Ulangan Uram 4

Musa biryi Israel ninyi asi, “Er Imtamnyi biryi, ‘Ukubdarur-ukuna mem,’ eboka yan memebdeibsou to akwe kunubdarur,” ebmou deyok

4:1-40

1Ura, Musa biryi Israel ninyi asi ato ebmou, “Niryi sunsi, ‘Ato kubde bankwandarur,’ ebdeibsise uram akwe kunubde bankwandarur! Ba, diboka kam kubde baramunyi asi, Er Iya Erebdobnyi biryi karebkwansir mutuk wengbindoka iya kubdobkwandum. Erda, sun abwe yabwe aryi miliboka moloraminyi kurur.

2Ba, nun Nai Iya Erebdobnyi biryi ebdeibwe ba, niryi, ‘Ukubdarur,’ eboka aruksise uram ara sunci mitika ton kilina mem! Ani, sunci tabangdongona mem! Eda, Er Iya Erebdobnyi eanci tok akwe kunubde bankwandarur.

3Ba, Er Iya Erebdobnyi biryi Peor mutuk kon dam aryi kwemdeina si Baal molonmai ninyi asi obkabokamwe ara sun asing kobdob aryi eiandau. 4Bok, Er Iya Erebdobnyi, nun molonubnyi bisi ilil teneboka Er uram ebdeibwe to kunundarur ninyi ara a iya kam tuba kunmarum. 5Ba, ni Nai Er Iya Erebdobnyi ni molonunyi biryi ni Musa bisi ukubkwanung ebdeibwe ba, sun dam esunun uram ara sun wengbindoka kubkwandum mutuk Kanaan dam aryi kunubkwandarur. 6Ba, a ebdeiansinyi uram ara busul kuboka tuba kununkwandarur. Ato kunubde baramunyi ura, sun yuk atei nang aryi sun kuramunyi dinyi eiboka biksingnyi ura, ‘Akatei nang ara etekdob kanya bonungci, bingna dinyi ilinto bingnung ninyi kunung,’ tenebkwansunung. 7Ba, Er Iya Erebdobnyi, nun molonubnyi biryi nun molobibyi tok karesurur. Bok, sun yuk atei ninyi molonung kwemdeina aryi Er Iya Erebdobnyi, nun Nai Imtamnyi biryi kurdeirisurur to ton da kurur do? Ton ato kum kurur. 8Tonda, dantam mutuk ninyi aryi yan memen uram telebto akwe dinyi ni arub a eterebmasin to yuk atei nang ton da ton ukunung do? Yuk mutuk nang ara ato dinyi ton eterena kum kunung. 9Ati, sun asing aryi eibmarum to kuboka kalikmunci diboka diblilibkwandarur. Ba, Er Imtamnyi biryi nun Israel ninyi ati, leboka karesurur dinyi ara sunci luba kimna mem! Eda, sun kam kubde binkwanduma nirya ara kisok dam boamunyi aryi sun mabwe odei-odei binkwanduma nirya asi eterebmurubde binkwandarur! 10Ara, sunci Horeb mutuk kon dam yandoka kurandau talak aryi Er Iya Erebdobnyi urasin dam yanmandau ba, ni Musa dam asi ato ebdeibmou, ‘Kanci sun Israel ninyi nirya neik dikum bulubdeibdum. Ba, Niryi ebdeibkwaman uram asi kekebkwaming. Ura, Niryi sunsi a ebdeianyi uram bikingiryi sun kam kubde binkwaming talak nirya ara Ni ebdeianyi uram akwe kunubde binkwaming. Ba, sunci sun mabwe odei-odei binkwaminga nirya eterebingnyi ba, Ni ebdeianyi to akwe kunubde binkwaming,’ ebmou. 11Ura, sun Sinai mutuk kon dam yandoka tikmandauci, dinmandau uca, a mutuk kon asi tulum akurya bunmouci, uk buk lengkerekoka im si tobmou. Ani, a tulum aryi duwa akurya burande to kuboka kunukmouci, tulum-tuluma dongonmou asi asing eibmandau. 12Ura, a uk lengkerengmou deici aryi, Er Iya Erebdobnyi biryi sun Israel ninyi asi uram enmasou bok, sunci Er nong laki eirinina kum kubmandau. Eda, Er uram dem kekebmandau. 13Ani, Horeb mutuk kon dam aryi, Er Imtamnyi ebdeiamwe to kunubde binkwandau ati sunsi ebdeibmasou. Ara, ‘Ukubdarur-ukuna mem,’ eboka uram yakna takubaryi keil lase bitinyi deici asi sekeibmou. Ati, Er Imtamnyi biryi a sekeibmou to akwe kunubde binkwandarur! 14Ura, a uki tum aryi Er Iya Erebdobnyi biryi nisi ato kuboka arukmanou. ‘Kanci sun Israel ninyi nirya asi yan memen uram ab, “Ukubkwandarur,” en uram ab asi eterebdum. Ba, sun Kanaan mutuk wengbindoka kubkwaming ara a ebdeibman uram akwe kunubde binkwanung,’ ebmanou,” ebmou. 15Ura, tubto Musa biryi ato ebmou, “Er Iya Erebdobnyi Horeb mutuk kon dam aryi uram yandoka ebmou bok, sunci Ersi asing kum eibmandau. Ati, sunci diboka kalikdandarur. 16Ati, sunci, ‘Sun kwemdeina kiboka molobkwayeb,’ tenen suncok ner atoa kum, sal atoa kum kiknibdeiboka molona mem! 17Ani, tonda sunci tukwetam kurande kamyoa yala nirya atoa kum, maka imtam langlang eryibarande atoa kum? 18Tukwe deici taram deib yibarande kamyoa kum? Me umbura kurande kamyoa atoa kum? Kiknibdeiboka molona mem! 19Tonda sunci imtam kurur dinyi asi asing eirirandum dinyi ababyi sun kwemdeina kiboka molona mem! Ara, kiting ab, wala ab kurya ab asi molona mem! Anda dinyi ara Er Iya Erebdobnyi biryi teneboka asing eiboka dirlorongdur. Ba, yuk atei nang ara imtam kurur dinyi asi sun kwemdeina kiboka tuba molonung. Ati, sunci a dinyi molobmunyi ura, sun dam nang malyi dinyi kunun ninyi kibdankwandum. 20Ba, sunda Mesir mutuk aryi mambul weik dinyi dorandau yala ninyi bok, Er Iya Erebdobnyi biryi iniboka bobde yandobsouci, Er nermabwe mabwe kibdeibsou. Ba, ukura telebto akwe a kunmarum.#Tit. 2:14; 1Ptr. 2:9

