Ulangan Uram 29

Er Imtamnyi ab, sun Israel ninyi ab aryi, “Ukubdankwayeb,” tubto ebdanamnyi uram deyok

29:1-29

1Ara, Er Iya Erebdobnyi ab, sun Israel ninyi ab aryi, Horeb mutuk kon dam aryi, “Ukubdankwayeb,” ebdeibdanamnyi. A ebdeibdanamnyi uram asi, Moab mutuk dam aryi Musa biryi sun Israel ninyi asi liki bitinyi dinyi tubto ato ebkwamou.

2A uram ebkwamou ati, Musa biryi sun Israel ninyi nirya naboka bulubdeibmou ura, sunsi ato ebmou. “Er Iya Erebdobnyi biryi Mesir mutuk dam aryi sienyi Firaun dam ab, er amwetam wa in nang dam ab, er mutuk ninyi nirya dam ab asi, ‘Iya ilil,’ tenen dinyi kiknirdeiriramwe ara sun asing aryi sirya eirirandau.

3Er Imtamnyi biryi sun Mesir mutuk ninyi asi anda ilila dumdena dinyi kareramwe ba, sun asing nong aryi eirirandau dinyi ara a mutuk ninyi iya mambul weik dona dinyi ab, iya weik ilil tenen dinyi ab kareramwe. 4Bok, uku talak ara Er Iya Erebdobnyi biryi sunsi etekdob bingni dinyi ara kum karebsou. Ara, asing aryi eiamunyi dinyi babyi, amol aryi kekeamunyi dinyi babyi, ‘Ato dinyi eiamoubwe ato dinyi kekeamoubwe tenen bikmunyei,’ tenen ati sunsi a etekdob bingni dinyi kum karebsou. 5Er Imtamnyi biryi ato ebdeibsou. ‘Ni sun Nai Iya Erebdobnyi sun molonindarurnyi biryi dibniliboka, sunsi yini mutuk bisik kuboka boyangaransise. Akiryi, a boyangaransise noutam ara sun nong ai aryi sun ongon aling ton kwilingna kum kuransou. Ani, sun yan ai aryi, sun yan ongona ton kum kwilingnansou. 6Tonda, roti kwaning babyi, anggur me babyi kum bok asi, Ni sun Nai Iya Erebdobnyi sun molonindarurnyi biryi boboka menekansisiryi a nirya kareransise.

7Bok, Moab mutuk dam yabwe ura, Hesybon atei sienyi si Sihon ab, Basan atei sienyi si Og ab aryi mar boansirei bok, nunci sunsi muna kibdongoamoubwe. 8Muna kibdongoboka akatei araboubwe ura, sun Ruben yala ninyi ab, Gad yala ninyi ab, Manasye yala ninyi dinatam ab ati karebmoubwe ba, sun mutuk kibdobmai. 9A deyok aryi sunci, a ebdeibsou uram asi nirya kunubokabmunci, diboka talebnurubdarur! Ba, sun kam kuboka wa ibdorobinkwandum tam nirya ara sun tenebdobmamunyi to kuboka talebde binkwandum,’ ebsou.

