Keluaran Uram 14
14
Me cebdobmou ati, Firaun mikib dobdobmou deyok
14:1-14
1Er Iya Erebdobnyi biryi Musa bisi ato ebmou, 2“Kanci Israel nang asi ato ebminyi ba, sun tamuboka Pi-Hahirot damulub Migdol kan, weik me kwan kan noutam asi keis ol ai dorbinkwaming. Ai dobkwamangnyi dikum ara Baal-Zefon dam kobdob weik me kwan kubkub asi keis ol ai dobkwanung. 3Ba, Firaun biryi Israel nang asi ato ebkwande, ‘Yini mutuk aryi bisik sekoka boongobwe ba, a mutuk bisik ongdanung,’ ebkwande. 4Niryi Firaun kanya kat biribdeibnyi ba, sun Israel nang asi Firaun biryi domyankwamasir. Ba, Niryi Firaun ab, er yin doun nang olong yuk-yuk ab nirya asi Ni mikib lak kibkwaman. Ba, Mesir ninyi aryi, ‘Dib Erda, Iya Erebdobnyi kurur,’ tenebkwamaning,” ebmou. Ura, Er Iya Erebdobnyi biryi ebmou to Israel nang tamuboka me kwan kubkub ai dorbinmai.
5Ura, Mesir sienyi bisi, “Israel nang sirya cukoka bindobmang,” ebmai. Ba, Firaun ab, er wa in nang ab kanya dangubmou ba, nun biti il dimnamoubwe tenebmai ura, Israel nang ati ato ebmai, “Nunci Israel nang asi il dimnub bok asi taklobib ba, bindobing ati dombinkwayeb,” ebmai. 6Ura, er Firaun ab, er atei nang ab sun kongkong erban keica kiknibminikmai. 7Ura, er Firaun biryi kongkong erban keica teleb dinyi akwe yubwa 600 baryi bobmou. Ura, Mesir nang kongkong erande keica yuk-yuk nirya mar ordana dabwe nang akwe akiboka bobmai. 8Ukuboka Er Iya Erebdobnyi biryi Mesir sienyi kanya kat biribdeibmou ba, Israel nang asi dombinmai. Uca, Israel nang ara mangkau asa barmuruna akwe kimai.
9Mesir nang ara Firaun kuda bisam deici bukmai ninyi ab, kongkong en keica deici ab aryi bukoka yin doun nang olong yuk-yuk kuboka sun Israel nang aminda domai. Dobde binmai ani, weik me kwan kubkub dam Pi-Hahirot dam Baal-Zefon damulub tam sun keis ol ai doboka mabmaia dam ibanmai. 10Ura, Israel nang dirtamurderdaramnyi ba, Firaun ab Mesir nang yin doun nang ab aminda iyanganmai asi asing eibmai. Ba, Israel nang sun ilil mitik kum kubmou ura, Er Iya Erebdobnyi bisi, “Lebdobsurum,” eboka molobmai. 11Ani, Musa bisi ato ebmai, “Lebdobkwamasoumwe ati boyanganmasirima kuma, nunsi orminingyanganmasirim. Nun obkwamasungwe atikwe boyanganmasirim ara malyito. Mesir dam okiryi obmasiting ba, dibmatibyi ara kikiman. Bok, talyitam lebdeibkwamasina kuna a boyanganmasumwe. 12Nunci Mesir dam aryi kanti a dinyi sirya minob ato eamoubwe. ‘Nun dumsina mem. Nun teleb asa aryi Mesir nang wa inkwayeb,’ eamoubwe. Ara, ato ati ebmab, Mesir nang il ara biti iramoubwe, yini mutuk a dina ara nun li,” ebmai.
13Uca, Musa biryi sun Israel nang asi ato ebmou, “Sun ilil kusina mem, a tikmamunyi tok Er Iya Erebdobnyi biryi lebkwinsir dinyi arub aryi karebkwamasir ati, dindarur. Sunci Mesir nang arub asing eiabdum nang ara aminda iya asing kum eibkwandum. 14Sunda ur tikoka dinmamunyi ba, Er Iya Erebdobnyi biryi sunsi mar dobmilibkwamasir,” ebmou.
