Keluaran Uram 15

Musa ab, Israel nang ab mot sebmai deyok

15:1-21

1A talak aryi Musa ab, sun Israel nang ab antaniboka Er Iya Erebdobnyi bisi mot sebmai ara ato eboka mot weiboka yuk-yuk sebmai.

“Yo, teleb ura, ni Nai Iya Erebdobnyi biti ni mot semkun.

Erda Iya Erebdobnyi kurur, yuk-yuk dinyi bisibkaboka iya erebdobnyi kurur.

Erci kuda ab, kuda bobmongwe nang ab asi weik me kwan dam donokmar ati mot sebkun.

2Ni Nai Iya Erebdobnyi bira ni mikib kimnanyi kurur. Erda niryi Ersi mot semnanyi kurur.

Erda ni lemninanyi kurur.

Erda ni Nai, ni molonunyi kurur ati, niryi Ersi si weik ebkwan.

Er Iya Erebdobnyi bira ni nai bibabyi si weik eramunyi kurur ati, niryi Ersi si weik erebdeibkwan.

3Er Iya Erebdobnyi bira ninyi mar bona deyoknyi kurur.

Er si ara ni Nai Iya Erebdobnyi kurur.

4Firaun er kongkong ena ab, er yin doun nang ab asi Imtamnyi biryi weik me kwan umbura dongobmar.

Mar bona dabwe weik nang asi Teberau kwan umbura tomoboka dongobmar.

5Ilila me kwan sunsi siklibmar.

Keil kuna yuruboka weik me kwan umbura lulu kobdob dongobmar.

6Nai Iya Erebdobnyi, Kan siriktam taruk aryi nun mar ordan nang mar asi borum.

Kan mikib weik aryi siriktam taruk ara iya erebdob taruk bobumwe aryi sunsi obkiribmarim.

7Nai Iya Erebdobnyi, Kanda yuk-yuk dinyi asi bisibkaboka iya erebdobnyi kurum.

Kan mar ordan nang nirya asi bai donokmarim.

Kan yu dinyi aryi uk dobkwetebmarim ba,

sunsi gandum yabla uk yalibde yirkarongnande to kubmar.

8Kan isin aryi me nirya dingibde welebmar.

Ani, me kwan dina-dina sengdonmoa ara ereboka tikmo.

Ani, Kanci, ilinto ereboka me noutam asi katabdeiboka bisik yabdeibmasirim.

9Nun mar ordananyi biryi ato ebde dobde yanganmasou, ‘Niryi sunsi dombinmanyi ani, dam seknerbinyi ura, taleboka sun bona dalubkwaman,’ ebmasou.

‘Sun bona nirya dalubdobnyi ura, a bona nun atei nang asi boknin yibinkwaman,’ ebmasou.

‘Ni yu wekmanica ara sunsi obde yibinyi ba, mundu lobkwamanir,’ ebmasou. Ani, ‘Ni ninyi on ya aryi sekwetebde yibinkwaman,’ ebmasou.

10Nai Imtamnyi, Kan isin aryi ubmarim ba, me aryi sunsi siklibmar.

Ikin weik keil si timah me umbura dongobingnyi ba, yuruboka wengnande to kuboka, sunsi weik me kwan umbura yuruboka iya lulu kobdob marbinsekmang.

11Nai Iya Erebdobnyi Kan kurum ara yuk-yuk kwemdeina kikniboka moloraming dinyi atonyi kum kurum.

Nai, Kanda beterdongona kumnyi kurum aryi, iya mililnyi kurum.

Kanci, ilil tenen dinyi kurandim dinyi ara ilil kimsinirandimnyi kurum,

Kanci, kurandim dinyi ara, ‘Dib Er Iya Erebdobyi biryi kubmar,’ tenen bingnung.

Akiryi yuk molon dinyi ara kan kurum atonyi ton da kum kurur.

12Kan siriktam taruk aryi ukdongobmomwe aryok

tukwe aryi sunsi nirya doboka alubdobmar.

13Kanda nunsi busul kuboka boukwe iya kimsurum deyok aryi, nun Kansi dib tenekunub nang iniboka boyanmasirimci, lebdeibmasirim.

Kan mikib deici aryi nunsi iniboka, Kan kurum mutuk iya teleb mutuk dam boyanmasirim.

14Yuk mutuk-yuk mutuk nang kekebingnyi ura, sun sirim talebkwamar.

Filistin mutuk nang nirya ababyi sirim talebkwamar.

