Ulangan Uram 31
31
Musa biryi Yosua bisi Israel mutuk sienyi tikeibmou deyok
31:1-8
1Ura, Musa biryi sun Israel ninyi nirya asi ato erbinmou. 2“Ni kam kubde yanganun kwalina nungna ara 120 baryi sirya kurbin. A kurbin talak aryi, niryi mikib doboka Israel sienyi kibman kum kubnir. Tonda, Er Iya Erebdobnyi biryi, ‘Sun Israel ninyi asi kanci me Yordan, kouboka kum bobinkwandim.’ 3Eda, Er Iya Erebdobnyi sun molonindarurnyi biryi boboka meneksiriryi, me kouboka Kanaan mutuk boboka wengbinkwansir. Ba, sun Kanaan mutuk a minob kunung ninyi nirya ara oboka malyi kibminikwande. Ba, sun a obminikwande ninyi atei ara sunci wengbindoka arabdobkwandum. Ara, Yosua biryi sun Israel ninyi sienyi kibokabsiriryi, Yordan me bokoubkwansir. Ara, Er Iya Erebdobnyi biryi ebdeibwe to kuboka boboka koubkwansir. 4Ani, Er Iya Erebdobnyi biryi sun Kanaan mutuk minob a kunung ninyi asi oboka kum dandeibkwande. Ara, sun Amori mutuk sien nang bitinyi si Sihon ab, Og ab sun yin doun nang ab asi, Er Imtamnyi biryi sun mutuk dam aryi oboka kum dandeiamwe to kuboka kum danabdeibkwande. A kuamwe ara sun Israel ninyi Amori mutuk bisik kuboka Kanaan mutuk baramnyi talak aryi kuamwe. 5Er Iya Erebdobnyi biryi sun Kanaan ninyi asi sun taruk dam dobkarebkwansir. Sun taruk dam dobkarebsici ba, ni Musa biryi sunsi, ‘Ato kubkwandarur!’ ebdeiansinyi to kuboka obkabkwandarur. 6Ati, sun kanya aryi sun Kanaan nang asi, ‘Ato kuboka obkwayeb,’ tenen kanya kiknibdobmunci, mikib kibdobdarur! Er Iya Erebdobnyi nun molonanyi biryi sunsi kalikoka bomenekwansir. Akiryi, sun mar ordan nang ilil ati, sirim talebsicei,” ebmou.
7Musa biryi sun Israel ninyi asi sirya ato ebmou. Ura, Erci Yosua bisi nabmou ba, sun Israel ninyi urasin dam tingyanmou ura, ersi ato ebmou. “Kanci sun Israel mutuk sienyi kibminci, Israel ninyi nirya asi boboka baraminyi tok asi, Er Iya Erebdobnyi biryi nun abwe yabwe asi, ‘Karebkwansin,’ ebdeiamwe mutuk boboka wengbinkwandim. Sunsi boboka wengbiminyi ba, sun mutuk kibkwande. Ati, kan kanya aryi, ‘Ato-ato kubkwan,’ tenen ati kiknibdobminci mikib kibdobdum! 8Ara, Er Iya Erebdobnyi, Erbiramnyi aryi, boboka menekoka kalikwansir. Ati, kan kanya surukoka, ilil kukina mem,” ebmou.
