Keluaran Uram 8

Liki bitinyi dinyi ara weik wenena bita kareboka wenebmou deyok

8:1-15

1Er Iya Erebdobnyi biryi Musa bisi ato ebmou, “Ni wibdeibse nang Nisi si weik eboka molorbinkwaning ati, talebumwa takdongobdum. Mesir sienyi bisi bindoka ato ebdum. 2Ni wibdeibse nang asi kum takdongobminyi ura, Niryi weik wenena kan mutuk nirya bita karebkwaman. 3Ba, bita yubwa ilinto me Nil umbura asi bulubkwamang. Ani, anaboka kan atei dam weleyandoka kan man ai wengyankwamang. Ani, kan man sokon ababyi wekwamang. Ani, tonda kan wa irmilikin nang ai ab, kan atei nang ai ab, kan roti kwaning daranking dikum ab ani, kan roti kwaning kikniranking keica umbura ababyi nirya oblibkwamar. 4Ba, anda bita aryi kan nong deici weleboka amubkwamaking. Ba, kan atei nang nong deici ab, kan wa irmilikin nang sun nong deici ababyi, weleboka amubkwamasing,” ebmou.

5Ura, Iya Erebdobnyi biryi Musa bisi ato ebmou, “Harun bisi ato ebdum, ‘Kan taruk ereboka kama aryi yiban me deici ab, tomol me deici ab, kwan me deici ab asi kama ukdongobminyi ba, bita anaboka mesir mutuk nirya bita akwa oblibkwande,’ ” ebmou. 6Ura, Harun biryi Mesir mutuk me nirya kama aryi ukdongobmou ba, bita anaboka Mesir mutuk nirya bita asok akwe oblibmou. 7Uca, Mesir mutuk mirei bingna nang sunbabyi bita anabdeibnin yibinmai ba, Mesir mutuk nirya bita asok akwe oblibmou.

8Ba, Mesir sienyi biryi Musa ab, Harun ab asi nabmou ura, ato ebmou, “Sunci Iya Erebdobnyi bisi molobdurum. Ba, ni ab, ni atei nang ab dam kurur bita yuk ai kibdeibkwande. Ato kubci ura, niryi, sun atei nang asi, ur sun Nai Iya Erebdobnyi biti sun dama deiboka molorbindarur, eboka mundu lobkwansin ati,” ebmou. 9Uca, Musa biryi Mesir sienyi bisi ato ebmou, “ ‘A talak moloryanururum,’ ebdum. Ba, nai, kan ab, kan wa in nang ab, kan atei nang ab ati, ‘Bita kum darur,’ eboka molobkwaman. Ba, kan dam kurur bita ab, kan ai kurur bita ab kum dandeibci ura, me Nil umbura akwa kubkwande,” ebmou. 10Uca, Mesir sienyi biryi, “Ambutum aryi moloryankwanururum,” ebmou. Ba, Musa biryi, “Kan ebmarim to kunubkwamar. Ba, nun Israel nang Iya Erebdobnyi bira, ‘Dib kurur,’ tenebminyi ura, ‘Yuk kwemdeina ara mikib ton kum kurur,’ tenebkwamarim. 11Ba, bita yubwa nirya kan dam aryi kum dankwamar. Ani, kan ai nirya ab, kan wa in nang ab, kan atei nang ab nirya kum dariryi, me Nil umbura akwe takwamar,” ebmou.

12Ura, Musa ab, Harun ab anaboka Mesir sienyi takloboka bindobmarei. Ura, Musa biryi Iya Erebdobnyi bisi, bita Mesir sienyi bisi weik wenena kareamwe deyok ati, Iya Erebdobnyi bisi molobmou.

13Ba, Iya Erebdobnyi biryi Musa molobmou to kunubmou. Ba, a bita nirya ai umbura ab, ai dam ab, wa dam ab nirya dibde yibinmou. 14Ura, a bita dibdoba nirya bobulubmai ara olong ilinto bulubminikmai. Ba, a mutuk nirya lun tong oblibmou. 15Bita sirya dibmai asi, Mesir sienyi eibmou ura, er kanya teleb kubmou cok, kanya kat biribokmou. Er Iya Erebdobnyi biryi eamwe to kunuboka a bitinyi nang uram kum kekebmou.