15Edom yala sien nang kekebingnyi ura, sun sirim talebkwamar.

Moab mutuk dabwe weik nang sun sirim talebkwamar,

Kanaan mutuk nang nirya sun kanya surukwamar.

16Nai Iya Erebdobnyi Kan kuna sun asing eibmang aryi sun ilil weik kubmar,

Kan molokunub nang anaboka bankwayeb talak ara,

nun mar ordan nang asi ikin kibdeibokwandim,

ba, sun mikib kum dobdobkwaming, Nai Iya Erebdobnyi.

Kanci nunsi lebdobmasirim nang ati, yuk nang ilil kunmaci ba, a mutuk bisiboka binkwayeb.

17Kanci nun Israel ninyi asi boboka, Kan mutuk kon iya teleb mutuk kon kamdeiriryasoumwe,

Nai Erebdobnyi, Kan kurum dikum yandoka kabdeibmasirim.

Nai Erebdobnyi Kan dam iya malyi dinyi beterdongona kum uca, lek dikum kiknibdeibumwe dikum boyandoka kabdeibmasirim.

18Nai Erebdobnyi Kanci, nun weik sienyi kiboka taleansiminyi tok iya talebmurubkwansirim. Aminda talak ababyi kum danana kum kubkwande,” eboka mot sebmai.

19Firaun ab, er kongkong ena ab, kuda bobmai ninyi ab me noutam wengyangai ura, Er Iya Erebdobnyi biryi a me lu tamubdeibokmou ba, a me lu tamuboka siklibmou. Uca, sun Israel nang ara me noutam cebdobmoua ilimtam asi bindobmai. 20Ba, Harun er malner Miryam, Imtamnyi uram kekebmaci to ermurun ner biryi lilim en keica si rebana doubmou. Ani, kulardongou ura, yuk nerabwe ababyi a keica rebana kulaboka mot seboka merebmai. 21Ura, Miryam biryi ato eboka mot weibmou,

“Imtamnyi bira Iya Erebdobnyi kurur ati mot sebkub.

Erci kuda ab, kuda bobmongwe nang asi me tomoboka dongobmar ati, mot sebkub,”

eboka mot sebmai.

Me Mara dam ab, Elim dam ab deyok

15:22-27

22Ura, Musa biryi sun Israel nang asi, “Weik me kwan Teberau kin dam aryi anaboka, yini mutuk Syur dam binkwayeb,” eboka arukmou to kunuboka binmai. Uki winiryi nirya a yini mutuk dam baramnyi talak ara me ton eiboka yina kum kuramnyi. 23Ani, mutuk si ara Mara dam binmai ura, me yibaramwe asi asing eibmai. Bok, a mutuk me sik deyok aryi me ton yina kum kubmai. A deyok aryi, “Mara mutuk,” ena ara nun uram danguboka, “Sik Me Mutuk,” enung. 24Ura, Israel nang aryi Musa bisi uram taleboka kerebmaici, ato ebmai, “Nun unato me yibtibyi do?” ebmai. 25Ba, Musa biryi Er Iya Erebdobnyi bisi molobmou. Ba, Er Iya Erebdobnyi biryi Musa bisi co toukwe tentok asi eterebmou. Ura, Musa biryi a co toukwe doboka me koun tam donongdamwe uca, a me sik kuramwa kum danmou ura, sik kum danmouci, dikum me kibmou. “A mutuk aryi ato-ato kubde bankwandarur,” eboka iya kibdeiboka karebmouci, “Sun, una kubkwaming do?” tenen ukubdenmou. 26Ura, Er Iya Erebdobnyi biryi ato ebmou, “Sunci, Ni sun Nai Imtamnyi, Iya Erebdobnyi uram asi iya diboka-diboka kekeramunci, Ni urasin dam aryi diboka kununkwandarur. Kunuramunci, ato-ato kunubde bankwandarur ebdeibsise to akwe diboka amol takeiboka kekenkwandarur. Ba, Niryi sunsi Mesir mutuk nang ati youn kareranse to kum karenkwansin. Ni Iya Erebdobnyi biryi sunsi youn kwetenkwansin,” ebmou.

27Sirya ato ebmou ura, mutuk si Elim dam oungbinmai. Elim dam ara me u amolbaryi yibinamwe. Ani, co si korma 70 baryi tikamwe asi a me dala kubkub asi keis ol ai dobmai.

Currently Selected:

Keluaran Uram 15: MTG

Highlight

Copy

Compare