Keluaran Uram 6

Iya Erebdobnyi biryi Musa bisi wiboka bokdonokmou deyok

6:1-12

1Ani, tubto Er Iya Erebdobnyi biryi Musa bisi ato ebmou, “Nira Iya Erebdobnyi kunun. 2Niryi Abraham ab, Ishak ab, Yakub ab asi Ni si Imtamnyi Iya Mikibnyi deici aryi lak kimdaranse. Uca, minob ura Nira Iya Erebdobnyi si deici aryi sunsi lak kum kibdananse. Eda, ukura Nira Iya Erebdobnyi si deici aryi lak kibdanman. 3‘Kanaan mutuk karebsiniba, tingban nang kiboka tingbinkwandum,’ ena sunsi ebdeianse. 4Tonda, ukura Nibabyi kekenun uca, Mesir nang aryi Israel nang il dimnung ba, sun Israel nang ngolongnung ara kekenunci, ‘Ukubkwansin,’ eanse dinyi teneibdenman. 5A deyok aryi Israel nang asi ato ebdum, ‘Ni sun Nai Iya Erebdobnyi biryi sunsi Mesir nang aryi il don nang kiboka sun il dimsunung asi lebdeibkwamasin. Ani, Mesir nang taruk dam aryi mikib asa Ni taruk ibokabniryi ikin weik wenen dinyi kareboka lebdobkwamasin. 6Niryi sunsi wibdeiboka Ni mabwe kibdeibkwansin. Ani, Nira sun Nai Imtamnyi kibkwansin. Ba, sunci Nisi Nun Nai Imtamnyi Er Iya Erebdobnyi Mesir nang aryi il dimnansei asi lebdeibsounyi tenebkwanurum. 7Ani, Niryi sun abwe yabwe Abraham ab, Ishak ab, Yakub ab asi dib en uram aryi ebdeiansise. A mutuk dam asi, sun mutuk kibdobkwandum mutuk dam, bobindoka eterebkwansin. Nira Sun Nai Iya Erebdobnyi kunun,’” ebmou.

8Ato ebmou ba, Musa biryi Er Iya Erebdobnyi biryi ebmou to kuboka, Israel nang asi bindoka ebmou. Uca, Sun Israel nang ara Mesir nang aryi sun wa in nang kiboka, il dimnamnyi deyok aryi Israel nang mambul kanya bobmaici, “Se!” tenebmai. A deyok aryi sunci Musa ebmou dinyi asi kum kekebmai.

9Ura, Er Iya Erebdobnyi biryi Musa bisi ato ebmou, 10“Mesir sienyi si Firaun bisi bindoka ato erbirum. Ara, ato, ‘Israel nang ara lobdeibci ba, er talebwe mutuk dam aryi anaboka bindobkwamang,’ ebkwandum,” ebmou. 11Uca, Musa biryi Iya Erebdobnyi urasin dam aryi ato ebmou, “Israel nang ababyi ni uram kum kekenunung, Mesir sienyi bira wanok kum kekebkwamanir. Nira, ni si bambul ara uram biti kum sisingnunyi kunun,” ebmou. 12Ura, Er Iya Erebdobnyi biryi Musa ab, Harun ab asi ato uram ebdeibmou ba, Mesir sienyi Firaun bisi binmarei. Ura, sunci ersi, “Mundu lobsiminyi ba, nun Israel nang Mesir dam aryi anaboka bindobkwayeb,” erbinmarei.

Musa ab, Harun ab sun abwe yabwe si deyok

6:13-26

13Musa ab, Harun ab, sun abwe yabwe deibdoba deibdanin yanamnyi ara ato: Yakub si er uruma si ara Israel, er mi dunyi bira Ruben deiamwe. Ruben biryi deiamwe mabwe si ara: Henokh ab, Palu ab, Hezron ab, Karmi ab ukuboka deiamwe ba, sun yala deibdoba aryi deibde baramnyi. 14Simeon mabwe si ara: Yemuel ab, Yamin ab, Ohad ab, Yakhin ab, Zohar ab deiamwe. Ani, tonda er mi Saul deiamwe. A mi ara Kanaan ner aryi deiamwe. Ara, Simeon mabwe ukuboka deiamwe ba, sun weit yabwe silib deibde baramnyi. 15Lewi mabwe yuma deibde yanamnyi to ara ato. Gerson ab, Kehat ab, Merari ab deiamwe. Ba, Lewi kam kuramwe talak kwalina ara yubwa 137 baryi kwaliamnyi. 16Lewi mi yuma mi si Gerson mabwe ara Libni ab, Simei ab ukuboka nun sun weit yabwe silib deibde baramnyi. 17Lewi mi bitinyi mi si Kehat, er mabwe ara Amram ab, Yizhar ab, Hebron ab, Uziel ab deiamwe. Ba, Kehat kam kuramwe talak ara kwalina yubwa 133 baryi kwaliamnyi. 18Lewi mi winiryi mi si Merari, er mabwe ara Mahli ab, Musi ab deiamwe. Lewi deibdoba ara ukuboka sun weit yabwe silib yaldakde baramnyi.

19Ani, Amram bira Yokhebed er naiyong bisi dobdobmou. Ba, Yokhebet biryi Harun ab, Musa ab er akenyi biti deibdeibmou. Amram kam kuramwe talak ara kwalina yubwa 137 baryi kwaliamnyi. 20Kehat mi si Yizhar mabwe ara Korah ab, Nefeg ab, Zikhri ab deiamwe. 21Ba, Kehat mi si Uziel mabwe ara Misael ab, Elsafan ab, Sitri ab deiamwe. 22Ba, Amram mi si Harun biryi Aminadab nebnyi Eliseba, Nahason er malner dobmou. Ura, a ner aryi Nadab, ab Abihu ab, Eleazar ab, Itamar ab erti deibdeibmou. 23Korah mabwe ara Asir ab, Elkana ab, Abiasaf ab deibmou. Ara, Korah weit yabwe silib kuramnyi. 24Harun mi Eleazar biryi Putiel nebnyi dobmou ura, er mi Pinehas erti deibdeibmou. Ara, Lewi weit yabwe silib ukuboka deibdanin yanamnyi.

25A nang Lewi yala deibdoba asi Harun ab, Musa ab asi Er Iya Erebdobnyi biryi sunsi ato eboka arukmou, “Sunci Israel nang asi sun yala deiamnyi to kuboka olong yuk-yuk liliboka Mesir dam aryi bobirurum,” eboka arukmou. 26Musa ab, Harun ab Israel nang asi Mesir dam aryi boboka binkwandei ati, Mesir sienyi Firaun dam asi sisikmarei. Musa ab, Harun ab sun mabsilib yaldangna ara ukuboka yaldakde baramnyi.

Musa biryi Mesir sienyi Firaun dam asi moloryanmou deyok

6:27–7:7

27Mesir mutuk dam aryi Er Iya Erebdobnyi biryi Musa bisi enmou ara ato. 28Iya Erebdobnyi biryi ato ebmou, “Nira Sun Nai Iya Erebdobnyi kunun. Mesir sienyi Firaun bisi, Niryi kansi erdeikunun tok nirya ato ebdum,” ebmou. 29Ato ebmou uca, Musa biryi Iya Erebdobnyi urasin dam aryi ato ebmou, “Ni si bambul ara uram ena biti kum sisingnun ati, Mesir sienyi biryi ni uram kum kekebkwamanir,” ebmou.

Currently Selected:

Keluaran Uram 6: MTG

Highlight

Copy

Compare