Ulangan Uram 3

Israel ninyi aryi Basan atei sienyi si Og oboka erebdobmai uram deyok

3:1-11

1Musa biryi sun Israel nang asi ato ebmou, “Nun me utam dangubdeiboka Basan mutuk dam binamoubwe. Ba, Basan atei weik sienyi Og ab, er yin doun nang nirya ab iyanansei ba, Edrei mutuk dam obdanamoubwe. 2Bok, Er Iya Erebdobnyi biryi nisi ato ebmanou, ‘Niryi weik sienyi Og ab, er yin doun nang nirya ab Musa kan taruk dam dobkarebkwamakin. Ba, kanci Og bisi Amori atei sienyi Sihon kuamoumwe to kubkwamarim. Ati, Musa kan ilil kukina mem!’ eanou. 3Ati, Nun Nai Iya Erebdobnyi biryi Basan atei weik sienyi si Og ab, er yin doun nang ab nun taruk dam dobkareansou. Ba, nunci sunsi nirya oamoubwe. 4Ba, a talak aryok nunci Basan mutuk dam bok weik sienyi Og taleamwe atei nirya arabdoamoubwe. Atei tentok ababyi tanglona kum kuamoubwe. Ara, Og taleamwe mutuk si Argob mutuk nirya arabdamoubwe. 5Bok, anda atei ara keil lika aryi imtam nun doamnyi. Ba, bisik bublan ababyi keil tembaga bublan tiringdamnyi. Bok, ton atei ara lika dona kum kuramnyi, Ani, bisik keil bublan kum tiringdamnyi. 6Akatei ab, a kuramnyi ninyi ab nirya nunci bindoka oamoubwe. A ukubmoubwe ara nunci Hesybon atei sienyi si Sihon kuamoubwe to kubmoubwe. Ara, sal, babyi nerabwe babyi, mitik mabwe babyi nirya oamoubwe. 7Ba, sun bisam winiramnyi nirya ab, sun bona-bona ab nirya ab daluboka doamuburyi nun dinyi kibdobmoubwe.

8A talak ara weik sien nang bitinyi Amori yala nang taleandei atei nirya arabdoamoubwe. Ara Yordan me kouboka dinatam ababyi nirya arabdoamoubwe. A mutuk ara Yordan kouboka yaletam bok, Arnon mutuk lu aryi kuboka Hermon mutuk kon asi nirya arabdoamoubwe. 9Ara, Sidon yala ninyi aryi Hermon mutuk kon si sina ara Siryon enung. Ba, Amori ninyi aryi Hermon mutuk kon si sina ara Senir enung. 10Ura, nun Israel ninyi aryi Basan mutuk weik sienyi Og taleamwe atei nirya asi arabdoboubwe. A arabdoboubwe mutuk ara mutuk kon dam doramnyi atei ab, Gilead mutuk nirya ab, Basan atei nirya ab, Salkha atei aryi kuboka Edrei atei dam nirya arabdoboubwe,” ebmou. 11“Weik sienyi Og bira Refaim yala er tentok kuramwe ati er dongobkwamnyi co sangkol ara kat keica si besi aryi kikniamnyi. Ba, er cang nungna ara empat meter baryi. Ani, er temda ara dua meter baryi. A kikniboka deiamnyi co sangkol ara ukubabyi tuba eirinung. Ara, Amon yala nang weik atei Raba ai deibyi,” Musa biryi Israel ninyi asi ato kuboka ebmou.

Yordan me kouboka dinatam yaletam mutuk asi yala yuk-yuk bokmai uram deyok

3:12-22

(Bil. 32:1-33)

12Musa biryi Israel nang asi ato ebmou, “Nunci Yordan me duman yaletam mutuk sirya arabdoboubwe ura, niryi Ruben yala ab, Gad yala ab ati bokeibse. A bokeibse mutuk ara Arnon me duman Aroer mutuk ab, Gilead mutuk kon dinatam ab, a mutuk weik atei ab ara sunti karebse. 13Ba, Gilead mutuk bok dinatam ara Manasye yala ati karebse. Akatei ara weik sienyi Og biryi il dimnamwe atei. Ba, Basan mutuk nirya ara Refaim nang mutuk enung. 14Ba, Manasye deibdoba Yair biryi Argob mutuk ebok, Basan mutuk ebok aryi kuboka Gesur nang mutuk ab, Maakha nang mutuk ab ara er yala si doboka er mutuk kibdobwe. Ura, a mutuk si ara Hawot-Yair ebmai. 15Ba, Gilead mutuk bok me utam mutuk ara Makhir yaldangna ati karebse. Sun yala ababyi ara Manasye yala nang. 16Ba, Ruben yala ab, Gad yala ab ara Gilead mutuk bok me youkwetam mutuk me Arnon yibiu mutuk karebse. Bok, me utam sekwetebnin yibiu mutuk ab, me Yabok yibiu dam ab ara Amon yala nang mutuk sekdobwe dam karebse. 17Tonda, sun mutuk kitingbantam wiliba ara Yordan me duman aryi kuboka Kineret mutuk ab, Laut Araba ebok Laut Asin enung me dingiblobwe mutuk ab ara sun mutuk kibwe. Ani, Yordan duman aryi kuboka yaletam Pisga mutuk konkon deyok dam ababyi nirya ara sun mutuk kibdobyi,” ebmou.

