Daniel Uram 3

Babel mutuk sienyi Nebukadnezar biryi ninyi atoa emas aryi kiknibmou deyok

3:1-30

1A talak kuramnyi ani, o talak kubmou ura, uki tentok tum aryi sienyi Nebukadnezar biryi ninyi atoa emas aryi kiknibmou. A kiknibmou keica er cang im dubtam kiklina ara 27 meter baryi kiknibmou. Ba, a keica ilatam kiklina ara, kiklina meter winiryi kikliboka dobmou. A keica kiknibmou mutuk si ara, Dura dam Babel mutuk asi kiknibmou. 2Ura, sienyi Nebukadnezar biryi a mutuk sien nang kuramnyi tok nirya nabmou. Ara, gubernur babyi, bupati babyi, sien nang asi ukubkwandarur enanyi babyi, a mutuk co bok deirinanyi babyi, malyito kubman nang lilirdeirin nang ababyi, yan memen uram sengkweten nang babyi, a mutuk sien nang kiboka talebdanamnyi nang a nirya asi nabmou ba, bulubmai. Ura, a ninyi ato keica kikniamwe dinyi ati, weik li doboka sirya tikeibkwamai ati buluryanmai. 3-4Ukuboka sien nang nirya buluryanmai ura, a sienyi Nebukadnezar kalingnanyi biryi ato ebmou, “Ni kwit yabwe yuk-yuk mutuk sien nang ab, yuk-yuk yala nang ab, yuk-yuk uram en nang ab, nun nai sienyi ebkur uram asi kekendarur! 5Sunti namasingiryi, buu ena si seruling lilim ab, trompet lilim ab, sangkakala lilim ab, kecapi lilim ab, gambus lilim ab, yuk-yuk lilim erande keica nirya lilim kwebkwamang. Anda keica kwemingnyi talak ara sunci, nun sienyi Nebukadnezar a kiknibmar keica ati, kisok tukwetam dumubdeiboka si weik erebkwandarur. 6Bok, unanyi biryi ninyi atoa a kiknibmar dinyi asi luknubdongoboka kum molobmarinyi bira taleboka uk buk angmaca umbura dongobkwamar,” ebmou. 7Ura, kekenmai uca, buu ena yala yuk-yuk nirya lilim kwemai talak ara a buluryanmai ninyi nirya aryi a keil emas aryi ninyi atoa Nebukadnezar biryi kiknibdeibmou dinyi asi kisok luknubdongoboka molobmai.

8Ura, a talak aryok Babel nang sal mikbaryi tikokmai ura, Yahudi nang a bindoka kuramnyi nang asi durukoka kerebmai. 9Ara, sienyi Nebukadnezar bisi ato eboka si erebdeibmai, “Nai sienyi, kanda iya sienyi kiaminyi tok kubkwandim. 10-11Nai, kanci ato ebmasirim, ‘Buu ena yala amuma-amuma nirya lilim kwemingnyi ura, nun kwemdeina atoa emas aryi ninyi atoa kiknibmasin dinyi asi luknubdongoboka si weik ebkwandarur. Unanyi biryi a keica asi molona kum kubmarinyi bira uk buk ilinto angmaca umbura tomobdongobkwaman,’ ebmom dinyi kununa kum kubmang. 12Ara, Yahudi yala nang ninyi winiryi aryi kan ebmarim uram kum kunubmangci, ur tikmang. A nang sun si ara Sadrakh ab, Abednego ab, Mesakh ab ara nun molonmab to kum kubmang,” ebmai.

13Ura, a sienyi Nebukadnezar bira a uram kekebmouci, er yu wekmou. Ura, “A winiryi nang Sadrakh ab, Mesakh ab, Abednego ab asi ni dam boyandarur,” ebmou ba, sienyi dam bobinmai. 14Ura, a sienyi biryi ato eboka asibmou, “Sunda unati ni kwemdeina ninyi atoa kiknibsa asi si weik eboka molona kum kubmarum do? 15Uku talak ara lilim eboka kwemnaming keica yala yuk-yuk nirya kwemingnyi ba, lilim eci ura, nun kwemdeina ninyi atoa kiknibman keica asi kisok tukwe dumuboka molobkwamarum do? Uca, a talak akiryok kum molomunyi ura, sunda uk buk ilinto angmaca umbura dongobkwamasin. Una kwemdeina aryi sunsi lebdeibkwamasir do? Ati, sun lebdeibkwamasir kwemdeina ton da kum kurur,” ebmou. 16Uca, Sadrakh ab, Mesakh ab, Abednego ab aryi sienyi Nebukadnezar bisi ato ebmai, “Nai sienyi, kan a ebmarim uram ara nunci lebesekoka kum lebdandobkwamab. 17Eda, nun Nai Imtamnyi, nun molonubnyi biryi kan taruk dam ab, uk buk angmaca umbura dongobmasiminyi dikum ab ababyi doboka lebdeibkwamasir. 18Ucab, nai sienyi, kanci nunsi uk buk umbura dongobmasiminyi bok, nun Nai Imtamnyi biryi lebdeibsici ura, kanci ninyi atoa kikniboka molorum kwemdeina kum molobkwankib,” ebmai.