21Bok, sun malyito dinyi kunundarur deyok aryi Er Iya Erebdobnyi yu kubwe ura, diba ati ato ebdeibnou, ‘Kanda me Yordan kouboka otam Ni ebdeibsise mutuk wengbana kum kubkwandim,’ ebmanou.#4:21 Er Imtamnyi biryi Musa ab Harun ab asi ato ebdeiamwe, “Sunci Nisi dib tenena kum kubnururumci, sun Israel nang urasintam Ni mikib aryi me anabdeibmanto bok asi, dib kum tenebdurumwe deyok aryi Israel nang asi Niryi, ‘Karebkwansin,’ ebdeibse mutuk Kanaan boboka kum wengbinkwandurum,” ebdeiamwe. Bil. 20:12 Akiryi, nira Er Imtamnyi biryi ebdeibsou mutuk tonkwa kum wengbinkwayeb. 22Ba, sunda uki kum uca do talak ara me Yordan kouboka Kanaan mutuk wengbinkwamarum. Bok, nira sun ab tonkwa kum wengbinkwayeb. Eda, a mutuk dam dibkwaman. 23Bok, sunci yuk kwemdeina kikniboka molona ara iya mem sirik. Ara, sun biramnang Er Iya Erebdobnyi dam asi, ‘Nunda yuk kwemdeina molona kum kubkwayeb,’ ebdau. A deyok aryi Er Iya Erebdobnyi biryi ebdeibwe uram akwe kunuboka Ersi molonkwandarur. 24Ato ebman ara Er Iya Erebdobnyi nun molonubnyi bira uk lemberekoka yirande atonyi kurur ati ebman. Ati, Er Imtamnyi bira yuk dinyi-yuk dinyi kiklibman kumnyi kurur. 25Ati, Er Imtamnyi biryi karebsou mutuk wengbimunci, uki weik kuboka mi yaldakoka odei-odei baramunyi ababyi, yuk keica-yuk keica ati, ‘Nun kwemdeina,’ tenen kiklibdeboka molona mem! Ato kuboka yuk kwemdeina kikniboka moloramunyi ura, Er Iya Erebdobnyi urasin dam malmalibkwandarur. Ukuramunyi ura, Imtamnyi Er yu kibsinibkwandarur. 26Niryi sunsi a ebdeibmasin uram kununa kum kubmunyi ura, imtam babyi tukwetam babyi a kekenmasiring bok, a uram ara niryi sunsi dib ati ebmasin. Ara, a uram kum kunubmamunyi ura, Er Imtamnyi biryi ebdeibsou mutuk Yordan kouboka otam mutuk dam wengbimunyi ababyi, uki weik kum kubkwandarur. Eda, Er Imtamnyi biryi kum dandeibkwansurur. 27Ba, Er Iya Erebdobnyi biryi bokwalwalabdeibsici ba, yuk nang mutuk binsekwandum. Ba, yuk atei-yuk atei bindoka ninyi mitikanun kubkwandum. 28Yuk atei nang taruk dam dobkareansici ba, yuk nang kankan dam bindoka kubkwandum ara ninyi taruk aryi kikniamingnyi kwemdeina asi molobkwandum. Anda kwemdeina ara co totoa, keil totoa aryi kiknibdanamingnyi asi molobkwandum. A kwemdeina ara lulukoka asing eirina kum kwemdeina ab, tong kekena kum kwemdeina ab, uram kekena kum kwemdeina ab, yina yibman kum kwemdeina bok asi molobkwandum. 29Ura, yuk nang mutuk bindoka kuramunyi ani, tubto sun Nai Er Iya Erebdobnyi bisi ingkirikwandum. Bok, sunci Imtamnyi bisi eibkwamunyi ura, sun kanya tentok boboka Ersi ingkirikmunyi akwe eibkwandum.

