Ulangan Uram 30

Er Iya Erebdobnyi biryi sun Israel ninyi tubto boyankwande deyok

30:1-10

1Ura, Musa biryi sun Israel ninyi asi ato ebmou. “Sun Israel ninyi asi kisal dangni dinyi babyi, mambul don dinyi babyi karebkwansir. A karebkwansir bitinyi dinyi nirya ara sun dam kunubkwande. Sun kankan dam sirya kunubci ura, sunci ato eboka bikwandum. Ara, ‘Nai e, Er Iya Erebdobnyi, nun molonanyi biryi nun malyi kun dinyi aryi bokwalwalabdeibsou ba, nun mutuk takloboka yuk mutuk yandoka kunub,’ teneboka bikwandum. 2Ani, sunci Er Iya Erebdobnyi, nun molonanyi dam tubto tamuroryankwandum. Ba, arub niryi a erdeirinmasin to kuboka, Er Imtamnyi uram kekebkwandum. Ara, sun ab, sun nermabwe mabwe kanya nirya ab, sun ab sun nermabwe nong nirya ab aryi, Er Imtamnyi uram asi kekebmurubde binkwandum. 3Ba, sun Israel ninyi asi Er Iya Erebdobnyi, nun molonanyi biryi yuk-yuk mutuk da donoknin yibisou ba, da kundarur ninyi nirya asi tubto tamuboka bulubdeibkwansir. Tamuboka bulubdeibsici ura, sun malyi kun dinyi nirya asi kiliboka lebdeibsiriryi, sunsi kanyi deibkwansir. 4Ara, sun kankan dam aryi im dangna tukwe dangna mutuk nirya aryi bokwalwalabdanamunyi ninyi ababyi, Er Iya Erebdobnyi, nun molonanyi biryi tubto neik ai doboka bulubdeibkwansir. 5Ura, Er Iya Erebdobnyi, nun molonanyi biryi nun abwe yabwe ati kareamwe ba, sun mutuk kiamnyi mutuk si Kanaan dam tubto boboka wengbinkwansir. Sirya boboka wengbisici ura, sunci a kuboka iya sun mutuk kibkwansir. Ba, Er Imtamnyi biryi sun abwe yabwe asi boukwe boboka kareramwe dinyi ab, sun yaldakde deibdoba ab ara outam kibkwande. Ba, sun yala ilinto kibdeiboka boukwe boboka karebkwansir dinyi ara bisibkaboka eitam kibkwande. 6Ani, sun deibdoba nirya asi, ukuryok kanya kareboka Er Imtamnyi uram akwe kunun ninyi kibdeibkwande. Ba, sunci Er Iya Erebdobnyi nun molonanyi bisi, sun kanya ab, sun nong ab nirya aryi Er uram kunuboka iya kam kubde binkwaming. 7Mambul don dinyi nirya ara Er Iya Erebdobnyi, nun molonanyi biryi sun mar ordana ninyi ab, sunsi kereboka domkiringdansei ninyi asi karebkwande. 8Ura, sunci tubto Er Iya Erebdobnyi uram kekebkwandum. Ani, Er Imtamnyi biryi ebdeibwe to asi, arub a enmasin uram akwe kunubde binkwandum. 9Er Iya Erebdobnyi nun molonanyi, Er kanya teleb asa aryi sun abwe yabwe asi boukwe kiboka, Er karen dinyi tabakdongoboka kareramwe to kuboka karebde binkwansir. Ara, Er Iya Erebdobnyi nun molonanyi biryi sun wa ibdobkwanduma nirya asi teleb dinyi akwe tabakdongoboka karebde binkwansir. A karebkwansir dinyi ara sun mi deiboka yaldakde binkwandum tam ab, bisam taleboka mi yaldakde binkwandum tam ab, wa ibkwandum ara tabakdongoboka karebde binkwansir. 10Ani, sunci Er Iya Erebdobnyi nun molonanyi uram kekeboka, ‘Ukubdarur,’ eboka sekeibsou kerek sengna umbura uram asi talebnurubkwandum. Ara, Er Iya Erebdobnyi nun molonanyi bisi sun kanya babyi, sun nong babyi nirya aryi tentok kiboka, tubto tamuboka yandobmunyi ura, ato kuboka talebde binkwandum.” Musa biryi sun Israel ninyi asi ato ebmou.