Liki winiryi dinyi ara weik wenena suma kareboka wenebmou deyok

8:16-19

16Er Iya Erebdobnyi biryi Musa bisi ato ebmou, “Harun bisi ato ebdum. ‘Kan kama aryi tukwetam asi iboka kulabdum,’ ebdum. Ba, tukwe borbota aryi suma dandoka Mesir mutuk nirya oblibkwande,” ebmou. 17Ba, Er ebmou to kunuboka, Harun biryi kama tukwe borbota deici kulabmou. Ba, suma yubwa anaboka ninyi nong deici babyi, kamyoa nong deici babyi amubmai. A tukwe borbota nirya aryi suma dandoka Mesir mutuk nirya oblibmou. 18Ani, mirei bingna nang ababyi sun mirei aryi, “Suma darur,” tenen ukubdenmai uca, kum kunubmou. Eda Harun biryi ukubmou dinyi asi suma danmouci, ninyi nong deici babyi, kamyoa nong deici babyi nirya amubmai. 19Ura, a mirei bingna nang aryi Mesir sienyi bisi ato ebmai, “A kunubmar dinyi ara Er Imtamnyi taruk aryi kunubmar,” ebmai. Uca, Er Iya Erebdobnyi biryi minob eamwe to kuboka Mesir sienyi kanya kat biribokmouci, sun uram kum kekebmou.

Liki dumbaryi dinyi ara weik wenena bum amubmou deyok

8:20-32

20Er Iya Erebdobnyi biryi Musa bisi ato ebmou, “Berentam kobdob anaboka Mesir sienyi bisi dibde tikwamarurum. Er me kin barande to baci ura, Iya Erebdobnyi biryi ato ebmar ebkwandurum, ‘Ni wibdeibse nang mundu lobmimba, Nisi molorbinkwaning ebmar,’ ebdurum. 21Kanci, ‘Ur bindarur,’ eboka mundu kum lobminyi ura, Niryi kan ab, kan wa in nang ab, kan atei nang ab, kan atei ab asi bum amubdeibkwamasin. Ba, Mesir nang ai kununga nirya ab, sun mutuk dam kunung tok nirya bum akwe amubdankwande. 22Uca, a tum aryi Niryi Gosyen mutuk ara bum kum kubkwande. A mutuk ara Ni wibdeibse nang kuramingnyi mutuk aryi bum mitika ton kum kubkwande. Ba, kanci Nisi, ‘Erda Iya Erebdobnyi dib a mutuk dam kurur,’ tenebkwanirim. 23Ara, ato deyok ati ebman. Niryi kan mutuk nang yuk kibdeibnyi ura, Ni wibdeibse nang yuk kibdeibkwan. Ambutum ara a weik wenena kunubkwamar,” Er Iya Erebdobnyi ebmou. 24Iya Erebdobnyi biryi ato ebmou to kunubmou ura, Mesir sienyi atei dam asi bum mitik kum yanmou. Ani, er wa in nang atei ababyi wekmou. Ani, Mesir mutuk nirya oblibmou. Ba, a mutuk ara bum amuramwe aryi mambul doramnyi.

25Ura, Mesir sienyi biryi Musa ab, Harun ab asi nabmou ura, ato ebmou, “Sunci sun Nai Iya Erebdobnyi bisi ur molorbirurum. Bok, era mutuk mem, eda dam a mutuk asi molorbinkwandurum,” ebmou. 26Uca, Musa biryi ato ebmou, “Kan a ebmarim to da kum kunubkwamab. Ara, nunci nun Iya Erebdobnyi biti dama deibkwamabyi dinyi asi, Mesir nang sun asing dina ara, ‘Iya malyito dinyi kunmang,’ teneboka keil aryi obsingnyei. 27Nun Nai Iya Erebdobnyi nun molonubnyi bisi dama deirirbinkwamabyi ura, yinimwe mutuk uki winiryi binkwanub. Erci nunsi minob ebdeiansou to kunubkwayeb,” ebmou. 28Ba, Mesir sienyi biryi ato ebmou. “Teleb, niryi sunsi Sun Nai Iya Erebdobnyi bisi yinimwe dam asi ur molorbindarur eboka mundu lobkwamasin. Eda, yana mutuk molorbana ara mem. Nibabyi molobliknibkwanindarur,” ebmou. 29Ura, Musa biryi ato ebmou, “Ukura nai kan taklobkiniryi ni nai Iya Erebdobnyi bisi molorbinkun. Ba, ambutum ara a bum ara Mesir sienyi kan dam ab, kan wa in nang dam ab, kan atei nang dam ab, aryi kum dankwamar. Eda Mesir sienyi kanci Israel nang asi tola ati kunusa doboka lak kum ebminyei. Ba, Iya Erebdobnyi bisi kum molorbingnyei,” ebmou.

30Sirya ato ebmou ura, Musa anaboka Mesir sienyi takloboka bindobmouci, Iya Erebdobnyi bisi molobmou. 31Ba, Iya Erebdobnyi biryi Musa biti molobmou to kunubmou. A bum Mesir sienyi dam ab, er wa in nang dam ab, er atei nang dam ab nirya kuramwe dinyi kum dandeibmou. Mitik tentok ababyi ton kum kubmou. 32Uca, a tum ababyi Mesir sienyi iya kanya kat biribokamwe. Erci Israel nang asi, “Ur bindarur,” eboka mundu kum lobmou.

Currently Selected:

Keluaran Uram 8: MTG

Highlight

Copy

Compare