19Ato ebmai deyok aryi a sienyi Nebukadnezar bira er yu wekmouci, urasin ining bi lukdobmou. Ara, Sadrakh ab, Mesakh ab, Abednego ab ati yu bobmou. 20Ura, sienyi Nebukadnezar biryi mikib ilinto yin doun nang ati ato eboka arukmou, “Sadrakh ab, Mesakh ab, Abednego ab asi tabwe deboka uk buk ilinto angmaca dam dongobdarur!” eboka arukmou. 21Ba, a yin doun nang aryi Sadrakh ab, Mesakh ab, Abednego ab asi tabwe debmaici, sun dertam ongon aling babyi, nununga ongon aling babyi, alib ongon aling babyi, kisok kaluna babyi nirya ongobdeibmaici, a winiryi nang asi uk buk ilinto angmoua umbura tomobdongobmai. 22A sienyi Nebukadnezar bira er yu ilinto wekmou deyok aryi, “Uk mitikto uk ara leboka yibindobingnyei,” tenen utotoa nirya buluboka uk dongonmai ba, Sadrakh ab, Mesakh ab, Abednego ab tomoboka uk dongorwelenmai nang ababyi uk yibmou. 23Uca, sun a winiryi nang Sadrakh ab, Mesakh ab, Abednego ab ara sun nong tabwe koubmai tok takdongobmai ba, uk buk ilinto angmou ba, umbura tam bongoboka wekmai.

24Ba, a sienyi Nebukadnezar bira lukdandoka er yin doun nang asi ato eboka asibmou, “A winiryi nang, Sadrakh ab, Mesakh ab Abednego ab ara tabwe deboka uk sirya dabmarum do?” eboka asibmou. Uca, er yin doun nang aryi ato ebmai, “Yo, nai sienyi a nang ara sirya uk dabmab,” ebmai. 25Uca, sienyi Nebukadnezar biryi ato ebmou, “A nang winiryi ara tabwe deboka uk dongobmab bok, uk umbura asi ninyi dumbaryi yibanmang asi asing eibman. A nang ara uk yirdena kum uca, uk umbura dam asi ur mangkau asa ninyi dumbaryi yibaronmang asi asing eibman. Bok, dumunyi bira ninyi sirik urasin kuma, eda era yuka nun milibmar,” ebmou. 26Ura, sienyi Nebukadnezar biryi uk buk ilinto angmoua dikum bublan dam tingbinmou. Ura, teneboka ato ebmou, “Sadrakh ab, Mesakh ab, Abednego ab sunda Er Imtamnyi Iya Erebdobnyi mabwe se! Sun ur anaboka ni dam yandarur!” eboka nabmou. Ba, er ebmou to kunuboka Sadrakh ab, Mesakh ab, Abednego ab uk umbura aryi anaboka yanmai. 27Ura, a mutuk sien nang kimnamnyi nang erebdob sien nang aryi kuboka amwetam sien nang nirya buluryanmaici, sun nong bol ab, sun ongon aling ab, sun kisok otong ab, sun nong nirya dirdenmai uca, mitik tentok ababyi uk ton yalibde yina kum kubmou asi asing eibmai. Ani, sun nong asi uk yalim tong ton ena ababyi ton kum kekebmai.

28Ura, a mutuk sienyi Nebukadnezar biryi ato ebmou, “Diba, Mesakh ab, Abednego ab, Sadrakh ab sun Nai bira dib kurur. Ati, niryi sun Nai Imtamnyi bisi si weik eboka kibman! Er Imtamnyi biryi Er mabwe lebdeibkwamou ati, Er dam wa in nang malaikat nang bokwetebmou ba, lemdeiriryanmang. Sun a winiryi nang ara sun Nai Imtamnyi bikwe, ‘Dib kurur, yuk kwemdeina molona nun li,’ teneboka kanyi deirirnung. A deyok aryi ni a mutuk sienyi ebmonwe uram ara yan yanibmaningci, ni kikniboka molonun kwemdeina babyi, yuk-yuk kwemdeina nirya babyi ara, ‘Nun li,’ tenebmang. Ani, sun dam nang aryi, ‘Uk da dongobsunung,’ tenen karebdanmang. 29A deyok aryi ni uram tentok ebkun ara, ‘A mutuk nirya uram yuk-yuk enung ninyi babyi, yala yuk-yuk kunung ninyi babyi, nirya ara Sadrakh ab, Mesakh ab, Abednego ab sun molonung Imtamnyi bisi malyi kibmunyei. Unanyi biryi a nang sun Nai bisi malyi kiboka ina ngilikmarinyi bira ya sekoka, er ai uk daboka mitik-mitik kibkabokwan. Ara, a nang sun molonungnyi kurur to ara, yuk kwemdeina aryi ato ton kum ukurur ati ebman,’” ebmou.

30Ura, a mutuk sienyi biryi Mesakh ab, Abednego ab, Sadrakh ab asi erebdob wa karebmou. Ba, a nang ara Babel mutuk dam asi sien nang Gubernur kiboka mutuk yuk-yuk talebmai.

Currently Selected:

Daniel Uram 3: MTG

Highlight

Copy

Compare