Kwalina tabaryi kwalibni tok yan memen uram nungna deyok
31:9-13
9Musa biryi sun Israel ninyi ati, “Ato-ato kubde binkwandarur,” en uram ab, yan memen uram ab sirya sekmou. Ura, Er Iya Erebdobnyi biti ninyi dama deirin nang si imam nang ab, sun Israel mutuk yuk weik sien nang ab taruk dam asi karebmou. Ara, imam nang ara Lewi yala nang aryi “Ukubdarur,” en uram deirin co sangkol kalingna nang kuramnyi. 10Sirya karebmouci, sunsi ato ebdeibmou. “Kwalina si Hari Raya Pondok Daun ara kwalina tentok dobci tok tuba kwalinkwandum. Bok, kwalina tabaryi kimbaci tum ara sun kwit yabwe asi, ‘Nun bona tiya ati boansiminyi ani, aminda tamubkarebkwanurum,’ eamunyi nang asi a bobumwe bona ara, ‘Tamurkarenin kum,’ ebdankwandarur. Ara, Hari Raya Pondok Daun dobmaci tum aryi ebdankwandarur. 11Ani, sun Israel ninyi nirya aryi, Er Iya Erebdobnyi, nun molonanyi biryi yuk wibdeibkwande dikum ai asi, yandoka Ersi moloryangankwandarur. A weik kwalina berekmaci uki tum ara a kerek sengna umbura dam sekeibsou dinyi nirya aryi doboka tentok kibdeibwe ara sun yan memesin uram sekeibsou. A sekeibsou uram asi, Israel ninyi nirya yandoka wekmamunyi ai aryi, nungnikwandarur. 12Ba, sunci kekebingnyi ura, Er Iya Erebdobnyi, nun molonanyi bisi, ‘Ilil,’ teneboka kunkwanung. Ani, yan memen uram aryi, ebdeianci to kuboka kunubde bankwanung. Ara, sun Israel ninyi nirya babyi, nermabwe mabwe babyi, tingyangan ninyi nirya babyi buluboka a yan memen uram kekenkwandarur! 13Ba, sun nermabwe mabwe aryi, a yan memen uram minob kum kekeramingnyi asi kekebokabingiryi, Er Iya Erebdobnyi nun molonanyi bisi, ‘Nun ilil,’ teneboka yan memen uram ebdeianci to kuboka, me Yordan kouboka otam bindoka kubkwandum mutuk aryi kunubde bankwanung,” ebmou.
Musa mot deyok koubmou deyok
31:14-30
14Ura, Er Iya Erebdobnyi biryi Musa bisi ato ebmou. “Kan dibkwamarim talak sirya dam kubmar. Ati, Niryi Yosua bisi wibokabniryi, Israel sienyi tikeiboka ersi uram ebdeibkwaman. Ati, ersi nabminyi ura, Ni ai Kemah Suci ai yarurum,” ebmou. Ebdeibmou ba, Musa biryi Yosua bisi nabmouci, Er Imtamnyi ai bindoka tingbinmarei. 15Ura, Er Iya Erebdobnyi bira duwa bum deici aryi yandoka lak kibdanmou. Ara, a keis ol ai Kemah Suci ai bisik wengban dam abyokomna ikamnyi dam aryi lak kibdanmou. 16Ura, Er Iya Erebdobnyi biryi Musa bisi ato ebmou. “Kan dibkwamarim talak sirya dam kubmar. Kan dibminyi talak ara Ni ab, sun Israel ninyi ab Sinai mutuk kon dam aryi sirya, ‘Uram talak dobdanamoubwe,’ uram asi dakbisibkwaming. Ara, sunci Nisi takloboka a wengbinkwamang mutuk si Kanaan ninyi aryi molonung kwemdeina asi miliboka molobkwaming. 17Ba, Niryi sunsi yu weik boboka taklobokabniryi, sun dam aryi Ni urasin inibdobkwan. Ba, mambul dinyi tuba-tuba dobokabingiryi dibsekwaming. A talak aryi, sunci ato ebkwaming, ‘A mambul weik dinyi donub nirya ara Er Imtamnyi biryi nunsi kum dirnilisurur deyok aryi kusurur do?’ ebkwaming. 18Bok, Nisi takloboka, yuk kwemdeina asi moloramingiryok ato enmangnyi deyok aryi a talak ara sun kankan dam aryi, Ni urasin inibdobkwan.