10Arub aryi sunda, Er Iya Erebdobnyi nun molonanyi urasin dam tikmarum. Ara, sun sien nang dam ab, sun wisi-wisi sien nang ab Er urasin dam tikmarum. Ani, sun yin doun sien nang ab, sun Israel mutuk, ‘A taleboka kuraming,’ tenen nang nirya ab Er urasin dam tikmarum. 11Ani, sun nermabwe mer ab, sun nerabwe mer babyi, tonda sun yuk mutuk nang bok, sun ab tonkwa kurandum nang babyi, co yengni nang babyi, sun me kwerkiringnansing nang babyi Er Iya Erebdobnyi urasin dam buluboka tikmarum. 12Ara, Er Iya Erebdobnyi nun molonanyi ab sun ab aryi, ‘Ato kubdankwayeb,’ eboka sirya ebdanandau. A ebdanandau uram asi, Er Iya Erebdobnyi nun molonanyi urasin dam asi, ‘A ebdanamoubwe to kuboka kunubde binkwayeb,’ ebkwamarum ati, yandoka bulubmarum. 13Ato ebmunci, kunubde bimunyi ba, arub aryi Er Imtamnyi biryi sunsi Er nermabwe mabwe kibdeibsir. Ara, Er Imtamnyi biryi sun ab, sun abwe yabwe Abraham ab, Ishak ab Yakub ab asi, ‘Ato kuboka Ni nermabwe mabwe kibdeibkwansin,’ eamwe to kubkwamasir. 14A moun yirdana uram ara sun Israel ninyi demang kum ebdeibdanamoubwe. 15Eda, nun Israel ninyi molonanyi Er Iya Erebdobnyi urasin dam a buluryanmab ninyi babyi, nun ab tonkwa kum buluboka wekmab ninyi babyi nirya asi sirya Er Imtamnyi nermabwe mabwe kibdeibmasir. 16Mesir mutuk bobinansei ba, weik il wa doramoubwe ani, yuk mutuk-yuk mutuk bisib-bisib yanamoubwe ara sunda sirya bikmarum. 17Ani, sun yuk mutuk ninyi kwemdeina iya duknasito kwemdeina ara sunda sirya bikmarum. Ara, keil ab, co ab, emas ab, perak ab aryi kiknibdeiboka molonung kwemdeina ara sunda sirya bikmarum. 18A deyok aryi, sun Israel ninyi sal babyi, nerabwe babyi, sun ai ninyi babyi, sun yala ninyi babyi aryi Er Iya Erebdobnyi nun molonanyi bisi deibloboka yuk kwemdeina asi molorbana mem! Ato kuboka sunci iniboka kwemdeina molon deyok aryi kouna yating ato kuboka, iya sik dinyi kibdongobkwandum. Ara, sun malyi dinyi kunun ninyi babyi, malyi dinyi kum kunuramunyi ninyi babyi nirya asi ikin dinyi karebsicei. 19Bok, sun a sumna uram kekebmarum ninyi aryi nun kubde binkwayeb tam ara, ‘Malyi dinyi kunuramibyi ababyi, iya kisal dangmurunkwansir,’ tenena mem! Ato teneramunci, kubde baramunyi ura, malyi dinyi kunun kum ninyi babyi, malyi dinyi kunun ninyi babyi nirya asi Er Imtamnyi biryi ikin dinyi kareboka obkwansir. 20Ato dinyi kunuramingnyi ninyi ara Er Iya Erebdobnyi biryi sun malyi kun dinyi kum kiliboka lebkwande. Bok, Er Iya Erebdobnyi biryi sun a malyito kunuramingnyi ninyi asi a tum aryi kerebkwande. Ani, a kerek sengna umbura aryi, ‘Sun malyi dinyi kunuramingnyi ninyi ara aminda ikin ilila dinyi karebkwande,’ eboka sirya kerek sekeibwe ikin asi, Er Iya Erebdobnyi biryi sunsi karebokabdiryi, kum danabdeibkwande. 21Er Iya Erebdobnyi biryi sun a malyi dinyi kunun ninyi asi, sun Israel mutuk ninyi kankan aryi takloboka yuk dikum wibdeibkwande. Ara, Er Imtamnyi biryi sunsi a kerek sengna umbura sirya sekeibwe yan memen uram aryi ikin dinyi kareboka wenebkwande. 22Ato kubdeibci ba, sun deibdoba ninyi ab, sun yuk mutuk ninyi aryi, Er Iya Erebdobnyi biryi sun mutuk asi mambul weik don dinyi kareansici asi eibkwaming. 23Ani, sun mutuk tukwe nirya ara mutuk tukwe malyi kurminingni keica si belerang ab, minmin ena si garam ab aryi malyi kibdeibkwande. Ba, a mutuk tukwe dam aryi kouryina ukutotoa nirya kum abdenkwande. Ani, sun mutuk ara Er Iya Erebdobnyi biryi Er kerena tin aryi sun Sodom ab, Gomora ab, Adma ab, Zeboim mutuk ninyi asi kum danabdeiamwe to kuboka kum danabdeibkwande. 24Ba, tukwe dangna mutuk ninyi nirya aryi ato ebkwaming. ‘Unato deyok ati Er Iya Erebdobnyi biryi sun Israel ninyi mutuk asi ato kubminikwe do? Ani, unato ati Erci a ilila yuk wekokamwe do?’ ebkwaming. 25Uca, Er Imtamnyi yu wekoka a mutuk asi malyi kibminikanci deyok bikamingnyi ninyi aryi ato ebkwaming. Ara, ‘Sun Israel mutuk ninyi aryi, Er Iya Erebdobnyi sun molonindarurnyi ab, sun abwe yabwe ab uram talak ebdeibdanamnyi uram asi diboka talebnuruboka kununa kum deyok aryi, sunsi ato kubwe. A uram talak ebdeibdanamnyi ara Er Imtamnyi biryi sun Israel ninyi Mesir mutuk aryi bobdakde yanamwe talak aryi ebdanamnyi. 26Ani, Er Iya Erebdobnyi biryi sun Israel ninyi asi, “Yuk kwemdeina molona mem!” eamwe. Bok, sunci yuk kwemdeina asi moloboka miliramnyi. 27Ato kuramnyi deyok aryi, Er Iya Erebdobnyi biryi sun Israel ninyi asi yu boboka kerebmou. Kerebmouci, sun Israel ninyi asi a kerek sengna umbura sekeibwe ikin dinyi karebmou. 28Ara, Er Iya Erebdobnyi ilila yu kerena aryi sun Israel ninyi nirya asi co yating delem-delem eboka bai donongdaming to yuk ninyi mutuk asi donokansou,’ ebkwaming. 29Er Iya Erebdobnyi nun molonanyi biryi nun mabde binkwayeb tam kunubde binkwande dinyi dinatam ara ton da inibdeibwe. A inibdeibwe dinyi ara nun ninyi aryi kum bingnub. Bok, Er Imtamnyi biryi, ‘Ukubdarur,’ ebdeibsou uram aryi nun ab, sunci yaldakde binkwandum nermabwe mabwe ab asi sirya lak kibdeibsou. Asi sun ab, sun yaldakde binkwandum nermabwe mabwe aryi talebnuruboka kunubde binkwandarur,” ebmou.

Currently Selected:

Ulangan Uram 29: MTG

Highlight

Copy

Compare