong aryi Mesir ninyi me Nil yibman kum kubmou. Ani, a mutuk me nirya ining akwe oblibmou. 22Ucab, Mesir mutuk mirei bikamnyi nang aryi, Musa ab, Harun ab me asi ining kibdeibmarei to, sunbabyi mirei bikamnyi to kuboka me asi ining dandeibmai. A deyok aryi Er Iya Erebdobnyi biryi eamwe to Musa ab, Harun ab ukubmarei dinyi kum eiana ato kuboka Firaun bira kanya kat biribokmou. 23Ura, Mesir sienyi a dinyi asing dina er li kubmou ura, tamuboka er atei dam yandobmou. 24Ba, Sun Mesir nang nirya aryi me Nil ara yibman kum ati, “Me yibkwanuba,” tenen me Nil kubkub asi tukwe kurukoka ingkirikmai. 25Iya Erebdobnyi biryi me Nil asi ining kibdeiamwe talak ara uki tabaryi mabmai ura, minob kuamwe bol kibmou.
Currently Selected:
Keluaran Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
