Daniel Uram 2

Babel mutuk sienyi Nebukadnezar lengdera mabmou deyok

2:1-49

1Babel mutuk asi ninyi si Nebukadnezar biryi sienyi kiboka taleamwe ara kwalina bitinyi kibmou. A talak aryi sienyi Nebukadnezar lengdera mabmou. Ukuboka lengdera mabmou deyok aryi er kanya teneina bukam kubmouci, wi diboka marlungna kum uca, kamkam asa akwe bukmou. 2Ura, a sienyi biryi mirei yala yuk-yuk bingna nang ab, asing kerket ninyi ab nabmou ba, er dam buluryanmai. 3Yanmai ura, sienyi biryi a nang asi ato ebmou, “Ni lengdera mabmanci, kamkam akwe kubmanir ba, wi diboka mabman kum kubmanir. A mabman lengdera ara, ‘Una kubkwande dinyi ati, a lengdera mabman do?’ tenenman. Ati, ni lengdera liliboka lak ebdeibnumunyi ba, bikwan tenen ati, sunsi nabmasin,” ebmou. 4Ba, mirei yala yuk-yuk bingna nang a yanmai nang aryi ato ebmai. Ara, Aram mutuk nang uram deib aryi, “Nun sienyi kanda iya sienyi kiboka talesina teleb! Ati, ura kan lengdera mabmarim to nun keken dam asi nukdum. Ba, nun kekebibiryi, ‘Ato kubkwande ati, ato mabmarim,’ ebkwayeb,” ebmai. 5Uca, sienyi Nebukadnezar biryi a mirei bingna nang asi ato ebmou, “Ni uram minob bebna dinikeibkwansin. Ara, ni lengdera mabman dinyi asi, sunci ato kubkwande ati, a lengdera mabmarim kum ebnumunyi ura, niryi sunsi ya sekoka obsinyi ura, ya kaliboka mitik-mitik kibkwamasin. Ani, sun ai ababyi dakoka mitik-mitik kibkabokwansin. 6Bok, ni lengdera mabman dinyi asi diboka lilibdeibnumunyi ura, dengna telebto dinyi ab erebdob wa ab karebkwansin,” ebmou. 7Ura, a nang aryi sienyi bisi ato ebmai, “Ato ebmarim ura, ukuca lengdera mabmarim to nun dam nukdum. Ba, nunci, ‘Ato dinyi ati mabmarim,’ ebkwankib,” ebmai. 8-9Uca, akatei sienyi biryi ato ebmou, “Sunda ni lengdera lak ebman to kum kubmasir deyok aryi, teneboka, ‘Nun obsicei,’ tenen talak lingdeirinmang, tenebmasunwe tok kunubmarum. Ani, sunda ton ato tenebmarum tenebmasin, ‘Teneboka uram talebdeibokmabyi ba, “Obkwan,” ebmar dinyi takoka yukto ebkwandura,’ tenen ukubmarum bikmasin. Ati, ukura ni lengdera lilibdeibnumunyi ba, ‘A nang ara lengdera lilirdeirina kikiman nang,’ tenebkwansin,” ebmou. 10Ura, lengdera nukoka lilirdeirin nang aryi ato ebmai, “Ninyi tukwetam a kununga nirya ara weik sienyi kiboka taleanci ababyi ton ato kum enung. Ati, ton da bikanci aryi kan lengdera mabmarim asi, ‘Ato kubkwande ati a lengdera mabmarim,’ ebkwamakiranyi ton da kum kunmar. Ani, tukwetam a kunung sien nang ara, dan mutuk sienyi biryi, ‘Lengdera lilibdeibniting,’ tenen ato ton erur to ebmarim do? 11Ati, kwemdeina molorandum dinyi ninyi kankan lak kum eirinung dinyi aryi lak ebdeibkwankir,” ebmai. 12Ba, a sienyi bira er yu wekmouci, Babel mutuk nirya lengdera lilirdeirin nang ab yuk-yuk mirei bingna nang ab nirya obkiribkwamouci, uram dobdeibmou.

13A mutuk sienyi biryi, “Etekdob bingna nang babyi, yuk-yuk mirei bingna nang babyi nirya asi obkiribkwan,” eboka uram sekwetebmou. Ba, Babel mutuk nang nirya obde yibinmai. Ani, Daniel ab er kwit yabwe ab ababyi obkwamiryi, ingkiringnamnyi. 14Ani, uki tentok tum ara akatei sienyi bisi kalikoka wa ina sienyi si Ariokh biryi Babel atei etekdob ninyi asi orbinmou. 15Bok, Daniel biryi Ariokh bisi ato ebmou, “Akatei sienyi biryi, ‘Etekdob nang nirya obdarur,’ ebmar ara, unati ebmar do?” ebmou. Ba, Ariokh biryi, “Sienyi biryi er lengdera maburyi, ‘Lak ebdeibnindarur,’ eboka mirei bingna nang asi namderur. Uca, bindoka lak erdeirina kum kunung ati, ‘Etekdob nang nirya obdarur,’ ebmar,” eboka lak ebmou.

