Keluaran Uram 16

“Uki si Sabat tum asi kalikdarur,” eboka arukmou deyok

16:1-36

1Sun Israel nang nirya Elim dam aryi anaboka banmai ani, yini mutuk si Sin dam sirya binmai. A mutuk ara Elim kan Sinai kon kan noutam mutuk asi binmai. Sun yuma Mesir mutuk anaboka yangaramnyi aryi kuboka, a tum ara wala bitinyi dinyi uki 15 baryi tum wengyanmai.

2Bisik noutam yangaramnyi ai ara sun Israel nang aryi Musa ab, Harun ab asi talak doboka uram taleramnyi. 3Ara, sunsi ato eramnyi, “Se, Mesir mutuk dam kuramoubwe talak ara to erande yina bisam tub toto, roti kwaning toto yibde kuroramoubwe ba, bouransou talak aryi, Iya Erebdobnyi kanci da obdeiansutum ba, kan taruk dam da dibsekantibyi. Nunda, nai Imtamnyi Kan uram keken nang nirya yini mutuk dam talyi botangloryasumwe ba, kwaning utan aryi dibsekwayeb,” eramnyi.

4Ura, Er Iya Erebdobnyi biryi Musa bisi ato ebmou, “Niryi sunsi imtam aryi kuboka roti kwaning mo cemninto kuboka dobkwetebkwamasin. Ba, sun Israel nang aryi uki tentok yibkwamangnyi to sun ai aryi anaboka bulubdobkwaming. Ara, ‘Niryi ukuboka bulubkwandarur-ukuboka yibkwandarur ebmanyi to kunubkwaming do? Kum kunubkwaming do?’ tenen ukubdenkwansin.#Yoh. 6:31 5Ba, uki nabaryi tum ara uki bitinyi kikiman yibdobkwamangnyi to bulubdobmangnyi aryi atei bobde yandoka ton yibdobingnyi ura, ton deibdobkwanung,” ebmou.

6Ato ebmou ura, Musa ab, Harun ab aryi sun Israel nang nirya asi ato ebmarei, “A sintam aryi Er Iya Erebdobnyi biryi Mesir dam aryi boboka yanansou tenebkwandarur. 7Ani, sunci Er Iya Erebdobnyi bisi uram talendarur deyok aryi Er kekebmasir aryi ambutum belekuna ara Er Iya Erebdobnyi Er Imtamnyi mikib ibarya aryi kunubkwamar dinyi asing eibkwamarum. Nunda una nang tenendarurci, nunsi uram talesindarur do? Nunci sun molobmamunyi to kunubdeibman kum nang kununum,” ebmarei. 8Ura, tubto Musa biryi ato ebmou, “Er Iya Erebdobnyi bito nang kurantinimyi ura, sintam yin dinyi ara maka tub ton kareransute. Ani, roti kwaning ababyi berentam kareransute ani, sintam kareransute ura, Ersi uram talerandate. Uca, nunda una nang kununum ati uram talesindarur do? Nunda ninyi sirik kununum Imtamnyi bito nang kum kununum. A endarur ara nunti kum endarur eda, Er Iya Erebdobnyi biti uram talendarur,” ebmou.

9Ura, Musa biryi Harun biti ato ebmou, “Sun Israel nang Er Iya Erebdobnyi uram keken nang nirya asi ato ebdum, ‘Sunci uram talendarur dinyi ara Er Iya Erebdobnyi sirya kekesurur,’ ebdum,” ebmou. 10Ura, Harun biryi sun Israel nang asi erabwe talak aryi, yini mutuk tam kuboka dirtamurderamnyi uca, Erebdobnyi milil berengna duwa umbura lak kibmou.

11Ura, Er Iya Erebdobnyi biryi Musa biti ato ebmou, 12“Sun Israel nang aryi Nisi uram talenunung ara sirya kekebman ati, sun Israel nang asi ebdum, ‘Sintam yina ara maka tub yinkwandum ab bisam tub ab yinkwandum. Ba, berentam yina ara roti kwaning yinkwandum ebdum. Ba, Ni Er Iya Erebdobnyi bisi Erda, Nun Nai kobdoba Iya Erebdobnyi dib kurur,’ tenebkwanurum,” ebmou.

13Ba, a sintam ara maka si puyuh mer dakoka a keis ol ai dam nirya yandoka amubmai. Ani, belekuna ara a keis ol ai deyok dam asi mo doun akwe boaknabmou. 14A mo doum-douma asi ito anabmou ura, yini mutuk a nirya mo doun kibilyi dudua atoanun asok akwe oblibmou. 15Sun Israel nang a dinyi asing eibmai ura, a keica sun kum bikmai aryi ato ebdanin yibinmai, “A kubmar keica ara unatoa do?” ebmai. Uca, Musa biryi sun Israel nang asi ato ebmou, “Roti kwaning Er Iya Erebdobnyi biryi sun yina karebmasir atiba.#1Kor. 10:3 16Er Iya Erebdobnyi biryi ato ebmasir, ‘Sun yuk-yuk nirya yibdobkwamamunyi to kuboka bulubdobkwandarur. Ani, sun ai kuramunyi to nukdeboka ninyi tentok ara bum tentok yibkwamaci to kuboka bulubdobkwandarur,’ ebmasir,” ebmou.