Weik me kwan Teberau kwan koubmai deyok
14:15-31
15Er Iya Erebdobnyi biryi Musa bisi ato ebmou, “Nisi tuba molonmanirima mem! Sun Israel nang asi, ‘Ur barondarur!’ ebmimba, baronung. 16Ani, kan kama aryi weik me kwan deici tam asi ukdongobmimba, a me sekdobkwande. Ba, Israel nang ara a weik me kwan dinatam-dinatam sekdobci tam asi noutumang bindobkwaming. 17Uca, iya dib sirik Niryi Mesir nang kanya kat biribdeibokwaman. Ba, sunci Israel nang asi aminda domyankwamang. Ba, Niryi er Firaun ab, er yin doun nang olong yuk-yuk ab, er kongkong ena ab, kuda bisam deici bobmangnyi nang ab asi Ni mikib sunsi lak kibkwaman. 18Ato kubnyi asi, Mesir nang atei tuba kunmangnyi nang aryi bikingiryi, sunci Nisi, ‘Erda Iya Erebdobnyi dib kurur,’ tenebkwaning,” ebmou.
19Ura, Er Iya Erebdobnyi uram erbananyi sun Israel nang banmai bisik menekmou ani, aminda tam kibdobmou. Ba, duwa bum ara sun menekmou aryi lulungdongonmou. Ura, sun aminda tikmai. 20Ura, a duwa bum ara Mesir yin doun nang kan, Israel nang kan tikmou. Ba, lukunda ato kunuk dakmurubmou. Ba, a lukunda nirya ara sun mamun asing kum eirirdanmai.
21Ura, Musa er taruk weik me kwan deici ukdongobmou. Ba, a lukunda ara Iya Erebdobnyi biryi mikib ilinto yeinya yaletam aryi weik me kwan asi urkarongmouci, sengdonmou. Ba, a weik me kwan asi iya cebmuling ebdobmouci, me kum yibaran dikum ato kubdobmou. 22Ba, Israel nang ara a weik me kwan cebdobmouci, ilim alakdobmoua tam asi baronmai. Ba, sun kwanimtam ab siriktam ab ara me sengdonmoua iririkna aryi lika doninto kubmou.#1Kor. 10:1-2; Ibr. 11:29
23Mesir nang ara aminda domyanmai. Ara, Firaun, er kuda nirya ab, er kongkong ena ab, kuda bobmai nang ab me noutam kobdob wengyanmai. 24Sirya wengyanmai ura, berekoua dam talak aryi Er Iya Erebdobnyi biryi a uk buk duwa umbura aryi Mesir nang yin doun nang asi diblilibmou. Ura, Mesir nang yin doun nang asi Er Iya Erebdobnyi biryi daluboka walwalabkabmou. 25Ara, Er Iya Erebdobnyi biryi sun kongkong eboka iyanganmai keica kongkong eboka yuk bisik wamubsinibokmou. Ani, kongkong eboka yanman kumto kubsinibokmou ba, Mesir nang aryi ato ebmai, “Er Iya Erebdobnyi biryi nun Mesir nang asi orbunmasir. Ati, Israel nang dombanmab ara takloboka tamubdobkwayeb!” ebmai.
26Ura, Er Iya Erebdobnyi biryi Musa bisi ato ebmou, “Kan kama taruk doubmarima aryi a weik me kwan deici asi tubto ukdongobdum! Ba, a me aryi Mesir nang ab, kuda deici bobmang nang ab, kongkong en keica ab asi me aryi oboka me dongobkwande,” ebmou. 27Ura, Musa biryi a weik me kwan deici asi er taruk aryi kama uklobmou ba, sirya kiting ururukmou. Ba, Mesir nang me noutam yangai ura, a me kwan minob dingiamwe to kuboka antanibdobmou. Ukuboka Er Iya Erebdobnyi biryi Mesir nang asi sikliboka weik me noutam dongobmou. 28A weik me kwan nirya minob dingiamwe to kuboka, Firaun er yin doun nang olong yuk nirya ab, kuda deici bukmai nang ab, kongkong ena deici bukoka yanganmai nang nirya me aryi siklibmou. Israel nang dobde yanganmai nang asi me umbura oboka dongobsekmou. Sun Mesir nang a domyanganmai nang tentok ababyi ton kum taklobmou. 29Ba, Israel nang ara weik me kwan noutumang me cebdobmouci, tukwe ilim kibdobmou asi baronmai. Ba, me sekoka dina-dina siriktam kwanimtam ara lika dobninto kubmou ba, noutumang asi bindobmai. 30A tum aryi Er Iya Erebdobnyi biryi ukuboka sun Israel nang asi Mesir nang taruk dam aryi lebdeibmou. Ba, sun Israel nang aryi dinmai uca, Mesir nang ara weik me kwan katum dam diblalabmai asi asing eibmai. 31Sun Israel nang aryi Er Iya Erebdobnyi biryi sun Mesir nang asi me sikliboka ninyi ilinto obukmou asi asing eibmai. Ura, Er Iya Erebdobnyi biryi ukun dinyi ara sun ilil kubmouci, Iya Erebdobnyi ab Er wa inanyi Musa ab asi, “Dib,” tenebmai.
Currently Selected:
Keluaran Uram 14: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