Kam kuna ab, dina ab deyok

30:11-20

11Ura, tubto Musa biryi sun Israel ninyi asi ato ebmou. Ara, “Arub aryi niryi sunsi a ebdeibsin uram ara, ‘A dinyi ati ebmar,’ teneboka bikwamarum. Ani, da yuk dikum aryi doboka kum ebmasin. Ati, sunci kekeboka kunubde binkwandum dinyi ati ebdeibmasin. 12Ara, imtam aryi doboka kum ebdeibmasin. Akiryi, ‘Er Iya Erebdobnyi biryi ebdeibsou uram ara una kuboka kekebibiryi kunubkwayeb do?’ Ena kum ebkwamarum. 13Ani, tonda weik me si laut kouboka otam aryi doboka kum ebdeibmasin. Akiryi sunci, ‘Unanyi biryi a weik me kouboka, Er Imtamnyi biryi ebdeibsou uram boyasiriba, kekeboka kunubkwayeb do?’ kum ebdankwamarum. 14Bok, a ebdeibwe uram ara sun dam a kubwe. Ara, sun mining uram ani, sunsi sirya ebdeibsou ba, sun kanyitam sirya a kubwe asi kunubkwandarur.

15Ura, Musa biryi sun Israel ninyi asi tubto ato ebmou. Arub tum ara Er Iya Erebdobnyi biryi sunsi kisal dangni dinyi ab, mambul don dinyi ab, kam kun dinyi ab, dimni dinyi ab ebdeibsou dinyi ebsin uram ara sun dam kubde. 16Arub ara niryi sunsi ato ebdeibmasin. ‘Sunci Er Iya Erebdobnyi nun molonanyi bisi boukwe kiboka, Erci ebdeibsou to kuboka kunubmurubde bindarur! Ba, sun wengbindoka kubkwandum mutuk si Kanaan dam aryi, kam tuba kubmurubkwandum. Ba, Er Iya Erebdobnyi nun molonanyi biryi sunsi kisal dakmurubde binkwansir. 17Bok, Er Iya Erebdobnyi biryi ebdeibsou uram asi kekena kum uca, takloboka yuk kwemdeina asi molobmunyi ura, 18Er Imtamnyi biryi sunsi obkwansir. Ani, me Yordan kouboka otam bindoka kubkwandum mutuk aryi, sun kam kubde ban uki ara weik kum kibdeibkwansir. Eda, uki mitikanun kibdeibkwansir. 19Arub ara im dangna tukwe dangna ninyi nirya aryi, a enmasin uram asi sirya kekebing. Ara, niryi sunsi kam kuron dinyi ab, din dinyi ab, teleb kuron dinyi ab, malyi kun dinyi ab ebdeibsou asi lak sun dam ebkarebsin, asi sunci wibdobdarur. Ba, a wibdobmamunyi kam kuna asi sunbabyi, sun deibdoba babyi iya kam kubde binkwandum. 20Ara, Er Iya Erebdobnyi biryi nun abwe yabwe Abraham ab, Ishak ab, Yakub ab asi, “Karebkwansin ba, sun deibdoba aryi wengbinkwaming,” ebdeiamwe mutuk si Kanaan dam wengbinkwandum. Sirya wengbimunyi ura, Er Iya Erebdobnyi nun molonanyi uram akwe kanyi deiboka, Er dam akwe iya kubmurubde binkwandum,’ ebdeiamwe.” Ara, Musa biryi sun Israel ninyi asi, Er Imtamnyi biryi ebdeiamwe to kuboka ebmou.

Currently Selected:

Ulangan Uram 30: MTG

Highlight

Copy

Compare