Ulangan Uram 13

1Ura, Musa biryi sun Israel ninyi asi ato ebmou, “Sangkuna sun kankan dam aryi, lengdera mananyi kibdandoka kum, Imtamnyi uram ermurunanyi kibdandoka kum, sun dam yaute ura, ‘Ilil tenen dinyi aminda kunubkwande,’ eboka kunubdeibsute. 2Ba, anyi eante tok kunubte ura, erci ato eboka nenebdobsute, ‘Sun kum bingdarur kwemdeina asi moloronkwayeb ati, yangandarur,’ eboka nenebdobsute. Ura, sunci a kwemdeina asi si weik eboka molobdate. 3Ato kuboka lengdera mananyi kum, Imtamnyi uram ermurunanyi kum, sun dam yandoka ebmasici ara Er Iya Erebdobnyi biryi a nang deici liknibdongoboka sunti dubdenmasurur. Ara, ‘Ni Imtamnyi bikwe sun kanya ab, sun nong ab, sun bingni dinyi ab kouboka ni tentok kanyi deibnei do?’ tenen ati teneboka dubdenkwamasurur. Ati, a nang uram kekebmunyei. 4Eda, sunci sun Nai, Er Iya Erebdobnyi bikwe dib tenebmunci, Er Imtamnyi biryi ebdeibwe uram akwe kunubde binkwandarur. Ani, Iya Erebdobnyi bisi ilil kuboka, Er uram akwe talebnuruboka tuba kekeboka kunubde binkwandarur! 5Sangkuna a lengdera mananyi kibdanmarinyi kum, a Imtamnyi uram ermurunanyi kibdanmarinyi kum ara, Er Iya Erebdobnyi Mesir mutuk dam mambul dinyi dorandau bok asi boyasounyi, ‘Taklobting,’ tenen dubdenkwansurur. Ati, anyi bira sun kankan dam aryi obkabkwandarur. Ato kuboka sunci, sun kankan dam aryi malyi dinyi yakdonokwandarur.

6Ani, tonda sangkuna sun kwit yabwe kum, sun mabwe kum, sun ner kum, sun nebnyi kum, sun kwit nong kobdob kum aryi, ato kuboka arukwansing. ‘Ni milibnindarur, yuk kwemdeina asi molorbinkwayeb. Ara, sunbabyi, sun nai yabwe babyi bingna kum kuramunyi kwemdeina asi molorbinkwayeb,’ eboka bobinkwansunung. 7Ara, sun kundarur mutuk dina-dina kunung mutuk nang da moloramingnyi kwemdeina kum, era mutuk nang da moloramingnyi kwemdeina kum im youkwe tukwe dam kuramingnyi nang moloramingnyi kwemdeina asi bobinkwamasingnyi ati, ato neneboka bobinkwansunung. 8Ato ebsingnyi ura, sun Israel ninyi aryi a ebmarinyi kum, a ebmaci ner kum, er uram kekeboka milina mem! Ani, sunci anyi kum, a ner kum asi boukwe kiboka er malyito enmaci uram asi limdona mem! 9Eda, sunci anyi kum, a ner kum asi obkabkwandarur. Yuma kan taruk aryi obminyi ura, sun Israel ninyi nirya asi, ‘Anyi obdarur,’ eboka arukwandum. 10Anyi biryi nenenmasici ara nun Nai Er Iya Erebdobnyi Mesir mutuk dam mambul dinyi dorandau bok asi boyasounyi, ‘Taklobting,’ tenen dubdenkwansurur. Ati, anyi bira kanci yuma keil doboka obminyi ura, sun Israel ninyi nirya keil doboka obingnyi ba, dibkwandur. 11Ba, ato kuboka obmamunyi deyok aryi sun Israel ninyi nirya bikingnyi ura, sun ilil aryi, ‘Ni ukuboka obningnyei,’ tenebingnyi ura, yuk kwemdeina asi iniboka bobana kum kubkwanung. Ato eboka Musa biryi sun Israel ninyi asi ato ebmou.

12Ani, sangkuna Er Iya Erebdobnyi nun molonubnyi biryi, ‘A mutuk bindoka kubkwandum,’ ebsou mutuk bindoka kuramunyi atei aryi uram da kekebmunyi ba, ato ebkwansing. 13Yuk kwemdeina molorandinyi biryi sun mutuk bok atei tentok asi yandoka ato eboka arukwamasunung. ‘Yangandarur sun kum bingdarur kwemdeina asi si weik ebkwayeb,’ ebkwamasunung. 14Ato eboka nenenmasingnyi ura, diboka asibdemunci lilibdenkwandarur. Asibdemunyi ba, dib ati sirya nenebmariba, kununmangnyi ura, sunci ato kubkwandarur. 15Akatei kuramingnyi ninyi ab, sun bisam yabwe ab nirya ninyi on ya aryi obkiriboka kum dandeibkwandarur. Ani, akatei ababyi nirya dakabkwandarur. 16Ura, akatei deiriramingnyi bona-bona ab, ninyi ab, ilila keta tam deirbimunyi ura, nirya uk dabkwandarur. Ba, a uk dabmamunyi dinyi ara Er Iya Erebdobnyi nun molonubnyi biti dama deiboka uk dabkwandarur. Sirya uk dongobmunyi ura, akatei olong ara tubto dona mem! 17Ba, akatei kuranci bona-bona ara ton dordena mem! Eda, nirya uk dongobkwandarur. Ato kubmamunyi ura, nun Nai, Er Iya Erebdobnyi biryi yu bosina kum kubkwansir. Eda, Erci boukwe kiboka sun yala tabakdongoboka weik kibdeibkwansir. Ara, sun abwe yabwe asi minob uca, ‘Ukubkwansin,’ ebdeiamwe to kuboka kunubdeibkwansir. 18Ati, sunci nun Nai Iya Erebdobnyi biryi ebdeibwe uram arub a ebman ba, kekenmarum to asi kunubkwandarur. Ara, Er Imtamnyi Iya Erebdobnyi teleb tenerande dinyi akwe kunubde binkwandarur. Ato kubmunyi ura, Er Iya Erebdobnyi sunsi boukwe kibkwansir,” ebmou. Ato eboka Musa biryi sun Israel ninyi asi eboka dukeibmou.

Currently Selected:

Ulangan Uram 13: MTG

Highlight

Copy

Compare