Ulangan Uram 12

Er Imtamnyi bisi molon dikum tentok uram deyok

12:1-28

1Musa biryi Israel ninyi asi ato ebmou. “Ukubdarur-ukuna mem en uram ab, yan memen uram ab ara sun abwe yabwe aryi moloraminyi Er Iya Erebdobnyi biryi karebsou. Ati, Erci ebdeibsou uram ara Kanaan mutuk dam bindoka kubkwandum nirya kunubkwandum ati karebsou. 2Sun sirya Kanaan mutuk wengbimunyi ura, Kanaan ninyi aryi molonung kwemdeina ai dalubkwandarur. Tonda, mutuk kon dub bisam oboka uk dongonung mutuk kon ab, co deyok ab, mutuk deyok dam ab sun kuboka kwemdeina molonung ai ab nirya asi dalubkabkwandarur. 3Ba, sunci sun kwemdeina ati dama deiboka uk danung keil dungna ab, sun kwemdeina teneibdeboka kiknibyi dinyi ab asi dalubkabkwandarur. Tonda, kwemdeina si Asyera bitoanun kiknibiryi ikyi abyokomna ab, sun yuk kwemdeina ninyi atoa kikniboka molonung dinyi ab nirya daluboka uk dongobkwandarur. Ato kubmunyi ba, sun Kanaan ninyi aryi molonung kwemdeina si luba kibingiryi tubto kum molobkwaming.

4Sun Israel ninyi aryi sun Nai Er Iya Erebdobnyi bisi molobkwamamunyi ura, Kanaan ninyi aryi yuk kwemdeina molonung to kuboka kikliboka molona mem! 5Sun Er Iya Erebdobnyi molonkwandum ai ara Er Iya Erebdobnyi nun molonubnyi biryi, ‘Ni mabwe Israel ninyi kankan aryi a dikum asi Nisi molobkwanindarur,’ ebkwansir. Ba, sun a dikum bindoka Er Imtamnyi bisi si weik eboka molonkwandum. 6Ba, a mutuk dam binkwamamunyi ura, Er Imtamnyi biti bisam domba nong nirya uk dabkwamamunyi dinyi ab, Er Imtamnyi biti yuk dinyi dama deiboka molon dinyi ab boboka binkwandarur. Tonda, Er Imtamnyi biti sun kouryina yuma kibmamunyi dinyi meici kukoka olong takubaryi kiboka olong tentok doboka dama deibkwamamunyi dinyi ab, Imtamnyi biti ur dem karen bisam ab, Imtamnyi biti minob uram talak eamunyi bisam ab, yuk dinyi ab boboka binkwandarur. Tonda, yuma deibmaci bisam sapi mi ab, domba ab bobinkwandarur. 7Ba, Er Imtamnyi biryi kisal daksici ura, a kisal dakmasici aryi, sun ai ninyi ab sun ner sal ab nirya Er Iya Erebdobnyi nun molonubnyi urasin dam yiboka Ersi kilkil kanya aryi si weik ebkwandum.

