Ulangan Uram 5
5
“Ukubdarur-ukuna mem,” en uram deyok
5:1-22
(Kel. 20:1-17)
1Musa biryi sun Israel ninyi nirya bulubdeibmouci, uram ato ebmou, “Ni kwit yabwe, Er Imtamnyi biryi, ‘Ukubdarur-ukuna mem,’ en uram ab, yan memen uram ab arub aryi ebkun ati kekendarur. Ba, sunci bikmunyi ura, a uram ebdeibnyi to asi busul kiboka kunubkwandum. 2Horeb mutuk kon dam aryi Er Iya Erebdobnyi nun molonubnyi biryi uram talak ebdeibsou. 3A uram ara nun abwe yabwe asi kum ebdeibwe. Eda, nun arub a tikmab ninyi, tuba kam kunub ninyi nirya ati ebdeibsou. 4Er Iya Erebdobnyi Horeb mutuk kon dam aryi uk buk angmou deici aryi sun dam yandoka uram ebmou 5Bok, sunda a uk ilil ati mutuk kon dub kum dinmandau. Eda, nisi Iya Erebdobnyi kan, sun kan noutumang tikmasiryi Er Imtamnyi uram enmou to sun dam enmase. Ura, Er Iya Erebdobnyi biryi a uram nirya ato ebmou.
6‘Nira Er Iya Erebdobnyi sun Molonindarurnyi kunun. Sunda mutuk Mesir aryi ikin wa takubdeiboka mambul weik dorandau bok, Niryi sun taruk taleboka boyasise.
7Ni Iya Erebdobnyi bira sun molonindarurnyi kunun ati, sunci Nisi ilil kuboka si weik ebkwanindarur. Sunci Ni urasintam asi yuk kwemdeina molona mem.
8Sunci yuk kwemdeina asi kiknibdeiboka molona mem. Ara, imtam kurur dinyi ab, tukwetam kurur dinyi ab, tukwe amwetam me umbura kurur dinyi ab asi kanya teneibdeboka kiknibdei molona mem. 9Ni Imtamnyi bira sun Ni dam kundarur nang ati boukwe weik kuboka, “Ni kikwa molobniting,” tenesununyi kunun. Ati, sunci yuk kwemdeina asi kutam ikdongoboka si weik ebmunyei. Yuk kwemdeina si weik eboka milibmunyi ura, Ni sun Nai Iya Erebdobnyi biryi yu weik kuboka wenebkwansin. Sun Niti, “Nun li,” tenebkwaning nang ab, sun mabwe odei-odei winiryi dumbaryi asi Niryi wenebkwansin. 10Ura, sun Nisi boukwe weik kun nang ara Ni ebdeibse uram diboka kekebnumunyi nang asi yubwa-yubwa 1.000 baryi Ni bico tenesunun.
11Ni sun Nai Iya Erebdobnyi si talyi enina mem. Talyi ebnumunyi ura, Ni wenebkwansin.
12Ni Iya Erebdobnyi biryi ebdeibse uki tum si Sabat tum ara, “Er Imtamnyi bisi si weik eboka milibkwayeb,” tenebdarur. A weik uki tum asi wa ina mem. 13Uki nabaryi ara sun irandum wa nirya ur ibdarur. 14Sirya ibmunyi ura, uki si Sabat tum berekci ura, taruk loubdarur. A uki tum ara Nira Iya Erebdobnyi uki tum ati, sunci wa ina mem. Ara, sun ton, sun mabwe nermabwe ton, sun wa irmilisin nang ton, sun wa irmilisin nerabwe ton, sun wa in bisam sapi ton, sun wa in bisam keledai ton, ababyi wa ina mem. Tonda, ninyi atei nang ara sun atei yandoka bukmangnyi nang ababyi a uki tum asi wa ina mem. 15Ati a uki si Sabat tum ara te louboka bukwandarur. Sunda minob Mesir mutuk aryi il weik wa dimnansei ba, irandau bok Ni Iya Erebdobnyi mikib aryi taruk taleboka boyasise.
16Er Iya Erebdobnyi biryi ebdeibwe to kubdarur. Ara, Sun nai sun kwin asi, “Nun nai, nun kwin,” tenen teleb asa akwe kalikwandarur. Sun ato kubmunyi ura, sunda Er Iya Erebdobnyi biryi karebkwansir mutuk asi wengbindoka ani, wau louboka dibkwandarur.
17Ninyi ona mem.
18Sal babyi ner babyi talyi yordana mem.
19Yuk ninyi dinyi asi ukula dona mem.
20Sun tola ati yuk nang asi tatab-tatab ena mem.
