Ulangan Uram 14

Mem en dinyi asi engeboka boukwe kimna deyok

14:1-2

1“Sunda Er Iya Erebdobnyi sun molonindarurnyi nermabwe mabwe kundarur. Ati, sun ai ninyi dibmangnyi ati yuk mutuk nang aryi sun nong bol tubdandoka, sun kisok otong dilo kwamdaramingto kurdana mem! 2Ba, Sun Israel ninyi ara Er Iya Erebdobnyi nun molonubnyi biryi yuk lek kibdeiboka yuk wibdeibsou. Ura, im dangna tukwe dangna mutuk nang kankan aryi, sunsi wiboka Er nermabwe mabwe kibdeibsouci, kanyi deirisurur,” eboka Musa biryi ebmou.

Yin kamyoa ab, yin kum kamyoa ab uram deyok

14:3-21

(Im. 11:1-21)

3Musa biryi Israel ninyi asi ato ebmou, “Er Iya Erebdobnyi biryi duknasito tenerur kamyoa ara yina mem! 4Eda, sun ur yibkwamunyi yan dumbaryi kamyoa ara bisam sapi yim ab, bisam domba ab, kambing ab 5bisam rusa ab, bisam kijang ab, bai bisam kambing ab, mutuk kon kurur bisam kijang ab, bai bisam domba ab ara ur yibkwandarur. 6Ara, sun yibkwamunyi bisam ara yan kwalekoka dumbaryi kianci bisam ab, yina yibmangiryok tubto mundu umbura aryi tamuboka si dam yaci ura, langnaming bisam yabwe ab ara ur yibkwandarur. 7Bok, a yan dumbaryi kamyoa asi yina mem! A kamyoa si ara bisam unta ab, weinya kelinci ab, weinya marmot ab ara yina mem! Ba, a kamyoa ara yina mundu umbura aryi tubto weleyandoka si dam yaci ura, lakde yina kum kunung. Ani, sun yan kila isiboka bitinyi kum kurur. Ati, sun Israel ninyi ara a kamyoa yina mem! 8Ani, tonda bai bisam ababyi ara yina mem! Er yan ara kwa lengdur bok yina asi mundu umbura yibkwetebmaci dinyi asi tamuboka si dam yangana kum kurur. Ati, er tub ara yina mem! Ba, dibmaci bisam ara talena mem!

9Me umbura kurur dinyi ara ur yibkwandarur. Ara, ikan nong dina-dina asi ol kurdongorande kamyoa ab, mekinaia kurande er bol alib karasa borande bol atoanun kirande kamyoa ab akwe ara ur yibkwandarur. 10Bok, mekinaia nong dina-dina asi ol kum kurdongorande ab, er bol alib karasa borande bol atoanun kum kirande kamyoa ab ara yina mem!

11Ba, duknasito kum, eda teleb maka ara ur yibkwandarur. 12Bok, maka bib ab, maka bib ering janggut ab, maka bib laut ab, 13maka bib merah ab, maka bib hitam ab, bib yala nirya ab yina mem. 14Tonda, maka mirin gagak er yala nirya ab ababyi yina mem. 15Ani, maka sanib ab, solman ab, ikan obde yin maka si camar ab, bib yala nirya ab, 16maka solman ab, bol kurun solman ab ara yina mem! 17Ani, maka ngaryi ab sililyo ab maka do ab, bur ab, 18keis ab, maka si ranggung ab, okbayol ab, okbayol yala nirya ab ara yina mem! 19Tonda olyoa kuanci kwising yala nirya ara duknasito ati sun Israel ninyi ara yina mem! 20Bok, olyoa kuanci maka, yina kikiman maka ara ur yibkwandarur.

21Sunda Er Iya Erebdobnyi biryi lek kibdeiboka Er mabwe nermabwe kibdeisou. Ati, sunci dibmaci kamyoa ara yina mem! Eda, yuk atei nang sun atei yandoka bukmang nang asi karebkwandarur. Tonda, sun yuk atei nang asi dekdobkwandarur. Ani, sun Israel ninyi aryi bisam domba mi kum, kambing mi kum asi, er kwin moum uruboka tonkwa yuna mem!” ato eboka Musa biryi Israel ninyi asi ebkarebmou.

Yuma kibmangnyi kwaning Er Imtamnyi bisi dama deirin deyok

14:22-29

22Musa biryi Israel ninyi asi ato ebmou, “Sun wa iamunyi yuma kibmamunyi yina meica dukoka olong takubaryi deibkwandarur. Ura, olong takubaryi deibmamunyi dinyi aryi olong tentok doboka Er Iya Erebdobnyi biti dama deibkwandarur. 23Ba, Er Iya Erebdobnyi biryi wibdeianci mutuk dam asi Er urasin dam yuma kibmamunyi yina meici kukoka olong takubaryi kiboka olong tentok asi Er Imtamnyi biti deirbindoka yibkwandarur. Ba, a yuma kibmamunyi gandum ab, anggur ab, zaitun me yung ab, yuma deianci bisam lembu mi ab, domba mi ab, kambing mi ab ara Er Imtamnyi biti dama deibkwandarur. A kubmamunyi dinyi aryi Ersi ilil tenen kunubmandarur. 24Bok, Er Iya Erebdobnyi biryi wibdeianci mutuk dam kum ura, sun a yuma kibmamunyi yina ara ato kubkwandarur. 25Co bok dekoka Er Iya Erebdobnyi biryi wibdeianci mutuk dam bobinkwandarur. 26Ba, a dekmamunyi co bok ara sun tenebdobmamunyi to kuboka dekdobkwandarur. Ara, bisam sapi dekdobkwayeb tenebmunyi kum, kambing kum, anggur me kum, walina me kum, sun dekdobkwayeb tenebmunyi to kubdobkwandarur. Ba, Er Iya Erebdobnyi dam sun ab, sun mabwe nermabwe ab nirya kilkil asa yibkwandarur. 27Bok, Lewi yala nang ara sun yuk Israel ninyi tukwe dobdauto ton kum kubyi. Ati, sunci sun Lewi yala nang asi taklobmunyei, eda sunbabyi sun yuma kibmamunyi yina ton karebkwandarur.

28Kwalina uki winiryi kwalibmunyi ura, sun iamunyi wa yuma kibmamunyi dinyi ara buluboka sun kun atei bulubkwandarur. 29Ba, Lewi yala nang tukwe kum dobyi nang ab, yuk atei nang sun atei yandoka kurandinyi ab, kwaknamna mabwe ab, sun akenyi yabwe diamingnyi ba, ur kuraming nerabwe ab, asi sun tenebmangnyi to doboka yibingnyi ura, mundu bukwande. Sun Israel ninyi aryi ato kuramunyi ura, Er Iya Erebdobnyi biryi sun wa ibkwandum nirya ababyi kisal dakwansir.” Ato eboka Musa biryi Israel ninyi asi ebmou.

Currently Selected:

Ulangan Uram 14: MTG

Highlight

Copy

Compare