16Ura, Daniel ola akatei sienyi bisi binmouci, ato ebmou, “Nai, uki ton karebmasiminyi ba, teneinmabyi ani, kan lengdera mabumwe dinyi lak ebkwayeb,” ebmou. 17Ura, sirya moloboka yanmouci, Daniel biryi er kwit yabwe Hananya ab, Misael ab, Azarya ab asi yandoka ato ebmou. “Sienyi bisi, ‘Uki ton karebmasiminyi ba, kan lengdera lilinmabyi ani, lak ebkwayeb,’ eboka yanan,” ebmou. 18Ura, Daniel er kwit yabwe asi ato ebmou ara, “Er Imtamnyi, imtam yin doun nang sienyi bisi molobibyi ba, boukwe kiboka lengdera lak kibdeibsici ura, yuk Babel bingna nang, mirei bingna nang ababyi nunbabyi kum obkwansing,” tenebmouci, ato ebmou.

19Ura, lukunda aryi Imtamnyi biryi Daniel bisi kunumna deici aryi sienyi asing eiamwe dinyi asi lak kibdeibmou. Ba, Daniel biryi Er Imtamnyi bisi si weik ebmou. 20Ura, ato ebmou, “Nai Imtamnyi, Kanda mikib weiknyi kurum. Imtamnyi, Kanda etekdobnyi kurum. Ati, Kansi akwe si ereboka si ebde bankwankin. 21Nai Kan Imtamnyi biryi talak yuk kiknirdeirirum. Ani, Imtamnyi, Kanci utotoa ukubkwanci li ababyi yuk kiknirdeirum. Kan Imtamnyi biryi sien nang tikeibmaminyi ani, anyi dobkweteboka yuknyi unurandimnyi kurum. Imtamnyi, Kanci etekdob nang asi etekdob dinyi ab, bingna dinyi ab karerum. 22Nai, Kan Imtamnyi biryi buntam inianci dinyi asi lak kimdeirirur. Kan Imtamnyi bira berengna dam kurur deyok aryi kunuk dakanci aryi asing eibman kum dinyi ababyi berengdeirirandanyi kurur. 23Nai Imtamnyi, ni nai yabwe aryi si weik eboka molorankinyi bisi nibabyi Kan kikwe molokunun. Ara, Kanci nisi etekdob bingna dinyi ab, mikib dinyi ab karenurum. Ani, arub ababyi nunci akatei sienyi lengdera maburyi, ‘Una kubkwanir ati ato lengdera mabse do?’ tenen er mambul kanya boboka ingkiringdorur dinyi lak kibdeibmasirim. Ba, nunci erti lak ebkwamab,” eboka molobmou.

24Sirya molobmou ura, Daniel anaboka akatei sienyi biryi, “Babel atei kunung ninyi, etekdob bingna bingnung ninyi nirya orbirum,” eboka arukmounyi si Ariokh bisi binmou. Ura, Daniel biryi anyi Ariokh bisi ato ebmou, “Babel atei etekdob bingna bingnung nang ara ona taklobdum. Eda, nisi inibdobniminyi ura, sienyi dam binkwanim. Ba, ni sienyi dam bindoka a lengdera ara ato kubkwande ati mabumwe ebkwan!” ebmou. 25Ura, Ariokh biryi Daniel bisi ola iniboka bobmouci, a mutuk sienyi dam bobinmou. Ura, bindoka ato ebmou, “Nai, niryi Yehuda yala nang asi a mutuk boboka tangloryai nang asi sal tentok boboka yanman. Ba, anyi biryi, ‘Kan lengdera mabumwe dinyi asi ato kubkwande ati a lengdera mabumwe,’ eboka lak kibdeibkwamakir,” ebmou. 26Ba, sienyi biryi Daniel er uruma si doamnyi ara, “Beltsazar,” eboka si doaminyi bisi ato eboka asibmou, “Kanda ni lengdera mabse dinyi asi, ‘Ato kubkwande ati, mabumwe,’ eboka, liliboka lak ebdeibnutum do? Kan ukubmanto kum do?” eboka asibmou. 27Uca, Daniel biryi sienyi bisi ato ebmou, “Nai sienyi, kanci etekdob bingna bingnung nang ab, asing kerket nang ab, yuk-yuk mirei bingnung nang ab aryi kansi a lengdera lak kum ebkwamaking. 28Eda, imtam ai dam asi Er Imtamnyi tentok kurur ara utotoa nirya lak kimdeirirurnyi kurur. A deyok aryi nai sienyi Nebukadnezar kansi aminda ukubkwande to dinyi ati, ‘Asing eibdur,’ tenen Imtamnyi biryi lak kibdeibkou. Ara, kan man sokon mabmoumwe uca, lengdera deici asing eibumwe dinyi ara ato kubkwande dinyi ati asing eibumwe. 29Nai sienyi, kan mabmoumwe uca, lengdera asing eibumwe dinyi ara Imtamnyi biryi inibdeibwe dinyi asi aminda kunubkwande to ati minob kan urasin dam lak amubkou. 30Ani, Imtamnyi biryi ni deici asi kan a lengdera mabumwe dinyi akwe ati duknuboka nisi karebnou. A karebnou dinyi ara ni etekdob bingna asi yuk nang a kunung nang bisibkaboka erebdobto bikwan ati kum karebnou. Eda, kan a lengdera mabumwe dinyi asi, ‘Anyi deici aryi lak kibdeibnyi ba, sienyi dam bindoka lak ebkwande,’ tenen ati ni deici deibwe. Ba, kanci a lengdera ara, ‘Ato kubkwande ati a lengdera mabse,’ tenen minob bikwandur,” tenen ni deici karebnou.