30Ura, a bokwalwalabdeiansici ba, bindoka kuramunyi mutuk dam aryi sunsi mambul weik dinyi ilinto sun dam kubkwansir. Anda mambul dinyi sun dam kubsici talak aryi Er Iya Erebdobnyi nun molonubnyi boukwe dam tamuboka yankwandum. Sirya yamunyi ura, Er Iya Erebdobnyi eanci uram akwe kunubde binkwandum. 31Sun Nai Er Iya Erebdobnyi sun molondarurnyi bira ninyi boukwe ilintonyi kurur. Ati, Erci sunsi deiblobsiriryi ona kum kubkwansir. Ani, Erci sun abwe yabwe deici asi, ‘Ukubkwansin-ukubkwansin,’ eboka uram talak ebdeiamwe dinyi ab, sun kalikwansin eamwe dinyi ab, orkasina kum kubkwansin eamwe dinyi ab ara luba kimna kum kubwe. 32Sunci im dangna tukwe dangna nirya yibinkirikoka ato eboka asibkirikdendarur. Dantam kwemdeina aryi Er Iya Erebdobnyi nun molonubnyi mikib ato ton da kurur do? Minob Er Imtamnyi biryi yuma kiknibmou talak aryi kuboka sun deirisina kabul talak ara ato mikib ton da kurur do? Er Imtamnyi biryi nun Er mabwe asi kusurur to ara yuk kwemdeina aryi ton da kurur do? Da ton kum kurur. 33Dantam ninyi aryi sun molonung kwemdeina aryi uk buk ilila lengkerengmaci deici aryi uram ebci ba, kekenung do? Sun Israel ninyi aryi, Er Imtamnyi biryi uk angmou kankan aryi uram ebwe ba, kekeandau to ara yuk kwemdeina aryi ton da ukunung do? 34Ani, yuk kwemdeina aryi ninyi yuk mutuk kuramingnyi asi dobobci ura, er mabwe kiboka er mikib aryi boyau enung asi da ton bingdarur do? Ara, sun Nai Imtamnyi biryi sun Mesir mutuk dam kurandau asi, boboka yandobsouci, Er mabwe kibdeibsou. Ba, Er Iya Erebdobnyi mikib ab, ilil tenen dinyi ab, Er taruk mikib ab aryi kurur dinyi ara sun asing aryi eibdau. Bok, a eibdau to yuk kwemdeina aryi ato ton kurur do? 35Sun urasin dam asi ilil tenen dinyi ilinto kunuramwe ara Er Iya Erebdobnyi Er tentok Iya Mikibnyi kurur. Ba, sun yuk kwemdeina ara mikib ton kum kunung. 36Er Iya Erebdobnyi imtam aryi uram doboka sunsi eteresurur. Ba, tukwetam ara Erci, ‘Sun asing eibnung,’ tenen ilila uk buk lemberekeibmou. Ura, a uk buk umbura aryi Erci sunsi uram ebmasou. 37Ara, Er Imtamnyi biryi sun abwe yabwe asi kanyi deiamuryi, a deyok aryi sunsi wiboka Er mabwe kibdeibsou. Ura, Er Imtamnyi mikib ibarya aryi sunsi Mesir mutuk dam aryi boyasou. 38Ani, Er Iya Erebdobnyi Er tentok kururnyi biryi mikib weik atei dordanung atei ninyi asi yakdonokoka bowengbinkwansir. Ara, Er Imtamnyi biryi sunsi etereansou mutuk bobisici ura, sun mutuk kibkwansir. 39A deyok aryi, arub aryok diboka bikdarur luba kimna mem! Ara, imtam babyi tukwetam babyi nirya, iya erebdob kwemdeina ton da kum kurur. Eda, nun molonubnyi Er Iya Erebdobnyi tentok a kunum kurur. 40Ati, arub aryi, ‘Ukubdarur-ukuna mem,’ eboka yan memebmasinci karebmasin uram ara iya talebnurubmunci, kununkwandarur. Ba, sun ab, sun mabwe nermabwe ab, odei-odei binkwandum ninyi nirya ara teleb asa akwe kubde binkwandum. Ani, Nun Nai Iya Erebdobnyi biryi eterebsou mutuk bindoka sun mutuk kibdobmunyi ura, a mutuk dam iya kubdobkwandum,” ebmou. Ato eboka Musa biryi sun Israel ninyi asi ebkarebmou.