19A deyok aryi, Musa kan ab, Yosua ab aryi sun Israel ninyi ati a mot sekdumunyi ura, seboka eterebdurum ba, sun kisok dam yuk-yuk bobkwaming! Ba, a mot ara sun Israel ninyi aryi, Niti teneirinin mot kibkwaming. Ba, a mot seboka, Niryi sunsi boukwe kiboka, karenun dinyi ati iya teneirin mot kiboka sebde binkwanung. 20Ba, sun abwe yabwe asi, ‘Karebkwansin,’ eanse mutuk si Kanaan dam bobinkwan. Ba, sunci a mutuk dam aryi yina amuma yiboka kubkwaming. Ara, sapi moum yung yina babyi, kwiryi me yung yina babyi yibde kubkwaming. Ba, bouboka sun nong bol teleb kubkwande. Ato kuboka karebkwan bok, sun Israel nang aryi Ni Imtamnyi bisi, ‘Outamnyi bica,’ tenebokabningiryi, Niryi sunti yan memebdeianyi uram ababyi yan yaniboka, yuk-yuk kwemdeina asi molobkwaming. 21Akiryi Ni Imtamnyi biryi sunti ‘Karebkwansin,’ ebsise mutuk dam asi boboka wengbana kabul talak aryi sunci malyi kubkwaming dinyi sun kanyatam kubwe ara sirya bikse. Ani, a mot ara sun ab, sunci yaldakde binkwaming ninyi kisok dam asi iya bobkwaming. Akiryi, mambul don dinyi weik dobkwaming talak ara a mot aryi Niryi sunsi boukwe kimnun dinyi asi teneirin mot kibkwande,” ebmou. 22Ba, Musa biryi a mot sekmouci, sun Israel ninyi asi eterebmou.
23Ura, Er Iya Erebdobnyi biryi ninyi si Nun mi Yosua bisi ato ebmou. “Kanci sun Israel ninyi sienyi kibokabminci, Kanaan mutuk dam boboka wengbinkwandim. Ati, mikib kibdobminci, kan kanya wisiboka, ‘Ato kubkwan,’ tenen kiknibminikdobdum! Sun a bobinkwandim noutam ara Er Imtamnyi biryi kansi kum taklobkwankir eda, kansi iya milibkwankir,” ebmou.
24Ura, Er Iya Erebdobnyi biryi sun Israel ninyi ati yan memen uram asi, Musa biryi nirya liliboka sirya sekmou. 25Ura, Musa biryi sun Lewi yala nang asi, Er Iya Erebdobnyi biryi, “Ukubdarur-ukuna mem,” en uram co sangkol bon nang asi ato ebmou. 26“A yan memen uram dobdobdarur! Dobdobmunyi ura, Er Iya Erebdobnyi nun molonanyi biryi, ‘Ukubdarur,’ en uram kiboka deirin co sangkol dinatam asi deibdarur! Ba, a mot aryi sun kankan dam kubokabdiryi, sun Israel ninyi nirya asi Er Iya Erebdobnyi biryi, ‘Ukubdarur,’ ebdeibsou uram tuba ati teneirin dinyi kibkwande. 27Ni Musa biryi sun kisok kat babyi, sun ususumna babyi nirya ara sirya biksise. Ani, ni kam tuba kunman ba, sun ab kunmab talak ababyi, Er Iya Erebdobnyi uram kununa kum uca, lebesengdarur. Ati, ni dibnyi talak ara wanok ato kuboka iya ati, lebesekwandum. 28Ati ukura, akatei sun yala yuk-yuk du nang ab, a mutuk mitik-mitik keis ol atei weik sien nang ab, ni yin doun nang sien nang ab nirya ara ni dam buluryandarur! Ba, ni Musa biryi sun im dangna mutuk tukwe dangna mutuk ninyi nirya aryi asi nabnyi ura, sun deyok ati ato ebkwaming. ‘Sun Israel ninyi ara Er Imtamnyi biryi ebdeibwe to kekeboka bikman bok asi dangbisinung asi einub,’ ebkwaming. 29Ni dibnyi talak ara sunci iya yu dinyi akwe kunubde binkwandum. Ani, ‘Ato kuboka kubde binkwandarur!’ ebdeiansinyi bisik takloboka yuk bisik binkwandum. Ato kuramunyi ura, sunci Er Iya Erebdobnyi kanya u yibkarebkwandum. A deyok aryi, sun aminda mabde binkwandum tam ara mambul dinyi mitik kum dobdobkwandum,” ebmou.
30Ura, sun Israel ninyi urasintam aryi, a sekmou mot yuma aryi kuboka sirya tam nirya sebmou.
Currently Selected:
Ulangan Uram 31: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