31“Yo nai, kan lengdera mabumwe ara, ninyi atoa kikniraming dinyi atoanun weika koukwe asi tikamwe. Ninyi atoanun kikniboka moloraming keica tikamwe ara loboka im si toamwe. Ba, a keica bol ara mil dangding eramwe. Tonda, a kikniamwe keica ara er ilil aryi ninyi dibdenman kumto kuramwe. Ato kuboka loamwe asi kan urasin dam tikmou ba, asing eibmoumwe. 32Ninyi atoanun kikniraming keica er kisok ara keil si emas aryi kikniraming dinyi ato kuamwe. Ba, a keica er taram ab, taruk ab ara keil perak aryi kiknininto kuamwe. Ba, er mundu ara mirikna dam ab ara tembaga aryi kikniraming to kuamwe. 33Ba, a keica er yan ab keil ab ara kat keil besi aryi kikniraming to kuamwe bok, a keica yan ara ton tam kalimna ngat tukwe aryi kikniraming to kuamwe. Ba, ton tam kalimna ara kat keil besi aryi kikniraming dinyi ato kuamwe asi eibumwe. 34A keica bol ato kubdanamwe asi, kan asing dimwe talak uca, a ninyi atoa kikniraming keica tikamwa asi keil atoanun aryi er damuka daksakoka a keica yan asi kum tikdonokmou. Ba, a keica dalukoka mabmou. 35A keica dalukoka marbaramwe uca, telteleboka mitik-mitik kibmou. Ba, a keica ara gandum sungsunga bulurdeiriraming ato kubmou. Ura, kumwe ubling eramwe uca, cabkabokmou ba, olong dem kubmou. Ba, a keica dalukwetebmou keil ara bungbung eboka weik danmouci, mutuk kon atoa bukmou ura, a keil aryi im dangna tukwe dangna nirya liknibdobmou asi asing eibmoumwe.