Yordan koubkaboka inirdarorban atei-atei deyok

4:41-43

41Ura, Musa biryi yaletam me Yordan kouboka otam mutuk bok, atei winiryi asi yuk wibdeibmou. 42A wibdeibmou atei winiryi ara sun teneboka kum kurongingnyi uca, sun kwit yabwe obkwetebingnyi nang bindoka kuron atei wibdeibmou. Ara, mar irdeirirdana kabul talak aryi akatei bindoka kuronkwanung. 43A sirya wibdeibmou atei si ara Bezer atei ab, Ramot-Gilead atei ab, Basan-Golan ab wibdeibmou. Yini mutuk Bezer atei ara erebdob atei asi sun Ruben yala ninyi baronkwamnyi ati wibdeibmou. Ba, Ramot-Gilead atei ara sun Gad yala ninyi ati yuk wibdeibmou. Ba, Basan-Golan atei ara sun Manasye yala ninyi ati yuk wibdeibmou. Ato kuboka sun winiryi yala nang ati Musa biryi atei yuk-yuk wibdeibmou.

Er Imtamnyi biryi sun Israel ninyi asi, “Ukubdarur,” en uram karebmou deyok

4:44-49

44Ura, Er Imtamnyi biryi sun Israel ninyi ati, “Ukubdarur,” ebdeiamwe uram asi Musa biryi tubto ebkarebmou. 45A ukubkwandarur ebdeibokabsouci, sirya iya kibdeibwe uram ebkarebmou ara sun Israel nang Mesir mutuk aryi anaboka yangaroramnyi talak aryi ebkarebmou. 46Ara, me Yordan koubkaboka yaletam mutuk bakan si Bet-Peor yandoka keis ol ai doboka kuramnyi talak aryi ebkarebmou. A mutuk minob ura sienyi si Sihon biryi Amori mutuk sienyi kiamuryi taleamwe mutuk dam aryi ebkarebmou. Ba, sienyi Sihon bira Hesybon kuramuryi Amori mutuk nirya taleamwe. Asi sun Israel ninyi ab Musa ab aryi sienyi Sihon bisi oboka muna kibdongoamnyi. 47Ato kuboka oboka muna kibdongobokabiryi, sienyi Sihon biryi taleamwe mutuk babyi, sienyi Og biryi sienyi kiboka taleamwe atei ababyi nirya arabdobmai. Sun a bitinyi sien nang ara me Yordan kouboka yaletam mutuk si Amori sienyi kiboka taleandei sien nang bitinyi kurandei. 48A mutuk tukwe bukamwe ara Aroer atei aryi kuboka me si Arnon binamwe aryi kuboka me utam mutuk kon si Siryon kon a sirya burbinamwe. Ara, mutuk kon si Hermon enung. 49Ani, me Yordan koubkaboka yaletam aryi kuboka weik me kwan si Laut Mati aryi kuboka mutuk kon si Pisga bukwa amwetam a nirya asi arabdobmai.

Currently Selected:

Ulangan Uram 4: MTG

Highlight

Copy

Compare