17Ba, sun Israel nang a ebmou to kunuboka bulubdobmai. Uca, ton yuk nang ara weikanun buluronmai ba, ton nang ara mitikanun buluronmai. 18Ba, kiklin meyok si gomer aryi kiklibdeboka sun ai ninyi yibkwamangnyi to kikiman kibdeiboka bumdoramnyi. Ba, weikanun bulubmangnyi nang babyi mitikanun bulubdobmangnyi nang babyi ara neiktoto akwe kimdeiriramnyi.

19Ura, Musa biryi sunsi ato ebmou, “A yina ara minob lubkwandura ati, ninyi tentok ababyi a deiblobmaci ba, ambutum maberengna mem,” ebmou. 20Uca, ton nang ara Musa uram kununa kum uca, a deibmai asi ambutum berekmou. Ba, ku mitikoka lun tong anabmou. Ba, Musa er yu wekmou ura, sunsi kerebmou.

21Berentam ara sun yuk-yuk yibdobkwamangyi to kuboka buluroramnyi. Uca, kiting deibci ura, nunuroramwe. 22Uca, uki nabaryi tum ara uki bitinyi yibkwamangnyi to kuboka meyok si gomer bitinyi kuboka ninyi yuk-yuk uki bitinyi yibkwamangnyi to buluroramnyi. Ura, sun Israel nang kalingna sien nang nirya aryi Musa bisi eryanmai. 23Ba, Musa biryi Israel nang asi ato ebmou, “Er Iya Erebdobnyi biryi ato ebmar ara ato deyok ati ebmar. Ambutum ara Iya Erebdobnyi uki tum kibdeiboka, taruk louboka bun tum berekwamar. Ati, a yina ara daboka yironmamunci, yuboka yibdobkwandarur. Kablobdobmamunyi dinyi ara berentam yibdobkwamamunyi dinyi ati a kubkwamasurur,” ebmou. 24Ura, Musa ebmou to kunuboka a tuba taklobmai asi berekmou. A dinyi ara ku mitikoka lun tong kum anabmou.

25Ura, Musa biryi tubto ato ebmou, “Arub ara Iya Erebdobnyi uki tum, uki tabaryi tum si Sabat tum ati, a yina akwe yibde kunkwamandarur. Bai bulurbana ara kum bulurbinkwamandarur. 26Uki nabaryi ara ur bulubde kuronkwamandarur. Eda, uki tabaryi tum ara Iya Erebdobnyi biti loubdeiboka bun tum berekwande. Ara, ta tum ara a roti kwaning kum kubkwande,” ebmou. 27Uca, a ta tum ara Israel nang, “Bulubdonkwayeb,” tenen binmai ababyi ton kum dobdobmai. 28A deyok aryi Er Iya Erebdobnyi biryi Musa biti ato ebmou, “Una talak aryi, ‘Ukubkwandarur,’ enun uram nirya kunubkwandum do? 29A deyok aryi Er Iya Erebdobnyi biryi loubdeiboka bun tum karebsou asi diboka bikdarur. Uki nabaryi tum aryi karebmasou roti kwaning ara uki bitinyi yibdobkwamandau ati karebmasou. A tum ara sun yuk-yuk kuramunyi atei akwe kunkwamandarur. A ta tum ara ninyi tentok ababyi ton anaboka sangkwetena mem,” ebmou. 30Ba, sun Israel nang a ta tum ara loubdeiboka bukmai. 31Sun Israel nang aryi a roti kwaning si ara Manna eboka si dobmai. A roti er bol ara mitik co du si ketumbar bol kait ato. Ba, yina ara kwiryi me ab kikniraming me minmin ato yina asi yiramnyi.

32Ura, Musa biryi ato ebmou, “Er Iya Erebdobnyi biryi ato ebmar: A roti kwaning kina si gomer tentok langkarikci ura, sun mabwe ati deibdarur. Ba, Ni Imtamnyi biryi Mesir dam aryi yini mutuk dam yandoka karesunun roti kwaning ara sun mabwe odei-odei binkwandum ninyi asing eibkwaming,” ebmou. 33A deyok aryi Musa biryi Harun bisi ato ebmou, “Meyok tentok doboka roti kwaning si Manna olong gomer tentok a meyok langkarikci ura, kiboka Er Iya Erebdobnyi urasin dam asi deibdum. Ba, aminda deibde binkwandum ninyi asing eibkwaming ati,” ebmou.#Ibr. 9:4 34Ba, Er Iya Erebdobnyi biryi Musa bisi ukubdum ebmou to kunuboka, Harun biryi meyok umbura kibdongoboka Imtamnyi biryi, “Ukubdarur-ukuna mem,” en uram deirin co sangkol iya deibkwamwe ati deirbinmou.

35Sun Israel nang roti kwaning si Manna akwe yibde kuramnyi asi kwalina 40 baryi kwaliamnyi. A yibde yangaramnyi tok asi yuk atei nang kuramnyi mutuk wengyanmai. Akiryi kuboka Kanaan mutuk wiliba sirya yandoka yibmai.#Yos. 5:12

36Ani, a roti kwaning kiklina si efa tentok ara gomer takubaryi kibdeiamnyi.

Currently Selected:

Keluaran Uram 16: MTG

Highlight

Copy

Compare