36Nai, kan lengdera ara ato kuboka mabmarim. Ukura niryi kan lengdera a mabmarim to asi liliboka ato kubkwande to ati mabmarim eboka lak ebkwan. 37Teleb, nai sienyi, kanci a mutuk sien nang kimnung nang bisibkaboka erebdob sienyi kiboka a mutuk nirya talebumwe. Ara, Er Imtamnyi imtam tukwi tam kiknibunyi biryi kansi, ‘Anyi biryi sienyi kiboka a mutuk talebkwande ara kikiman,’ tenen mikib dinyi ab, sienyi kimna wa ab, si ererdeirin dinyi ab karebkou ba, sienyi kibumwe. 38Ani, kansi a mutuk dam ninyi ilinto kunung mutuk ab, maka yala ab, yuk-yuk kamyoa nirya ab asi kan sienyi kiboka talebkwamoumwe ati karebkou ba, kanci talebumwe. A deyok aryi kan lengdera ninyi atoa kikniraminga kisok asi keil emas kuamwe eibmomwe ara kan mining damnyi biti lengdera mabdamwe. 39Ani, tonda kan sienyi kiboka taleaminyi bok asi, ka yuknyi sienyi ton tikwande. A deyok aryi dengna weik keil si perak aryi kikniamungwe asi asing eibmomwe. Ani, tembaga aryi kikniamungwe asi asing eibmomwe ara ton yuk sienyi kibkwande to ati asing eibmomwe. Anyi bira sienyi bikwe winirinyi tikokabdiryi, a mutuk nirya talebkwande. 40Ani, sienyi bikwe dumbaryi dinyi tikwandanyi bira kat ara besi kat atonyi nun tikwande. A deyok aryi besi bol kiamwe asi asing eibmomwe. A eibmomwe to kuboka besi kat atonyi sienyi tikokabdiryi, minob tikamingnyi sien nang a nirya asi yan kusukoka ersi erebdobkwande. 41Ba, ninyi atoa kikniraming keica, er yan ab yan du ab ara kat dinyi besi turukdongo bok, ngat tukwe turukdongoboka kiamwe asi asing eibmomwe ara, aminda sien nang kiboka sun mutuk yuk-yuk sienyi kibde binkwaming to ati, a dinyi asing eibmomwe. 42Ba, a keica er yan ara bol yala bitinyi kuamwe, tonda besi aryi kikiamungwe bol turukamwe. Ba, ton bol ara ngat tukwe aryi kikniamungwe asi turukamwe asi asing eibmomwe. Ara, aminda sienyi kiboka bukde binkwaming ara tonda mitang sien nang kibkwaming. Ba, tonda mikib ilinto sien nang kibkwaming to ati mabmarim. 43Ani, tonda besi ab, ngat tukwe ab turukdanamwe dinyi ara mutuk yuk-yuk sienyi kiboka taleabdanamingnyi mutuk nang ara ton mutuk nang nerabwe ab, dinatam mutuk nerabwe ab tabtabukoka dobdankwaming ati, ato kuboka lengdera mabumwe.

44Ato kuboka sien nang kiboka talebde baramingnyi bok, Er Imtamnyi imtam tukwe tam kiknibunyi biryi sienyi kiboka tikeibkwandanyi bira iya sienyi kianci tok, iya kum danana kum kubkwande. Ani, a sienyi kianci dinyi asi doboka yuk mutuk nang ati karena kum kubkwande. Ba, a sienyi kiboka talebdinyi biryi yuk sien nang asi yan yaniboka tiklim darabdeibkwande. Eda, er a sienyi kianci tok asi iya kubkwande. 45Ato kubkwande to ati, nai sienyi, kan lengdera deici aryi er damuka keil mutuk kon aryi daksakoka ninyi atoa kat keica besi ab, emas ab, tembaga ab, ngat tukwe ab aryi kataboka tikamwe asi telebdonokmouci, yuk-yuk kibmou asi asing eibmomwe. Ara, aminda mikib ilinto sienyi talebdiryi yuk-yuk sien nang asi yan kusukoka tiklim darabkwande to ati a lengdera mabumwe. A lengdera mabumwe ara, Er Imtamnyi Iya Weiknyi biryi aminda ukubkwande to ati, nai sienyi kansi, ‘Asing eibdur,’ tenen amubkou. A lengdera mabumwe dinyi ara dib aminda kunubkwande to mabumwe. Ati, a lengdera ara ukuboka kunubkwande eboka lak ebman to asi dib tenebkwandum,” ebmou.

46Ura, sienyi Nebukadnezar urasin tukwe dumubdongoboka Daniel bisi kibdobmou. Ura, ato ebmou, “Daniel kanti lengdera nukeibmanirima kira bisam oboka dekwamakin,” ebmou. 47Ura, Nebukadnezar biryi Daniel bisi ton ato ebmou, “Nai e, Daniel kan Nai Imtamnyi bira diba! Kan Nai Imtamnyi bira yuk-yuk kwemdeina bisibkaboka Imtamnyi bira dibnyi kurur. Erda tukwetam sien nang bisibkaboka Iya Erebdobnyi kurur. Erci inirdeirirur dinyi asi botoboka lak kimdeirirurnyi kurur. Ati, kanci ni lengdera bikman kum bok, lak ebmarim ati, niryi dib tenebman,” ebmou. 48Ura, a sienyi Nebukadnezar biryi Daniel bisi dengna teleb-teleb dinyi karebmouci, erebdob wa ababyi karebmou. A wa karebmou ba, Daniel bira Babel mutuk sienyi Gubernur kibdeibmou. Ba, Daniel bira Babel mutuk nang etekdob bingna bingnamnyi nang sun sienyi kibdeibmou. 49Uca, Daniel biryi a sienyi Nebukadnezar bisi molobmouci, “Nai, ni kwit yabwe, Sadrakh ab, Mesakh ab, Abednego ab asi Babel mutuk talebkwaming,” eboka molobmou ba, a nang asi karebmou. Ba, Daniel bira sienyi Nebukadnezar er sienyi kiamwe ai dam a kuramwe.

Currently Selected:

Daniel Uram 2: MTG

Highlight

Copy

Compare