21Yuk nang dinyi asi, “Dobdobtinyi,” tenena mem. Yuk nang ai ton, yuk nang ner ton, yuk nang wa irmilinanyi ton, yuk nang wa irmilin ner ton ati, “Ni dinyi,” tenena mem. Yuk nang wa in bisam sapi ton, wa in bisam keledai ton ababyi, “Dobdobtinyi,” tenena mem!’ ebmou.
22A uram ara Er Iya Erebdobnyi biryi sunti ebdeibsou. Sunda Sinai mutuk kon dam neika buluboka wekmandau bok, Er Imtamnyi uram iboka uk angmouci duwa kunukmou dam tingyandoka uram ebmou. Ara, yuk dinyi kuma eda, ‘Ukubdarur-ukuna mem,’ en uram ebmou. Ba, Er Iya Erebdobnyi biryi a kerek sekeibmou ara keil lase bitinyi sekoka nisi karebmanou,” ebmou.
“Er Iya Erebdobnyi yankwamar,” eboka sun Israel ninyi ilil kubmou uram deyok
5:23-33
(Kel. 20:18-21)
23Musa biryi Israel ninyi asi ato ebmou, “Mutuk nirya kunukmouci, mutuk kon asi uk buk ilinto angmou. A uk angmou kankan aryi uram kekebmandau. Ura, sun boboka menengsin nang ab, sun Israel ninyi sien nang ab ni dam yanmai. 24Ura, sunci ato ebmai, ‘Er Iya Erebdobnyi Er mikib ab, Er ibarya ab lak kibdanmarci, mutuk Sinai kon uk angmar kankan dam aryi uram ebmar asi kekebmab. Ani, arub tum aryi nun asing eibmab ara Er Iya Erebdobnyi biryi nun ninyi dam asi yandoka uram ebmar bok, a ninyi ara iya kam kunmab. 25Bok, uku talak aryi nun unatoa ati dibkwamab do? Ara, nun bikdanmab ilila uk angmar dinyi aryi nun yibkwamasir. Ani, Er Iya Erebdobnyi biryi nunsi tubto uram yandoka ebsici ura, nun dibkwamab. 26Nun Er Iya Erebdobnyi uram ebmar ba, kekebmabci kam kunmab to, ton yuk ninyi da ton kekebiryi iya kam kunung do? Nun tenen dinyi ara nunbabyi dibkwamab. 27A deyok aryi Musa kanci nun Nai Iya Erebdobnyi nun molonubnyi biryi ebkwamar to kanci kekerbirum. Kekebminyi ura, nun dam yandoka ebsiminyi ba, nun kekebibiryi Er Imtamnyi ebmaci to kunubde binkwayeb,’ ebmai.”
28Ato ebmai dinyi Musa kekebmouci ato ebmou, “Er Iya Erebdobnyi biryi nisi ato ebmar, ‘Sun Israel ninyi ebmang ara Ni Iya Erebdobnyi sirya bikman. Ati sun kan dam ebmang dinyi ara dib ebmang. 29Ani, sun kanyitam aryi Ni Imtamnyi bisi ilil tenebmang dinyi ab, Niryi ebdeibmanyi uram kunubkwaming dinyi ab aryi, sun ab sun deibdoba ab ara teleb asa akwe kubmurubde binkwaming,’ ebmar,” ebmou. 30“Ura, Er Iya Erebdobnyi biryi ni Musa bisi ato ebmou, ‘Ur bindobdum. Biminyi ura, sun Israel ninyi asi ato ebdum, “Sun atei yuk-yuk bindobdarur,” ebdum,’ ebmou. 31‘Bok, Musa kanda tamuboka yaminyi ura, Ni Iya Erebdobnyi ab a kunkwamanim. Ba, Niryi kansi yan memen uram ab, arungna uram ab, “Ukubdarur-ukuna mem,” en uram ab kan dam ebkarebnyi ura, kanci sun Israel ninyi dam bindoka eterebdum. Ba, sunci Niryi ebdeibse mutuk bindoka kubkwaming ara a ebdeianyi to kunubde binkwaming,’ ebmou.”
32Ura, Musa biryi sun Israel ninyi asi ato ebmou, “Ni kwit yabwe, Er Iya Erebdobnyi, nun molonubnyi sunsi ebdeibmar uram asi dib tenebmunci kunubdarur. Sunci a ebdeibmar uram asi dangbisina mem. 33Sunci Er Iya Erebdobnyi ebdeibmar uram nirya asi kunubkwandarur. Ato kuboka kunuramunyi ura, sun bindoka iya kubkwandum mutuk ara iya kam kuboka teleb asa kubmurubde bimunci, wau lobkwandum,” Ato eboka Musa biryi Er Imtamnyi ebdeibmou to kuboka sun Israel ninyi dam ebkarebmou.
Currently Selected:
Ulangan Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
