Ulangan Uram 7

Israel ninyi asi Imtamnyi biryi, “Kanaan wengbimunci, kubkwandum to ara ato kubdarur,” ebmou uram deyok

7:1-11

1Musa biryi sun Israel ninyi asi ato ebmou, “Er Iya Erebdobnyi, nun molonubnyi biryi Kanaan mutuk bobisici ba, kubkwandum. A bindoka kubkwandum mutuk dam ara ninyi ilinto kununga asi Er Imtamnyi biryi yakdonokwande. A mutuk dam kunung atei yala ninyi ara Het yala ninyi ab, Girgasi yala ninyi ab, Amori yala ninyi ab, Kanaan mutuk yoka nang ab, Feris yala ninyi ab, Hewi yala ninyi ab, Yebus yala ninyi ab kunung asi yakwande. Ninyi yala tabaryi a kunung ara sun mikib ilinto ninyi kunung. Ba, sun Israel ninyi ara mikib mitik ninyi kundarur. 2Ba, Er Iya Erebdobnyi biryi a yala ninyi sun taruk dam karebsici ura, sunci sunsi boukwe kimna mem. Tonda, sunci uram talak erdana mem. Eda, sun Israel ninyi oboka erebdobmunyi ura, a mutuk yala ninyi nirya obkwandarur. 3Tonda, sunci ner bokanibdandoka kamdeirirdana mem! Sun nermabwe ara akatei yala nang mabwe asi kamdeirina mem! Ba, sun mabwe ababyi akatei yala nang nermabwe dona mem! 4Sunci ato kuramunyi ura, sun mabwe ara sun nerabwe aryi nenebdobingnyi ba, yuk kwemdeina molobingnyei. Sun ato kuboka yuk kwemdeina molobingnyi ura, Er Iya Erebdobnyi yu wekoka ola obkabkwansurur. 5Ati, ‘Imtamnyi biryi obsicei,’ tenebmunyi ura, sun Israel ninyi aryi ato kubkwandarur. Sun kwemdeina ati dama deiboka bisam obingiryi uk daramingnyi keil lamna nirya ab, keil dukdandoka moloramingnyi dinyi ab, abyokomna ikoka moloramingnyi dinyi ab, sun kwemdeina si Asyera bitoa kiknibdeiboka moloramingnyi dinyi ab, dalubkaboka uk dabkwandarur! 6Sun Israel ninyi ara Er Iya Erebdobnyi nun molonubnyi biryi lek kibdeiboka yuk wibdeibsou. Ura, im dangna tukwe dangna mutuk nang kankan aryi, sunsi wiboka Er nermabwe mabwe kibdeibsouci, kanyi deirisurur.

7Sunsi Er Iya Erebdobnyi biryi wibsou ara ninyi ilinto kurandau ati kum wibsou. Eda, sun ninyi mitikto nun kundarur bok, Imtamnyi biryi sunsi wibsou. 8Bok, Er Iya Erebdobnyi biryi sunsi wibsou ara Er boukwe kusurur deyok aryi wibsou. Ura, Erci sun abwe yabwe dam asi minob uram talak eboka, ‘Mutuk karebkwansin,’ eamwe to kunubdeibsou. A deyok aryi Mesir mutuk sienyi Firaun biryi il weik wa dimnansou ba, mambul dorandau asi Er Imtamnyi mikib aryi lebdeibsou. 9Ati, nun Nai Imtamnyi bira Er tentok Iya Erebdobnyi kurur. Ani, Imtamnyi Erda busul weiknyi kurur. Ani, Er Imtamnyi biryi uram talak ebdeiamwe dinyi kunubdeibsou ara Erci iya boukwe kimkwansir. Er ebdeibwe uram akwe kunuramingnyi nang ara odei-odei 1.000 baryi yaldakwaminga ababyi boukwe kibmurubkwande ati bikwandarur. 10Bok, unanyi biryi Er Iya Erebdobnyi bisi, ‘Ni li,’ teneboka Er uram kununa kum kuramingnyi nang ara ola dekeiboka din dinyi karebkwande. 11A deyok aryi ni Musa biryi sunsi arub aryi yan memen uram ab, ‘Ukubdarur,’ en uram ab a nukmanto asi kekebmunci, kunubde binkwandarur!” ebmou.