18Sirya mutuk nukwe ura, Musa biryi Ruben yala ab, Gad yala ab, Manasye yala ab asi tubto ato ebmou, “Niryi sunsi ato ebmasise ‘Nun Nai Iya Erebdobnyi biryi me Yordan yaletam mutuk sun mutuk kiboka kubkwandum,’ eansou. Bok, sun mikib weik yin doun nang ara yin mar douboka sun atei Israel ninyi yuk yala ninyi ara menekaboka Yordan me kouboka binkwaming. 19Ba, sun nerabwe ab, sun mabwe nermabwe ab, sun winin bisam yabwe ilinto ab ara niryi, ‘Sunsi sirya eterebsise atei dam asi kabdeibdarur,’ 20Ba, a kabdeibmunyi ura, sun kusurur to kuboka sun kwit yabwe ababyi Er Iya Erebdobnyi biryi me Yordan kitingbantam mutuk asi karebkwande. Ba, Er Iya Erebdobnyi biryi sunti mutuk kareboka kalingsurur to sunbabyi ukubkwande. Sirya karebci ura, niryi mutuk yala yuk-yuk nukoka eterebsise mutuk bindobkwandarur.

21Ba, Yosua bisi niryi ato eanse, ‘Kanci Er Iya Erebdobnyi biryi kubmou to ara lak asing eibmoumwe. Ara, weik sienyi Og ab, Sihon ab ati asi kunmaci dinyi eibmoumwe,’ eanse. ‘Ato kuboka dantam-dantam mutuk dam binkwandima ababyi Er Iya Erebdobnyi kan molorumnyi biryi kubmaci to ababyi asing eibkwandim,’ eanse. 22Ba, Er Iya Erebdobnyi biryi sunti menekoka mar dobkwamasir. Ati sunci sunsi ilil kuna mem!” eboka Musa biryi Israel ninyi ati ebkarebmou.

Musa Kanaan mutuk wengbana kum kubmou uram deyok

3:23-29

(Bil. 27:12-14; Ul. 32:48-52)

23Musa biryi ato ebmou, “Niryi Er Iya Erebdobnyi bisi ato kuboka molobmase. 24‘Tukwetam kurur molon dinyi ab, im dub kurur molon dinyi ab ara Nai Iya Erebdobnyi, Imtamnyi Kan kurum to, ton kum kunung. Ara, Nai Iya Erebdobnyi, Kanci ni dam asi ilil tenen dinyi yuma lak kibdeianoumwe. 25Ati, Nai Iya Erebdobnyi nisi, “Yordan kouboka ur birum,” ebnurum. Ba, niryi sul ilinto mutuk ab, mutuk konkon mutuk teleb ab, Libanon mutuk ab eibkwan,’ eboka molobmase. 26Bok, sun Israel ninyi malyi kuna aryi Er Iya Erebdobnyi ni molona kum kekebmanouci, yu bobmanouci, ato ebmanou, ‘Sirya! A dinyi tubto molobtabakminyei,’ ebmanou. 27Ura, Er Imtamnyi biryi ato ebmanou, ‘Me Yordan kouboka kum binkwandim ati, Pisga mutuk kon welebindoka dibderum. Ara, kitingyangantam ab, me utam ab, me youkwetam ab, kitingbantam ab asing donokoka bita dibderum. 28Dibdeminyi ura, Yosua bisi, “Ato kuboka kubdum,” eboka eterebdum. Ara, er Yosua biryi sun Israel ninyi bobdiryi Yordan me kouboka bobinkwande. Ura, sun Israel ninyi ara kan asing eibmarim mutuk bindoka kubkwaming,’ ebmanou. 29A deyok aryi ukura nun Bet-Peor mutuk dam a kunmab.” Ato kuboka Musa biryi Israel ninyi dam asi ebmou.

Currently Selected:

Ulangan Uram 3: MTG

Highlight

Copy

Compare