8Bisam dama deirin uki berekmaci ura, sunci yukto-yukto kuboka dama deirina mem. Ani, sun teleb tenebdobmamunyi to akwe kuboka dama deirina mem! 9Ara, uku talak sun Er Iya Erebdobnyi nun molonubnyi biryi Kanaan mutuk sunti karebkwansir ebdeibsou mutuk kum wengbindau. Ani, uku talak ara teleb asa kum kunmarum. 10Eda, Yordan me kouboka otam mutuk bimunyi ura, Er Iya Erebdobnyi nun molonanyi biryi lebdeibkwansir. Ba, Er Imtamnyi biryi sunti karebkwansin ebdeibsou mutuk bindoka kubkwandum. Ani, Er Imtamnyi biryi sun kalikoka diblilibsiriryi sun mar ordan nang kalikwande. Ba, sun diboka kubmunci mangkau asa kubkwandum. 11Ba, Er Iya Erebdobnyi nun molonubnyi biryi, ‘A mutuk ara Ni si iya kubkwande,’ eboka wibkwande. A ebmaci mutuk asi, sun Israel ninyi aryi, ni Musa biryi ebdeibmanto kuboka bobmunyi ura, kunubkwandarur. Ara, Er Imtamnyi biti bisam oboka nong nirya uk dan dinyi ab, Erti dama deiboka uk dan bisam ab, Er Imtamnyi biti sun kouryina yuma kibmamunyi dinyi meici kukoka olong takubaryi kiboka olong tentok doboka dama deibkwamamunyi dinyi ab bobinkwandarur. Tonda, sun kubde baramunyi dinyi ati teneibdeboka dama deibkwandarur. Tonda, ‘Er Imtamnyi biti ukuboka karebkwankin,’ eboka uram talak likeiamunyi dinyi boboka bimunyi ura, Er Iya Erebdobnyi biti karebkwandarur. 12Sun Lewi yala ninyi ara Kanaan mutuk dam tukwe ton kum dobyi ati tonkwa kubkwandarur. Ati, sun Lewi yala ninyi sun atei kunung ninyi ab, sun Israel yuk yala ninyi ab tonkwa Er Iya Erebdobnyi bisi si weik ebkwandarur. Ani, sun Israel ninyi mabwe nermabwe ab, sun wa irmilin nang ab, wa irmilin nerabwe ab ababyi nirya kilkil kanya aryi Er Iya Erebdobnyi bisi si weik ebkwandarur.

13Ba, sunci Er Iya Erebdobnyi biti dama deirin dinyi deibkwamamunyi ura, talyi dikum asi deirbana mem! 14Eda, Er Iya Erebdobnyi biryi, ‘A dikum asi, Niti bisam oboka dama deibkwanindarur,’ ebci mutuk asi deibkwandarur. Ani, akai aryi ni ebdeibmanto nirya kuboka kunubkwandarur.

15Bok, sun kubkwandum mutuk dam aryi, winiramunyi bisam ab, ninyi winina kum bisam rusa ab ara sun tenebdobmunyi tok oboka boun asa talyi yibkwandarur. Ani, Er Imtamnyi dam beterdongoramingnyi nang ab, sun betebdongobdanamingnyi asi sirya kilibdandamingnyi nang ab nirya talyi yibkwandarur. 16Bok, bisam ining ara yina mem! Eda, me kuna tukwe ai diklobkwandarur. 17Ba, Er Imtamnyi biti sun kouryina yuma kibmamunyi dinyi meici kukoka olong takubaryi kiboka olong tentok doboka dama deibkwamamunyi dinyi gandum ab, anggur du ab, zaitun co yung ab, yuma deianci bisam sapi ab, kambing ab ara sun kun atei umbura yina mem. Ani, ‘Er Iya Erebdobnyi biti ukubkwankin,’ eamunyi dinyi ab, Er Imtamnyi biti ur dem karen dinyi ab, yuk dama deirin dinyi ab ara sun kun ai umbura yina mem. 18Eda, sun ab, sun mabwe nermabwe ab, sun wa irmilisin ninyi ab, Lewi yala nang ab tonkwa Er Imtamnyi urasin dam yibkwandarur. Ara, Er Iya Erebdobnyi nun molonanyi biryi wibdeibwe mutuk dam asi bobindoka yibkwandarur. A wibdeibwe mutuk dam asi sunci kanya kilkil kuboka Ersi si weik ebkwandarur. 19Bok, sun Israel ninyi bindoka kubkwandum mutuk dam aryi, Lewi yala nang asi luba kiboka tanglona ara mem! Eda, sunci dirnilinkwandarur.