“Er Imtamnyi ebdeianci to kunuramingnyi nang asi kisal dangna dinyi dobkwaming,” ebmou deyok

7:12-26

12Musa biryi Israel ninyi asi tubto ato ebmou, “Sunci Er Iya Erebdobnyi biryi yan memen uram ab, ‘Ukubdarur,’ ebdeibwe uram ab asi busul kuboka kunubkwandarur. Ba, Er Iya Erebdobnyi biryi Er uram talak ebdeiamwe dinyi kunubdeibsou ara Erci busul kuboka iya boukwe kimkwansir. 13Ura, Er Imtamnyi biryi sunsi boukwe kiboka kisal dangni dinyi karebkwansir. Ba, sunci mabwe ilinto yaldakde binkwandum. Ani, sun koubdoba gandum du ab, anggur co du ab, zaitun co yung ab sapi bisam ab, kambing bisam ab, domba bisam ab ababyi ilinto kubkwansir. Ba, Er Imtamnyi biryi sun abwe yabwe deici asi, ‘A mutuk karebkwansin,’ eamwe mutuk dam asi kubkwandum. 14Ba, sun Er Imtamnyi biryi sunsi kisal dangnansici ba, sun yuk-yuk mutuk nang ton u kum kunung to kubkwandum. Ara, sun kankan dam aryi, mi you ninyi ton kuna kum kubkwandum. Eda, mi yaldangna ner sal akwe kubkwandum. Ani, sun bisam yabwe ababyi mi yaldangna bisam akwe kubkwaming. 15Er Iya Erebdobnyi biryi kalingdansici ba, Mesir mutuk ninyi aryi mambul weik dinyi ab, ilila youn doramnyi to ara sun dam kum karebkwansir. Eda, sun mar ordan atei nang asi aminda a mambul dinyi karebkwande. 16Ba, Er Iya Erebdobnyi biryi sun mar ordan nang ara sun dam dobkarebsici ba, sunci boukwe kimna mem! Eda, obkabkwandarur. Ani, sunci sun mar ordan nang moloramingnyi kwemdeina ara molona mem! A kwemdeina asi molobmamunyi ura, sun damnang youbdankwandum.

17Ani, sun kanyatam aryi, ‘Nun mar ordan nang ara ninyi ilinto deyok aryi nun una kuboka sunsi muna obdongoboka erebdobkwayeb do?’ tenena mem! 18Sunci sun mar ordan nang ati ilil kuna mem. Mesir mutuk sienyi Firaun bisi Er Iya Erebdobnyi biryi ilil tenen dinyi kikniboka boyasou asi teneibdenkwandarur. 19Ati, Er Iya Erebdobnyi biryi ilil tenen dinyi ab, mikib dinyi ab kikniramwe ara sun asing nong aryi eirirandau. Ani, Er Iya Erebdobnyi taruk mikib yaboka sunsi boyasou. Ati, Er taruk mikib aryi sun Kanaan nang kankan dam ababyi ato kuboka sun Israel ninyi asi lebdeibkwansir. 20Ba, Er Iya Erebdobnyi nun molonubnyi biryi sun mar ordan nang tuba kunmangnyi ninyi ab, inirorbinmangnyi ninyi ab ara ilila lusa karebci ba, si tobci uca, dibsekwaming. 21Er Iya Erebdobnyi nun molonubnyi bira mikib weiknyi biryi sunsi milibkwansir. Ati, sunci sun mar ordan nang asi ilil kuboka sirim talesina mem. 22Er Iya Erebdobnyi sun molondarurnyi biryi Kanaan mutuk yala ninyi mitik-mitik kum dandeibde binkwande. Ati, sunci liki tentok nirya orkana mem. Ato kuboka nirya obkabmunyi ura, yu kamyoa baitam kunung dinyi tabakoka weiki kibdiryi, sunsi oboka yibsingnyei. 23Ba, Er Iya Erebdobnyi biryi sun Kanaan yoka nang asi sun taruk dam doboka karebsici ba, sun Israel ninyi aryi sunsi obkiriboka kum dandeibkwandum. 24Ani, sun Kanaan sien nang ababyi Er Imtamnyi biryi sun Israel ninyi taruk dam dobkarebkwansir. Ba, sunci a sien nang nirya asi obkiriboka sun si ereramingnyi ara kum dandeibkwandum. Ba, sun a mutuk sien nang aryi sun si leboka oryangasina kum kubkwansing. 25Ura, sun mar ordan nang aryi kwemdeina kiknibdeiboka molonung kwemdeina nirya ara uk dabkwandarur. Ani, sun Israel ninyi aryi a mutuk nang bona dengna weik keil si emas keil ab, perak keil ab asi, ‘Dobdobkun,’ teneboka dorona mem. A dinyi dobmamunyi ura, sun dam nang youbdankwandum. Yuk kwemdeina molona ati Er Iya Erebdobnyi urasin dam ara duknasito kurur. 26Ba, sun Israel ninyi aryi daluamunyi kwemdeina asi sun ai umbura bobana mem. Ato kubmamunyi ura, sun mar ordan nang asi Er Imtamnyi biryi ikin karebwe dinyi ara sunbabyi dobdobmunyei. Ati, a kwemdeina asi Er Imtamnyi biryi, ‘Duknasito,’ tenerur to kuboka sunbabyi, ‘Duknasito,’ tenebkwandarur. A deyok aryi sun kwemdeina nirya daluboka uk dabkwandarur.” Ato eboka Musa biryi sun Israel ninyi asi ebmou.

Currently Selected:

Ulangan Uram 7: MTG

Highlight

Copy

Compare