Ulangan Uram 6

Er Imtamnyi biryi Israel ninyi asi yan memebdeiboka, “Ukubdarur-ukuna mem,” ebdeibwe uram deyok

6:1-25

1Musa biryi sun Israel ninyi asi ato ebmou, “ ‘Ukubdarur-ukuna mem,’ en uram ab, yan memen uram ab ara nun Nai Er Iya Erebdobnyi biryi arukmanir to kuboka sunsi tubto eterebkwinsin. Ba, sun bindoka kubkwandum mutuk aryi kunubde binkwandum. 2Ba, a uram ara sun ab, sun mabwe nermabwe ab sun deibdoba odei-odei binkwanduma nirya ab, aryi kunubde binkwandum. Ba, sun kubkwandum nirya ara Er Iya Erebdobnyi nun molonubnyi bisi ilil kuboka Er ebdeianci to nirya kunubde bankwandarur. Ba, sun bindoka kubkwandum mutuk dam aryi wau louboka dibkwandum. 3Ati, sun Israel ninyi kekebdarur. Sunci Er Imtamnyi biryi, ‘Ato kubkwandarur-ato kuna mem,’ en uram asi busul asa aryi kunubmunyi ura, teleb asa akwe kubkwandum. Ara, sunci diboka kunubmunci, Er Iya Erebdobnyi biryi sun abwe yabwe asi minob uram talak ebdeiamwe to sun yala ilinto kubkwandum. Ura, mutuk tentok karebsou asi wengbindoka kubkwandum. A mutuk ara tukwe sul aryi yina ilinto lubanbanabkwande mutuk wengbindoka kubkwandum.

4Ati ni kwit yabwe, sun Israel ninyi kekendarur! Nun Nai Er Imtamnyi bira Iya Erebdobnyi Er tentok kurur. 5Ati, Er Iya Erebdobnyi nun molonubnyi bisi tentok kanya boboka Er kikwe kanyi deibkwandarur. Ani, sun kanya ab, sun nong ab, sun bingni dinyi ab nirya koubtaleboka Er Iya Erebdobnyi bikwe kanyi deirina teleb. 6Arub aryi, ‘Ato-ato kubkwandarur,’ ebmasin to akwe kununkwandarur, luba kimna mem! 7Ani, ‘Ato-ato kubkwandarur,’ ebmasin uram ara sunci sun mabwe asi tuba-tuba eterebkwandarur. Ara, ai umbura bukmamunyi tum babyi, bisik dam yibanmamunyi tum babyi, mabmamunyi tum babyi, bukokmunyi tum babyi nirya eterenkwandarur. 8Ani, a uram ara sekokabmunci sun taruk ta dikum toubna ongoramunyi deici asi kikiboka bobkwandarur. Tonda, sun asok dam me aling ongoramunyi dam asi kikiboka ongobkwandarur. 9Ani, a uram ara sun bisik wengban dam abyokomna ab, atei bisik wengyangan bublan ab asi sekdongobkwandarur,” ebmou.

10Ura, Musa biryi tubto sun Israel ninyi asi ato ebmou, “Er Imtamnyi biryi sunsi boboka sun abwe yabwe Abraham ab, Ishak ab, Yakub ab dam asi, uram talak ebdeiamwe mutuk bobinkwansir. Bobisici ura, a mutuk ara weik-weik atei ab, telebto atei ab ara sunci dona kum kuamunyi atei ab asi bindoka kubkwandum. 11Minob a dobdanamingnyi ai yuk-yuk ara bona-bona teleb yala ilinto langkaringdaranci asi, bindoka kubkwandum. Ani, sunci longna kum me asi bindoka yibde kubkwandum. Ani, anggur wa nirya ab, zaitun wa nirya ab sun taruk aryi kum kouamunyi dinyi asi bindoka yibde kubkwandum. Ba, anda yina nirya yibde kuramunyi ba, boubkwansir. 12Ato kubkwandum deyok aryi, Er Iya Erebdobnyi Mesir mutuk dam aryi mambul weik dinyi dorandau asi boyasounyi luba kibmunyei. 13Ati, sunci Er Iya Erebdobnyi nun molonubnyi bisi ilil kuboka molobkwandarur. Sunci yuk-yuk deyok ati uram talak ebkwamamunyi ura, yuk-yuk kwemdeina si deici aryi ena mem! Eda, Er Imtamnyi si deici akwe si siboka uram katabum ebdeibkwandarur. 14Ani, sunci a bindoka kuramunyi mutuk dina-dina kuramingnyi atei nang moloramingnyi kwemdeina asi sun miliboka molona mem! 15Ara, sun Nai Iya Erebdobnyi sun molondarurnyi bira matan weiknyi kurur. Sunci yuk kwemdeina molobmunyi ura, Er yu wekoka sun nirya kum dandeibkwansurur.