20Nun Nai, Er Iya Erebdobnyi biryi sun bindoka kubkwandum mutuk sirya wiboka yakna likeibnin yibinkwansir. Sirya kubdeibsici ura, sunci winiramunyi bisam ab, ninyi winin kum bisam rusa ab ara sun tenebdobmamunyi tok ur yibkwandarur. 21Tonda, Er Iya Erebdobnyi, nun molonubnyi biryi, ‘Niti a dikum asi dama deiboka molobkwanindarur,’ ebdeianci dikum bana weik kibsici ura, ‘Nun yibdobkwayeb,’ tenen winiramunyi bisam sapi kum, kambing domba bisam kum ara sun kuramunyi atei dam ur obkwandarur. Ba, a bisam ara sun kanyi kubsici tok ur yibkwandarur. A kubkwamunyi to ara niryi sirya sun dam, ‘Ur ato kubkwandarur,’ ebdeibsise. 22Ba, a bisam yibkwamamunyi ara Er Imtamnyi bisi beterdongoramingnyi nang babyi, sun betebdongobdanamingnyi nang asi sirya kilibdandamingnyi nang ab nirya talyi yibkwandarur. Ara, kijang bisam ab, rusa bisam ab yirandum to kuboka yibkwandarur. 23Bok, ining tuba kunmaci bisam ara yina mem! A ining ara er kanya a ining dam kubmaci deyok aryi yina mem! Ba, a bisam tub ab, kanyi ab tonkwa yina mem! 24Tonda, a obmamunyi bisam ining ara yina mem! Eda, me kuna tukwetam diklobkwandarur. 25Sunsi a ebman to kuboka kunuramunyi ura, Er Iya Erebdobnyi kanya teleb kubkwande. Ba, sun ab, sun deibdoba ab ara iya telebto akwe kubmurubde binkwandum.

26Bok, Er Iya Erebdobnyi biti, ‘Ukubkwan,’ eamunyi dinyi ab, Er Imtamnyi biti dama deiboka uk dan dinyi nirya ab ara boboka Nun Nai, Er Iya Erebdobnyi biryi wibdeianci mutuk dam bobinkwandarur. 27Ura, Er Imtamnyi biti dama deiboka nong nirya uk dabkwamamunyi bisam ara Er Iya Erebdobnyi nun molonubnyi biti dama deiboka uk dan keil dungna dub bobinkwandarur. Ba, a bisam ining ara a keil dungna dub dikwandarur. Bok, yuk dama deirin bisam ining ara Er Iya Erebdobnyi biti dama deirin keil lamna dub asi dikwandarur! Ba, a bisam tub dinatam ara keil dungna dub uk dabkwandarur. Ba, ton dinatam ara ur a dikum aryi yibkwandarur.

28Niryi sun Israel ninyi dam ebman uram diboka bikdarur. Ani, sunci sun Nai, Er Iya Erebdobnyi teleb tenerur to kunuramunyi ura, sun kubde binkwanduma ab, sun mabwe odei-odei binkwanduma nirya lebdandobmunci, iya telebto kuboka wau lobkwandum,” ebmou.

Musa biryi Israel ninyi ati, “Yuk kwemdeina molona mem!” eboka yan memebmou deyok

12:29–13:18

29Ura, Musa biryi sun Israel ninyi asi ato ebmou. “Sunci Kanaan ninyi mar bobmunyi tum aryi Er Iya Erebdobnyi nun molonubnyi biryi Kanaan ninyi nirya obkwande. Ba, sun a mutuk dam bindoka kubkwandum. 30Ba, sunci Kanaan mutuk ninyi nirya obkiribmunyi ura, diboka kalikdankwandarur. Ara, sunci Kanaan ninyi molonung kwemdeina asi molona mem! Sun Israel ninyi aryi Kanaan ninyi molonung kwemdeina moloramunyi ura, sun bidam nang eboka youbdankwandum. Kanaan ninyi asi ato eboka asirdena mem! ‘Sun Kanaan ninyi sun kwemdeina asi una kuboka molondarur do? Nunbabyi sun molondarur to kuboka sun kwemdeina asi molobkwayeb,’ ena mem! 31Sun Kanaan ninyi aryi kwemdeina molobkwamangiryi sunukoka mot semnung to ab, sun mabwe nermabwe asi oboka sun kwemdeina ati dama deiboka uk danung to ab ara Er Iya Erebdobnyi bira iya duknasito tenerur. Ati, sun Israel ninyi aryi Er Iya Erebdobnyi bisi ato kuna mem!

32A ebman to kuboka kunubkwandarur. Sun Israel ninyi aryi ni ebman uram tabangna mem! Ani, sunci ni ebman uram kilirkana me!” Ato eboka Musa biryi sun Israel ninyi asi yan memebdeibmou.

Currently Selected:

Ulangan Uram 12: MTG

Highlight

Copy

Compare