16Sunci sun Nai Er Iya Erebdobnyi bisi yini mutuk Masa atei dam yangarandauci, ‘Ukubman kum tonyi do?’ tenen malyi kiandau to kuna ara mem! 17Eda, Er Imtamnyi biryi, ‘Ato-ato kubkwandarur,’ uram ebdeibsou dinyi ab, yan memen uram ebdeibsou dinyi babyi, arungna uram ebdeibsou dinyi babyi iya kunubde bankwandarur. 18Er Iya Erebdobnyi biryi, ‘Teleb,’ tenen dinyi ab, ‘Dib,’ tenen dinyi ab akwe kunubkwandarur. Ba, sun teleb asa akwe kubde binkwandarur. Ba, Er Iya Erebdobnyi biryi sun abwe yabwe deici asi, ‘Sul mutuk karebkwansin,’ eboka uram talak ebdeiamwe. A ebdeiamwe mutuk Kanaan mutuk dam ara sun mutuk kiboka kubdobkwandum. 19Ara, Er Iya Erebdobnyi ebdeibwe to kuboka sun mar ordan nang nirya asi, Erci minob yakdonokwande.

20Ba, bindoka kubmunci, do mabde baramunyi talak sun mabwe aryi ato kuboka asibkwansing, ‘Unatoa ati Er Iya Erebdobnyi, nun molonubnyi biryi nunsi, “Ukubdarur-ukuna mem,” en uram ab, yan memen uram ab, arungna uram ab sekdeibsou do?’ ebkwansing. 21Ato ebsingnyi ura, sun mabwe asi ato ebkwandarur, ‘Minob ura, nunda Mesir mutuk sienyi biryi arungnansou ba, er il wa ibde kuramoubwe. Bok, Er Iya Erebdobnyi Er ilila mikib deici aryi lebdeibsou. 22Ba, nun urasin dam aryi, Er Iya Erebdobnyi biryi Mesir weik sienyi Firaun ab, er ai ninyi ab, er taleamwe mutuk nang dam ab asi, ilil tenen dinyi ab, “Nai e,” tenen dinyi ab ninyi orminingni dinyi ab kiknibmou asi eibmoubwe. 23Ba, nunda Erci a mutuk dam aryi boboka yanmasou. Erci nunsi a boboka anabmasouci, Erci minob aryi nun abwe yabwe asi nukareburyi, uram talak ebdeiamwe to aryi a mutuk dam bowengyasou,’ ebkwandarur. 24Er Iya Erebdobnyi, nun Nai Imtamnyi biryi, ‘Erdeirin uram nirya ara kununkwandarur,’ eboka arukmasou. Tonda, ‘Ni Iya Erebdobnyi sun Nai Imtamnyi bisi ilil kuboka boukwe kimkwanindarur,’ ebsou. A ebmasou ara nunci diboka kunuramibyi ura, Erci nunsi kam kun dinyi karebsici ba, teleb asa akwe kubdobkwanub. 25Nunci Er Iya Erebdobnyi nun Nai Imtamnyi urasintam asi Er arungdeirisurur uram a nirya asi iya busul kuboka kunuramibyi ura, Erci nunsi kanya deibkwansurur.” Ato eboka Musa biryi Israel ninyi asi ebmou.

Currently Selected:

Ulangan Uram 6: MTG

Highlight

Copy

Compare